10 "Soqala mithafe, adussatethay nam7u wadhanne takadho, gompay issi wadhanne takadho, geesay issi wadhanne takadho gidiya saaxine oothite. 11 Gaathaanne kariya walahi bayna worqan kamma; iya yuushuwaka worqan lanxa. 12 He Taabotiyas oyddu worqa sagaayota oothada; oyddu gedata bolla issi baggara nam7u sagaayota, qassi hanko baggara nam7u sagaayota aathada gasetha. 13 Taabotiya tookiya kaso mithata soqala mithafe kessada worqan lanxa. 14 Taabotiya tookanaw iya miyen de7iya sagaayotan kaso mithata aatha. 15 Tookiya kaso mithati Taabotiya sagaayota giddon de7o; enti yaape keyopo. 16 Taabotiya giddon taani new immiya, tammu kiitati xaafetida nam7u loche shuchata wotha.

17 "Walahi bayna worqafe adussatethay nam7u wadhanne takadho, gompay issi wadhanne takadho gidiya nagara atotetha kama ootha. 18 Qefera de7iya nam7u kiruubeta worqafe qoxada ootha. 19 Issi kiruubiya issi bagga gaxan, nam7antho kiruubiya hanko bagga gaxan wothada nam7aa Taabotiya guphiyara oythada ootha. 20 Kiruubeti woliko simmi uttidi, banta qefiya denthidi, atotetha kamaa kammo. 21 Taani new immiya loche shucha bolla xaafetida tammu kiitata Taabotiya giddon wotha. Yaatada, guphiya Taabotiya bolla wotha.

22 Taabotiya guphiya bolla de7iya nam7u kiruubetape giddon gidada taani neera gahetana. Isra7eele asaas immiya kiita ubbaa taani yan new immana."

1 Basili7eeli Taabotiya soqala mithafe giigisis. Taabotiya adussatethay nam7u wadhanne bagga, gompaynne geesay issi wadhanne bagga.

1 Goday Museko haysada yaagis; 2 "Koyro ageenan, koyro gallasan, Geeshsha Dunkaaniya toka. 3 Tammu kiitata oykida Caaqo Taabotiya iya giddon wothada, iya sinthan magarajuwa kaqa.

20 Yaatidi, tammu kiitata oykida nam7u loche shuchata, Taabotiya giddon wothis. Tooho kaso mithata Taabotiya sagaayotan aathis; nagara atotetha kamaka Taabotiya bolla wothis. 21 Taabotiya Geeshsha Dunkaaniya giddo gelsidi, geshe magarajuwa kaqis. Yaatidi, Goday kiitidaysada, Caaqo Taabotiya kammis.

89 Musey Godaara odetanaw Geeshsha Dunkaaniya geliya wode caaqo taabotiya kamaa bolla de7iya nam7u kiruubetape giddon gididi Goday odishin si7is.

33 Asay Godaa zumaape dendidi, heedzu gallasa oge bidosona. Godaa caaqo Taabotey enti shempana bessi koyishe heedzu gallas entafe sinthe sinthe bis. 34 Enti dunkaanida gutaape dendiya wode ubban Godaa shaaray gallas gallas entafe bollara de7ees. 35 Taabotey dendiya wode ubban Musey, "Abeeti Godaw, denda; ne morketi laaleto; nena ixeysati ne sinthafe baqato" yaagees. 36 Taabotey shempiya wode ubban Musey, "Abeeti Godaw, daro mukulan taybetiya Isra7eele asaako simma" yaagees.

1 Goday Museko, 2 "Isra7eele asay issi issi kochaa halaqatape issi issi xam7a ekidi tammanne nam7u xam7a new ehana mela entaw oda. He xam7aa bolla issi issi asaa sunthaa xaafa. 3 Issi issi kochaa halaqaas issi xam7a koshshiya gisho, Leewe xam7aa bolla Aarona sunthaa xaafa. 4 He xam7ata geeshsha dunkaaniya giddon ta neera gahetiya Taabotiya sinthan wotha. 5 Ta dooriya uraa xam7ay aacana; hessada oothada hinte bolla Isra7eele asaa zuuzuntha ta teqana" yaagis.

