10 Ta kesui ɓɛtɛ ga akasia wului. Sakpai ɠa ɠɛ ga mɛtɛlɛ ɠila taata, kogi ɠɛ ga mɛtɛlɛ ɠaaɠwɛsui, ta sɔligi ɠɛ ga mɛtɛlɛ ɠaaɠwɛsui. 11 Ɗa zanu kitei ziɛ koozuʋɛ ta poluʋɛ, è daaɓegi ɠɛ ga zanugi, é ɠaku ma. 12 Ɗa zanugi ɠaawuun, è bala naanigɔiti kpɛtɛ bɛ, è ti ʋili goizu naanigɔiti ba, bala felegɔ gilazu ʋelei ta bala felegɔ zɔɔla ʋelei. 13 Ɗa gulu zɔkpɔiti kpɛtɛ ga akasia wului, è zanugi ziɛ ti ma. 14 Ɗa gulu zɔkpɔiti dɔ balaiti su, kesui ɠakamaʋɛti, ti kesui ʋa, kesui ɗa zeɠe ga tiye. 15 Gulu zɔkpɔiti ta yɛ kesui ná-balaiti su, ti mina ɠula ná. 16 Zeele woo zɛʋɛi gè feezu è ya, ɗa da kesui zu. 17 Ɗa kesui lakulugi ɓɛtɛ ga zanu kitei. Sakpai ɠa ɠɛ ga mɛtɛlɛ ɠila taata, kogi ɠa ɠɛ ga mɛtɛlɛ ɠaaɠwɛsui. 18 Geezuɠeela felegɔiti ti laaseigi ga seeluɓɛin, ɗa naati kpɛtɛ ga zanu doɠai, è ti ʋilɛ kesui lakulugi laaɓe felegɔiti ga. 19 Ɗa seeluɓɛin gila kpɛtɛ daaɓegi ɠilazuʋɛ ɠa, seeluɓɛin gila daaɓegi zɔɔla ʋelei ɠa. Ɗa seeluɓɛin felegɔiti ta kesui lakulugi ɓɛtɛ ga ani ɠila nɔ. 20 Seeluɓɛinti ta ti-ɠoʋegiti suvie maazuʋɛ, ti kesui lakulugi maalɔɔɠu ga ti-ɠoʋegiti, ta ɠaaʋote ɓɔɠɔ ma. Seeluɓɛinti ta ɠaaʋote kesui lakulugi ma. 21 Zeele woo zɛʋɛi gè feezu è ya, ɗa da kesui zu. Ɗa kesui laaɠulu.

22 Miná ɠa nà ɠɛ ɠulazu ná kɛlɛma è ʋɛ, zeele woo ɠesui lakulugi maazuʋɛ seeluɓɛin felegɔiti zɔɠɔzuʋɛ. Ná ɠa gè ʋaazu ɓɔɛzu ná è ʋɔ, é lo nà-deveiti kpein ba, Izilayɛle nuiti faa zu.

1 Ɓɛsaleyɛle kesui ɓɛtɛni ga akasia wului. Sakpai ɠɛni ga mɛtɛlɛ ɠila taata, kogi ɠɛ ga mɛtɛlɛ ɠaaɠwɛsui, sɔligi ɠɛ ga mɛtɛlɛ ɠaaɠwɛsui.

1 Ɠɔoɠɔ GALAGI ɓɔɛni Moize ʋɔ, é ɠɛ ma: 2 «Alu mɔungi ma volo mɔungi, ɗa seɠe ʋɛlɛ ɲadegai lo, GALA daaɠomi seɠe ʋɛlɛi. 3 Ɗa zeele woo ɠesui zei bu, è maalɔɔɠu ga kwɛpele seɠezuɠoozagi.

20 É zeele woo ɠokolo felegɔi zeɠeni, é ti la kesui zu. É gulu zɔkpɔiti dɔɔni kesui ma ʋalaiti su. É kesui lakulugi zeini kesui la. 21 É liini ga kesui seɠe ʋɛlɛ ɲadegai wu. É kwɛpele seɠezuɠoozagi zɛlɛni, nii a kɛ é zeele woo ɠesui maalɔɔɠu, eɠɛʋelei Ɠɔoɠɔ GALAGI ma levei veeni la zea.

