Agradecimento pela vida

6 Bika bibioso bilembo vumuna bizitisa Yave.

Luzitisa Yave.

Yave weti nungisa batu bayamusu

1 Luzitisa Yave ;

Zitisa Yave, a muelꞌama.

2 Ndiela zitisanga Yave mu luzingu luama loso ;

ndiela yimbidilanga Nzambi ama minzitusu

thangu yoso ndizingila.

13 Ngeyo wuvanga binama biama bi khati nitu ;

ngeyo wuthunga va kimosi mu vumu ki ngudi ama.

14 Ndikuzitisa bila ndidi vangu ki tsisi ayi kitsiminanga ;

mavanga maku madi matsiminanga ayi nzebi buawu bumboti.

15 Khubukulu ama yi mimvesi yisia suama va ntualꞌaku ko

mu thangu ndikubuku mu buangu kisuama ;

mu thangu ndivangu va kimosi ku tsina ntoto.

16 Meso maku mamona nitu ama yikambu kubuku.

Bilumbu bioso biobi wukhubikila biba bisonama mu bukuꞌaku,

tuamina lumbu kimosi mu biawu kiba.

33 Ndiela yimbidilanga Yave mu luzingu luama loso.

Ndiela yimbidilanga Nzambi ama minzitusu thangu yoso yi luzingu luama.

34 Bika mambu mama ndinyindula mammonisa khini

banga phila ndilembo muena khini mu Yave.

3 Luzaba ti Yave niandi Nzambi.

Niandi wutuvanga ayi niandi wutuvuidi.

Tuidi batu bandi ; nkangu andi, wu mamemi

wowo kedi dikila.

4 Kotanu mu mielo miandi mu phutudulu matondo

ayi mu ziphangu ziandi va kimosi ayi minzitusu.

Lumvutudila matondo ayi luzitisa dizina diandi.

7 Tala phila luzolo luaku lu ngolo lukambu thalu !

Luidi luzangulu ayi lukululu va khatitsika batu

bobo bansuaminanga ku tsi phozi yi mavevi maku.

8 Beti tula minyengo mu wombo di bima bi nzo aku

ayi ngeyo wukubanuikinanga mu nlangu

wu makhini maku.

9 Bila kuidi ngeyo kuidi tho yi luzingu.

Mu kiezila kiaku, tulembo moni kiezila.

Ngeyo wuphutudila luzingu

1 Ndiela kuyayisa, a Yave

bila ngeyo wuthotula mu dibulu didi thipula

Wusia tia ko ti bambeni ziama zimona khini

mu diambu diama.

2 A Yave, Nzambi ama, ngeyo nditela mu diambu di lusadusu

ayi ngeyo wumbelusa.

3 Yave, ngeyo wuthotula mu tsi bafua,

ngeyo wuthanina muingi ndibika tibuka mu dibulu.

Nzambi wuzenga nkanu mu busonga

1 Ndiela kuzitisa, a Yave, mu ntimꞌama wumvimba.

Ndiela yamikisa matsiminanga maku moso.

2 Ndiela mona khini ayi ndiela sakadala mu ngeyo,

Ndiela yimbidila nzitusu mu diambu di dizina diaku,

ngeyo Nzambi wuzangama.

20 Mu zithangu zioso, luvutudilanga Nzambi Tata matondo mu mambu mamo mu dizina di Pfumuꞌeto Yesu Klisto.

Nlemvo wu Nzambi mu Klisto.

3 Bika Nzambi kakemboso,

niandi Dise di Pfumu eto Yesu Klisto !

Niandi wutusakumuna mu zitsakumunu zioso

zi phila mu phila zi kipheve mu Diyilu mu Klisto.

15 Matondo kuidi Nzambi mu diambu di dikaba diandi dinnenidiodi dilendi baka busudukusulu ko.

12 Mu khini, luvutulanga matondo kuidi Tata wutufuanisa muingi mamveno lubaka bu tambudila kiuka kioki kalundila banlongo boso mu kiezila. Bila :

13 Niandi wutukula mu lulendo lu tombi

ayi wutunata mu Kipfumu ki Muanꞌandi wu luzolo ;

14 mu niandi tutambudidi khudulu

ayi tutambudidi nlemvo wu masumu.

15 Niandi mfikula yi Nzambi

yi kayimonikanga ko

ayi niandi wuthete mu butuka mu bivangu bioso.

16 Bila mu niandi bima bioso bivangulu :

bima biobi bidi mu diyilu

ayi bima biobi bidi va ntoto,

biobi bieti monika

ayi biobi kabi monikanga ko,

biba bikundu bi kipfumu voti bipfumu,

voti bikulutu voti batu ba lulendo.

Niandi wuvanga bima bioso ;

ayi biawu bivangulu mu diambu diandi.

17 Niandi widi ku ntuala bima bioso

ayi bima bioso binzinga mu niandi.