10 Milagres de Jesus na Bíblia: Lista com versículos e explicação

Yesu pekwi memiing wo wain

1 Lek bouk tiwei yal eno iingama ti qandi nanghei beyeeng Kana eivek Galili. Yesu ta la toundei inyon woy atax, 2 me Yesu is e xe xel betiyeing is ambei nyon, xel wo dik wou xel en iingama yon. 3 Gyeik ingwei wain ma, eno Yesu ta neil wou e, "Wain ma veil xel o."

4 Yesu neil elox bei, "Tang, wang neil ambei nyon wou ay enva? Bouk wei ay eno se ghei lam."

5 Moxo ta neil wou xel xukxe, "Xam ghe bong vati wei embei neil wou xam o."

6 Deng qakous ngandoung limti mi nale paviy nanghei inyon, xel Yudayeiw mi lipek eivek nambei xel xe kwa. Memiing nimaying nambei 100 lita eno mi nale eivek titi.

7 Yesu neil wou xel xukxe bei, "Xam a taw memiing eivek deng qakous on xel xouing." Om xel taw eivek me e pup.

8 Woyom moxo neil wou xel bei, "Xam zakouv valu gweimbeeng me na qou me na wou tambiy wei la tax en mata yo."

Om xel wong ambei nyon, 9 me teiv wei la tax en mata eno num me axe bei memiing pekwi wain. Moxo se woulek bei inyon lam anghei inya, qe xel xukxe wei di taw memiing eno woulek. Woyom moxo taxe moux wei embei dii vex o la beyaleing 10 me neil embei, "Xel dalus mi wong wain wei nenyeing o me xel mi num atax, deka xel num ngenong woy, xel wong ingwei lavus o me xel num yus. Ekom wang byexaxoun ingwei nimza yo de gweimbeeng kane eno wang qou me lam."

11 Yesu wong e xe lulvako tiwei tax o nambei dee nanghei Kana, danghei wei Galili nei. Moxo talex e xe nikanzek ngandoung teyei me e xe xel betiyeing yei me wongis e.

Pavulek wei moux matekeing ti yo

1 Ka moxo di la, eno moxo yei moux ti matek gyeik umbek o. 2 Moxo xe xel betiyeing teling e, "Putoung, eti wong sewokeing, moux tine venaxow o ma luw ta, om ingwei matek gyeik umbek o?"

3 Yesu neil embei, "Moux tine se wong sewokeing o ma luw ta se wo sewokeing, qe lul tine qandi bei Anutu xe xuk e gyeip yaing eivek e xe mapieing. 4 Kawei bendiyeing ne eno xey a bong xuk wou tambiy tiwei wong a lam o. De boukeing nam eno xelti tyek se bong xuk. 5 Gyeik ingwei a toundei eivek tembuing sapa ne, eno a maxow xeiyaing wei tembuing sapa yo."

6 Yesu neil ambei nyon, dom pesuv myalouk lek tembuing me wong e wo bandis de toung lek moux tiyon manghalus. 7 Moxo neil wou e, "La, wang na zipek eivek lounyeing wei Siloam nei" (qayeeng tiyon qes ambei inye wong e la). Om moux tiyon la lipek, de loum beeng eno manghalus yeila.

8 Moxo xe xel wei e beeng qes o me xel wei yei e takwei gyeik e mindei me tay lulul eno teling bei, "Beip inyei tambiy tiwei mindei me tay lulul o?" 9 Xel valu neil embei e inyon.

De xel valu neil embei, "Ma, inye xel nge ekom ma nambei e."

Ekom moxo venaxow neil xow teyei bei, "Inye ay yo."

10 Xel teling e, "Woyom nambei nya wa mamghalus yeila?"

11 Moxo neil elox bei, "Tambiy tiwei xel mi neil Yesu eno wong tembuing wo bandis me toung lek a mang. Moxo neil wou ay bei a na zipek anghei Siloam. Om a la lipek, de woyom a mang yeila."

12 Xel teling e bei, "Moux tiyon inya?"

Moxo neil embei, "A se woulek."

Yesu vet moux 5,000

13 Yesu ngo vati wei belup on, moxo la veil beyeeng me la lek bot me la ingwei xel ma veil o. Xel qendu ngandoung on ngo tine me betiy e me la vaxend nanghei beyeeng nayak ngenong on. 14 Yesu teila me yei xel qendu ngandoung on, moxo lalei pyaxow en xel om wong xel xe vanei wo nimzalek.

