10 Milagres de Jesus na Bíblia: Lista com versículos e explicação

Yesu pali koni mal dǝm njeti mal Inabi

1 Den pǝt kǝ myakano nyel gudlumi ra gip bǝn kǝ Kana gip kǝti atl kǝ Galili. Nasi Yesu ra lasi, 2 Yesu na mir mǝn kulci kar ti ma la wur bi kǝ ba gudlumiyi. 3 Nan mal kin inabi gǝzǝn pakawo, ar ni nasi Yesu wul ti’e, <<Wu’i na mal kin inabi da’a.>>

4 Yesu bali ti tǝ wul ti’e, <<Nǝna, unun kem kǝ ɗir karǝm rawe? Wokoci gǝn piwi da’a.>>

5 Ar ni nas wul mǝn pi mbapi’e, <<Pi ni argon tu kup tǝ yari in gwa.>>

6 Kosak na lasiwo kiri ran kǝ tat jen ra guduli mukka, nari ni mǝn Yahuda ba pi mbap ju kan Yam ba nǝm gwa tǝp kǝ ba hotǝne, ko gonge gip tati ba mani shoti ti mal bar kǝ tat mal mukka.*

7 Ar ni Yesu wul ga mǝn pi mbapi’e, <<Laa’i ni ran ju na male.>> Kan wu la’i har bisi.

8 Kan Yesu ba wul wur’e, <<Kǝkǝno nge ni kǝ ri ni mbarǝm tu kan ne ti gam nyeli gwa.>> Ar ni wu pi untuyi, 9 kan mbarǝm tu ne gam nyeli ba ɓom mali kan palika mal inabi gwa. Tǝ mom las tu ar ɗǝl gwa da’a, mǝn mbap ju kan nge mali gwa ni momi. Kan tǝ la bi ba mǝn gudlumiyi markǝme 10 tǝ wule, <<Ko gonge mbarǝm ba ɗǝli ni mal inabi kan mani tǝmtǝn gwa kakani, den kaariwo kan dǝ ɗǝli muntu kan ri mǝntayi da’a wokoci tu mǝndǝkiyi tla ar kǝm wur wi gwa, ama kiwo kǝ ne muntu mani tǝmtǝn gwa se kǝkǝni.>>

11 Muntu ni’e halama bar kǝ dlǝkǝntǝn kǝ Yesu kǝ nǝm, tǝ pini muntu gip bǝn kǝ Kana gip kǝti atl kǝ Galili. Na untu ni tǝ gode ɗǝɗatǝn gǝsi, kan mir mǝn kulci kar ti ba ngǝsh wur den ti.

Yesu ɓul ger kǝ mbarǝm gon kan gǝr ti tabi gwa

1 Nan Yesu ci cinawo, ar ni tǝ shin mbarǝm gon tabi tun gǝri gǝsi. 2 Mir mǝn kulci kar ti ngen momi kar ti wu wule, <<Ba mǝn kulci, warwat pitǝn kǝ wo ni kem kan ba gǝr mbarǝm tu tabiyi, gwas na, ko kǝ ga mǝn gǝri gǝs ni?>>

3 Ar ni Yesu wule, <<Mbarǝm tu ko mǝn gǝri gǝs ni pi warwat pitǝn da’a, ama muntu pini kǝ dǝ mbarǝm shin mbap ju kan Yam ni nangǝs ba pi gwa den ti. 4 Ar nǝm mi te yarka mǝ ci cina na pi mbap kǝ muntu kan karǝm gwa kǝ pǝte. Gas den ɗirtǝne, nan mbarǝm baa mani pi mbap da gwa. 5 Ami ni ra den kaar atlo, ami ni’e cirtǝn kǝ atl kundǝrǝndlip.>>

6 Nan ti yari untuwo, ar ni tǝ bǝse mo’ǝm den atli, tǝ liiti, kan tǝ zaapi den ger kǝ mbarǝmi. 7 Ar ni tǝ wul ti’e, <<Mbǝri, ri ho gerka gip mal kǝ Silowam>> (Kartǝn ituwi). Ar ni mbarǝmi ndara kan tǝ ho gerka, kan tǝ pal na mani shini bar gǝsi.