89 Siɛgi zu Moize ɠɛni lɛɛzu la GALA daaɠomi seɠe ʋɛlɛi wu, ga é ʋa ɓɔɛ Ɠɔoɠɔ GALAGI ʋɔ, é ɠɛni wooi mɛnisu, é ɗa ɓɔɛ pɔ, é zeɠe kesui lakulugi maazuʋɛ seeluɓɛin felegɔiti zɔɠɔzuʋɛ, ti zeiɗai zeele woo ɠesui maazu. É ɠɛni ɓɔɛzu pɔ.

33 Izilayɛle nuiti ti liini, ti zeɠe Ɠɔoɠɔ GALAGI ná-gizei ma, ti folo saʋagɔ ziɛi woni. Naama volo saʋagɔiti daawu, Ɠɔoɠɔ GALAGI ná-minazeɠe kesui ɠɛni loni ti luɠɔ, é ɗa ada ɠaiziɛ ti ʋɛ, ʋɛ ta looɠo ná. 34 Siɛgi zu ta la zeɠena la ti-ʋuuzuʋɛ, Ɠɔoɠɔ GALAGI ná-tonaɓiingi ɠɛni zɛlɛsu ti maazu foloi.

35 Minazeɠe kesui lii la ɠilagila, Moize ɠɛni GALA falii ɠɛɛzu, é ɗa ɠɛ ma: «Wuzeɠe Ɠɔoɠɔ GALAGI, è zili nuiti ti vaza, niiti ti è wɔinzeɠezu, naati ti ʋela è ʋa!» 36 Siɛgi zu ta la zeina la, é ɠɛni ɠɛɛzu ma: «Ʋa ʋolu Ɠɔoɠɔ GALAGI, ɗa-nuɓusɛ ɓulu mɔinmɔingiti saama, ti ga Izilayɛle nuiti!»

1 Ɠɔoɠɔ GALAGI ɓɔɛni Moize ʋɔ, é ɠɛ ma: 2 «Ɓɔɛ Eleazaal ʋɔ, zalaɠa ɠula nui Aalɔn ná-doun zunui, bo ma ga é ansanse gala liɠiiti kula abui zu, é abulekaiti pu ya ɠoozama, mazɔlɔɔ diɠii naati ti ɲadega. 3 Nui niiti, ti zaai ta-ɠotoi maaʋele ma, à ta-ansanse gala liɠiiti seɠe, wo ti loɠa, wo ti ɓɛtɛ ga kɔlu ɓɔi sɛpɛgiti, nii a ʋɛɛ zalaɠa ɠulazuʋɛ ma. Diɠii naati ti ɲadega, mazɔlɔɔ ti ʋaaʋɛ ga tiye pɔ̀. Ta ɠɛ ga poogi Izilayɛle nuiti bɛ.»

4 Zalaɠa ɠula nui Eleazaal ansanse gala liɠiiti seɠeni, niiti ti ga kɔlu ɓɔigi, zunuiti niiti ti ʋaani ga tiye, abui naati galani. Ti ti loɠani, ti ti ɠɛ ga ma zɛpɛgiti, ti pɛɛ zalaɠa ɠulazuʋɛ ma. 5 Naa ɠa é ga ɠizɛsui Izilayɛle nuiti bɛ, ga nu nɔpɛ nii é la ga Aalɔn mavofodai, maa la nɛɛni, é ʋa maaɓuɠa Ɠɔoɠɔ GALAGI ʋa, é ʋa ansanse kula ga zalaɠai gaazu, a ʋa ɠɛ eɠɛ Kolé ta ná-nuɓusɛiti, eɠɛʋelei Ɠɔoɠɔ GALAGI devei veeni la Moize ya ga é bo ma.

