10 Milagres de Jesus na Bíblia: Lista com versículos e explicação

Iesus dɨpam gɨrazɨma a wainɨn dɨpamɨn oto

1 Dughiar pumuning gɨvazɨma, gumazir mam Kanan nguibamɨn ikia amizimɨn ikiasa, ezɨ amuimɨn ikiamin isam oto. Kanan nguibam a Galilin Distrighɨn aven iti. Dughiar kam Iesusɨn amebam uaghan iti.* 2 Ezɨ me uaghan Iesus uan suren gumaziba ko men diazɨma me uaghan amuimɨn ikiamin isar kamɨn ghuegha iti.

3 Ezɨ wainɨn dɨpam gɨvazɨma, Iesusɨn amebam kamaghɨn a mɨgei, "Me ua wainɨn dɨpaba puvatɨ."

4 ✝Ezɨ Iesus kamaghɨn a mɨgei, "Amebam, kar nɨn bizim, nan bizim puvatɨ. Nan dughiam a tɨghar izam."

5 Ezɨ an amebam ingangarir gumazibav gei, "A bizitam damusɨ ia mɨkɨmtɨ, ia a damu."

6 ✝Ezɨ dɨpenir kamɨn 6plan dagɨar mɨner ekiaba iti, da ekevegha egha vaghvagha 100 litan dɨpaba dar iti. Judaba uan rurir arazibar gɨn ghua dɨpar kabagh rue.

7 Ezɨ Iesus kamaghɨn ingangarir gumazibav gei, "Ia mɨner kabar dɨpaba tuigh." Ezɨ me da tuizɨma da bar izevegha akabagh imara.

8 Ezɨ a kamaghɨn me mɨgei, "Ia datɨrɨghɨn mɨner dozitam inigh dɨpatam tuighɨva a inigh gumazir isamɨn faragha zuim bagh mangɨ." Ezɨ ingangarir gumaziba maba inigha zui. 9 Ezɨ dɨpar kam wainɨn dɨpamɨn otogha gɨfa, ezɨ gumazir isamɨn faragha zuim anepava a barasi, egha a fozir puvatɨ, me managh wainɨn dɨpar kam ini. Ezɨ ingangarir gumazir dɨpam tuiziba, merara fo.

Kamaghɨn amizɨ, isamɨn faragha zuir gumazim a gumazir amuimɨn ikiasava amim, an diagha, 10 kamaghɨn a mɨgei, "Gumazamiziba bar wainɨn dɨpar aghuim faragha me ganɨdi. Ezɨ gumazamiziba wainɨn avɨrim amegha gɨvazɨma, me gɨn wainɨn dɨpar mong afangizim anɨdi. Ezɨ no, nɨ wainɨn dɨpar aghuimɨn anogoregha, egha datɨrɨghɨra nɨ a inigha izi!"

11 ✝Kar mirakelɨn arazir Iesus faragham amizim. A Galilin Distrighɨn aven itir nguibam Kanan, mirakelɨn arazir kam gami. Ezɨ mirakelɨn kamɨn, Iesus bar uan gavgavir ekiam aka. Ezɨ an suren gumaziba an ganigha egha nɨghnɨzir gavgavim an iti.

Gumazir damazir okavɨrɨzimɨn eghaghanim

1 Egha Iesus ghuavigha gumazir damazir okavɨzir mamɨn api. An damazimning okavizɨ amebam a bate. 2 ✝Ezɨ Iesusɨn suren gumaziba an azara, "Tisa, tina arazir kuram gami, gumazir kam o an amebam ko afeziam, ezɨ an damazimning okavizɨ amebam a bate?"

3 ✝Ezɨ Iesus kamaghɨn men akam ikaragha ghaze, "Gumazir kam arazir kuram gamizir puvatɨ, ezɨ an amebam ko afeziam uaghan arazir kuratam gamizir puvatɨ. God kamaghsua, bizir gumazir kamɨn otozim, gumazamiziba an ganigh fogham, Godɨn ingangarim azenim girɨ. Kamaghsua an damaziba okavizɨ amebam a bate. 4 ✝Ezɨ datɨrɨghɨn aruem ikiavɨra itima, e gumazir na amadazɨ kɨ izezim an ingangarim damuam. Amɨnim pɨrasa roghɨra izi, ezɨ gumazamiziba ingangaritam damighan kogham. 5 ✝Dughiar kɨ nguazir kamɨn itim, kɨ gumazir angazangarim nguazimɨn itir gumazamizibagh anɨdim."

6 ✝Iesus kamaghɨn mɨkemegha nguazim giparigha nguazim sara uan ipazariba veregha, gumazimɨn damazimning gaghui. 7 ✝Egha Iesus kamaghɨn a mɨgei, "Nɨ mangɨva Siloamɨn mozir dɨpam guruegh." (Ziar kam Siloam, an mɨngarim kamaghɨn ghu, "Amada.") Ezɨ gumazir damazir okavɨrɨzim ghua rue. Egha uamategha iza, biziba bar deravɨra dar gari.