8 Ga berǝm dǝmi gǝs na munju ba kur shin ti den liri bar ngen momi wu wule, <<Muntu ni’e mbarǝm tu kan ba kur dǝm kǝ liri bar gwa diya?>> 9 Jen wule <<Ti ni.>> Nami ngapo wu wule, <<O’o, tǝ pini kama nan ti.>> Ama mbarǝmi na gam gǝs wule, <<Ami ni’e mbarǝmi.>>

10 Wu ngen momi na wultǝn’e, <<Imni pi kan ger gi ba ɓul rawu?>>

11 Ar ni tǝ bali wur tǝ wule, <<Mbarǝm tu ba la ti bi Yesu gwa ni liiti gurku na mo’ǝm gǝs kan tǝ zaapi den ger gǝni. Tǝ wulǝm’e a su Silowam a ho gerka. Ar ni a ndara kan a ho gerka, kan a nǝm shini bari.>>

12 Wu ngen momi kar ti wu wule, <<Ako ni mbarǝmi ra?>> Ar ni tǝ wul wur’e, <<A mom da’a.>>

Yesu bi fingal mbarǝm zangu nantam

13 Nan Yesu kum untuwo, ar ni tǝ to gip kungǝlǝn jikat mal kan tǝ ndara las tu mbarǝm ra dagwa. Ama nan mbarǝm kum untuwo, ar ni wu ɗǝl ɗir gip mir bǝn gǝzǝni wu kop ti den asǝm rǝn las tu tǝ ra kagwa. 14 Nan Yesu ɗǝl sur gip kungǝlǝn jikat mali kan tǝ shin domtǝn kǝ mbarǝm na womtiwo, ar ni guna ci ti den wuri, kan tǝ pǝni jen kumi dli gǝzǝnka. 15 Nan sit piwo, ar ni mir mǝn kulci kar ti ɗir kar ti, wu wul ti’e, <<Ɗewo gip lǝp ni, mbarǝm ra da’a, artu gas den ndetǝn wi. Ar baa mani kǝ za mbarǝm ju wu ndara wu ri gip mir bǝn jen wu wur fingal wu ci diya?>>

16 Ama Yesu nǝmi wur tǝ wule, <<Ba’e ar nǝm ni dǝ mbarǝmi ndara da’a. Bi wur ni fingal wu ci.>>

17 Ar ni mir mǝn kulci kar Yesuyi wul ti’e, <<Miwo, bǝredi nantam na kos rop ni katl mǝn ra nari.>>

18 Tǝ wul wur’e <<Ɗirim ni ɗe.>> 19 Kan Yesu ba wul mbarǝmi’e, wu dǝm atl den jiri. Tǝ pǝn bǝredi nantam na kos ropi, tǝ tli gam tǝ goode Yam kan tǝ cecceni tǝ bi mir mǝn kulci kar ti wu bi domtǝn kǝ mbarǝmi. 20 Kup gǝzǝn ba ci wu laa’i tu gǝzǝni, kan wu dom mir roɓǝs burodiyi nan sagwa, ba laa’i shar kutl-cet rop. 21 Womtitǝn kǝ mbarǝm ju kan ci fingali pi wule moni bar kǝ zangu nantam (5,000) bat na mǝtli na mimiri.

Yesu matl zhe’e pitǝn kǝ itǝr gip bar ɓul’a’i

35 Gasi kǝ sito Yesu wul mir mǝn kulci kar ti’e, <<Mǝ te ni den bishidiyi mǝnta.>> 36 Ar ni wu za womti mbarǝmi kaari, kan wu ndara nan ti gip kungǝlǝn jikat male. Kungǝlǝn jikat mali jen ra es nan ti. 37 Kan dun yam ba tli tor gǝsi, mal ba nǝm ghuni kungǝlǝn jikat mali, kan mal ba pare laa’i kungǝlǝnyika. 38 Yesu ra tǝp kaar kungǝlǝn jikat mali na gam gǝs den bar kǝ tli gami, tǝ den nde umuri. Mir mǝn kulci kartiyi putu ti kan wu wul ti’e, <<Ba mǝn kulci, ar ghun ki diya, mǝ ri kǝ mǝshtǝn wu gwa?>>

39 Tǝ tlyami, kan tǝ matl itǝr kan tǝ wul zap mali’e, <<Sa shot! Dlǝr lasi nǝm!>>Ar ni itǝri za’i, kan las ba sa shot hoyi.

