10 Milagres de Jesus na Bíblia: Lista com versículos e explicação

Mpapala gwa kutola akege kikilambo cha Kanaani

1 Lichoba lya tatu pakiba ngongano jukutola kukilambo cha Kana, okwo ku Galilaya. Amamundu Yesu bakiba kweno, 2 jwombe Yesu ate kokigwa penia pa mpapala gwa kutola akege pamwe na akinapunji bakwe. 3 Apajapeta divai, amamundu, ngabannenge Yesu, "Bakwetangitije divai."

4 Yesu ngabajanga, "Amama, makanengeje chikutenda. Kingobu chango tango kuika."

5 Penia amamundu ngabalengela akapakachi, "Chachoa chela achapakunengela ntendange."

6 Akayahudi bakiba na lukobo lwa ukuya, penia pakiba na ibega chita ya mabwe, kila kibega chimwe kijingi madebe mabele au matatu ga mache gukuya. 7 Yesu ngabalengela, "Ntweleyange mache mweno muibega." Ngabatweleya twe mpaka kunani. 8 Kubokapenia ngabalengela, "Ngoe ntekange mapelekele akilongochi ba mpapala." Ngabatekanga mache gala, 9 Akilongoi ba mpapala apabapaya mache gala, ngaba manya genia gayokite divai, Bombe bamanyije divai jene jibokitako, nambu akapakachi bala bamanyangite jibokitako. Akilongoi ba mpapala ngabakema bene akola mpapala, 10 Akilongoi ba mpapala ngabalengela, "Kila mundu kutumbula kupangania oti divai jambone, kubokapenia anda batochike kupanga divai jambone. Nambu mwe mpangite divai jambone mpaka ngoe!"

11 Yesu alaya iingi yi ikobo yu kutumbula okwo kukilambo cha Kana, Ku Galilaya, ngalaya kibumo chakwe, na akinapunji bakwe ngabanhwamini.

Yesu anamia Mundu ojwa belwike Jwangalola

1 Yesu apakiba akapeta ngammona mundu jumwe, jwangalola kuboka pabelekwa. 2 Bai akinapunji ngabankonya, "Aboli, ngabeneke abatei mabaja jwombe mwene au amamundu na awamundu mpaka mundu ojo abelekwe jwangalola?"

3 Yesu ngajanga, "Kile chene chapiti kwa magambu ga mabaja gakweje na wala mabaja ga akapotoi bakwe. Ila abelwike jwangalola ili makakala ga Nnoongo gabonekane gakakamu maengo nkati jakwe. 4 Anda kubi tango nalumu tupaligwa kujendekea ukamwa maengo ga baba abandumite, maana kilo kitenda kuika peni mundu aotwaje ukamwa maengo. 5 Mangobu mbi kudunia, ne nga lumuli lwa kudunia."

6 Kuboka pukulonge genia, Yesu ngauna mata pae, ngaunya mandope, ngampakaya jweno jwangalola mumio, 7 ngannengela, "Nnyendi makakuye mulilaba lya Siloamu." (Siloamu maana jakwe, "abatumigwe.") Penia jweno jwangalola ngajenda, ngakuya, kubokapenia ngabuja abi akalola.

8 Bai andamya ajabe na baba abakiba bumanyi jweno akiba nhwocho kijopajopa, ngabalenga, "Bo, ojo jwajoje nhwocho na kijopajopa?"

9 Bange bandu ngabalenga, "Ujojo."

Bange ngabalenga, "Je, ila atekulandana."

Nambu jweno ojwaakabe jwangalola ngalenga, "Nga nenga!"

10 Bai ngabankonya, "Lele, mio ginu gawekuka bo?"

11 Na jweno ngabajanga, "Jwajo mundu ojwakemigwa Yesu akatenda mandope, ngambakaya kumio na nganengela, ‘Nnyabu makakuye mulilaba lya Siloamu.’ Penia, ne nganyenda, nganguya, ngambata kulola."

12 Ngabankonya, "Jweno abikole?"

Najweno ngabajanga, "Ne manyije!"

