35 Kwaviya nakeivaga sala niyo wanink’ha chokudya, nakeivaga nk’hilu, niyo mwanink’ha chokunywa, nandaga mgeni, niyo mwanitendela ukise. 36 Nandaga hisakaza niyo mwanink’ha suke, nandaga mnyonge niyo mweza kunikaula, nandaga mvugailwa kwe divugailo, niyo mweza kunitalamkila.’

37 "Niyo awedi hameso yo Mnungu wamhitula kugamba, ‘Zumbe, niini kikuone una sala niyo chakwink’ha nk’hande? Hegu naho kikuona ini una nk’hilu niyo chakwink’ha chokunywa? 38 Naho nekikuona ini kugamba weye wi mgeni niyo chakuhokela? Hegu kikuona hi usakaze niyo chakwink’ha suke? 39 Chakuonaga hii umnyonge, hegu du ukwedivugailo niyo cheza kukutalamkila?’ 40 Zumbe niyo ahitula kugamba, ‘Nawagambilani ikindedi, vovose viya mumdamanyile yumwenga mwa wadodo awa wandugu zangu, mnidamanyila miye.’

42 Mnt’hu akukulombeza kint’hu, mwink’he. Use kumlemela akuunga kukukopa.

16 Viligane na ivo, ung’azi wenyu nanywe ung’ale mwa want’hu, vileke wakaule ayedi mkudamanya, wamtogole Tati yenyu ywa kwe mbingu.

38 Wenk’heni want’hu vint’hu, Mnungu naye naamwink’heni nyuwe. Nomhokele kihimo kimemile na kusint’hwa na kusegeswa kikuta kwitika, nicho Mnungu naakiike mwe mikono yenyu. Kwaviya kihimo kiya ukuwahimila watuhu, nicho Mnungu naawahimileni."

10 Want’hu niyo wamuuza, "Haluse kitende vivihi?"

11 Niyo awahitula, "Mta nk’hazu mbili naamwink’he heena nk’hazu, naho mta nk’hande atende iivo."

33 Tageni ivint’hu venyu vose mkawenk’he wakiwa, kedamanyileni nk’hoba hezikusakala, kindolo heikuhunguka ukwo kwe mbingu hant’hu hahakubuligwa ni mbavi naho hezidingwe ni vuvu. 34 Kwaviya vindolo venyu hadya vikuunga vinde naaho imioyo yenyu ikuunga ikale.

12 Sigilizi yangu ni ino. Muungane enga viya miye niwaungile nyuwe.

13 Lukunde lutendese mnt’hu ananawo ni udya ukulava ugima wakwe kwa wambuya zakwe.

35 Hiwalagisani kwa kila kint’hu kugamba kwa kudamanya ndima enga ivo, kiwambize hewekukedaha, kikakumbukila milosi ya Zumbe Yesu mwenye akagamba, ‘Kiyuko kinyemi mo kulava kujink’ha kuhokela’."

36 Paulo eze abinde kulonga ayo, afikaga madi na want’hu wose niyo wamvika Mnungu. 37 Wose nawanda wakaila, na kumtoza Paulo mkono no wakamlaga kwa lukunde lukulu. 38 Mbuli itendese yawageile kinyulu niidya agambile, hawadahe kumuwona naho, naivo niyo wamsindikiza kwe ngalawa.

13 Waambizeni want’hu wa Mnungu heweina kint’hu naho wahokeleni want’hu wose.

1 Suwe kitogile mwo mhuwi chaungwa kiwambize wasokezi wo mhuwi, kise kudamanya mbuli zikuchelela uswe wenye du.

2 Yambizaneni mwa makunt’ho yenyu, naivo mkint’hize miko ya Kilisito.

28 Mbavi ase kubawa, akonge kudamanya ndima yedi kwa mikono yakwe vileke ande ne vint’hu va kumwambiza mkiwa.

4 Hasekunda na mnt’hu akukaula mbuli zakwe mwenye du, mna akaule mbuli za weyawe.

14 Wandugu zangu, kuna wedi wani uneva mnt’hu agamba ana mhuwi mna hakuulagisa kwa udamanyi? Mhuwi uwo wadaha kumyokola? 15 Kigambe weyuko wandugu wasakaze hegu wana gumbo, 16 yambizai uneva yumwenga ywenyu awagamba, "Gendeni mp’heho! Mkotele moto naho mkadye mwigute," mna hawenk’hile yadya wakuunga mwo wikazi wawe? 17 Naivo mhuwi uwenye du hewiina udamanyi, mhuwi uwo ubanika.

17 Mna, mnt’hu ananda na vint’hu va wikazi wa mwe isi niyo amuwona nduguye heina kint’hu no kulemela kumwabiza, Adaha vivihi kugamba Lukunde lwa Mnungu lumndani mwakwe?