8 Gumazir kam faragha dagɨaba uabɨ danɨngasa gumazamizibagh inge, ezɨ gumazamizir avɨriba an gani. Datɨrɨghɨn men marazi ko an boroghɨn itir darasi, me ghaze, "Gumazir kamra, a faragha apiav ikia dagɨaba bagha gumazamizibagh inge?"

9 Ezɨ marazi ghaze, "Are, gumazir kamra."

Ezɨ marazi ghaze, "Puvatɨ. A gumazir kamɨn mɨrara gara, a gumazir igharazim."

Ezɨ gumazir kam uabɨ ghaze, "Kar kɨrara."

10 Ezɨ me an azara, "Manmaghɨn amizɨma nɨn damazimning dera?"

11 Ezɨ a kamaghɨn men akam ikaragha ghaze, "Gumazir kam an ziam Iesus, a nguazim giparigha uan ipazarim sara veregha nan damazimning gatɨ. Egha na mɨgei, ‘Nɨ Siloamɨn mozir dɨpamɨn mangɨgh egh ruegh.’ Ezɨ kɨ ghua ruezɨma nan damazimning dera, ezɨ kɨ deravɨra bizibar gari."

12 Ezɨ me an azara, "Gumazir kam managh iti?" Ezɨ a kamaghɨn mɨgei, "Kɨ fozir puvatɨ."

Iesus dagheba isa 5,000 gumazibagh anɨngi

13 Ezɨ Iesus kamaghɨn oraki, me Jonɨn fɨrim atuzɨma an areme. Ezɨ a nguibar kam ategha kurim inigha uan suren gumaziba ko, gumazamiziba puvatɨzir danganir mamɨn ghu. Ezɨ gumazamizir avɨrim orazima, a danganir kamɨn ghu. Ezɨ me nguibar ekiam ategha, a buria uan suebar zui. 14 ✝Ezɨ Iesus ghua dɨpar dadarimɨn otogha garima, gumazamizir bar avɨriba iti. Ezɨ a men apangkuva men gumazamizibar arɨmariaba akɨra da gefi.

15 Aruem gevima, Iesusɨn suren gumaziba iza kamaghɨn a mɨgei, "Kar gumazamiziba puvatɨzir danganim, ezɨ amɨnim pɨrasava ami. Kamaghɨn amizɨ, nɨ gumazamiziba amangɨtɨ, me mangɨ nguibabar uari bagh daghebagh ivez."

16 Ezɨ Iesus uan suren gumaziba kamaghɨn me mɨgei, "Me tizim bagh mangam? Ia uari daghetaba me danɨng."

17 Ezɨ me ghaze, "E bar bretɨn rubuzir 5pla ko osirir pumuningra iti."*

18 Ezɨ a ghaze, "Ia bretba ko osirimning inigh izɨ."

19 ✝Egha Iesus gumazamizibav geima, me grazim gapia. Ezɨ a 5plan bretba ko osirir pumuning inigha kogha overiamɨn gara Afeziam mɨnabi. Egha bretba bɨgha uan suren gumazibagh anɨngi. Ezɨ an suren gumaziba da isava gumazamizibagh anɨdi. 20 ✝Ezɨ gumazamizir kaba bar amegha, naviba bar izefe. Ezɨ dagher naba itima, me da akuvagha 12plan akɨrabagh aghui. 21 Gumazir amezibar dɨbobonim 5,000ɨn tu. Me amiziba ko boriba dɨponezir puvatɨ.

Iesus amɨnir ekiam ko dɨpavsɨzim batoghezɨ aning pura nɨmɨra irɨghav iti

35 Aruer kamɨn amɨnim pɨrasava amima Iesus kamaghɨn uan suren gumazibav gɨa ghaze, "E dɨpar kam abigh an vongɨn mangam." 36 A kamaghɨn me mɨgeima gumazamiziba dadarimɨn ikiavɨra iti, ezɨ me Iesus aperaghav itir botɨn ghuavanabogha pul gamua vongɨn zui. Botɨn igharazir maba uaghan me ko vongɨn zui. 37 Iesus uan suren gumaziba ko zuima, Maia! Amɨnir ekiam dɨkafi. Ezɨ dɨpavsɨziba izava bot gafirazɨ dɨpam botɨn aven ghuaghira, bot gizɨvazɨ, an atam dɨpamɨn aven magɨrasava ami.

38 Bot magɨrasava amima, Iesus botɨn kamɨn gɨrakɨrangɨn dapanir aghoghonir mam uan dapanimɨn aghorogha akui. Ezɨ an suren gumaziba a gaghuragha kamaghɨn a mɨgei, "Tisa, e gɨfa! Nɨ e bagha nɨghnɨsi, o puvatɨ?"