Yesu bapeganga ilyo bandu ajingi kupeta bandu elufu itatu

13 Yesu pajoa genia, ngaboka paali penia muntumbwi, ngajenda paali pantemela nambu bandu ngabamanya ngabankengama kuboka muilambo. 14 Apauluka muntumbwi, ngaubona nkengeni nkolongwa gwa bandu, ngababone kia, ngabalamiya akatamwe babe.

15 Piika kimuyo, akinapunji bakwe ngabannyendelela ngabannenge, "Pamba papongoti, na ngoe kutipike, maleke bandu bajabule kiilambo yabe bakaemele yakulya." 16 Yesu ngabajanga, "Bakajabulangaje, mapegange mangweto ilyo." 17 Nambu angweto ngabannenge, "Tukweti mikate nhwano tu na yamaki ibele." 18 Yesu ngalenga, "Unetelange pamba." 19 Ngabaamulicha bandu batame pae pamanyai. Penia Yesu ngatola mikate nhwano jela na yamaki ibena yela, ngalola kunani kumbengu, ngannumba Nnoongo. Kuboka penia ngametula mikate, ngabape akinapunji bakwe, na akinapunji bakwe ngababaganakia bandu. 20 Bandu boa ngabalye nu kujukuta. Kuboka penia akinapunji ngabalokota imbolopolo iigile ngabatwele ikapo komi ni ibena. 21 Abalilangite bakiba akinalome elufu nhwano pangabalanga akikege ni ingota.

Yesu aamulicha kimboonga kikotoke

35 Kimuyo, lichoba ulyo, Yesu ngabalenge akinapunji bakwe, "Tujomboke tujende kwiye ji lilaba." 36 Penia ngubulekanga nkengeni gwa bandu, akinapunji bakwe ngabajingi muntumbwi mwakiba Yesu, ngabajabulanga. Penia pakiba ni mitumbwi jenge. 37 Kingobucho tu kimboonga kikolongwa ngikitumbula kuguguma, mawimbi ngagaputa ntumbwi na ntumbu gwenio ngutwele mache. 38 Yesu akagoloka kuagami nhwagamilo unyuma ja ntumbwi. Akinapunji bakwe ngaba nnyimuya kulenga, "Aboli, bo, mboni kuagabaje tupa kuwe?"

39 Yesu ngajimuka, ngakiamulicha ngimbonga, kulenga, "Nkotoke!" Ngagalenge mawimbi, "Nnende!" Penia kimbonga ngikikotoka, na ngukube jee. 40 Kubokapenia Yesu ngabalenge akinapunji bakwe, "Mboni nnyogopanga? Bo, tango mmilingitije na imani?" 41 Nambu ngabajogopanga muno, ngabalengalana, "Mundu ni ojo, upepo na mawimbi kunnyoa?"

25 Pakiba nu munkege juna kitamwe cha ncholo kwa yaka komi nibena, 26 aganu kulaguligwa na akaganga ajingi. Nu kutumia uloi gwakwe gwoa, nambu alamitije na ali jakwe ngijibe mbaja. 27 Apajoa nhwalo gwa Yesu, na yene ngapekenyela pankengeni gwa bandu kunyuma ngakunyula ngobo yakwe, 28 ngawacha kumwojo, "Anda ngunywile tu ngobo jakwe, manama."

29 Ngakunyula lutando lwa Yesu, na myai jakwe ngijijoma kingobu ucho, na ngakibona mwene kutenda mmele gwakwe ulamiigwe mulilola lyakwe. 30 Kingobucho Yesu ngamanya kube makakala gammokite, yene ngabatendebuki bandu bala, ngakonya, "Beneke abakunywi ngobo yango?"

31 Akinapunji bakwe ngabannyanga, "Mmikulola bandu apabunhwegelile, mboni nkonya beneke abankunywile?" 32 Nambu Yesu ngajendekea kulola ammone ojwatei genia. 33 Munkege jwenio, ngamanya agampitile, yene ngaika kukilaya kwa mbwele, ngakilikatila, nu kulenga kweli. 34 Yesu ngannenge jwenio, "Manango, imani jinu jinnamiye. Nnyabule kwa tengela, nname kitamwe chinu."