15 Ka ingwei di souk o, xel betiyeing lam me neil wou e, "Beyeeng bandaing tine xel ma veil, de moxo di bouk tiyo inye mouyo. Wong xel qendu ngandoung on la, en kandek xel na beyeeng nei me na bou xend yaeing valu yo."

16 Yesu neil elox, "Xel na enva? Xam ghe bong lul yaeing valu wou xel en xel gya."

17 Xel neil wou e, "Yaing ngenong ma veil xa yo, inye belet lim de woing yuw xemou."

18 Moxo neil, "Xam qou dalus me lam inye wou ay." 19 De moxo neil wou xomaxoneing on bei xel mendei tembuing lek lesilek on. Moxo qou belet lim on me qou woing yuw on is dom yeila tyoung gheyapu nei, me wo dange wou dom dembu. Woyom wong wou e xe xel betiyeing, me xel betiyeing wong wou xel xomaxoneing on. 20 Xel dalus on ya me enden xel, de xel betiyeing qekuwou myapapu wei xel se ya yo eivek pasik xoumeeng yuw. 21 Xel moux wei ya yaeing on teyei lek 5,000. Xel se pyaw memend wou xel vex alis neundyeiw.

Yesu neil dom laweeng valeivek ma

35 Lek bouk kayon gyeik soukeing di lam, eno moxo neil wou e xe xel betiyeing, "Xey ambei na nge loxalu nei." 36 Xel ghanaw xomaxoneing qendu ngandoung on dom xel qou e me la lek bot tiwei Yesu toundei lek o. Inyon bot valu la is xel. 37 De inyon laweeng valeivek ti tyip, me mamileeng di vuklek me lam leislek bot me embim a puplek. 38 Yesu toundei eivek bot leyus, me di yeip lek pilo. Xel betiyeing piyexe e me neil wou e, "Putoung, inyon wa seng pyanaleim en ingwei xey a bim a mey ne?"

39 Moxo qandi lek me luk nikanzek wou laweeng de neil wou mamileeng wei di vuk me lam on, "Denduing ma! Dom weip kanzek!" Woyom laweeng mey de mamileeng yeip kanzek.

40 E neil wou xel betiyeing, "Nambei nya ekom xam ghe waleeng? Beip xam seng ghei wongis?"

41 Xel yaleeng ngandoung me teling wouma, "Tambiy tine eti? Omek laweeng me mamileeng ngo e vya ne!"

25 Me vex ti mindei inyon, eno e xe gyand mi lam teyei lek vakovek qes xoumeeng yuw. 26 Vexo mi qou vanei ngenong wou dokta ngenong me saing malew dalus wei e yo, ekom vanei yon se ma qe mi wo nol wou e. 27 Gyeik vexo ngo qayeeng en Yesu, vexo lam apu paviy e demi eivek xel qendu yon me axlek e xe teimb ding, 28 en vexo wounalei, "Wangwei a mou daxlek e xe teimb, tyek a bong nimzalek." 29 Lutika eno vexo gyand touk me vexo axe lek xow bei wo nimzalek veil myavanei wei mi qou yo.

30 Lutika eno Yesu woulek bei nikanzek valu la veil e. Moxo pekwi ma vivekwou eivek xel qendu ngandoung on me teling, "Eti axlek a xe teimb?"

31 E xe xel betiyeing neil elox, "Wang wei xomaxoneing qendu ngandoung on nale lip is wang on, om nambei nya wang teling, ‘Eti axlek ay?’ "

32 Ekom Yesu vena di yei e vivekwou bei gyei bei eti ka wong inye. 33 Woyom vex on vena woulek vati wei tyip wou e yo, om lam me ev vaxa qatu me yeip ma eivek tembuing me etek is yalenyeing, dom neil wou e zonghek en lul dalus. 34 Moxo neil wou vex on, "A neung vex, wa xe wongeingis wong wang wo nimzalek. La is laleim vevopeing. Vanei wei wang qou yo eno ma dom wang wo nimzalek."