6 Poluma zobui Izilayɛle nuɓusɛiti kpein ti ɠɛni zelii losu Moize ta Aalɔn ma, ti ɠɛ ma: «Wo Ɠɔoɠɔ GALAGI ná-nuɓusɛiti paaʋɛ!» 7 Ti maaɓɔni ba Moize ta Aalɔn maaɠoolii zu. Ti ɠɛai ma latisu GALA daaɠomi seɠe ʋɛlɛi ʋɔ pelei, pɛtɛ, tonaɓiingi ʋɛɛni ma, Ɠɔoɠɔ GALAGI ná-lɛbiyai ɠulani kɛlɛma. 8 Moize ta Aalɔn ti liini, ti lo GALA daaɠomi seɠe ʋɛlɛi laaʋɛ. 9 Ɠɔoɠɔ GALAGI ɠɛni Moize ma: 10 «À ɠula bɛbɛi tɛi saama, nà ti-ma zuwu ɠaaleʋezu ɠani nɔ.» Ti laaʋɛɛni zooi ma. 11 Naa ʋolu Moize ɠɛni Aalɔn ma: «Ɗa-ansanse gala liɠii zeɠe fala, abulekaiti seɠe zalaɠa ɠulazuʋɛ, è pu su, è ansansegi ʋu ga. Suvilɛ, è lii la nuɓusɛiti pɔ bɛ, è koto gba vai ɠɛ, mazɔlɔɔ Ɠɔoɠɔ GALAGI ná-ziiɠaawanai lokoleʋea, niizu maanɔɠɔi tɔɔzeiɗa.»

14 Nuɓusɛiti ti ta-zeɠe ɠotaiti pɛɛni su, Zuludɛn ɓudɛ vai zu. Zalaɠa ɠula nuiti ti minazeɠe kesui zeɠeni, ti lo ti luɠɔ. 15 Molo leʋe ziɛgi zu ɠɛni de, Zuludɛn a ɗa ve la yeenɔpɛ, é ɓudɛ ma ɠakeiti maazu. Siɛgi zu zalaɠa ɠula nuiti ti minazeɠe kesui zeɠezu la, ti-ɠɔɠɔi maayɛɓɛni la ziɛi wu, 16 ziɛi nii é ɠɛni yeizu, é ɗa zeɠe maazu ʋelei, naa zuzoni, é la mɔ ɠɛni yeizu, é loni gaaɠooza eɠɛ siɠigi, é li ɠoozama, é zo Adame taai ma, é li Saletan ʋele. Kɛlɛ tɔun, buu ʋelei, ziɛi nii é yeizu Kpoloɗɛ Wanai ʋɔ pelei, Zuludɛn ma ʋɛtu nɛmɛi zu, naa ɠɛni yeizu, eyɛsu é vɔ. Nuɓusɛiti ti leʋeni Zeliko letemaʋɛ. 17 Zalaɠa ɠula nuiti ti ɠɛni Ɠɔoɠɔ GALAGI ná-minazeɠe kesui zeɠezu, ti loni Zuludɛn ziɛ laazuʋɛ, ná vɔai. Ti yɛni loni ná kpaan, eyɛsu nuiti kpein ti leʋe, ti-ɠɔɠɔi maavɔai.

18 Siɛgi zu zalaɠa ɠula nuiti, niiti ti Ɠɔoɠɔ GALAGI ná-minazeɠe kesui zeɠezu, ti ɠulani la ziɛ laazuʋɛ, ti-ɠɔɠɔi lo kakei ma, Zuludɛn ɗɛi laani su ʋolu, é náti pɛ daave, é ɗa yei, eɠɛʋelei é ɠɛni la pɔlɔmazu.