40 Yesu wul mir mǝn kulci kartiyi’e, <<Unun kem bǝrti nǝm kǝnwe? Kǝ’i ni ra na holi ngǝshtǝn den Yama?>>

41 Bǝrti nǝm mir mǝn kulci kar tiyi naari kan wu wul ezǝn’e, <<Wo ni’e muntuwe? Itǝr na zap mal ma wu kop shirǝm gǝsi!>>

25 Nagǝr gon ra lasi muntu kan pi sheti ghon kutl cet rop bǝran den tatltǝn gip ti gwa. 26 Tǝ kum dli naarwi am dǝ mǝn bi un na jili bar ju kup tǝra nari gwa. Kup na untu, kumi dli gǝso ci cina na naartǝn ni ar dene. 27 Nan tǝ kum shirǝm den Yesuwo, ar ni tǝ ri tǝp kaar da ti gip womti mbarǝm ju, kan tǝ ne am den bi tutul dli gǝsi. 28 Tǝ pi ni untu domici tǝ dam ti tor gip mbatl gǝs tǝ wule, <<Ami ni a zam a ne am den tutul dli gǝs katl ma, kumi dli gǝn baa pa’i.>> 29 Ar ri kǝtigon da’a ar ni tatltǝn kǝ bǝran gǝs dlǝri, tǝ pa kum gip dli gǝs den tǝ warkewi.

30 Bar tu ar ni Yesu kum iko kǝ pi bar ɗǝl gip ti, ar ni tǝ bal ti rǝn den womti mbarǝmika tǝ wule, <<Wo ni ne am den tutul dli gǝn we?>>

31 Ar ni mir mǝn kulci kar ti nǝmi ti wu wule, <<Ɓa shin womti mbarǝm ju kan den tla’i gi gwa, kan kǝ wule, <Wo ni ne am demǝna?> >>

32 Ama Yesu pi ta kari ger kǝ dǝ tǝ shin muntu pi untuyi gwa. 33 Nagǝr mǝri na momi argon tu kan zam tiwo, ar ni tǝ ɗir ngus cina dǝ Yesu, tǝ den dǝdartǝn gip bǝrti, kan tǝ yari Yesu ge shirǝm kǝ kup argon tu kan pi gwa. 34 Ar ni tǝ wul nagǝr mǝriyi’e, <<Nya gǝni, ngǝshtǝn gi den Yam warke i’wi. Ndara bom na ghol mbatli, kǝ zam paltǝn lau den kumi dli giwi.>>

Yesu pǝni mǝn dun itǝr kumi dlika

1 Yesu na mir mǝn kulci kar ti jikat ɓula wu te den kǝti ɓula kǝ Galili, gip atl kǝ mǝn Gerasa. 2 Na ɗǝltǝn kǝ Yesu sur gip kungǝlǝn jikat maliwo, ar ni mbarǝm gon mǝn dun itǝr tli ɗir kǝ ba gambǝci tǝ mbor ti. 3 Gambǝci ni’e ba dǝmi kǝ mbarǝmi. Murgon ra kan ba mbu nǝmi gǝs tǝ ɓal tika na sarsari da’a. 4 Tla ɓali gǝska am na asǝm na sarsari, ama wokoci tu kup ɓaltikawo tǝ kur ngot sarsariyika tǝ ceccen sarsari kǝ asǝm da tika. Murgon ra kan baa mani nǝmi gǝs kǝ ɓali na ndǝrtǝn kǝ bigul da’a. 5 Ba dǝmi gǝs ni’e ba gambǝci na gip tlǝndǝre, ti den la’i yar na tloyi dli gǝs na tate.

6 Nan ti shin Yesu terkawo, ar ni tǝ tli na kǝtǝr tǝ te nda ngurup cina da ti. 7 Tǝ la yar hoyi tǝ wule, <<Unun ghun ki namǝni, Yesu, Nya Bar Gun kǝ to yamka? A lir ki gip sun kǝ Yami, ba kǝ kumim dli da’a!>> 8 Tǝ yari ni untu nan Yesu wule, <<Dun itǝri, ɗǝl ter gip mbarǝm tuka!>>

9 Ar ni Yesu wul ti’e, <<Ununu ni’e sun gi?>> Mbarǝmi nǝmi ti tǝ wule, <<Sun gǝn ni’e womti,* nan mǝn ra na womti gwa.>> 10 Kan tǝ pi ta liri Yesu den ba dǝ tǝ ɗǝli ga dun itǝrika gip las tu kan wu dǝm gwa da’a.