Yesu annamia mundu juna michepela

1 Yesu na akinapunji bakwe ngabaika kukilambo cha Akagelasi, kwie ji lilaba likolongwa Kugalilaya. 2 Kingobu Yesu apauluka muntumbwi, ngakongana na mundu aboka kamakabuli. Mundu ojwakiba ni michepela, 3 na atama kamakabuli. Na akibaje mundu ojwaotwile kuntaba kabena mitondolo, 4 kingobu chenge bantabanga pingu ni mitondolo nambu kila mangobu ngaotola kueketa mitondolo nu kutunulana pingu yene, na akibaje mundu ojwaotwile kunhibilikia. 5 Atama kamakabuli nu kiitombi kilo na mui, akachobela nu kukikechanga mabwe.

6 Akiba kutaali kingobu apammona Yesu, yene ngammutakila, ngakilikitila majugwa nnongi ja Yesu, 7 na ngalenga kanonoya, "Yesu, Mwana jwa Nnoongo ojwabi kunani muno! Mpala nike kwango nenga? Ku liina lya Nnoongo, nannyopa makambotekaje!" 8 Alongela genia magambu Yesu annengi, "Nchepela nchapu, mumoke mundu jwenio."

9 Yene Yesu ngankonya jwenio, "Lina linu mabeneke?" Mundu jwenio ngajanga, "Lina lyango, ‘Matyala,’ Magambu tubi tajingi." 10 Kubokapenia jwenio ngannyopa Yesu akajibengaje michepela mukilambo chenie. 11 Kikiba kipenga kikolongwa chi magolobe papipi na penia pululela kamachela gi kitombi. 12 Michepela jenie ngijinnyopa Yesu, "Mutupeleke kwa magolobe, takagajingile." 13 Yesu ngajijeketela, michepela jenie ngijimpita mundu jwenio ngijijingi mumagolobe. Kipenga choa cha magolobe agakiba elufu ibena ngikielela puelelo mpaka kulilaba, ngikijingila mumache.

14 Akachungi ba magolobe ngabatilanga, nukutangacha nhwalo gweno kunnyini nu muilambo yoa ibandakile. Bandu ngabaikanga kugabona agapitile, 15 kingobu pabanhwikalila Yesu, ngabammona mundu ujwajo ojwakiba na matyala gi michepela atamite penia, akwinditi ngobo na abi namalango gakwe, na boa ngabajogopanga. 16 Bandu abibweni ikobo yenie ngabalanduli bandu ikobo eimpatite mundu jwenio ojwakiba na nchepela nhwalo gwa magolobe. 17 Kuboka penia bandu ngabatumbu kunnyopa Yesu aboke mukilambo chabe.

18 Kingobu tu Yesu ngaombe muntumbwi, mundu ojwakiba na nchepela ngannyopa kulongwana nakwe.

19 Yesu ajeketileje, nambu ngalenga, "Nnyabule kachinu kwakalongo binu makalandulila ilebe yoa Angwana eibantendile na kia jibakweti kwinu mwenga."

20 Penia, mundu jwenio ngajabula, ngatumbu kutangacha kwenio ku Dekapoli ikobo yoa Yesu eyantendile, bandu boa abajoa genia ngabaomongwa.

Biti Yailo nu munkege ojwakunyula ngobo ja Yesu

21 Kingobu Yesu pajomboka kabele kwie ji lilaba likolongwa, nkengeni nkolongwa gwa bandu nguguntindila, Yesu kiti abi umbwega ji lilaba. 22 Kuboka penia kilongoi jumwe jwa nyumba ji kung’ongale Nnoongo liina lyakwe Yailo, ngaika penia. Apammona Yesu, ngakilakatila nnongi ja Yesu, 23 ngannyopa kulenga, "Nhwenja jwango ntamwe ambajomoka. Chonde tujende, makammeke maboko ginu, jwenio malama nu kube mmomi."

24 Kuboka penia Yesu ngajabu nakwe. Bandu ajingi ngabankengama, nukunhwegelela tii nde.

25 Pakiba nu munkege juna kitamwe cha ncholo kwa yaka komi nibena, 26 aganu kulaguligwa na akaganga ajingi. Nu kutumia uloi gwakwe gwoa, nambu alamitije na ali jakwe ngijibe mbaja. 27 Apajoa nhwalo gwa Yesu, na yene ngapekenyela pankengeni gwa bandu kunyuma ngakunyula ngobo yakwe, 28 ngawacha kumwojo, "Anda ngunywile tu ngobo jakwe, manama."