39 Ezɨ Iesus dɨkavigha akar gavgavim amɨnim ganɨga, egha kamaghɨn ongarim mɨgei, "Gua amɨragh, nɨmɨra ikɨ!" A mɨgeima, amɨnim amɨrazɨ, dɨpam pura nɨmɨra irɨghav iti.

40 Ezɨ Iesus kamaghɨn uan suren gumazibav gei, "Ia tizim bagha puv atiati? Ia nɨghnɨzir gavgavim oteveghavɨra iti?"

41 Ezɨ me bar atiatigha kamaghɨn uarira uariv gei, "Kar gumazir manmaghɨn amizim? A mɨgeima, amɨnim ko dɨpavsɨzim an akam barasi!"

25 Me zuima men tongɨn amizir 12plan azenibar ghuzim batir arɨmariam itir mam uaghan me ko zui. Amizir kam ghuzim batir arɨmariam an itima 12plan azeniba gɨfa. 26 A fomɨra arɨmariam agɨvasa doktaba bagha zuima, me an arɨmariam a gɨvazir puvatɨ. Ezɨ a mɨzazir kuram isi. A uan arɨmariam agɨvasa pura uan dagɨabar me givezima an dagɨaba bar gɨfa. Bizir kaba an arɨmariamɨn akurazir puvatɨ. An ekɨva ghuavɨra iti.

27,28 ✝A Iesus amir bizibar akam baregha, kamaghɨn nɨghnɨsi, "Kɨ puram an azenan itir korotiamra suiragh nan arɨmariam gɨvagham." A kamaghɨn nɨghnigha egha damuasa. Amizir kam gumazamizir avɨribar gɨn izava me munamaga iza Iesusɨn korotiar avɨzimɨn suira. 29 Amizim Iesusɨn korotiamɨn suizir dughiamra, an ghuzir arɨmariam pura dutugha ghu. A uabɨ baregha fo, an mɨkarzim ua dera.

30 ✝A kamaghɨn amimra, Iesus zuamɨra uabɨ baregha God gumazamizibar arɨmariaba gɨvaghasa a ganɨngizir gavgavim, an mɨkarzim ataghizɨ a fo, nan gavgavim ingari. Egha a ragha gumazamizibar garava men azara, "Tina nan korotiamɨn suira?"

31 Ezɨ an suren gumaziba a ikaragha kamaghɨn a mɨgei, "Nɨ garima, gumazamizir avɨriba nɨ akufa. Ezɨ nɨ tizim bagha kamaghɨn azai, ‘Tina nan korotiamɨn suira?’ "

32 Me kamaghɨn Iesus mɨgɨavɨra itima, Iesus an korotiamɨn suirazir gumazim o amizim gɨfoghasa raghɨrɨgha garagharui. 33 A ruiavɨra itima, amizir kam a batozir bizim gɨfogha iza Iesusɨn guamɨn degiaghirɨgha, atiatia nɨgha guizbangɨra a batozir bizimɨn gun mɨgei. 34 ✝Ezɨ Iesus kamaghɨn a mɨgei, "Nan guivim, nɨ navim bar amɨragh ikɨ. Nɨ nɨghnɨzir gavgavim nan iti. Kamaghɨn, nɨn nɨghnɨzir gavgavim nɨ gamizɨ nɨ dera. Nɨ navir amɨrizim sara mangɨ, eghtɨ nɨn arɨmariar kam ua nɨ damuan kogham."

Iesus Gerasan gumazir mamɨn duar kuraba batoghezɨma da anetaki

1 Ezɨ Iesus uan suren gumaziba ko dɨpam abigha vongɨn Gerasan danganimɨn oto. 2 ✝Me otivigha, Iesus bot ategha dadarimɨn anadima gumazir duar kuram apazazir mam, a matmatiamɨn tongɨn ikegha Iesus bativasa izi. 3,4 A matmatiamɨn ikiava a gakui. Me dughiar avɨriba senbar an agharimning ikiava, ankavba an suemning gazui. Ezɨ a zurara senɨn kabar suigha da aghora egha an suemning ikezir ankavbav sogha da aghoragharɨsi. Kamaghɨn amizɨ, gumazitam gumazir kamɨn suiragh a ikɨva avegham. Me uaghan senbar a ikeghtɨ da an suiraghan kogham. Egh gumazitam gavgavigh a ikeghan kogham. 5 A dɨmagariba ko aruebar matmatiam ko mɨghsɨabar purama arua pamtem arava dagɨabar uabɨ uan mɨkarzim aghori.

6 A saghon ikia Iesusɨn ganigha ivegha a bagha izava an guamɨn uan tevimning apɨri. 7,8 ✝Ezɨ Iesus kamaghɨn duar kuram mɨgei, "Nɨ duar kuram, nɨ gumazir kam ategh azenan izɨ."

