Ajuda ao próximo
Ajudar o próximo é mandamento de Deus e expressão prática da fé. A Bíblia ensina que a fé sem obras é morta — e que servir ao menor dos irmãos é servir a Cristo.
ತಮಿ ಹ್ಯ ರಾಜೆ ಗೆವ್ಹಾ ಕಾ ಮಂಜೆ ಮಿ ಬುಖ್ಯಾಲ್ತೊ ತುಮಿ ಮನಾ ಜೆವಾನ್ ದಿಲಸಾ ಮಿ ತಾನ್ಯಾಲ್ತೊ ತುಮಿ ಮನಾ ಪಾನಿ ಪಿಯಾ ದಿಲಸಾ ಮಿ ಯಕ್ಲಾಸ್ ಗರ್ಹಾತ್ನಿ ದುರ್ ಆಸ್ಥಾನಾ ತುಮಿ ಮನಾ ತುಮ್ಚಾ ಗರ್ಹಾತ್ ಗೇತ್ಲಾಸಾ ಮಿ ಉಗ್ಡಾ ಹುತೊ; ತುಮಿ ಮನಾ ಗಾಲಾಯಾ ಕಪ್ಡ ದಿಲಸಾ ಮಿ ದುಕ್ನ್ಯಾತ್ ಪಡ್ಲೊ ವ್ಹತೊ ತುಮಿ ಮಾಜಿ ಸೇವಾ ಕಿಲಿಸಾ ಮಿ ತುರುಗಾಂತ್ ಹುತ್ತೊ ತವಾ ತುಮಿ ಮನಾ ಬಗಾಯಾ ಆಲಾಸಾ’ ಮನ್ಹುನ್ ಸಾಂಗ್ತೊ.
"ತವಾ ಚಾ಼ಂಗ್ಲಿ ಲೊಕ, ‘ಪ್ರಭು, ತು ಬುಖ್ಯಾಲ್ಯಾಲಾ ಬಗುನ್ ಕವಾ ಜೆವಾನ್ ದಿಲ್ತ? ತು ತಾನ್ಯಾಲ್ಯಾಲಾ ಬಗುನ್ ಕವಾ ಪಾನಿ ಪಿಯಾ ದಿಲ್ತ ತು ಯಕ್ಲಾಸ್ ಗರ್ಹಾತ್ನಿ ದುರ್ ಆಸ್ಲ್ಯಾಲಾ ಬಗುನ್ ಕವಾ ಆಮ್ಚಾ ಗರ್ಹಾತ್ ಗೇತ್ಲಾ? ತುಲಾ ಕಪ್ಡ ನಸ್ಲ್ಯಾಲ ಬಗುನ್ ಕವಾ ಗಾಲಾಯಾ ಕಪ್ಡ ದಿಲ? ತು ದುಕ್ನ್ಯಾತ್ ಪಡ್ಲ್ಯಾಲಾ ನಾಹಿತ ತುರುಂಗಾತ್ ಗ್ಯಾತ್ಲ್ಯಾಲಾ ಬಗುನ್ ಕವಾ ತುಜಿ ಸೇವಾ ಕಿಲಿ? ಮನ್ಹುನ್ ಸಾಂಗ್ತಿಲ.
"ತವಾ ರಾಜಾನಿ, ‘ಮಿ ತುಮಾನಾ ಖರ ಸಾಂಗ್ತೊ. ತುಮಿ ಹಿತ್ತ ಮಾಜಾ ಬನ್ಹಿ ಬಾವ್ಹಾಂಚೆ ಸಾಟಿ ಕ್ಯಾ ಕ್ಯಾ ಕರ್ಸಿಲಾ ತ್ಯ ಸಗ್ಳ ಮನಾ ಕೆಲ್ಯಾ ಶಾರ್ಕಸ್’ ಮನ್ಲಾ.
ಕುನಿ ತರಿ ತುಮ್ಚಿಪ ಆಸ್ಲ್ಯಾಲ ಕಾಯ್ ತರಿ ಮಾಗ್ಲತ ತ್ಯಲಾ ದೇವಾ. ತುಮ್ಚಿಪ್ನಿ ಉಸ್ನ ಗಿಹ್ಯಾ ವ್ಹಯಿ ಮನ್ಹುನ್ ಆಲ್ಯಾಲ್ಯಾಲಾ ದಿಯಾಚೆ ಆಂದಿ ರಾಹು ನಕೊಸಾ.