29 Ngakunyula lutando lwa Yesu, na myai jakwe ngijijoma kingobu ucho, na ngakibona mwene kutenda mmele gwakwe ulamiigwe mulilola lyakwe. 30 Kingobucho Yesu ngamanya kube makakala gammokite, yene ngabatendebuki bandu bala, ngakonya, "Beneke abakunywi ngobo yango?"

31 Akinapunji bakwe ngabannyanga, "Mmikulola bandu apabunhwegelile, mboni nkonya beneke abankunywile?" 32 Nambu Yesu ngajendekea kulola ammone ojwatei genia. 33 Munkege jwenio, ngamanya agampitile, yene ngaika kukilaya kwa mbwele, ngakilikatila, nu kulenga kweli. 34 Yesu ngannenge jwenio, "Manango, imani jinu jinnamiye. Nnyabule kwa tengela, nname kitamwe chinu."

35 Kingobu Yesu apakiba akalenga genia, bandu kuboka ku nyumba ja Yailo ngabaika nu kunnenge, "Mwana jwinu ajomwike. Ku nike kujendekea kachumbuya Aboli?"

36 Yesu ajalitije chibalongila, "Nambu ngannenge jwenio makajobokaje nhwamina tu." 37 Yesu ajeketije kujenda na bandu bange nambu Petulo na Yakobo na Yohana, ununa gwa Yakobo.

38 Ngabaikanga kachakwe Yailo, Yesu ngajoa manjega, nguto nu kokaleka kujingi. 39 Ngajingi unyumba, ngalenga, "Mboni manjega na nguto? Kamwale ajomwikije, atekugoche tu."

40 Angweto ngubunhweka. Penia ngabapiyanga boa panja, nambu ngabakema awamundu mwana na amamundu na akinapunji bakwe atatu, ngabajingilanga kuchumbi omubabeka mmele gwa mwana jwenio. 41 Ngankamu luboko, ngannenge, "Talitha, kumi," mana gakwe, "Kamwale, nannenge, nnyimuke!"

42 Kingobucho ngajema nu kutumbu kutindi tindila. Akiba na yaka komi ni ibena. Kingobu pagapitila genia bandu ngabaomongwa muno. 43 Nambu Yesu ngabakelebuya kikobo chenie bakannenge munduje, na ngabalenge bampe chakulya.

Yesu ajenda panani pa mache

22 Kingobucho, Yesu ngabalengela akinapunji bakwe baombe muntumbwi, balongalele kwiye jililaba kingobu mwene bannekite akatabuka bandu. 23 Kuboka pakatabuka bandu ngaombe pikitombi jika jakwe kunng’ongalela Nnoongo. Piika kimuyo, jwenio akiba kwenio jika jakwe, 24 na kingobu ntumbwi gwenio puika panakati ji lilaba, nambu ngube mukomo gambu gu upepo gukaibi ntumbwi gwenio.

25 Kilo kupabandakila kuche Yesu ngabajendelela akinapunji bakwe akajenda panani ja mache. 26 Akinapunji bakwe pabammona akajenda panani pamache ngabajogopa muno, ngabalenga, "Lihoka" ngabachobela chamila kwa mbwele.

27 Kingobu ucho Yesu ngalonge nabo, "Nkotokange, nga nenga. Makajogopaje!"

28 Petulo ngannengela Yesu, "Angwana, anda kweli mwenga unenge ne nyende panani ja mache nhike kwenio."

29 Yesu ngannengela, "Aja, nhwikage." Petulo ngauluka muntumbwi, ngajenda panani pa mache, ngannyendele Yesu. 30 Nambu paubona upepo gola, ngajoboka, ngatumbu kumilwa, ngaguta kulilobe likolongwa "Angwana, ungole!"

31 Penia Yesu ngatondabeya luboko lwakwe, ngankamula nu kunnenge, "Mwe mammi na imani njokochoko! Mbone nnoila mbwele?"

32 Kubokapenia ngabaombelanga muntumbwi, nu upepo ngukotoka. 33 Akinapunji boa abakiba nkati ja ntumbwi ngaba nng’ongolela ngabalenga "Kweli mwenga ma Mwana jwa Nnoongo."

