Ajuda ao próximo

35 Ura tonai qa burana ara sa qu iasiu, qa kidepe sara sa qu vabukusiu, na tinoni gotoqu sara ba qu vatoga vatalesiu agou pa miu ruma. 36 Na gagadoqu, ba qu vapopokosiu; qa mo, ba qu kopunisiu agou; tonai qa tapiu, ba qu ovikisiu tugu agou,> minagu.

37 Poni mai oea ira na tinoni tuvisidi, pira marigu, <Bangara, pa visa sa qu burana ao ko qe iago agei? Toto sa sa qu kidepe ao sa qe lao vanigo na pie agei? 38 Pa visa sa na tinoni gotomu qeunigo, ko qe vatogaigo pa mei ruma agei? Beto pa visa qe batigo na gagadomu ko qe vapopokogo agei? 39 Toto sa sa qe batigo qu korapa momoomu ao beto ko pa visa sa na suveremu pa ruma vaipiu ko qe lalao ovikigo agei?> marigu.

40 Poni mina oeria na Bangara sira, pira minaguniria, <Ma poja sosotonigou ara sagou: tonai qu roiti laonia agou kai roiti jongana tana kame ira na tasiqu nake poreveveidi aipira, sa qu korapa tugu roiti valame vanisiu ara sisa,> minagu.

42 Na tinoni sa tepago sa mu vania, beto na tinoni sa nyorogua tekua gu mai tamu biu sa muke uku peleni tu,>> sau si Jisu.

16 Ko agou ba mi tolanga vatale tu sa na miu kabere ko ira na tinoni mai batiria na miu roiti jongadi, ko mai vatarasaea sa na Tamamiu pa noka,>> sau si Jisu.

38 Mu ia vataleria na tinoni, ko mi ia vatalegou na Tamasa. Isa mina ianigou isa sa na ia nabuna, mina vei na boko kiko bou sa tasaqiti ko sa tanyonyoqoro vatale ko sa pugele nyonyoa beto qu tinu boborua na miu. Ura isa tugu na pada qu ia vatale veiniria ira na goto tinoni, poni sa isa tugu mina ia vatale veinigou sa na Tamasa,>> sau si Jisu.

10 Poni qai nanasa sira na minete tinoni, <<Ego ko na sa sa mene roitinia agei?>> qarigu.

11 Poni sa oeria isa sira, <<Isa na tinoni sa karu na ona soti, sa mi vania kame isa kepore ona. Beto isa sa poregana gagani, sa mi iaria tugu sira sa keporeniria,>> sauniria.

33 Mu vavainiria sira na miu isisongo beto na poatadi sa mu ianiria ira qai golaba. Mu tekua na pausu isa sake boka taunyara talulutu, isa sa na isisongo pa noka. Pa ia ketakoi sa mineke maragutu manyao, kepore na tinoni mai boka ikoa, beto na tamo minake boka ganiria. 34 Ura ketakoi qai kole na miu isisongo sa ketakoi tugu qai kole sa na bulomiu,>> sau si Jisu.

12 Api sa na garunu taqu: mu mekarai vairoqu sagou kai muqisi vei tugu ara qa roroqugou sagou.

13 Kepore mutugu sa kai vairoqu sa lavata jolania na vairoqu tana tinoni sa vaivanania nona toa ko sa tokaniria ira nona baere.

35 Ira doru kai sa qa vabatinigou sa tana pavu talenia gita beto sa kode tana boka tokaniria sira qai munyala. Mu roqu vakoititiria sira na paranga tana Bangara i Jisu tonai pira sau, <Na vaiia sa na mana sa lavata jolania na tekuona na tinoni,> sau,>> sau si Paula.

36 Ko totonai sa beto paranga si Paula, sa sa ovoro gore sori tutungu tavitiria ira ko sa vavara. 37 Qai lukana uui beto sira doru beto qai borua beto qai aoa ira si Paula. 38 Isa qai takulanga vivitiginia ira sa na paranga sa pojaria isa na veveina kode maike isongo bati ligua ira sa na isumatana isa sauniria. Ego beto sa qai tutia ko qai riu loai pa vaka.

13 Ira na tinoni tana Tamasa qai vaivasevi sa mu iaria, beto mu revanga vaniria na miu ruma sira na tinoni kamudi.

Vaqeraria na goto tinoni, nake mekamiu

1 Ego ko gita taqe boboka sa ta pogoso tokaniria na pogoso mamata sira qai munyala beto ko take vaqera mulenigita gu mekada.

2 Mu vaipogoso tokainia na pogoso mamata, ko pana soana vei api muna vagore votua agou sa na vavanau tana Karisito.

28 Na tinoni sa ikiko sa mi beto iko, goto mi pavu talenia tu na varoitiria na limana mekana pana roiti jongana ko mi boka tokania mekana beto ira na tinoni vaivasevidi.

4 Nake miu nyorogua gu mekamiu sa mu kole doro kopunia, goto na nyorogua tadira na goto tinoni tugu vei.

Na rarange sa tabata votu pana roiti jongana

14 Ka visa tavitiqu, ai poreveveina vei sa na paranga vei pira? Vei bi paranga sa kai tinoni, <<Na tinoni rarange sara,>> biu, beto bike tabata votu pana ona roiti sa na ona rarange. Kode minake boka taalonia isa sa na rarange vei isa. 15 Bi kaki marene babi na rereko tavitimiu sa bi keporeniria na poko beto bi keporeniria na gagani. 16 Ba bi paranga tu sa kame agou, <<Mu riu vabubulemiu tu. Mu popoko vamanginimiu beto mu teteku vatalemiu tu,>> biu, beto bike pavu vaniria na sakasava bai boka toania. Ai poreveveina vei sa na paranga vei inara? 17 Inara sa vei, ko na rarange gagale sake tavitia na roiti sa na matena.

17 Na tinoni sa isongia na isisongo tana kasia gusu api beto sa batiaona sa kai turana sa vaivasevi ba sa sado vauku palea tana sa na bulona, poni sa ai vei beto mina boka kolea na vairoqu tana Tamasa sisa?