1 Zeliko taai laaɠuluni kpekpe, Izilayɛle nuiti maaʋele ma. Nu la ɠɛni lɛɛzu, nu la ɠɛni ɠulazu. 2 Ɠɔoɠɔ GALAGI ɠɛni Zozuwe ma: «Wɛlɛ, gè Zeliko lɔa è yeezu, ta ná-masagi, ta ná-kɔɔɠɔ nu ɠɛzɛɠɛzɛgiti kpein. 3 Folo lɔzita laawu, ɗa-o, ɗa-ɠɔɔɠɔ nuiti-yo, folo-o-folo wa ɗa lati taai ma, ná ɠɛ ɠila folo ɠila. 4 Zalaɠa ɠula nu lɔfela, niiti baala minɛ ʋuʋugi ti ɠilagilagi ya, naati ta lo minazeɠe kesui luɠɔ. Folo lɔfelasiɛi, wa lati taai ma, ná ɠɛ lɔfela, zalaɠa ɠula nuiti ta puʋugi vɛ niina. 5 Siɛgi zu nuɓusɛiti ti baala sinɛ ʋuʋugi vɛ wooi mɛnisu da suɠoozaai, ɛsɛ pɛ ka kpeei loo ʋɔɔma, taai ma ziɠigiti ta wolo gaamago nɔ. Nuɓusɛiti ta taai zo, ɛsɛ ge lɔ ga letegi.»

6 Nun ná-doun zunui Zozuwe zalaɠa ɠula nuiti tolini, é ɠɛ ti ma: «À minazeɠe kesui zeɠe, zalaɠa ɠula nu lɔfela baala sinɛ ʋuʋu dɔfela zeɠe, ti lo Ɠɔoɠɔ GALAGI ná-minazeɠe kesui luɠɔ.» 7 Naa ʋoluma é ɠɛni nuɓusɛiti ma: «À li, wo lati taai ma, kɔɔɠɔ zunu ɠɛzɛɠɛzɛgiti kpein ti lo Ɠɔoɠɔ GALAGI ná-minazeɠe kesui luɠɔ.»

20 Ti puʋugi vɛɛni. Nuɓusɛiti ti mɛnigai ma, ti kpeei looni, ti wooɠula la, siɠigi woloni gaamago nɔ. Nuɓusɛiti ti ʋilini taazuʋɛ, ɛsɛ ge lɔ ga letegi, ti taai zo.

2 Filisiti nuiti ti lopele ɓɛtɛni kɔɔɠɔ vai ma, ti kɔɔi lɔɔzeini ta Izilayɛle nuiti. Kɔɔi ɓɔini ga gola, Filisiti nuiti ti zeelini Izilayɛle nuiti ma, ti nu waanaanigɔ (4.000) ɠɛɠala ʋaani ti zaama, kɔɔɠɔzuʋɛ. 3 Zɔiti ti ʋelani, naati ti ɠalegai ma ma kɔɔlaaɠai zu, Izilayɛle lotuɠɔiti ti ɠɛni ɓɔɠɔ ɠaazaɠasu ga: «Lee vaa zu Ɠɔoɠɔ GALAGI ade yɛga na Filisiti nuiti ti ɗa vɔni ade ma?» Ti ɠɛni ɓɔɠɔ ma: «Ade li Silo, ade ʋa ga Ɠɔoɠɔ GALAGI ná-minazeɠe kesui. Naa a ɠɛna ade zaama, toɠa ade ɠizo ade zili nuiti zeei ma.»

4 Ti numaa leʋeni Silo, Ɠɔoɠɔ GALAGI ná-minazeɠe kesui ɠalama, Fai-Pɛ-Maliɠii, nii é zeini seeluɓɛinti unda. Zalaɠa ɠula nui Eli ná-doun zunu felegɔiti Wofeni ta Fineyase ti yɛni minazeɠe kesui ʋolu, ti ʋa.