Iesus kamaghɨn a mɨgeima, gumazir kam pamtem ara kamaghɨn mɨgei, "Nɨ manmaghɨn na damuasa, Iesus, Godɨn Bar Pɨn Itimɨn Otarim. Kɨ Godɨn damazimɨn pamtem nɨn azangsɨsi, nɨ arazir kuratam na damuam markɨ!"

9 ✝A kamaghɨn mɨgeima Iesus kamaghɨn a mɨgei, "Nɨ uan ziam dɨborogh."

Ezɨ duar kurar kam a ikaragha kamaghɨn a mɨgei, "E bar avɨraseme, kamaghɨn nan ziam Avɨriba."

10 A Iesus danganir igharazitamɨn me amangan aghuagha Iesus vɨvɨgha a gakaghori.

11 Dughiar kam, men boroghɨra itir mɨghsɨar mɨriamɨn dar avɨriba ikiava api. 12 Ezɨ duar kurar kaba kamaghɨn Iesus mɨgɨava a gakaghori, "Nɨ e mɨkemegh e amadaghtɨ e mangɨ dar okoruar munam gapazaka." 13 Ezɨ a men amamangatɨzɨ duar kurar kaba gumazir kam ategha azenan izegha ghua dabagh apasa. Dar avɨrir kaba, dar dɨbobonim 2,000ɨn boroghɨn ghu. Ezɨ daba puv ivemara ghua davarir kuram giraghuegha dɨpamɨn aven ghuegha dɨpam apava ariaghire.

14 Ezɨ dabar garir gumaziba daba batoghezir bizimɨn ganigha ghua nguibar ekiamɨn ghua danganir kamɨn itir nguibar dozibar ghua bizir otozir kamɨn gun mɨgei. Ezɨ gumazamiziba bizir kamɨn ganasa dɨkavigha izi. 15 ✝Me iza Iesusɨn boroghɨn duar kuraba apazazir gumazimɨn garima, an nɨghnɨzim ua derazɨ, a korotiaba aghuigha aperaghav iti. Me an ganigha atiati. 16 Ezɨ otozir bizir kamɨn ganizir gumazamiziba, me duar kuraba apazazir gumazim batozir bizir kabar gumazir igharazibav gei. Me dar gun mɨgɨa uaghan daba batozir bizimɨn gun mɨgei. 17 Egha gumazamizir kaba bizir kam baregha iza an gara a gakaghora ghaze, a men nguazim ategh danganir igharazitamɨn mangɨ.

18 Ezɨ Iesus danganir kam ategh mangasa botɨn bɨrima duar kuraba apazazir gumazim Iesus ko mangasa pamtem a gaghori. 19 Ezɨ Iesus an anogoregha kamaghɨn a mɨgei, "Nɨ uamategh uan adarazi bagh dɨpenimɨn mangɨva Ekiam nɨn akuragha nɨ gamizir bizibar gun me mɨkɨmɨva, a uaghan bar nɨn apangkuvizir bizimɨn gun me mɨkɨm." 20 ✝Ezɨ gumazir kam a baregha ghua Iesus an akurazir bizimɨn gun Dekapolisɨn Distrighɨn itir nguibabar ghua bar me mɨgei. Gumazamizir kaba a baregha dɨgavir kuram gami.

Iesus aremezir guivir mam ko, arɨmariar amizir mam gamizɨ aning ua dera

21 Ezɨ Iesus bot inigha uamategha dɨpamɨn vongɨn ize. A izegha dɨpar dadarimɨn itima, gumazamizir avɨriba izava anekufa. 22,23 ✝Ezɨ God ko mɨgeir dɨpenimɨn bizibar garir gumazir mam, an ziam Jairus, a iza Iesusɨn gara an guamɨn uabɨ ekunigha an dagarimningɨn boroghɨn irɨgha kamaghɨn puvɨram a gaghori, "Nan guivim aremeghasa an dɨghorimra isi. Nɨ izɨva uan dafarim a datɨghtɨ an arɨmariam gɨvagh ua ikiam." 24 Ezɨ Iesus a ko zui.

A zuima gumazamizir avɨrim bar anekuvagha an gɨn zui. 25 Me zuima men tongɨn amizir 12plan azenibar ghuzim batir arɨmariam itir mam uaghan me ko zui. Amizir kam ghuzim batir arɨmariam an itima 12plan azeniba gɨfa. 26 A fomɨra arɨmariam agɨvasa doktaba bagha zuima, me an arɨmariam a gɨvazir puvatɨ. Ezɨ a mɨzazir kuram isi. A uan arɨmariam agɨvasa pura uan dagɨabar me givezima an dagɨaba bar gɨfa. Bizir kaba an arɨmariamɨn akurazir puvatɨ. An ekɨva ghuavɨra iti.