11 Ar dǝm’e kosak na lasiwo womti alade ra den ci bar gǝs tlǝndǝre. 12 Ar ni ga dun itǝri lir Yesu wu wule, <<Kar mi te gip alade juka, za mi mǝ te gip wuri.>> 13 Tǝ nǝmi wuri, kan ga dun itǝri ba ɗǝl ter gip mbarǝmi wu te gip aladeyi. Womtitǝn kǝ aladeyi ri zangu rop (2,000), kan wu yem sur atl na kǝtǝr wu su ro gip mal wu mǝshka.

14 Nan mǝn le aladeyi shin untuwo ar ni wu tli na kǝtǝre wu te gip bǝni na mir bǝn kǝ markǝmi, wu yari argon tu kan pi gwa. Mbarǝm ɗǝl ɗir kǝ shini argon tu kan ratl gwa. 15 Nan wu ɗir kar Yesuwo ar ni wu shin mbarǝmi kan ra har na womti dun itǝri gwa. Nan wu shin ti njon lasi gip tutul dli kan gam gǝs pal semwo, ar ni bǝrti ci wuri. 16 Munju kan shin argon tu kan piwo, ar ni wu yari mbarǝm argon tu ndo na mbarǝm mǝn dun itǝri na aladeyi esi. 17 Ar ni mbarǝm kǝ bǝni nǝm liri Yesu den tǝ za atl gǝzǝni.

18 Nan Yesu den totǝn gip kungǝlǝn jikat malo, ar ni mbarǝm tu kan ra har na dun itǝri lir ti tǝ wule, <<Za’ǝm a kop ki ngapi.>> 19 Ama Yesu nǝmi ti da’a, ama kan tǝ wul ti’e, <<Ndara bom kar ya’ǝn kǝ yari wur kiri bar na womti ju kan Babom pi’i na kandatu tǝ shin guna gi gwa.>> 20 Ar ni mbarǝmi ndara tǝ kop mir bǝn gudǝli kutl kǝ gip atli, tǝ nǝm yari mbarǝm kiri bar na womti ju kan Yesu pi ti gwa. Ar dlǝkǝn mbarǝm ju kup kan kum argon tu tǝ yari gwa.

Yesu tli mǝshi nye gǝre kan tǝ pǝni kumi dli nagǝr gonka

21 Nan Yesu to gip kungǝlǝn jikat mal tǝ pa jikati tǝ te den kǝtǝyi gon kǝ ɓula’iwo, ar ni mbarǝm na womti dom wur kar ti nan ti’i ra bi ɓula’i gwa. 22 Ar ni mbarǝm gon gip kǝ cina kǝ bom domtǝn kǝ mǝn Yahuda, mǝn sun Yayirus, ɗir lasi. Nan tǝ shin Yesuwo ar ni tǝ nda atl cina da ti. 23 Tǝ pi ta liri Yesu, tǝ wule, <<Nye mǝtli gǝn ra bi dǝ mǝshtǝni. Kustu, ɗir ne am den ti kǝ pǝni ti kumi dliyika, tǝ pal lau ra.>>

24 Ar ni Yesu ri nan ti. Mbarǝm na womti kop ti kaari, wu den tla’i gǝska. 25 Nagǝr gon ra lasi muntu kan pi sheti ghon kutl cet rop bǝran den tatltǝn gip ti gwa. 26 Tǝ kum dli naarwi am dǝ mǝn bi un na jili bar ju kup tǝra nari gwa. Kup na untu, kumi dli gǝso ci cina na naartǝn ni ar dene. 27 Nan tǝ kum shirǝm den Yesuwo, ar ni tǝ ri tǝp kaar da ti gip womti mbarǝm ju, kan tǝ ne am den bi tutul dli gǝsi. 28 Tǝ pi ni untu domici tǝ dam ti tor gip mbatl gǝs tǝ wule, <<Ami ni a zam a ne am den tutul dli gǝs katl ma, kumi dli gǝn baa pa’i.>> 29 Ar ri kǝtigon da’a ar ni tatltǝn kǝ bǝran gǝs dlǝri, tǝ pa kum gip dli gǝs den tǝ warkewi.