5 Ti zeeliai ma ga Ɠɔoɠɔ GALAGI ná-minazeɠe kesui kɔɔlaaɠai zu, Izilayɛle ɠɔɔʋɛbɛi wooɠulani ga koozunɛɛi, eyɛsu zooi ɓali ti wu, ʋɛ ti ɠɛni ná. 6 Filisiti nuiti ti zɔngɔ wooi naa mɛnigai ma, ti ɠɛni ɓɔɠɔ ɠaazaɠasu, ti ɗa ɠɛ ma: «Kpee wolai nii ʋoluʋɛ ɠa ga leeni, Eɓulu nuiti ta-ɠɔɔlaaɠai zu?» Ti mɛnini ga Ɠɔoɠɔ GALAGI ná-minazeɠe kesui ɠa ti ʋaai la Izilayɛle ná-kɔɔlaaɠai zu. 7 Ti wola luani, ti ɗa ɠɛ ɓɔɠɔ ma: «Ade maanɔɠɔa, tɔɔzei GALA ge ʋa Eɓulu nuiti ta-ɠɔɔlaaɠai zu, é la ɠɛa ɠana pɔlɔma. 8 Ade maanɔɠɔa-o! Ɓɛ ɠa a ade ɠula zɛbɛsu ɠalagi niiti zea? Galagi tɛiti ka ti maanɔɠɔi ma zii mɔinmɔin seini Ezipete nuiti ma, teʋebai zu. 9 À zasulo! Filisiti nuiti, wo ɠɛ ga zunu ɓɔɠɔɓɔɠɔ! Wo mina ʋa lɔɔzu duɔlai zu, Eɓulu nuiti zea, eɠɛʋelei ti ɠɛa la wo ya duɔlai zu, naa ɠa é ba, à zunuyai ɠɛna, wo kɔɔi ɠɔ.»

10 Filisiti nuiti ti kɔɔi lɔɔzeini, ti vɔnini Izilayɛle ma, ɛsɛ pɛ ge ɗa ɓizɛ ga lɔɔɠua ná-seɠe ɠotai wu. Ti vɔnini Izilayɛle ma ga gola, nu waaʋuusaʋagɔ (30.000) ɠa é zaani Izilayɛle ʋa. 11 Filisiti nuiti ti GALA ná-minazeɠe kesui zeɠeni, Eli ná-doun zunu felegɔiti ma, Wofeni ta Fineyase, naati ti za kɔɔi zu.

6 Ɠɔoɠɔ GALAGI ná-zɛbɛi lɛɛni ga Asadɔde nuiti, é dualuagi lɔɔni ti zu, é puzɛɠulagi ʋɛɛni ti ʋa, Asadɔde ta ná-zooi pɛ su. 7 Asadɔde nuiti ti naama vai ɠaai ma, é ɗa ɠɛ ga tiye, ti ɠɛni ma: «Izilayɛle ná-GALAGI ná-minazeɠe kesui la lɛbiga ada-laazuʋɛ, mazɔlɔɔ zeei ná-zɛbɛi ɠa ade laalɔɠɔma, ada-o, ada-ɠalagi Dagon-o.»

8 Ti Filisiti ɠundiɠiiti tolini Asadɔde taazuʋɛ, ti ti ɠaazaɠa, ti ɠɛ ma: «Lee ɠa ada kɛ ga Izilayɛle ná-GALAGI ná-minazeɠe kesui nii?»

Naati ti ti wooɠaaʋoteni, ti ɠɛni ti ma: «Kɛni Izilayɛle ná-GALAGI ná-minazeɠe kesui leʋe Gate.» Ti liini ga GALA ná-minazeɠe kesui miná. 9 Kɛlɛ ti lia ʋoluma la, Ɠɔoɠɔ GALAGI wuzeɠeni Gate taai laalɔɠɔma. Dualua golai lɔɔni ti pɛ su, puzɛɠulagi ti zoni, é lɔɔzei doungoiti ma, é li kpakologiti pɔ.

10 Gaamago nɔ, ti GALA ná-minazeɠe kesui ɠulani naa ʋa, ti lii la Ekelɔn. Kɛlɛ ti zeeliai ma la Ekelɔn, Ekelɔn nuiti ti kpee wolai looni, ti ɠɛ ma: «Ti ʋa ga Izilayɛle ná-GALAGI ná-minazeɠe kesui ada-laazuʋɛ, nii a kɛ ade za, adea-o, ada-nuɓusɛiti-yo!» 11 Tiya ɓalaa, ti Filisiti ɠundiɠiiti tolini, ti ɠɛ ti ma: «À Izilayɛle ná-GALAGI ná-minazeɠe kesui ɠaaɠale ma ná-zooi zu, ni naa laade, gi kpein gá ʋaazu zaazu, giya-o, gá-nuɓusɛiti-yo!» Mazɔlɔɔ nuiti ti ɠɛni zaazu ga duɔi taazuʋɛ ná pɛ. Mazɔlɔɔ GALA ge ná-zɛbɛi lɛɛni ga tiye gola.