Yesu tiy memo veil moux ti

1 Xel la nge loxalu wei lounyeing Galili me la tembuing danghei wei xel Gerasa nei. 2 Gyeik Yesu lam myayaing veil bot, lutika eno moux tiwei laweeng nilaxes dei eivek e eno lam veil beyeeng wei meyeing o, me lam wou e. 3 Moux tine mindei eivek beyeeng wei meyeing o, xelti se teyeimbei tup e no, o se teyeimbei xel bako e nangya sen. 4 En e yon xel mi toung sen eivek e mema me vaxa, ekom moxo mi tax sen la yuw me pyaw aen mi pek lek vaxa. Xelti se ninkanzek teyei bei bong embo males. 5 Boukeing me bendiyeing eivek eeng wei meyeing me lukendu nayak senghoing, eno moxo mi eng ngandoung me ghuw xow angya qakous.

6 Gyeik e yei Yesu nanghei dingta, moxo veimya me la ev vaxa qatu eivek wou e manghalus. 7 Moxo ghak niseikeing bei, "Yesu, Anutu Neu wei gheyapu ghanaw veil o, wambei bong vati wou ay? Neil neing lek Anutu lei, bei tyek wa seng bong myaveweeng wou ay!" 8 En Yesu neil wou e woy bei, "Wa laweeng nilaxes on, lam myayaing veil moux tine!"

9 Woyom Yesu teling e, "Wa leim va?"

Moxo neil elox, "A leing qendu ngandoung wei vevek, en inye xa ngenong." 10 Om moxo tay wou Yesu lumama bei, e se bong xel na myayaing veil tembuing senghoing kayon.

11 Bok qendu ngandoung ti eno di ya paviy lukendu nayak on nenyawes. 12 Xel memo on tay wou Yesu bei, "Wong xa la eivek xel bok on." 13 Moxo lenghek lek xel, om laweeng nilaxes on lam myayaing me la eivek bok. Bok qendu ngandoung on teyei lek ambei 2,000 eno veimyend niseikeing me la oing mazanghei me lepla eivek lounyeing me num memiing de mey.

14 Xel wei mi vet bok eno pek me la neil qayeeng tine eivek beyeeng nayak me beyeeng beimambei nei om xomaxoneing la myayaing bei na gyei vati wong tiyon. 15 Gyeik xel lam wou Yesu, xel yei moux tiwei memo ngenong mindei eivek e yo, eno byex teimb me e lupeyei yon yeip yaing, om xel yaleeng. 16 Eti yeiw wei xel yei eno neil wou xomaxoneing en vati wei belup wou moux wei memo mindei eivek o, me neil e lala en bok is ambei nyon. 17 Woyom xomaxoneing tay wou Yesu bei e na veil xel xe tembuing danghei tiyon.

18 Ka Yesu embei na eivek bot, moux wei memo dei eivek e yon lam tay wou Yesu bei na is e. 19 Yesu se lewexe lek e, qe neil, "La bam wou limyeiyeiw me neil wou xel, en vati wei Tambiy Ngandoung wong wou wang o, en ingwei lalei pyaxow en wang o." 20 Om tambiy on la veil e me di neilteyei eivek tembuing danghei dalus wei Dekapolis nei en vati wei Yesu wong wou e yo. Om xomaxoneing dalus on etek en qayeeng on.

Vexawo wei mey me vex wei myavanei yo

21 Gyeik Yesu lox me la nge loxalu lek bot eivek lounyeing eno xomaxoneing qendu ngandoung qekuma me lam wou e gyeik e toungale paviy lounyeing o. 22 Woyom gyovaxa wei xomek qekueing ama eno ti lei Yairus, lam inyon. Yei Yesu, om moxo ev vaxa qatu eivek wou e vaxa, 23 me tay wou e, "A neung vex yak eno e bim a mey, om lam liw memam lek vexo en kandek e xe vanei e ma dom mendei mapieing." 24 Om Yesu la is e.

Xel qendu ngandoung ti betiwou e me vingama vivekwou e. 25 Me vex ti mindei inyon, eno e xe gyand mi lam teyei lek vakovek qes xoumeeng yuw. 26 Vexo mi qou vanei ngenong wou dokta ngenong me saing malew dalus wei e yo, ekom vanei yon se ma qe mi wo nol wou e. 27 Gyeik vexo ngo qayeeng en Yesu, vexo lam apu paviy e demi eivek xel qendu yon me axlek e xe teimb ding, 28 en vexo wounalei, "Wangwei a mou daxlek e xe teimb, tyek a bong nimzalek." 29 Lutika eno vexo gyand touk me vexo axe lek xow bei wo nimzalek veil myavanei wei mi qou yo.