Yesu annamia mundu ojwapolite mmele

1 Machoba majingije, Yesu ngabuja kabele Kukafalanaumu, bandu ngabajoa kutenda abi kachakwe. 2 Bandu ajingi ngabakongana kwenio kabe kiigije chumbi changa bandu, mpaka panniango na panja poa. Kwenio Yesu ngabatangachila Nhwalo Gwambone. 3 Bandu akancheche ngabaika bampotwi mundu ojwapolite mmele gwoa ngabanneta kwa Yesu. 4 Kwa magambu ga bandu ajingi, baotwije kumpeleka unyumba mwakiba Yesu, penia ngabapojo pikinyanga kipola na Yesu, ngabanhuluya mundu jwenio bang’onike pilikai. 5 Yesu apaibona imani yabe, ngannenge mundu jwenio, ojwapolite, "Manango, mabaja ginu galekekiigwe."

6 Bange akaboli ba Malagilo ga Musa, abatamangite penia ngabawacha mumyojo jabe, 7 "Alongebo yene? Antukana Nnoongo! Abije mundu jwaotwi kulekekeya mabaja, Nnoongo tu nga ojwaotwile!"

8 Kingobu chenie Yesu ngamanya mawacho gabe, ngabakonya, "Mboni nhwachanga genia mumyojo jinu? 9 Kini chikibi kindema muno kunnenge mundu ojwapolite, ‘Nnekekiigwe mabaja ginu?’ Andaje ‘Kunnenge nnyinuke, ntole likai linu nnyabule’? 10 Nampala mmanyange kutenda, Mwana jwa Mundu akweti kinala cha kalekekeya bandu mabaja gabe pannema." Penia ngannenge mundu ojwapolite, 11 "Na nnenge, nnyeme, ntole likai linu nnyabu kachinu!"

12 Kingobu bandu boa bakannolekea, mundu jwenio ngajinuka, ngatola likai lyakwe, ngajabula. Bandu boa ngabaomongwa ngabannumba Nnoongo, ngabalenga, "Tanalolaje kilebe andi eche!"

Kiu cha Lazalo

1 Mundu jumwe ojwa konda Lazalo, ojwatama ku Betania, akiba ntamwe. Ku Betania kikiba kilambo echibatama Maliamu na Malita, akalombo mundu. 2 Maliamu nga jweno ojwampakaya Angwana mauta nukunhwungula kwanywili yakwe. Lazalo nkakamundu ngaojwakiba ntamwe. 3 Bai akalombo bena ngabatuma nhwalo kwa Yesu kutenda, "Angwana, nng’anjagwinu jwamampala ntamwe!"

4 Yesu pajoa yene, ngalenga, "Kitamwe chenje kiletaje kiu, nambu kumagambu ga kunkoya Nnoongo, alwalite kitamwe chenje kupala kumpe kibumo Mwana jwa Nnoongo."

5 Yesu ngampala Malita na alombo mundu na Lazalo. 6 Paupata nhwalo gwenio Lazalo ntamwe, Yesu ngajendekea kutama paali upo kwa machoba mabele. 7 Kuboka penia ngabalengela akinapunji baakwe, "Tujende kabele kukilambo cha Kuyudea!"

8 Akinapunji ngabalengela, "Aboli! Kingobu kichokotu kipetite kuboka pa Akayahudi pabapala kunkoma na maganga, namwe mpala kujenda kabele kwenioko?"

9 Yesu ngajanga, "Bo, kingobu cha mui komi ni ibeleje? Bai mundu anda atyangite mui kuotoje ukobala magambu alola ndaa padunia. 10 Nambu mundu anda ajendite kilo apakobala kumagambu lumuli lubije nkati jaakwe." 11 Yesu pajomola kulongela malobe genia, ngabalengela, "Ng’anjagwito Lazalo abi lugono, nambu ne manyenda kunyimuya."

12 Akinapunji baakwe ngannengela, "Angwana, anda abi lugono, bai malama."

13 Angweto bapemelela Yesu alengita kugoche lugono, bamanyije alenga kiu cha Lazalo. 14 Bai Yesu ngabalengela kipola, "Lazalo awile! 15 Nambu mbi na laa kumamagambu giinu, nakibaje na mangweto kwenio, na mpate kuamini. Aja, tujende kachakwe."