27,28 ✝A Iesus amir bizibar akam baregha, kamaghɨn nɨghnɨsi, "Kɨ puram an azenan itir korotiamra suiragh nan arɨmariam gɨvagham." A kamaghɨn nɨghnigha egha damuasa. Amizir kam gumazamizir avɨribar gɨn izava me munamaga iza Iesusɨn korotiar avɨzimɨn suira. 29 Amizim Iesusɨn korotiamɨn suizir dughiamra, an ghuzir arɨmariam pura dutugha ghu. A uabɨ baregha fo, an mɨkarzim ua dera.

30 ✝A kamaghɨn amimra, Iesus zuamɨra uabɨ baregha God gumazamizibar arɨmariaba gɨvaghasa a ganɨngizir gavgavim, an mɨkarzim ataghizɨ a fo, nan gavgavim ingari. Egha a ragha gumazamizibar garava men azara, "Tina nan korotiamɨn suira?"

31 Ezɨ an suren gumaziba a ikaragha kamaghɨn a mɨgei, "Nɨ garima, gumazamizir avɨriba nɨ akufa. Ezɨ nɨ tizim bagha kamaghɨn azai, ‘Tina nan korotiamɨn suira?’ "

32 Me kamaghɨn Iesus mɨgɨavɨra itima, Iesus an korotiamɨn suirazir gumazim o amizim gɨfoghasa raghɨrɨgha garagharui. 33 A ruiavɨra itima, amizir kam a batozir bizim gɨfogha iza Iesusɨn guamɨn degiaghirɨgha, atiatia nɨgha guizbangɨra a batozir bizimɨn gun mɨgei. 34 ✝Ezɨ Iesus kamaghɨn a mɨgei, "Nan guivim, nɨ navim bar amɨragh ikɨ. Nɨ nɨghnɨzir gavgavim nan iti. Kamaghɨn, nɨn nɨghnɨzir gavgavim nɨ gamizɨ nɨ dera. Nɨ navir amɨrizim sara mangɨ, eghtɨ nɨn arɨmariar kam ua nɨ damuan kogham."

35 Iesus amizir kam mɨgɨavɨra itima gumazir maba God ko mɨgeir dɨpenimɨn bizibar garir gumazim, Jairusɨn dɨpenimɨn ikegha iza kamaghɨn Jairus mɨgei, "Nɨn guivim areme. Nɨ osɨmtɨzim Tisa danɨngan markɨ."

36 Me kamaghɨn mɨgeima Iesus me baregha kamaghɨn Jairus mɨgei, "Nɨ atiatingan markɨ. Nɨ pura nɨghnɨzir gavgavim nan ikɨ."

37 An gɨn aruir gumazamiziba a ko mangasa amima a men anogoregha, Pita, ko Jems uan dozim Jon ko, a merara inigha me zui. 38 Me ghua Jairusɨn dɨpenimɨn otivigha Iesus gumazamiziba barazima, me bar azia nɨgɨnir dafam gami.

39 Ezɨ a me bagha aven ghua kamaghɨn me mɨgei, "Ia tizim bagha azia nɨgɨnir dafam gami? Borir kam aremezir puvatɨ. An akui."

40 ✝A kamaghɨn me mɨgeima, me a dɨpova an ingarava kava uariv gei, "E fo, a guizbangɨram areme." Gumazamiziba kamaghɨn mɨgeima, a bar me batuegha guivimɨn afeziam ko amebam inigha an suren gumazir pumuning ko mɨkezim, merara a ko zui. A me inigha me guivimɨn kuam itir danganimɨn aven ghue. 41 ✝Me ghuegha a guivimɨn dafarimɨn suiragha kamaghɨn a mɨgei, "Talita kum!" (Akar kamɨn mɨngarim kamaghɨn iti, "Guivir dozim, kɨ nɨ mɨgei, nɨ dɨkafigh!") 42 An a mɨgeimrama, guivim dɨkavigha tughava arui. (An azenir 12pla.) A dɨkavigha tugha aruima, me kamaghɨn guizbangɨra dɨgavir kuram gami. 43 ✝Ezɨ an akar gavgavimɨn guizbangɨra me mɨgɨa ghaze, ia bizir kamɨn gun gumazir igharazitam mɨkɨmam markɨ. A kamaghɨn me mɨgɨava daghetam a danɨngasa me mɨgei.

Iesus dɨpam gisɨn tugha zui

22 Ezɨ Iesus uan suren gumaziba amaga me mɨgɨa ghaze, me faragh bot inigh dɨpamɨn vongɨn mangɨ. A uabɨ ikɨ gumazamiziba amangam. 23 ✝A gumazamiziba amadagha, egha uabɨra ikia God ko mɨkɨmasa mɨghsɨamɨn ghuavanabo. Ezɨ amɨnim pɨrizɨma, Iesus uabɨra iti. 24 Ezɨ bot dadarimɨn saghon ghuzɨma, amɨnim botɨn guamɨn dɨkavigha me givaima ongarim men bot mɨsosi. 25 Ezɨ amɨnim tiasava amima, Iesus dɨpam gisɨn arua uan suren gumaziba bagha zui. 26 ✝Me garima, Iesus dɨpam gisɨn izima, me bar puv atiatiava agoa ghaze, kar ti duam. Egha atiatiava arai. 27 Ezɨ Iesus zuamɨra me mɨgɨa ghaze, "Ia gavgafigh, kar kɨrara. Ia atiatingan markɨ!"

