Agradecimento pela vida
Agradecer pela vida é reconhecer que cada respiração é dom de Deus. Toda criatura que tem fôlego louve ao Senhor — porque Ele nos formou e nos sustenta com amor.
सोभै ज़िऊंदै ज़ीब करा तेऊए ज़ै-ज़ैकार!
बिधाते करा सोभै ज़ै-ज़ैकार!
बिधातो नसाफ
बिधाते ज़ै-ज़ैकार करा,
ए मेरै मन्नां, बिधाते ज़ै-ज़ैकार कर।
आपणीं ज़िऊंदी ज़िता रहणअ मुंह तेऊए ज़ै-ज़ैकार करदै लागी,
सारी ज़िन्दगी रहणअ मुंह गिहा बोली तेऊए ज़ै-ज़ैकार करदै लागी।
तंऐं आसा मेरी देही भितरे सोभै गल्ला बणाईं दी,
मेरी आसा आपणैं हाथै मेरी माए ओदरै हुंह बूणअ द।
हुंह करा तेरअ शूकर किल्हैकि ताखा लागा डरनअ ई,
ज़ेऊ साबै तंऐं हुंह बणाअं सह आसा बडअ ज़बर अर नोखअ!
ऐहा गल्ला समझ़ा हुंह ज़ाथी राम्बल़ै करै।
मेरी माए ओदरै ज़ोल़ै तंऐं
मेरै हाडकै-हाडकै बडै राम्बल़ै करै,
हुंह त गुप्त बझ़दअ लागअ द
पर ताखा निं मेरी किछ़ै च़ीज़ गुप्त आथी ती,
तूह त मेरै ज़ल्म हणैं का आजी मुंह बझ़दै भाल़अ लागअ द।
मेरै ज़ल्म हणैं का आजी थिऐ तंऐं
मेरी ज़िन्दगीए हर धैल़ै
आपणीं कताबा दी लिखी हेरै दै डाही।
हे बिधाता, मुंह बोल़णीं सारी अमरा तेरी ज़ै-ज़ैकारे गिहा,
ज़ेभै तैणीं हुंह ज़िऊंदअ रहे, तेभै तैणीं रहणअ मुंह तेरै भज़न बोल्दै लागी।
तूह लोल़ी त मेरी सोठ अर गिहा करै खुश हुअ,
किल्हैकि मुल्है खुशी एछा ताखा ई।
तम्हां का आसा थोघ बिधाता आसा परमेशर,
हाम्हैं आसा तेऊ बणाऐं दै अर हाम्हैं आसा तेऊ ई लै,
हाम्हैं तेऊए परज़ा आसा तेऊए ई घैहणीं च़रदी भेडा-बाकरीए हेल़्ही ज़िहै।
तेऊए प्रऊल़ी भितरी डेओआ शूकर करदी,
अर तेऊए खोल़ै डेओआ ज़ै-ज़ैकार करदी।
तेऊओ करा शूकर अर ज़ै-ज़ैकार।
तेरअ हाम्हां मणछा लै झ़ूरनअ आसा किम्मती खज़ानै ज़िहअ!