16 Tomasi ojwakemigwa Mabela ngabalengela akinapunji akajakwe, "Tujende na twe tukawee tuboa!"

Yesu kuyoya na bwomi

17 Yesu pajenda kwenio ankolela Lazalo abi mulikabuli machoba ncheche. 18 Kukijiji cha ku Betania kukiba papipi na kilambo cha Kuyelusalemu, kulipa kwakwe kubi kilomita itatu. 19 Akayahudi ajingi bakiba baike kwa Malita na Maliamu kakokalekea kukiu cha nkaka mundu.

20 Bai Malita pajoa Yesu atendakuika, ngajenda kumpokela, nambu Maliamu ngaika kachakwe. 21 Malita ngannengela Yesu, "Angwana, makabi upamba, Nhwacha gwito kabi ajomwikeje! 22 Nambu maanyi mpaka ngoe chachoa cha mpa kunnenge Nnoongo, mampa."

23 Yesu ngannengela, "Nhwacha gwinu mayoka."

24 Malita ngajanga, "Manyi mayoka mangobu ga kuyoka, lichoba lya kupela."

25 Yesu ngannengela, "Nenga nga kuyoka na bwomi. Ojwaamini nenga ata akajomwike malama. 26 Na kila ojwalama na kuamini nenga aweje ngu. Bo, kuamini genago?"

27 Malita ngannengela, "Elo Angwana! Nenga amini mwenga nga Kilisto, Mwana jwa Nnoongo, jwajo ojwaika padunia."

Yesu atenda kuguta

28 Bada ja kulenga genago, Malita ngajenda kunkema Maliamu nnombo mundu, ngannengela pantemela, "Mmoli abi pamba, ankema." 29 Jwombe apajoa gena kingobucho ngajinuka, nukunnyendelela Yesu. 30 Yesu akiba anajingije pikijiji, ila akiba tango paali upapa apampokila Malita. 31 Bai Akayahudi babakiba pamwe kachakwe Maliamu babakiba kumpe pole pabamona ajinwike nukupita panja chokwe, ngabankengama. Bakita akiba kujenda kamakabuli kulombola.

32 Bai Maliamu apaika paali pena apabi Yesu nukummona ngakilikitila, nukunnengela, "Angwana makabi upamba, akaka bango kabi bawije!"

33 Yesu apammona akaguta na Akayahudi babaika pamwe, nangweto uyo baguta, ngabe na chimbaa, na laaje kumwojo gwakwe. 34 Kibokachapenia ngabankonya, "Mammekiti ko?"

Ngabannyanga, "Angwana, nhwike nnole."

35 Yesu ngaguta. 36 Akayahudi ngabalenga, "Nnolange apampaile!"

37 Nambu kati jabe ngabalenga, "Bo, jonjo nganhwekwi mio jwangalola jola, kuotoje kuntenda Lazalo akaweje?"

Lazalo atenda kuyoigwa

38 Bai Yesu akiba na laaje kabele kumwojo, ngaika kamakabuli likabuli lyene lyakiba nduka, liekiligwe kwa libwe! 39 Yesu ngalenga, "Mmoyange libwe lyene!"

Malita, nnombo mundu jwajo ojwawile, ngannengela, "Angwana, tayali atumbu kununga, atamite mulikabuli machoba ncheche!"

40 Yesu ngannengela, "Bo, nanengije anda nhwamini mamikibona kibumo cha Nnoongo?" 41 Bai ngabaliboya libwe lyene. Yesu ngalola kunani kumbingu, ngalenga, "Nanumba ma Awawa kwa magambu umbi kunyoa. 42 Maanyi umbi kunyoa machoba goa. Nambu nengite genago magambu ga bandu ababi pamba bapate kuamini kutenda mwenga maundumite." 43 Apajomola kulenga genago, ngakema kwa lilobe likolongwa, "Lazalo! Mpite panja!" 44 Jwajo ojwakiba ajomwike ngapita panja, kongo bantabite chanda mumakongono na mumaboko, nukumio jakwe kuwekeligwe. Yesu ngabalengela, "Mankulugule, manneke ajabule."