1 Ɠɔoɠɔ GALAGI ná-minazeɠe kesui kɛɛni ga alu dɔfela Filisiti nuiti ta-yooi zu. 2 Filisiti nuiti, ti ta-zalaɠa ɠula nuiti ta ʋelela ʋele vaa wo nuiti gaalɛɛni ba, ti ɠɛ ti ma: «Leeni ɠa gá kɛ ga Ɠɔoɠɔ GALAGI ná-minazeɠe kesui? À pele lɛ ga giye, nii gá leʋe da, gi daazeeli ná-zooi zu.»

3 Naati ti ti wooɠaaʋoteni, ti ɠɛ ma: «Ni wa Izilayɛle ná-GALAGI ná-minazeɠe kesui leʋesu ná-zooi zu, à mina ma ɲakai nɔ leʋe. Kɛni wo faazuɓɛtɛ zalaɠaa ɠula bɛ. Wa naa ɠɛɛna, wa ɠɛdɛ, wa kwɛɛ leeni vaa zu é wuzeɠezu wo laalɔɠɔma siɛnɔpɛ.»

10 Filisiti nuiti ti ziɛni ga naama lɛnɛ gooi. Ti koima nikɛ zaa felegɔi zeɠeni, ti ti ɠili wotoloi ʋa, ti nikɛ yiʋoiti tɛ togani makɛ ʋɛlɛi wu. 11 Ti Ɠɔoɠɔ GALAGI ná-minazeɠe kesui laani wotoloi zu, ta kesui nii zanu sɔɔlaiti ti su, puzɛɠulagi ta inɛgiti baaɠulabai. 12 Nikɛ zaaiti ti liini ga Ɓɛte-Semɛse ʋele, ti lete nɔ tein, ti ɗa li ga ɓainga, ti la ɠɛni zeɠeni pelei ʋa, ti ʋa li ga yeezazu ʋele, ɓaa ɠɔʋɛzu ʋele. Filisiti ɠundiɠiiti ti yɛni ti ʋolu, eyɛsu ti zeeli Ɓɛte-Semɛse ɠwɛpelemaʋɛ.

13 Ɓɛte-Semɛse nuiti ti ɠɛni nɛmɛ wolai zu, molo leʋezuʋɛ. Ti minazeɠe kesui ɠaai ma, ti wola ɠoozunɛɛni. 14 Wotoloi zeelini Ɓɛte-Semɛse nui, Zozuwe ná-kpalagi zu, wotoloi loni kɔtu wolai ɠobaʋɛ. Nuiti ti wotoloi ma wuluiti teʋeleʋeni, ti baliʋali, ti zɛba ti nikɛ zaa felegɔiti kɛ ga gala zalaɠai Ɠɔoɠɔ GALAGI ʋɛ. 15 Levi nuiti ti Ɠɔoɠɔ GALAGI ná-minazeɠe kesui ɠulani wotoloi zu, ta kesui nii zanu sɔɔlaiti ti ɠɛni su, ti ti la kɔtu wolai maazu. Naama volo ɠilagi nɔ, Ɓɛte-Semɛse nuiti ti gala zalaɠaiti kulani Ɠɔoɠɔ GALAGI ʋɛ, ta zalaɠai taɠiligaa.

1 Kiliyate-Yeyalime nuiti ti ʋaani, ti Ɠɔoɠɔ GALAGI ná-minazeɠe kesui zeɠe, ti lii la, ti tɛ Aɓinadaɓe ná-pɛlɛi wu, gizei ma. Ti yiimazeɠeni ga ná-doun zunui Eleazaal, ga é ɗa makɛ Ɠɔoɠɔ GALAGI ná-minazeɠe kesui ʋa.

2 É lɔɔzei minazeɠe kesui ʋa voloi ma Kiliyate-Yeyalime, suɠoozani gola, kona ʋuufelegɔ (20) leʋeni niina. Naazu Izilayɛle nuiti kpein ti ɠɛni ɓalakpalasu, mazɔlɔɔ wɔin ɠɛni ti ma, ga ti ʋa ʋolu Ɠɔoɠɔ GALAGI ʋɔ.