30 Lutika eno Yesu woulek bei nikanzek valu la veil e. Moxo pekwi ma vivekwou eivek xel qendu ngandoung on me teling, "Eti axlek a xe teimb?"

31 E xe xel betiyeing neil elox, "Wang wei xomaxoneing qendu ngandoung on nale lip is wang on, om nambei nya wang teling, ‘Eti axlek ay?’ "

32 Ekom Yesu vena di yei e vivekwou bei gyei bei eti ka wong inye. 33 Woyom vex on vena woulek vati wei tyip wou e yo, om lam me ev vaxa qatu me yeip ma eivek tembuing me etek is yalenyeing, dom neil wou e zonghek en lul dalus. 34 Moxo neil wou vex on, "A neung vex, wa xe wongeingis wong wang wo nimzalek. La is laleim vevopeing. Vanei wei wang qou yo eno ma dom wang wo nimzalek."

35 Ka Yesu nanghei di luk, moux valu lam anghei Yairus xe xomek, inyon gyovaxa wei xomek qekueing ama yo. Xel neil, "Wa neum vex eno mey, wa seng bo nimaying ti wou Putoung no."

36 Yesu se li nenya wou vati wei xel neil o, qe neil wou gyovaxa wei xomek qekueing ama yo, "Wa seng gwaleeng. Qe wang bongis."

37 Moxo se wong xelti betiwou e qe Petele, Jems me Yoan wei Jems li moux o. 38 Gyeik xel lam xomek wei gyovaxa wei xomek qekueing ama yo, Yesu yei xomaxoneing di wo nindenduing is engeing me di wo talot. 39 Moxo eivek la lalei me neil wou xel, "Nambei nya xam ghe di eng me ghe wong nindenduing ngandoung on enva? Vex yak ne mou se mey ti qe di yeip o." 40 Ekom xel napexe e.

Ka e tiy xel dalus la myayaing, eno qou vex yak on ma me ta me e xe betiyeing wei la is e yo me xel la eivek ingwei vex yak on di yeip anghei yo. 41 E zeim vexo mema dom neil wou vexo, "Talita kum," qes ambei nye, "Vex yak, a neil wou wang, qandi lek!" 42 De lutika eno vex on nale ghey me vivek eivek xomek. En inye vex on xe vakovek qes xoumeeng yuw. Om xel on etek niseikeing. 43 Moxo wong petieing tine bei xel se bong xelti boulek inye, me neil wou xel bei xel bong lul yaeing valu wou vexo bei e gya.

Yesu di la lek lounyeing

22 Lutika eno Yesu wong xel betiyeing la eivek bot me la tax en e me la nge loxalu, dekakom wong xel qendu ngandoung on la. 23 Ka ingwei wong xel on la woy, moxo venaxow lek la lukendu bei na zeimema. Gyeik ingwei boukeing di lam eno e maxow toundei inyon, 24 ekom bot vena la dingta takwei nei veil tembuing, me laweeng vei mamileeng vuk me lam leislek bot is xel.

25 Ka embim boyaing eno Yesu di la wou xel, me la lek lounyeing mapu. 26 Xel betiyeing yei moxo di la lek lounyeing mapu, om xel yaleeng me neil, "Inye memo ti nu." Om xel yaleeng me nyayek.

27 Ekom Yesu wo daing me neil wou xel, "Xam nale nimkanzek! Inye ay yo. Om xam seng gwaleeng."

28 Petele neil elox bei, "Tambiy Ngandoung, wangwei inye wang nei, ond neil me a lak wou wang lek memiing on."

29 Moxo neil, "Lam."

Woyom Petele teila veil bot, dom la lek memiing mapu me la wou Yesu. 30 Ekom moxo yei laweeng, moxo yaleeng mouyo, me di teila eivek manghembi, om taxe niseikeing, "Tambiy Ngandoung, vind ay!"

31 Lutika eno Yesu tatei mema la me vyex e. Moxo neil, "Wa xe wongeingis on nayaka. Wa laleim on wo yuw enva?"

32 Woyom luw lek la eivek bot, de laweeng on mey. 33 Woyom xel wei toundei eivek bot on wong lalo wou e, me neil, "Neing ayang wang on Anutu Neu Moux."