28 Ezɨ Pita an akam ikaragha kamaghɨn mɨgei, "Ekiam, guizbangɨra nɨrara, nɨ na mɨkemeghtɨ, kɨ dɨpam gisɨn nɨ bagh mangam."

29 ✝Ezɨ Iesus ghaze, "Nɨ izɨ."

Ezɨ Pita bot ategha dɨpam gisɨn Iesus bagha zui. 30 A ghua amɨnir gavgavimɨn gari, a bar ekevezɨma an atiatia dɨpamɨn aven ghuaghiri. Egha dei, "Ekiam, nɨ nan akuragh!"

31 ✝Ezɨ Iesus zuamɨra uan agharim amadagha Pitan suira. Egha kamaghɨn Pitan mɨgei, "Nɨn nɨghnɨzir gavgavim sufi. Nɨ tizim bagha okam nɨghnɨsi?" 32 Egha aning me gatɨn botɨn ghuavanabo, ezɨ amɨnim pura gɨfa.

33 ✝Ezɨ botɨn itir gumaziba Iesusɨn ziam fa ghaze, "Bar guizbangɨra, nɨ Godɨn Otarim!"

Iesus gumazir soroghafariba amɨrazir mam gamizɨma a ua dera

1 Ezɨ dughiar maba gɨvazɨma, Iesus uamategha Kaperneamɨn ghu. A ghua dɨpenimɨn itima gumazamizir avɨriba a uamategha izezir akam baraki. 2 Me akar kam baregha izezɨma dɨpenim bar izɨvazɨ an tiar akam sara izɨfa. Ezɨ Iesus Godɨn akam me mɨkɨri. 3 An akam akurima, gumazir maba soroghafariba amɨrazir gumazir mam inigha a bagha izi. Gumazir pumuning ko pumuning akuriamɨn a gisaghpugha izi. 4 Me iza garima dɨpenimɨn tiar akam bar izɨfa, kamaghɨn amizɨ, me Iesus bagh mangan ibura. Egha me gumazir kam inigha dɨpenir siriamɨn ghuavanabogha dɨpenir siriamɨn torim gamigha beniba akuriam dafegha anemadazɨma a Iesus bagha ghuaghiri.* 5 ✝Ezɨ Iesus gumazir kabar nɨghnɨzir gavgavimɨn ganigha kamaghɨn soroghafariba amɨrazir gumazim mɨgei, "Nan borim, kɨ nɨn arazir kuraba gɨn amada."

6 Iesus kamaghɨn a mɨgeima, Judan Arazibagh fozir gumaziba apiaghav ikiava uarira uan navir averiabar kamaghɨn mɨgei, 7 ✝"Gumazir kam tizim bagha kamaghɨn mɨgei? A Godɨn danganim iniasava ami! Gumazir kɨnitam gumazir igharazitamɨn arazir kuraba gɨn amadaghan kogham. God uabɨra." 8 Me kamaghɨn nɨghnɨzima, Iesus zuamɨra uan navir averiamɨn men nɨghnɨzibagh fogha kamaghɨn me mɨgei, "Ia manmaghsua uan navir averiabar aven kamaghɨn nɨghnɨsi? 9 Kɨ akar manam mɨkɨmam? Pura gumazir kɨnitam kamaghɨn mɨkɨm suam, kɨ nɨn arazir kuraba gɨn amada. Egh uaghan gumazir kɨnitam kamaghɨn mɨkɨman kogham, nɨ dɨkavigh uan akuriam inigh mangɨ, egh ua deragh. 10 Kɨ arazir kam damightɨma, ia ganigh fogham, Gumazamizibar Otarim a nguazir kamɨn arazir kuraba gɨn amangamin gavgavim iti."

Egha kamaghɨn gumazir soroghafariba amɨrazim mɨgei, 11 "Kɨ nɨ mɨgei, nɨ dɨkavigh uan akuriam inigh dɨpenimɨn mangɨ." 12 ✝Egha a mɨgɨavɨra itima me gari gumazir kam dɨkavigha uan akuriam inigha azenan ghu.

Gumazamiziba bar an ganigha dɨgavir kuram gamigha Godɨn ziam fa kamaghɨn mɨgei, "E faragha bizir katamɨn ganizir puvatɨ!"