30 Bar tu ar ni Yesu kum iko kǝ pi bar ɗǝl gip ti, ar ni tǝ bal ti rǝn den womti mbarǝmika tǝ wule, <<Wo ni ne am den tutul dli gǝn we?>>

31 Ar ni mir mǝn kulci kar ti nǝmi ti wu wule, <<Ɓa shin womti mbarǝm ju kan den tla’i gi gwa, kan kǝ wule, <Wo ni ne am demǝna?> >>

32 Ama Yesu pi ta kari ger kǝ dǝ tǝ shin muntu pi untuyi gwa. 33 Nagǝr mǝri na momi argon tu kan zam tiwo, ar ni tǝ ɗir ngus cina dǝ Yesu, tǝ den dǝdartǝn gip bǝrti, kan tǝ yari Yesu ge shirǝm kǝ kup argon tu kan pi gwa. 34 Ar ni tǝ wul nagǝr mǝriyi’e, <<Nya gǝni, ngǝshtǝn gi den Yam warke i’wi. Ndara bom na ghol mbatli, kǝ zam paltǝn lau den kumi dli giwi.>>

35 Nan Yesu i’den shirǝmo, ar ni jen gip mir mǝn bom kǝ Yayirus kan’e bari kǝ bom domtǝn kǝ mǝn Yahuda gwa, wu ɗir wule, <<Nye mǝtli gi mǝsh kawi, unun kem kǝ pa ghun ba mǝn kulci rawe?>>

36 Ama Yesu kar kǝm den argon tu kan wu yari gwa da’a, kan tǝ wul ti’e, <<Ba kǝ kum bǝrti da’a, ki de ngǝsh ki den Yami.>>

37 Ar ni tǝ za murgon kop ti kaar da’a se ga Bitǝrus, na Yakubu, na Yohana erǝm kǝ Yakubu.

38 Nan wu mbubar bom dǝ Yayiruso, ar ni Yesu shin kandatu las pika ghiru-ghiru kan mbarǝm den ta kulu na la’i yar hoyi gwa. 39 Ar ni tǝ te gipi kan tǝ wul wur’e, <<Unun kem kǝn den kulu na la’i yar untuwe? Nyayi mǝsh nika da’a, umur ni tǝ dene.>> 40 Ar ni wu gyatli ti. Nan tǝ kaar wurka kup te kaari kawo, kan tǝ pǝn basi nyayi na nase na mir mǝn kulci kar ti ju kan ra nan ti gwa, kan tǝ te gip kupshiyi las tu nye gǝri ra gwa. 41 Tǝ nǝm am kǝ nyayi, kan tǝ wul ti’e, <<Talita kum!>> (Muntu ba pi nupi gwa’e, <<Nye gǝre, a wul ki’e, tlyami!>>) 42 Ar ri kǝtigon da’a ar ni nye gǝri tlyam dlor kan tǝ nǝm desi. Bar kǝ sheti ghon kutl cet rop ni nye gǝri ra na gǝri. Muntu kem mbarǝm ju kan ra lasi gwa kǝ nǝmi bi na am na naari. 43 Ama Yesu dǝli wur kǝm hoyi den ba dǝ wu yari murgon shirǝm tu da’a. Ar ni tǝ wul wur’e wu bi nye gǝri fingal tǝ ci.

Yesu desi den gam male

22 Ar ni Yesu wul mir mǝn kulci kar tiyi’e, wu to gip kungǝlǝn jikat male wu kur jikati te bi shidiyi bartaka. Kan tǝ za mbarǝmi wu ndara. 23 Nan tǝ za mbarǝmi wu ndarawo, ar ni tǝ to den tlǝndǝr kǝ dǝ tǝ shirǝm na Yami. Tǝra to den tlǝndǝrika nangǝsi ba ri bi siti. 24 Ama wokociyiwo kungǝlǝn jikat mali ra te dlom bar ɓula’ika zab mal den dǝli gǝs ɗe na barta, domici itǝr mǝn nartǝn den gapa na kungǝlǝn jikat mali.

