Amor de casal
O amor de casal é celebrado na Bíblia como dom sagrado. O Cântico dos Cânticos exalta a beleza do amor conjugal — íntimo, exclusivo e forte como a morte.
ओ मेरे प्रेमी! माखे नगिने जेड़ा आपणे दिलो दे लगाई की राख
ओर जन्त्रो जेड़ा आपणियां बांई पाँदे बानी लओ,
प्यार मौता जेड़ा तागतबर ए;
तेतेरा जुनून मौता रे रूपो दे तागतबर ए। ओर जल़न कब्रा जेड़ी बिना दया री ए,
ओर तिजी रिया लूपिया आगी री लूपिया जेड़िया ओईया,
ओर बऊत बड़िया ओईया।
बऊत सारा पाणी बी प्यारो रिया आगी खे बजयाई नि सकदा
ओर ना कोई बाढ़ा रा पाणी तिजी खे डबोई सकोआ।
जे कोई आपणे कअरो री सारी तअन-दौलत प्यारो रे बदले बी देई देओगा,
तेबे बी तेसरी तअन-दौलत प्यारो रे पालड़े रे अल़की पड़नी।
वधूआ रा पाई
ओ मेरी प्यारी, ओ मेरी मंगेतर, तैं मेरा मन मोहित करिता रा,
तैं आपणियां एक ई नजरा ते
ओर आपणे गल़े रे एक ई ईरे ते मेरा मन मोहित करिता रा।
काश! तूँ माखे आपणे ओठा ते चूमदा,
कऊँकि तेरा प्यार अंगूरा रे रसो ते जादा उत्तम ए।
तैं कईया किस्मा रे इत्र लगाई राखे, इजी खे तिजी री खुशबू कितणी अच्छी ए,
तेरा नाओं मानो लटे रे इत्रो जेड़ा ए;
इजी री खातर जवाणसा तांते प्यार करोईया।
तूँ बांकी ए, ओ मेरी प्यारी, तूँ सुन्दरी ए;
तेरिया आखी कबूतरिया जेड़िया ए।
वधू
ओ मेरी प्यारी तूँ सुन्दरी ओर मनो खे अच्छी लगणे वाल़ी ए
ओर म्हारा बछौणा बी अरा-फरा काआ ए;
तेबे परमेशर यहोवा बोलेया, "आदमिए रा कल्ला रणा ठीक निए, तेसखे मां एड़ा जोड़ीदार बनाणा, जेस साथे से मेल खाओ।"
ओर परमेशर यहोवा तेसा पसलिया खे, जो तिने आदमिए ते निकयाल़ी थी, जवाणस बणाई ती ओर तेसा खे आदमिए गे ली आया। तेबे आदमिए बोलेया, "एबे ये मेरी आड्डिया री आड्डी ओर मेरे मासो रा मास ए, एसा खे जवाणस बोलेया जाणा, कऊँकि ये मर्दो ते निकयाल़ी राखी।" इजी बजअ ते मर्द आपणे माए-बाओ खे छाडी की आपणियां लाड़िया साथे मिलेया रा रणा ओर सेयो एक तन बणे रे रणे।
जिने जवाणस ब्यायी ली, तिने किमती चीज पाई ली,
ओर यहोवे री आशीष तेस पाँदे ऊई री।
तूँ आपणियां जवानिया री लाड़िया साथे तन्य ओ,
जेसा साथे तैं जवानिया दे ब्या करी राखेया,
से तेरिया तँईं प्यारी ईरणी ओर बांकी सांभरनिया जेड़ी ठईरो,
तेसा रे स्तन हमेशा ताखे संतुष्ट राखो,
ओर तूँ तेसा रे प्यारो दे सदा डूबेया रा रओ।
ओ मेरे पाऊ, तुँ व्याभिचार करने वाल़ी जवाणसा पाँदे कऊँ मोईत ओ,
ओर बगानी जवाणस तेरिया छातिया साथे कऊँ लगो?
तो एबे सेयो, दो नि पर एक तन ए। इजी री खातर, जो परमेशरे जोड़ी राखेया, तिना खे माणूं लग नि करो।"
प्यार सब्रखोर ए और कृपा करने वाल़ा ए। प्यार जल़न नि करदा, प्यार आपणी तारीफ नि करदा और कमण्ड नि करदा। प्यार अनुचित रीतिया ते नि चलदा, से आपणी पलाई नि चांदा, प्यारो रे चट गुस्सा नि आऊँदा, बुरा नि मानदा। प्यार कुकर्मो ते खुश नि ऊँदा, पर सच्चो ते खुश ओआ। प्यार सारिया गल्ला सईन करी लओआ, सारिया गल्ला रा विश्वास करोआ, सबी गल्ला री उम्मीद राखोआ, सबी गल्ला रे सब्र राखोआ।
ईंयां ई लाड़ा आपणी-आपणी लाड़िया साथे आपणे शरीरो जेड़ा प्यार राखो, जो आपणी लाड़िया खे प्यार करोआ, से आपू साथे प्यार करोआ। कऊँकि कोई बी आपणे शरीरो ते बैर नि राखदा, बल्कि तिजी रा पालण-पोषण करोआ, जेड़ा मसीह बी मण्डल़िया साथे करोआ।
पर ये तुसा खे बी लागू ओआ कि तुसा बीचा ते हर एक आपणी लाड़िया साथे, आपू जेड़ा प्यार राखो और लाड़ी बी आपणे लाड़े रा आदर करो।
और इना सबी पाँदे, प्यारो खे जो सिद्धता रा कटिबन्द ए बानी लो।
कले रणे ते दो माणूं साथे रणे अच्छे ए, कऊँकि सेयो एकी दूजे री मताद करी सकोए सफल ऊणे रिया तँईं। कऊँकि जे तिना बीचा ते कोई एक जणा रूड़ो, तो दूजे से चकणा, पर हाय तेस पाँदे, जो कल्ला ऊई की रूड़ो ओर तेसखे कोई चकणे वाल़ा नि ओ। जेबे दो जणे कट्ठे सऊणे, तो सेयो गर्म रणे, पर कल्ला माणूं किंयाँ आपू खे गर्म राखी सकोआ? जे कोई कल्ले पाँदे अमला करो तो करो, पर दो जणे तेसरा सामणा करी सकोए। जो डोरी तीऊँ तागेया साथे बाटी री ओ से चट नि टूटदी।
पक्का यहोवे ई तुसे कट्ठे जोड़ी राखे। तुसा री आत्मा ओर तुसा रा शरीर तेसरे ई ए। इजी री खातर से तुसा ते परमेशरो ते प्यार करने वाल़ी ल्वाद चाओआ। इजी री खातर तुसे सब आपणी-आपणी लाड़िया साथे वफादार बणे दे रओ। जेसा साथे तुसे जवानिया दे ब्या कित्तेया था।
जे किने मर्दे नवां-नवां ब्या करी राखेया ओ, तो से नवां ब्याया रा मर्द सेना साथे युद्धो रे नि जाओ ओर ना ई सेना रे केसी बी किस्मा रे कामो री जिम्मेबारी तेस पाँदे पाई जाओ। से एकी सालो तक आपणे कअरे आजादिया साथे रई की आपणी ब्यायी री लाड़िया साथे खुशी मनांदा रओ।