Yesu wong bezombeing ti wo nimzalek

1 Bouk valu lak veil, eno Yesu lox me la Kapenaom me xomaxoneing ngo bei e toundei eivek beeng. 2 Om xomaxoneing ngenong qekuma om xomek lalei yon puplek, me elam myayaing wei xomek mya eno is, de moxo di neil Anutu xe xoulek wou xel. 3 Xomaxoneing valu lam, xel qou tambiy wei vaxa bezomb o ti me lam wou e, moxo kanzek mey, de xel vey qalei e lek lelek. 4 Tyek xel se teyeimbei qou e me na wou Yesu en inye xel ngenong pup xomek lek, om xel gwang xomek demi qetyei nanghei kawei Yesu toundei eivek o, de xel wong tambiy wei vaxa bezomb on teila kaka is lelek wei di yeip lek o. 5 Gyeik Yesu yei xel xe wongeingis, moxo neil wou vaxa bezombeing on bei, "A neung moux, wa xe sewokeing on a semaleeng veil."

6 De woyom xel putoung valu wei petieing eno toundei inyon, xel venaxow di wou naleind naleind bei, 7 "Nambei nya xomaxoneing tine neil qayeeng ambei nyon? Moxo lukyak lek Anutu! Eti teyeimbei semaleeng sewokeing veil, qe Anutu venaxow?"

8 Lutika eno Yesu axe lek xow en vati wei xel venaxow di wou naleind en o, om moxo neil wou xel, "Nambei nya xam ghe di wou naleimim en tine? 9 Qayeeng vati wo pok bei a neil wou vaxa bezombeing on, ‘Wa xe sewokeing a semaleeng veil,’ o a neimbei, ‘Qandi, de qou wa xe lelek me la?’ 10 En kandek wang boulek bei inyon Xomaxoneing Neu Moux wei wo lei ngandoung lek tembuing bei semaleeng sewokeing." Moxo neil wou tambiy vaxa bezomb on, 11 "A neil wou wang, qandi, de qou wa xe lelek me la bam." 12 Moxo qandi lek me qou e xe lelek me la myayaing eivek xomaxoneing on dalus mend. Tine wo etekeing wou xel tambakateiv on om xel sanghoxe Anutu lei, me neil, "Xa se mi xei lulti nambei tine!"

Meyeing wei Laserus o

1 Ekom inyei tambiy ti lei Laserus eno vanei wong. Moxo nanghei Betani, beyeeng wei Maria luw li vex Marata yo. 2 Maria tiyon, takwei eno taw wel xeimangou lek Tambiy Ngandoung me vu e vaxa en luvelus, eno li moux Laserus vanei wong me e di yeip. 3 Om li vex aluw wong qayeeng la wou Yesu bei, "Tambiy Ngandoung, moux tiwei wa laleim vind eno vanei wong."

4 Ka ingwei Yesu ngo inyon eno moxo neil embei, "Vanei yon se en ingwei xomaxoneing embei mey o. Ma, inyon embei talex Anutu xe nikanzek wou moux alis vex en xel bong e lei na, en kandek xel bong Anutu Neu Moux na qou lei ngandoung is." 5 Yesu lalei vind Marata me li vex me Laserus. 6 Ekom gyeik ingwei moxo ngo bei Laserus vanei wong, eno toundei inyon teyei lek bouk yuw is no.

7 Woyom moxo neil wou e xe xel betiyeing bei, "Xey ambei nox me na Yudia."

8 Xel neil embei, "Putoung se ghei denlek ingwei Yudayeiw embei banex wang en qakous o ti, ekom wa being nox me na inyei no?"

9 Yesu lewexe, "Beip inye se seivma xoumeeng yuw lek bendiyeing ti? Tambiy tiwei mi velewexe bendiyeing eno se mi beng en mi yei tembuing xe xeiyaing. 10 Ekom gyeik ingwei e velewexe eivek boukeing eno tyek na beng en xeiyaing ma veil e."

11 E neil tine dekakom moxo neil wou xel, "Xe xe gweleeng Laserus yeip, ekom ambei na inyei en nana piyexe e."

12 E xe xel betiyeing neil elox bei, "Tambiy Ngandoung, wangwei emdi gyeip on tyek bo nimzalek." 13 Yesu neil en ingwei e xe meyeing o, ekom e xe xel betiyeing embeik nge Laserus di yeip.

14 Om moxo neilteyei wou xel bei, "Laserus mey, 15 de en xam eno a wo xeinglala ngandoung en a se toundei inyei, om tyek xam ghe bongis. Ekom xey ambei na wou e."