हाम्हैं लआ तेरै फैंखा हेठै शरण।
तूह दैआ हाम्हां लै आपणैं घअरा का रज्ज़ी खाणां लै,
तूह दैआ हाम्हां आपणीं भलाईए गाडा का रज्ज़ी झुटणा लै।
ज़िन्दगी दैणैं आल़ी सोबल़ आसा ताखा ई,
अर तेरै धुप्पै करै हआ हाम्हां सोभी लै प्रैश्शअ।
बिधातो शूकर
हे बिधाता, मुंह करनी तेरी ज़ै-ज़ैकार
किल्हैकि तंऐं डाहअ हुंह बच़ाऊई अर
तंऐं निं मेरै दुशमणा लै खुशी दैनी हणैं।
ए मेरै बिधाता, मंऐं पाई ताह सेटा पकार अर तंऐं
किअ हुंह नरोगअ।
हे बिधाता, तंऐं बच़ाऊअ हुंह मरनै का
हुंह हणअ त घोरी पल़अ द, पर
तंऐं डाही मेरी ज़िन्दगी बच़ाऊई।
ज़ितणा लै करा बिधातो शूकर
महान बिधाता, मुंह करनी दिला का तेरी ई ज़ै-ज़ैकार,
ज़ुंण महान काम तंऐं आसा किऐ दै, तिंयां खोज़णैं मुंह सोभी का।
ताह पिछ़ू मनाऊंणी मुंह खुशी,
तूह परम प्रधान परमेशर बिधाता आसा सोभी का बडअ, मुंह बोल़णैं तेरै ई भज़न।
सदा करनअ सोभी गल्ला लै म्हारै प्रभू ईशू मसीहे नाओंऐं बाब परमेशरो शूकर।
मसीहा दी आत्मिक बर्गत
परमेशरो करा शूकर ज़ुंण म्हारै प्रभू मसीहा ईशूओ बाब आसा। तेऊ दैनी हाम्हां लै मसीहा दी स्वर्गे ज़ैगा सोभी रंगे आत्मिक बर्गत। किल्हैकि हाम्हैं हुऐ मसीहा संघै एक।
परमेशरो आसा तेऊ दाना लै शूकर, सह दान ज़ुंण मसीहा आसा ज़ुंण एतरअ महान कि तेते बारै खोज़णअ आसा म्हारै बशा का बागै।
हाम्हैं करा हर बगत बाब परमेशरो शूकर, ज़ुंणी तम्हैं एता जोगी बणाऐं कि तम्हैं बी तेऊ प्रैश्शै दी पबित्र लोगे ज़ैदाता दी साझ़ू होए ज़ेते तेऊ आपणैं लोगा लै करार आसा किई दी।
किल्हैकि तेऊ ई छ़ड़ैऊऐ हाम्हैं न्हैरै दी काम करनै आल़ी राख्से शगतीए बशा का अर तेऊ पजैल़ै हाम्हैं आपणैं पैरै पूते राज़ा दी। आपणैं पूतो बल़ीदान करी तेऊओ लोहू बहाऊई दैनअ तेऊ हाम्हां लै राख्से शगती का छ़ुटकारअ मतलब म्हारै पाप किऐ माफ।
मसीहा दी मेल़-ज़ोल़
हाम्हैं निं परमेशरा भाल़ी सकदै,
पर ज़ांऊं मसीहा ईशू मणछ देही लई, तेऊ भाल़ी लागअ हाम्हां का थोघ कि परमेशर किहअ आसा
किल्हैकि मसीहा ईशू आसा परमेशरा ई ज़िहअ।
सह आसा सोभी का ज़ेठअ, तेऊ बाद ज़ेतरी बी गल्ला परमेशरै बणाईं,
सह आसा तिन्नां सोभिओ मालक।
किल्हैकि सह मसीहा ई त परमेशरा संघै सोभी गल्ला बणाणैं आल़अ,
स्वर्गै या पृथूईए, भाल़ी दी होए या नांईं भाल़ी दी होए,
कै राज़गाद्दी, कै राज़, कै गुप्त संसारे शगती।
सारी च़िज़ा आसा तेऊ करै अर तेऊए ई अदर करना लै बणाईं दी।
सोभी च़िज़ा बणाणैं का आजी त मसीहा,
अर सोभै च़िज़ा रहा तेऊ ई दी कठा काम।
आपणैं परमेशर बिधाता निं बिस्सरुई
"ज़ांऊं तम्हैं खाई-पिई रज्ज़ी जाए, तेता लै करै आपणैं परमेशर बिधातो शूकर ज़ुंणी तम्हां लै अह रज़दी-पज़दी ज़ैगा दैनी।
हे मेरै मालक, तूह आअ संघा बच़ाऊई मेरी ज़िन्दगी।
हुंह डुबअ समुंदरै पर्बते थाल्लै तैणीं,
मंऐं हेरअ त सोठी कि हुंह हुअ तैहा ज़ैगा कैद अर ऐबै निं हुंह तेता का कधि छ़ुटदअ!
पर ओ बिधाता, तेता का बी बच़ाऊई तंऐं मेरी ज़िन्दगी!
तंऐं बच़ाऊअ हुंह तैहा मौता का बी।
हुंह त ज़िक्की दैंदअ गअ द लागी,
तेखअ लागअ हुंह ताह बिधाते बारै सोठदअ,
मंऐं किई ताखा अरज़ अर मेरी पकार पुजी तेरी पबित्र ज़ैगा
ज़िधी तूह बस्सअ द आसा।