ತಸಸ್ ತುಮಿ ಲೋಕಾನಾ ಉಜಿಡ್ ವ್ಹವುನ್ ರಾಹ್ಯಾ ವ್ಹಯಿ. ಆಸಿ ತುಮ್ಚಿ ಚಾ಼ಂಗ್ಲಿ ಕಾಮ ಬಗುನ್ ಸ್ವರ್ಗಾತ್ಲ್ಯಾ ತುಮ್ಚಾ ಬಾಲಾ ವವ್ಯಾಳುನ್ತ.
ತುಮಿ ಆಂದಿ ದುಸ್ರ್ಯಾನಾ ದೆವಾ ಮಂಜೆ ತುಮಾನಾ ದೇವ್ ದಿಯಿಲ್; ಮಾಪ್ ಚಾ಼ಂಗ್ಲ ದಡಪುನ್, ಹಾಲ್ವುನ್ ಆನಿ ಶಿಗ್ ಬರ್ಹುನ್ ತುಮ್ಚಾ ಪದರಾತ್ ಗ್ಯಾಲ್ನಾರ್; ಕಾ ಮಂಜೆ ತುಮಿ ಮ್ಯಾಪ್ಲ್ಯಾಲ್ಯಾ ಮಾಪಾನಿ ದೇವ್ ತುಮಾನಾ ಮ್ಯಾಪ್ನಾರ್.
ತವಾ ತ್ಯಾ ಲೊಕಾಂಚಾನಿ ತ್ಯಲಾ "ತಸ ಜಾ಼ಲ್ಯಾ ಆಮಿ ಕ್ಯಾ ಕರಾ ವ್ಹಯಿ? ಮನ್ಹುನ್ ಇಚಾರ್ಲ.
ತವಾ ಯೊಹಾನಾನಿ ತ್ಯನಾ ಉತ್ತರ್ ದಿಲಾ, "ತುಮ್ಚಿಪ ದೊನ್ ಆಂಗ್ಯಾ ಆಸ್ಲ್ಯಾಲ್ಯಾನಿ ಕುನಾಲಾ ಅಂಗಿ ನಸ್ನಾರ್ಯಾಲಾ ಏಕ್ ದೇವಾವ. ಆನಿ ಕಚಾಪ ಆನ್ ಹಾ, ತ್ಯನಿ ಆನ್ ನಸನಾರ್ಯಾಲಾ ಖಾಯಾ ದೇವಾವ" ಮನ್ಹುನ್ ತ್ಯನಾ ಸಾಂಗ್ಲ.
ತುಮಚ಼ ಕ್ಯಾ ಹಾ ತ್ಯ ಇಕುನ್ ಗರಿಬಾನಾ ದಾನ್ ಧರ್ಮ ಕರಾ ತಸಸ್ ಸ್ವರ್ಗಾತ್ ಫಾಟುನ್ ಜಾ಼ಯಿ ನಸ್ಲ್ಯಾಲ್ಯಾ ಪಿಸವ್ಯಾ ಪುಸುನ್ ಜಾ಼ಯಿ ನಸ್ಲ್ಯಾಲಿ ಆಸ್ಥಿ ಕರಾ ತಿಥ ಚೊ಼ರ್ ಯಯಿತ್ ನಾಹಿ ಕಸರ್ ಲಾಗತ್ ನಾಹಿ. ಕಾ ಮಂಜೆ ಕುಠ ತುಮಚ಼ ಧನ್ ತಿಥ ತುಮಚ಼ ಮನ್ ಹಾ.
ಮಿ ತುಮ್ಚಿ ಮಾಯಾ ಕೆಲ್ಯಾ ಶಾರ್ಕಿ ತುಮಿ ಯಕಾಮಕಾಚಿ ಮಾಯಾ ಕರಾಯಾ ವ್ಹಯಿಸಾ ಮನ್ಹುನ್ ಮಿ ತುಮಾನಾ ದೆತ್ಯಾಲಿ ಆಜ್ಞೆ ಜಾ಼ಲೆ.