Lasarus aremegha gɨfa

1 ✝Gumazir mam Lasarus, an arei. A Betanin nguibamɨn gumazim. Betanin nguibam, Maria uan avenamebam Marta ko aning itir nguibam.* 2 ✝(Marian kamra, a mughuriar aghuim zuir borem isa Ekiamɨn dagarimning ginge, egha uan dapanir arɨzibar anedɨsi. Datɨrɨghɨn an dozim Lasarus arei.) 3 ✝Ezɨ an amizimning Iesus bagha akam amada, "Ekiam, gumazir nɨ bar ifongezim, an arei."

4 ✝Ezɨ Iesus oregha, kamaghɨn aning mɨgei, "Kar gumazim aremegh bar gɨvaghamin arɨmariam puvatɨ. Kar gumazamizibar amutɨ, me Godɨn gavgavimɨn ganɨva egh ziar ekiam a danɨngamin arɨmariam. Ezɨ tuavir kamra, Godɨn Otarim uaghan ziar ekiam iniam." 5 Iesus bar Marta ko an afumim ko Lasarus, me gifonge. 6 Ezɨ a Lasarusɨn arɨmariamɨn akam baregha, ua dughiar pumuningɨn nguibar a itir kamɨn ikiavɨra iti.

7 Egha a gɨn suren gumazibav gɨa ghaze, "E uamategh Judian Distrighɨn mangam."

8 ✝Ezɨ suren gumaziba a mɨgɨa ghaze, "Tisa, boghɨmra Judian Distrighɨn itir gumaziba, me dagɨabar nɨ ginivasava ami. Ezɨ nɨ uamategh Judian Distrighɨn mangasa, a?"

9 ✝Ezɨ Iesus kamaghɨn men akam ikaragha ghaze, "Dughiar vamɨra aruem ti 12plan auan gari, o? Gumazim aruemɨn aruava, angazangarimɨn gara, kamaghɨn an asaghpora irir puvatɨ. 10 ✝Ezɨ gumazim dɨmagarimɨn aruava, a ganamin angazangariba puvatɨ, kamaghɨn an asaghpor iram."

11 ✝Iesus mɨkemegha gɨvagha, gɨn ua kamaghɨn me mɨgei, "En roroam Lasarus an akui. Eghtɨ kɨ mangɨva a gaghuraghtɨ a ua dɨkavigham."

12 Ezɨ suren gumaziba an akar kam baregha kamaghɨn mɨgei, "Ekiam, a dakuigh arɨmariam gɨvagham." 13 Suren gumaziba me kamaghɨn fozir puvatɨ, Iesus ghaze, Lasarus aremegha gɨfa. Me ghaze, Iesus Lasarusɨn mɨgɨa ghaze, a puram akui.

14 Ezɨ datɨrɨghɨn Iesus deravɨra kamaghɨn me mɨgɨa ghaze, "Lasarus an aremegha gɨfa. 15 Ezɨ kɨ ia gɨnɨghnɨsi, egha kɨ fo, bizir kam ia damutɨ, ia nɨghnɨzir gavgavim ikiam. Kamaghɨn, kɨ a ko dughiar kamɨn ikezir puvatɨgha, kɨ bar akonge. Ezɨ datɨrɨghɨn e a bagh mangam."

16 ✝Iesus mɨkemegha gɨvazɨma, Tomas an ziar mam Fufuzim, a kamaghɨn suren gumazir igharazibav gei, "E uaghan uan Tisa ko mangɨva, a ko ovengam."

Iesus ghaze, Kɨ uabɨ, kɨ gumazir gumazamizibagh amima me ua dɨkavim, egha kɨ uabɨ, kɨ gumazir ikɨrɨmɨrir zurara itim anɨdim

17 Ezɨ Iesus uan suren gumaziba ko ghuava Betanin nguibamɨn boroghɨn zui, egha kamaghɨn oraki, Lasarus 4plan aruebar mozimɨn ike. 18 ✝Betanin nguibam a Jerusalemɨn boroghɨn iti, tuavimɨn ruarim a 3 kilomitan tu. 19 Ezɨ Judian gumazamizir avɨriba iza Marta ko Marian gara iti. Aningɨn dozimɨn ovevem bagha, me aningɨn akurvaghamin mɨgɨrɨgɨar tabav kɨmtɨ aningɨn navimning deraghasa, me ize. 20 Ezɨ Marta orazima, Iesus izima, a Maria ataghizɨ a dɨpenimɨn itima a ghua tuavimɨn Iesus bato.

21 ✝Egha Marta kamaghɨn Iesus mɨgei, "Ekiam, nɨ kagh ikezɨ, nan dozim aremeghan koghai! 22 ✝Ezɨ kɨ uaghan fo, nɨ datɨrɨghɨn bizitam bagh Godɨn azaraghtɨ a nɨ danigham."

23 Ezɨ Iesus a mɨgei, "Nɨn dozim ua dɨkavigham."

24 ✝Ezɨ Marta a mɨgei, "Kɨ fo, a nguazim gɨvaghamin dughiamɨn dɨkavigham, dughiar gumazamiziba bar dɨkavamim."