25 Kǝ bǝtloni, bar kǝ gǝlla am myakano, ar ni Yesu bǝtl gam te kar kungǝlǝn jikat malika, tǝ den desi den gam mali. 26 Ama nan mir mǝn kulci kar ti shin ti den desi den gam malo, ar ni bǝrti ci wuri, wu la yar gip bǝrti wu wule, <<Tlon ni!.>>

27 Na zhotǝne ar ni Yesu nǝmi wur tǝ wule, <<Ba ar ghun kǝn ni da’a, mi ni. Ba dǝ bǝrti ci in ni da’a.>>

28 Ar ni Bitǝrus nǝmi ti tǝ wule, <<Babomi, ki ni fawo, bim bi a desi te den gam malka, a te kar ki.>>

29 Yesu wul ti’e, <<teri.>> Ar ni Bitǝrus ɗǝl sur gip kungǝlǝn jǝkat mali tǝ nǝm desi tǝ den tetǝn kar Yesu. 30 Ama nan Bitǝrus shin ndǝrtǝn kǝ itǝriwo, ar ni bǝrti ci ti, tǝ nǝm sitǝnka gǝs male. Kan tǝ la yar tǝ wule,<<Babomi ɗǝli mi!>>

31 Ar ni Yesu nǝm am kǝ Bitǝrus na zhotǝne tǝ dǝl ti tor tǝ wul ti’e, <<Ki mǝn kali ngǝshtǝn den Yami, unun zote’i la’i mbatl gi demǝn kawu?>>

32 Nan wu to gip kungǝlǝn jikat maliwo, ar ni itǝri za wultǝne. 33 Ar ni munju kan ra gip kungǝlǝn jikat mali ba bote ti wu wule, <<Na ho bi, ki Nya Yam ni.>>

Yesu warke muntu itǝr tle ti dlika

1 Murka njem den kaariwo, ar ni Yesu pa te gip bǝn Kaparnahum, kan mbarǝm ba kumka den’e tǝra bomi. 2 Ar ni mbarǝm na womti dom wur har kushi ba ɗatka, ko te bǝdlabǝn karika ma, kan tǝ pi wur wazu shirǝm kǝ Yami. 3 Ar ni mbarǝm wupse jen ter na mbarǝm gon kan ra den kumi dli gwa, itǝr ni tle ti dlika. 4 Nan wu mani zami tǝp kǝ te gǝs kar Yesu da’a na womtitǝn kǝ mbarǝmo ar ni wu tul las gon den rupi kushiyi sur gam dǝ Yesu, den kaar kǝ tuli shuyiwo, kan wu shu muntu itǝr tle ti dli kayi sur cina dǝ Yesu ɓom den bamuri gǝsi. 5 Nan Yesu shin ngǝshtǝn den Yam gǝzǝno, ar ni tǝ wul muntu itǝr tle tikayi’e, <<Nya gǝni, ho’i’i warwat pitǝn gi kawi.>>

6 Lasiwo mǝn kulci mbarǝm den kulci kǝ Musa ra njon, ar ni wu dami gip mbatl gǝzǝn wu wule, 7 <<Unun kem mbarǝm kǝn ba shirǝm untu we? Mǝgǝn shirǝm ni tǝ pi Yami! Wo ni baa mani ho’i warwat pitǝnka in ba Yam ni katl nan gǝs dagwa?>>

8 Ar ri kǝtigon da’a ar ni Yesu momka gip ruhu gǝs’e argon tu wu den dami gip mbatl gǝzǝn gwa itu, kan tǝ wul wur’e, <<Unun kem kǝn den damtǝn den munju we? 9 Gonge ni ban mani, dǝ wul muntu itǝr tle ti dli kayi’e <Ho’i i warwat pitǝn gi kaya,> ko <Tlyami, pǝn bamuri gi kǝ ndara?> 10 Ama kǝ dǝ kǝ mom’e Nya Mbarǝm ra na iko den atl kǝ ho’i warwat pitǝnkawo,>> ar ni tǝ wul muntu itǝr tle ti dli kayi’e, 11 <<A wul ki’e, dlyami, pǝn bamuri gi kǝ ndara bomi.>> 12 Ar ni tǝ tlyami, tǝ pǝn bamuri gǝs kan tǝ nǝm tǝp den ger kǝ kum gǝzǝni. Muntu dlǝkǝn mbarǝm kup kan wu ɗǝɗa Yam na wultǝn’e, <<Mǝ taɓe shini argon untu da’a!>>