ಸೊಪ್ತ್ಯಾಂಚೆ ಸಾಟಿ ಸ್ವತಾಚಾ಼ ಜೀವ್ ದೆತ್ಯಾಲೆ ಮಾಯೆವ್ನಿ ದುಸ್ರಿ ಮುಟಿ ಮಾಯಾ ನಾಹಿ.
ಸಗ್ಳ್ಯಾ ಗುಸ್ಟಿತ್ನಿ ಮೀ ತುಮಾನಾ ಮಾದರಿ ದ್ಯಾವಲೆ. ತುಮಿಬಿ ತಸಿಸ್ ರಾಬುನ್ ಬಳ್ ನಸ್ಲ್ಯಾಲ್ಯಾನಾ ಮಜ಼ತ್ ಕರಾಯಾವ್ಹಯಿಸಾ; ಆನಿ; ‘ಗಿಹ್ಯಾಚಾವ್ನಿ ದಿಯಾಚಾತುಸ್ ಖುಬ್ ಆಶೀರ್ವಾದ್ ಹಾ ಮನ್ಹುನ್’ ಪ್ರಭು ಯೇಸುನಿ ಸಾಂಗ್ಲ್ಯಾಲಾ ಸಬ್ದ ಯದತ್ ಥೆವಾ" ಮನ್ಲಾ.
ಹ್ಯಾ ಬೊಲ್ಯಾ ತ್ಯನಿ ಸಾಂಗ್ಲ್ಯಾ ನಂತರ್ ನಡ್ಗ ಮುಡುನ್ ತ್ಯಂಚೆ ಸಗ್ಳ್ಯಾಂಚೆ ಸಂಗ ಮಾಗ್ನ ಕರ್ತೊ. ನಂತರ್ ತೀ ಸಗ್ಳಿ ದುಃಖಾನಿ ರಡತ್, ತ್ಯಲಾ ಯಾಂಗ್ ಗಾಲ್ಹುನ್ ಮುಖ ದಿಲ ಜಾ಼ವುನ್ ಎ ಮನ್ಹುನ್ ಸಾಂಗ್ಲ. ತ್ಯನಿ ನಂತರ್ ಆನಿ ಮನಾ ಬಗ್ನಾರ್ನಾಹಿಸಾ ಮನ್ಹುನ್ ಸಾಂಗ್ಲ್ಯಾಲ್ಯಾಲಾ ತ್ಯನಾ ಖುಬ್ ದುಃಖ್ ಜಾ಼ಲ್ಹ ಆನಿ ತ್ಯಚಿ ಸಂಗ ವ್ಹಡಿಪರೆತ್ ಗಿಲಿತ ಆನಿ ತ್ಯಲಾ ಲಾವುನ್ ದಿಲಾ.
ಕೊರತೆತ್ ಆಸ್ಲ್ಯಾಲ್ಯಾ ದೇವಾಚಾ ಲೋಕಾನಾ ಮಜ಼ತ್ ಕರಾ, ತುಮಾಚಾ ಗರ್ಹಾತ್ಲಿ ದಾರ ವಳಕ್ ನಸ್ಲ್ಯಾಲ್ಯಾ ಲೋಕಾಂಚೆ ಸೇವೆ ಸಾಠಿ ಉಡ್ಗುನ್ ಥೆವಾ.
ದುಸ್ರ್ಯಾನಾ ಆವಾಡತ್ಯಾಲಿ ವ್ಹವುನ್ ರಾವ್ಹಾ ತುಮಾನಾಸ್ ತುಮಿ ನವ್ಹ
ಮನ್ಹುನ್ ಬಳ್ ಆಸ್ಲ್ಯಾಲ ಆಮಿ ಇಸ್ವಾಸಾತ್ ಬಳ್ ನಸ್ಲ್ಯಾಲ ಆಮಿ ಸುಸ್ವುನ್ ಗಿಹ್ಯಾ ವ್ಹಯಿ. ಆಮಾನಾಸ್ ವವ್ಯಾಳುನ್ ಗಿಹುನಾಹಿ.