25 ✝Ezɨ Iesus kamaghɨn a mɨgei, "Kɨ uabɨ, kɨ gumazir gumazamizibagh amima me ua dɨkavim, egha kɨ uabɨ, kɨ gumazir ikɨrɨmɨrir zurara itim anɨdim. Gumazitam, nɨghnɨzir gavgavim nan ikɨva aremegh, an angamɨra ikɨvɨra ikiam. 26 ✝Ezɨ gumazamiziba bar angamɨra ikia egha nɨghnɨzir gavgavim nan iti, me aremeghan kogham. Puvatɨ. Me angamɨra ikɨ mamaghɨra ikiam. Nɨ nɨghnɨzir gavgavim akar kabar iti, o puvatɨ?"

27 ✝Ezɨ Marta kamaghɨn Iesus mɨgei, "Are, Ekiam! Kɨ nɨghnɨzir gavgavim ikia fo, nɨ Godɨn Otarim. Nɨ gumazir kam God nguazimɨn nɨ amangasa mɨkeme, Gumazir God Uam E Iniasa Mɨsevezim."

Iesus Lasarusɨn apangkuvigha azi

28 Marta kamaghɨn mɨkemegha, ghua uan afumim Marian dia. Egha nɨmɨra Marian kuarim gatɨgha kamaghɨn a mɨgei, "Tisa ize, egha nɨ bagha azai." 29 ✝Ezɨ Maria kamaghɨn oregha, zuamɨra dɨkavigha Iesus bagha ghu. 30 (Iesus tɨghar nguibamɨn otivam. A danganir Marta faragha a batozɨ naghɨra iti.) 31 Ezɨ Judaba Marian apangkuvigha a ko dɨpenimɨn iti, egha an garima, a zuamɨra dɨkavigha azenan ghu. Ezɨ me an gɨn zui. Me ghaze, a ti aziasa mozimɨn zui.

32 ✝Ezɨ Maria ghua Iesus itir danganir kamɨn otogha Iesus bato. Egha a Iesusɨn suemningɨn boroghɨra tevimning apɨrigha, kamaghɨn a mɨgei, "Ekiam, nɨ ti kagh ikezɨ, nan dozim aremeghan koghai."

33 Ezɨ Iesus Marian garima, an azi. Egha a Judan Marian gɨn izezibar garima, me uaghan azi. Ezɨ a bar men apangkuvigha uaghan aziasava ami. 34 Egha a kamaghɨn men azara, "Ia managh anefa?"

Ezɨ me kamaghɨn a mɨgei, "Ekiam, nɨ izɨ ganigh."

35 ✝Ezɨ Iesus azia teriba iri. 36 Ezɨ Judaba an ganigha kamaghɨn uariv gei, "Ia munagh gan. A gumazir kam bar a gifonge."

37 ✝Ezɨ marazi ghaze, "A gumazir damaziba okaviziba akɨrizɨma, me ua gari. Egha a gumazir kamɨn akurazɨ, an aremeghan koghai. A ti manmaghsua an akuraghan aghua?"

Iesus Lasarus gamizɨma, a ua dɨkafi

38 ✝Ezɨ Iesus ua bar osemegha, ghua mozimɨn oto. Mozir kam a dagɨar mozim, me mɨghsɨamɨn an ingari. Ezɨ dagɨar ekiar mam an tiar akam avara. 39 Ezɨ Iesus ghaze, "Ia dagɨam puegh munagh amadagh."

Ezɨ gumazir aremezimɨn amizim Marta, a kamaghɨn Iesus mɨgei, "Ekiam, an kuam 4plan aruebar mozimɨn ike. An kuamɨn mughuriar kuram otivam."

40 ✝Ezɨ Iesus kamaghɨn a mɨgei, "Kɨ faragha nɨ mɨkemegha gɨfa, nɨ nɨghnɨzir gavgavim ikɨva, egh nɨ Godɨn gavgavir ekiamɨn ganam."

41 Egha me dagɨam puegha munagh amadazɨ, Iesus kogha overiamɨn gara kamaghɨn mɨgei, "Afeziam, nɨ na barasi, kamaghɨn amizɨ kɨ nɨ mɨnaba. 42 ✝Kɨ fo, nɨ zurara na barasi. Ezɨ kɨ gumazir kagh tuivighav itibagh nɨghnɨgha, kamaghɨn ifonge, me kamaghɨn fogh suam, nɨ na amadazɨ kɨ ize. Kamaghɨn kɨ akar kam gami."

43 Iesus mɨkemegha gɨvagha, a pamtem dɨa ghaze, "Lasarus, nɨ azenan izɨ." 44 Ezɨ Lasarus ua dɨkavigha azenan ize. An sueba ko aghariba ko guam, me inimɨn da nomke.

Ezɨ Iesus kamaghɨn me mɨgei, "Ia inim adegh, egh aneteghtɨ, a daru."