Mǝshtǝn kǝ Li’azaru

1 Mbarǝm gon mǝn sun Li’azaru ra den kumi dli. Ti mbarǝm kǝ Betanya ni, nye bǝn kǝ ga Maryamu na erǝm gǝs Marta. 2 Maryamu tu, muntu erǝm gǝs Li’azaru ra ɓom atl den kumi dliwo, nǝm ti ni’e muntu kan shoti mir den kaar asǝm kǝ Babom kan tǝ sarka na ta gam gǝs gwa. 3 Ar ni ga erǝm gǝs mir mǝtliyi kar bar den Yesu wu wul ti’e, <<Babomi, muntu kan kǝ ndu gwa ra den kumi dli.>>

4 Nan tǝ kum untuwo, ar ni Yesu wule, <<Kumi dli gǝs tu baa ri ga mǝshtǝn da’a. O’o, den bi ɗǝɗa Yam ni, kǝ dǝ Nya Yam zam ɗǝɗatǝn tǝp kar untuyi.>> 5 Yesu ba ndu Marta na ga erǝm gǝs Maryamu na Li’azaru. 6 Kup na untu, nan tǝ kum’e Li’azaru ra den kumi dliwo, ar ni tǝ dǝm gǝs las tu tǝra gwa kǝ muri rop ra.

7 Kan tǝ wul mir mǝn kulci kar ti’e, <<Mǝ pa pal ni gip atl kǝ Yahuda.>>

8 Wu wul ti’e, <<Ba mǝn kulci, ar dlyam wi da’a kan mǝn Yahuda ndu wu la ki na tat gwa, kup na untuwo kǝ ndu kǝ pa pal bartaya?>>

9 Yesu nǝmi wur tǝ wule, <<Awa kutl cet rop ni gip nde pǝt nǝm diya? Mbarǝm tu kup ba ɓom asǝm gip pǝto, tii pat asǝmka da’a, domici tǝ shin bar na cirtǝn kǝ den atl kǝni. 10 Ama muntu kup ba ɓom asǝm gip gas gwa ni ba pat asǝme, nan cirtǝn ra kar ti dagwa.>>

11 Nan tǝ yari muntuwo, ar ni tǝ ci cina tǝ yari wur’e, <<Berǝm gǝmi Li’azaru nde umur kawi, ama aa ri putu tika.>>

12 Mir mǝn kulci kar ti bali ti’e, <<Babomi, umur ni fa tǝ ndewo, tii kum tǝmi kǝ dli gǝsi.>> 13 Yesu ni den shirǝm den’e Li’azaru mǝsh kawi, ama mir mǝn kulci kar ti pǝn’e nde umur kǝ shukutǝn ni ti dene.

14 Ar ni tǝ yari wur ghon tǝ wule, <<Li’azaru mǝsh kawi. 15 Ar gholim mbatl domici gin nan ami ra lasi da gwa, kǝ dǝ kǝ ngǝsh kǝn den Yam ra. Ama mǝ rǝni kar ti.>>

16 Ar ni Toma (kan ba la ti bi’e nye Ngumci* gwa) wul nami mir mǝn kulci kar Yesuyi’e <<Mǝn ma mǝ su nǝka, kǝ dǝ mǝ mǝsh ni nan ti pa’e.>>

Yesu ni’e tlitǝn gip mǝshi mbarǝme na ge mbatli

17 Nan Yesu mbubaro, ar ni tǝ zam na momi den Li’azaru pi muri wupse na kapi wi. 18 Betanyawo kosak na Urshalima ni ar ra, bar kǝ mil rop*, 19 Mǝn Yahuda na womti ɗir wi kǝ kulu keti na ga Marta na Maryamu den mǝshtǝn kǝ erǝm gǝzǝni. 20 Nan Marta kum’e Yesu den ɗirtǝno, ar ni tǝ ɗǝl tǝ ri kǝ mbori gǝsi, ama Maryamu dǝm gǝs bomi.