12 É woni Davide ma ga Ɠɔoɠɔ GALAGI tuya looʋɛ Woɓɛde-Edɔme ná-pɛlɛyeɠei ʋɛ ta nɔnɔiti pɛ, GALA ná-minazeɠe kesui maaʋele ma. Názuʋɛ Davide liini, é GALA ná-minazeɠe kesui zeɠe Woɓɛde-Edɔme ná-pɛlɛi wu, é lii la Davide ná-taa wolai zu, koozunɛ wolai zaama. 13 Ɠɔoɠɔ GALAGI ná-minazeɠe kesui zeɠe nuiti ti kɔɠɔ lo dɔzita ɠɛai ma, Davide nikɛ zinɛ wola ɠila kulani ga zalaɠai ta nikɛ yiʋo ɠila nii gulɔai. 14 Davide ɠɛni kuai wosu ga zɛbɛi pɛ Ɠɔoɠɔ GALAGI ɠaazu, maaɠiliai nɔ ga geze zeɠei, kulaai ga zalaɠa ɠula nuiti ta-zeɠei. 15 Ʋele ɠana Davide ta Izilayɛle nuiti pɛ ti liini la ga Ɠɔoɠɔ GALAGI ná-minazeɠe kesui Zeluzalɛme, ga koozunɛ wooiti ta puʋu fɛɛ wooiti.

1 Naama ziɛgi zu masagi Salomɔn Izilayɛle ɠɛwolaiti pɛ, ta bolodama ɠundiɠiiti, ta pɛlɛyeɠeiti gaazuʋɛti pɛ tolini ga ti ɠaalɛ ba koba Zeluzalɛme, ga ti Ɠɔoɠɔ GALAGI ná-minazeɠe kesui zeɠe Davide ná-taa wolai zu, ná laa ga Siyɔn, ti li la Ɠɔoɠɔ GALAGI zei ʋɛlɛi ma ɠoizuʋɛ. 2 Izilayɛle nuiti kpein ti ɠaalɛɛni ba masagi Salomɔn ɠoba fɛti ɠula vai ma, nii a ɗa ɠɛ alugi lɔfelasiɛi ma, daa ga Etanime.

3 Izilayɛle ɠundiɠiiti pɛ ti ʋaani, zalaɠa ɠula nuiti tosuʋɛ ɠɛni ga ti minazeɠe kesui zeɠe. 4 Zalaɠa ɠula nuiti ta Levi nuiti ti Ɠɔoɠɔ GALAGI ná-minazeɠe kesui zeɠeni, ta GALA daaɠomi seɠe ʋɛlɛi, naa ʋɛɛ bu zɔɔlai ɲadegaiti pɛ ba. 5 Masagi Salomɔn ta Izilayɛle nuɓusɛiti pɛ, niiti ti ɠaalɛɛni ba koba, naati ti ɠɛni minazeɠe kesui ɠakalaʋɛ, ti ɗa togani ʋɛlɛʋɛlɛgiti ta ma ɓaazagi ma mɔinmɔin kula ga zalaɠai, nu la ɓena tie kwɛɛ.