ತುಮಿ ಯಕಾಮಕಾಚ಼ ವಜ಼ ಉಚ್ಲು಼ನ್ ಗೆವಾ, ಆಸ ಕ್ರಿಸ್ತಾಚ಼ ನೇಮ್ ಪುರ್ತಿಕರಾ.
ಚು಼ರಿ ಕರ್ನಾರಾ ಹಿತ್ನಿ ಮೊರ್ಹ ಚು಼ರಿ ಕರಾಚೆ ಆಂದಿ ಚಾ಼ಂಗ್ಲ ಕಾಮ್ ಕರುನಿ. ತವಾ ಗರಿಬಾನಾ ದಿಯಾ ತ್ಯಲಾ ವ್ಹನಾರ್.
ತುಮ್ಚಾತ್ಲ್ಯಾ ಪರತೇಕ್ ಯಕಾನಿ ಸ್ವತಾ ಆಪ್ಲಿ ತ್ಯವ್ಡಿಸ್ ನವ್ಹ ಆಂದಿ ದುಸ್ರ್ಯಾಂಚಿಬಿ ಚಿಂತಾ ಕರುನಿ.
ಇಸ್ವಾಸ್ ಆನಿ ಕಾಮ್
ಮಾಜಾ ಬನ್ಹಿ ಬಾವ್ಹಾನು, ಯಕಾನಿ ಆಪ್ಲ್ಯಾಲಾ ಇಸ್ವಾಸ್ ಹಾ ಮನ್ಹುನ್ ಸಾಂಗುನ್ ತ್ಯಚಿಗತ್ ಚಾ಼ಲ್ನ, ಕಾಮ ನಸ್ಲ್ಯಾಲಾ ಜಾ಼ಲಾತ ಉಪೆಗ್ ಕ್ಯಾ? ತಸ್ಲಾ ಇಸ್ವಾಸ್ ತ್ಯಲಾ ರ್ಯಾಕ್ನಾರ್ ಕ್ಯಾ? ತುಮ್ಚಾತ್ಲ್ಯಾ ಯಕಾ ಬಾವ್ಹಾಲಾ ನಾಹಿತ ಯಕ ಬನ್ಹಿಲಾ ಗಾಲ್ಹಾಯಾ ಕಪ್ಡ ನಾಹಿತ ತ್ಯಾ ದಿಸಾಚ಼ ಜೇವಾನ್ ವ್ಹಯಿ ಜಾ಼ಲತ, ತುಮ್ಚಾತ್ಲಾ ಯೊಕ್ ತ್ಯನಾ ಶರಿರಾಲಾ ವ್ಹಯಿ ಜಾ಼ಲ್ಯಾಲ ಪುರ್ನ ಕರಾಚೆ ಆಂದಿ ಸಮಾದಾನಾನಿ ಜಾ಼ವಾ, ತಾಪತ್ ಬಸಾ, ಪ್ವಾಟ್ ಬರ್ಹುನ್ ಖಾವಾ ಮನ್ಹುನ್ ಸಾಂಗಲ್ಯಾವ ಉಪೇಗ್ ಕ್ಯಾ? ತಸಸ್ ಕಾಮಾಲಾ ನಸ್ಲ್ಯಾಲಾ ಇಸ್ವಾಸ್ ಮೆಲ್ಯಾಲಾ ಜಾ಼ಲ್ಯಾ.
ಫನ್ ಹೇ ದುನೆತ್ ಸಂಪತ್ ಆಸ್ಲ್ಯಾಲಾ ಕೊನ್ತರಿ ತರಾಸಾತ್ ಆಸ್ಲ್ಯಾಲ್ಯಾ ಬಾವ್ಹಾಲಾ ಬಗುನ್ ಕನಿಕರಾ ದಾವಾಚೆ ಆಂದಿ ಶೊಡ್ಲಾತ ದೇವಾಚಿ ಮಾಯಾ ತ್ಯಚಿಪ ರಾಹ್ಯಾ ವ್ಹಯಿಲ್ ಕ್ಯಾ?