21 Marta wul Yesu’e, <<Babomi, kira far ɗewo, erǝm gǝn ba ri kǝ mǝshtǝn da’a. 22 Ama a mom’e kǝkǝn ma Yam baa bi’i argon tu kup kǝ liri gwa.>>

23 Yesu wul ti’e, <<Erǝm gi baa tli ra esi.>>

24 Marta nǝmi ti’e, <<A mom’e ti tli ra es gas pa’i bar kup kan mǝshi mbarǝm baa tli ra na ge mbatl gwa.>>

25 Yesu wul ti’e, <<Ami ni’e tlitǝn kǝ mǝshi mbarǝm kan ami ni’e ge mbatli. Muntu kan ngǝsh ti demǝno, tii dǝm na ra na ge mbatli, ko ma tǝ mǝsh nika. 26 Muntu kan ra na ge mbatli kan ngǝsh ti demǝno, tii mǝsh da’a. Kǝ ngǝsh ki den muntu ya?>>

27 Marta wul ti’e, <<Aan, Babomi, a nǝm wi den ki ni’e Almasihu, Nya Yami, muntu kan ba sur gip atl gwa.>>

28 Nan tǝ pa’i yari muntuwo ar ni tǝ pal rin bomka kan tǝ la bi erǝm gǝs Maryamu markǝm tǝ wul ti’e, <<Ba mǝn kulci mbirawi, tǝ den ngeni gi.>> 29 Nan Maryamu kum muntuwo, ar ni tǝ tlyam na zhotǝn tǝ ri kar ti. 30 Ar dǝm’e Yesu mbubar gip bǝni wi da’a, ama tǝ’i las tu Marta mo nan ti gwa. 31 Nan mǝn Yahuda kan ra na Maryamu gip bom den damtǝn nan ti shin tǝ tlyam na zhotǝn kan tǝ ɗǝlo ar ni wu pǝn den’e tǝ rǝni kǝ ba gambǝci’i kǝ kulu lasi.

32 Nan Maryamu mbubar las tu Yesu ra, nan tǝ shin tiwo, ar ni tǝ nda atl cina da ti tǝ wul ti’e, <<Babomi, na dǝ wule ki ra far ɗewo, erǝm gǝn baa mǝshka da’a.>>

33 Nan Yesu shin ti den kulu, na mǝn Yahuda ju kan ɗir nan ti ma den kuluwo, ar ghun ti gip ruhu kan tǝ dam ti hoyi gip mbatl gǝsi. 34 Ar ni tǝ wule, <<Ako ni kǝ kap tiwe?>> Kan wu bali ti’e, <<Babomi, ɗir shini.>>

35 Ar ni Yesu kuli.

36 Ar ni mǝn Yahudayi wule, <<Shin kandatu tǝ ndu ti gwa!>>

37 Ama jen gip wur wule, <<Muntu kan ɓul ger kǝ batabi tu baa mani hane mbarǝm tu mǝshtǝn diya?>>

Yesu tli Li’azaru gip mǝshi mbarǝme

38 Nan Yesu ra gip damtǝn den mǝshtǝniwo, ar ni tǝ ri kar gambǝci’i. Gambǝci’iwo shu ni kan bor gip tat gwa kan ba le bisika na tat goni. 39 Yesu wul wur’e, <<Jirkǝt ni tatika markǝme.>> Ama Marta, erǝm kǝ mǝshiyi wule, <<Ama Babomi, kǝkǝno usuntǝn ni katl bani, domici muri gǝs wupse ituwi na mǝshtǝni.>>

40 Ar ni Yesu wule, <<A yari’i ni da’aya? E den ki ni kǝ la Yam mbatlo, kii shin ɗǝɗatǝn kǝ Yami?>>

41 Ar ni wu kutǝl tatika markǝme. Yesu tli ger yami, kan tǝ wule, <<Bǝba, a goode’i den kǝ kumǝni. 42 A mom’e kǝ kumǝn ko gigasi, ama a yari ni untu den bi kǝ munju kan dlor ɗegwa, kǝ dǝ wu nǝm den’e ki ni kǝ karǝmi.>>

43 Nan tǝ yari muntuwo, ar ni Yesu tli yar yam tǝ wule, <<Li’azaru, ɗǝl tori!>> 44 Ar ni mǝshi mbarǝmi ɗǝl tor, am gǝs na asǝm gǝs na ɓali na tutul ghumi mǝshi mbarǝme, na ba ger gǝs ɓali na tutule. Yesu wul wur’e,<<Pǝtl ni tutul ghumi mǝshi mbarǝm tuka kǝ za tǝni tǝ ndara.>>