6 Zalaɠa ɠula nuiti ti Ɠɔoɠɔ GALAGI ná-minazeɠe kesui laani, ʋɛ ná ɓɛtɛai bɛ, ʋoluzu ʋele ʋɛlɛ ɠoozuʋɛ GALA sei ʋɛlɛ wu, ná laa ga ada ɲadega wolai, seeluɓɛinti koʋegiti bu. 7 Tɔɔzei seeluɓɛinti koʋegiti suviega ɠɛni de minazeɠe kesui zeizuʋɛ maazu, nii a kɛ ti ʋɛɛ kesui ta seɠe wulu zɔkpɔiti ma. 8 Ʋelei ti gulu zɔkpɔi naati koozani la, nu ɠɛni yɛsu ada ɲadegai wu, ʋɛ ná ada ɲadega wolai ɠakalaʋɛ, nu ɗa ti-zokpaiti ka, kɛlɛ nu la ɠɛni ti ɠaazu ga etea ʋelei. Miná ɠa ti yɛgai ná eyɛsu za. 9 Ani ɠili ge la ɠɛni minazeɠe kesui zu, kɛni kɔtu ɠokolo felegɔiti Moize ti laani su Wolɛɓe,* siɛgi zu Ɠɔoɠɔ GALAGI minazeɠegi ɠɛni la ti yɔɠɔzu ta Izilayɛle nuiti, ti ɠulazuʋɛ Ezipete. 10 Siɛgi zu zalaɠa ɠula nuiti ti ɠulani la ada ɲadegai, tonaɓiingi Ɠɔoɠɔ GALAGI zei ʋɛlɛi wuulaaveni. 11 Tonaɓiingi maaʋele ma, zalaɠa ɠula nuiti ti la ɠɛni zooni ti ʋa yɛ ná ga ti ʋa ta-wotii ɠɛ. Mazɔlɔɔ Ɠɔoɠɔ GALAGI ná-lɛbiyai ná-pɛlɛi wuulaaveni.

14 «À ɠale ma, wo ʋa, kololala lointi!»

Ɠɔoɠɔ GALAGI wooi ɠana.

«Mazɔlɔɔ nà ɠa gè ga wo-Maliɠii.

Nà wo zeɠezu, gila taa wolai ta zu,

felegɔ pɛlɛyeɠei ta wu,

ga gè li ga woye Siyɔn.

15 «Nà totuɠɔiti feezu wo ya, niiti dàai ti la. Ta wo makɛ ga keleɠelegi ta ɠimalai. 16 Siɛgi zu wo ɠaawɔɔlɔzu la zooi ɠa, wo mɔin gola, naama voloiti su, nu la mɔ Ɠɔoɠɔ GALAGI ná-minazeɠe kesui ná-faa woga, nu la mɔ ɠisiaa su, ma ɠisiɛi la mɔ loa nu ʋɛ. Po ge la mɔ ʋua nu ʋa, ta nu la mɔ taɠili kpɛtɛa,» Ɠɔoɠɔ GALAGI wooi ɠana.

1 Minazeɠe mɔungi zu, GALA dɛbi ʋelei ma leveiti ti ɠɛni ná, naa ʋɛɛ seizu ɲadegai ʋa, nii é ɠɛni ga eteai zu gelei. 2 Seɠe ʋɛlɛ ɲadegai loni, é leʋeni su fele, ma ada mɔungi laaseigi ɠɛni ga ada ɲadegai. Miná ɠa fitina zei anii ɠɛni ná, ta taɓalii, ta ɓuluiti ti veai GALA bɛ. 3 Naa ʋolu kwɛpele seɠezuɠoozagi velesiɛi ʋoluʋɛ, adaʋɛ miná laaseigi ɠɛni ga ada ɲadega wolai. 4 Ansansegiti ma zalaɠa ɠulazuʋɛ, ta minazeɠe kesui, niiti zanugi ziɛni ti maaʋɛ, naati ka ti ɠɛni miná. Zanu diɠii manegi ɠɛni su, ta Aalɔn ná-tukpɔi é ʋɔnɔni, ta kɔtu ɠokologiti niiti GALA ge minazeɠegi ma lɔgiti sɛʋɛni ti ma, naati ka ti ɠɛni kesui zu. 5 Seeluɓɛinti ti ɠɛni minazeɠe kesui maazuʋɛ, ti dɛɛ ga GALA ka ná. Ti koto gbazuʋɛ maalɔɔɠuni ga ti-ɠoʋegiti maaniinigiti. Yeeɠɛɠala la de ya, de ʋa naama vaiti gilagilagi pɛ bo.

19 GALA sei ʋɛlɛi é geeɠɔlɔgi zu daalaoni, minazeɠe kesui ɠaani bu. Mainmain saɠani, wooiti ti mɛni, tona kpunɛ tugiti ti ɠulani, zooi balini, sakɔtui ʋuuni ga gola.