16 Woyom Tomas (wei xel mi neil Didimas) eno neil wou xel betiyeing valu bei, "Wong xey dalus a la, en nana mey is e yo."

Yesu qes wei qandieing lek me mapieing o

17 Gyeik Yesu la eivek Betani eno ngo bei Laserus mey woy me xel ev eivek leiveeng meyeing de bouk vey la veil. 18 Betani toundei paviy Yerusalem nambei kilomita yayal, 19 de xel Yudayeiw ngenong lam toundei is Marata luw Maria me byexaxoun luw en ingwei li moux mey o. 20 Marata ngo bei Yesu lam, eno la myayaing en embei na pelong e, dom Maria toundei eivek xomek.

21 Marata neil wou Yesu bei, "Tambiy Ngandoung, wangwei wa toumendei inye nei on tyek a ling se mey. 22 Ekom gweimbeeng a woulek bei Anutu tyek bong vati wei wambei teling wou e yo."

23 Yesu neil wou vexo bei, "Wa lim moux tyek qandi lek no."

24 Marata lewexe bei, "A woulek bei moxo tyek qandi lek no eivek bouk loxyus wei xel embei qandi lek o."

25 Yesu neil wou vexo bei, "A maxow qandieing lek me mapieing qes. Xelti embei bongis ay eno tyek na toumendei mapieing gyeik e mey o, 26 de xel eti yeiw wei toundei mapieing me wongis ay eno tyek se teyei bei mey. Beip wang wongis tine?"

27 Marata neil wou Yesu bei, "Ee, Tambiy Ngandoung, a wongis bei wa Kilisi, Anutu Neu Moux, tambiy tiwei embei nam lek tembuing o."

28 Deka Marata neil tine, eno lox me la taxe li Maria la nenyawes. De ngoung wou e, "Putoung lam toundei inye me di teling en wang." 29 Maria ngo tine, eno vexo qandi lek daing me la wou Yesu. 30 Yesu seng ghei la eivek beyeeng, qe nanghei toundei beyeeng wei Marata la pelong e yo. 31 Xel Yudayeiw wei toundei is Maria eivek xomek me ghanduxoun e, eno yei ingwei vexo qandi lek daing me la myayaing om xel betiy e, xel embeik nge embei na bo talot anghei ingwei leiveeng meyeing nei.

32 Maria la tyip beyeeng wei Yesu toundei yo me yei e, eno vexo ev vaxakatu eivek wou moxo vaxa me neil, "Tambiy Ngandoung, wangwei wa toumendei inye nei on tyek a ling moux se mey."

33 Yesu yei ingwei vexo eng, me Yudayeiw wei lam is e eno di eng is, om moxo lalei pyaxow me embei deeng. 34 Moxo teling bei, "Xam ghe liw e nanghei inya?"

Xel neil elox bei, "Tambiy Ngandoung, lam me wei."

35 Yesu eng.

36 Woyom Yudayeiw neil embei, "Xam wei ingwei moxo lalei mi vind e mouyo!"

37 Ekom xel valu neil embei, "Tambiy tine mi wong xel wei mentekeing eno mi yeila, ekom nambei nya se teyei bei devind tambiy tine veil meyeing?"

Yesu piyexe Laserus veil meyeing

38 Yesu lalei pyaxow no me la ingwei leiveeng meyeing nei. Inyei eeng wei xel kwelexe eivek qakous me lax mya zeyi yo. 39 Moxo neil embei, "Xam wo qakous veil."

Marata wei li moux mey eno neil embei, "Ekom Tambiy Ngandoung, tyek bo niliy, en yeip inyon bouk vey la veil o."

40 Woyom Yesu neil embei, "Beip a se neil wou wang bei wangwei wang bongis, on tyek wang gwei Anutu xe nikanzek ngandoung?"

41 Om xel qepei qakous veil. Woyom Yesu veilma lek me neil embei, "Mang, a wong dange wou wang en wang mi ngo ay. 42 A woulek bei taxombouk eno wang mi ngo ay, ekom a neil inye en nimza wei xomaxoneing wei toungale inye, bei xel bongis bei wang wong a lam."

43 Ka Yesu neil tine woy, eno taxe xoulekeing bei, "Laserus, lam myayaing!" 44 Moux wei mey eno lam myayaing, xel beliv e mema luw me vaxa luw en qaeing de beliv qaeing vivekwou e ma.

Yesu neil wou xel "Xam tul qaeing wei leiveeng meyeing eno veil de wong e la."