6 Hessa Musey Isra7eele asaas odin, tammanne nam7u halaqati huuphen huuphen issi issi xam7a ehidosona. Aarona xam7ayka he xam7ata giddon de7ees. 7 Musey he xam7ata ubbaa geeshsha dunkaaniya giddon Godaa sinthan wothis.

8 Wontetha gallas Musey geeshsha dunkaaniya giddo geliya wode Leewe koche gidida Aarona xam7ay aacidaysa, gambuxidaysa, ciiyidaysanne lawuze mitha ayfe ayfidaysa be7is. 9 Musey xam7a ubbaa Godaa sinthafe ehidi Isra7eele asaa bessis. Enti hanidaba be7idaape guye issi issi halaqay banta xam7aa xam7aa ekidosona. 10 Goday Museko, "Aarona xam7aa Taabotiya sinthan zaarada wotha. Makallida Isra7eele asay ta bolla zuuzuntha aggonna ixiko hayqanaysa entaw malaata oothada wotha" yaagis. 11 Musey, Goday kiitidaysada oothis.

14 Asay Yordaanose shaafa pinnanaw dunkaanida gutaape dendiya wode, caaqo taabotiya tookida kahineti asaa sinthan boosona. 15 Kathi shiishiya wode Yordaanose shaafay medhaysada kixikoka, caaqo taabotiya tookida kahineti Yordaanose shaafa gakidi, enta tohoy haatha gaxa yedhida wode, 16 qommofe duge goggiya haathay eqis. Zartaana matan de7iya Adaama katama gakanaw shiiqidi dooretis. Duge Hayqo abbaako goggiya haathay eqis. Yaanin, asay Iyaarko katama pinnidosona. 17 Isra7eele asay mela biittara pinnidi wurana gakanaw Godaa caaqo taabotiya tookida kahineti Yordaanose shaafa giddon mela biittan eqidosona.

18 Godaa caaqo taabotiya tookida kahineti Yordaanose shaafape keyidosona. Enta tohoy mela biitta yedhida wode ellesidi, Yordaanose haathay ba bessa simmidi, kase goggeysada gaxa gakidi gogethi oykis.

1 Isra7eele asaas yayyida gisho, Iyaarko katama gimbe dirsaa pengeti gordetidosona. Oonika katamaa gelanawunne keyanaw danda7enna. 2 Goday Iyyasuko, "Iyaarko katamaa iya kawaranne iya mino olanchotara ne kushen aatha immas. 3 Neeranne ne olanchotara salpidi, gallasan issi toho usupun gallas gakanaw, katamaa gimbe dirsaa yuushuwa yuuyite. 4 Laapun kahineti issoy issoy moyze oykidi, Godaa caaqo taabotiya sinthan boo. Laapuntha gallas kahineti moyze punniya wode hinte katamaa laapun toho yuuyite. 5 Kahineti moyze goochidi punuwa hinte si7iya wode, asa ubbay ellesidi banta qaala dhoqu oothidi waasso. Hessafe guye, katamaa gimbe dirsay kundana. He wode asa ubbay gido lawuhu gidi gelana" yaagis.

6 Nawe na7a Iyyasu kahineta xeegidi, "Godaa caaqo taabotiya tookite. Hintefe laapun kahineti moyze oykidi, caaqo taabotiyape sinthe aadhidi boo" yaagis. 7 Asaako qassi, "Bidi, katamaa yuushuwan yuuyite; olanchoti Godaa caaqo taabotiya sinthan hemetonna" yaagidi kiittis.

20 Hessa gisho, moyzey punetis; asay waassis. Derey moyze punuwa si7ida wode banta qaala dhoqu oothi waassin, katamaa gimbiya dirsay kundis. He saaten asay lawuhu gidi gelidi katamaa oykidosona.

2 Filisxeemeti cugan cugan gididi, Isra7eeletara oletanaw dendidosona; olay minnida wode Filisxeemeti Isra7eeleta xoonidi oyddu mukulu gidiya asaa wodhidosona. 3 Olanchoti dunkaanida gutaa simmida wode Isra7eele cimati, "Hachi Goday nuna Filisxeemeta kushen ayis aathidi immidee? Nuura baana melanne nu morketa kushepe nuna ashshana mela Godaa Taabotiya Seelope ane ehoos" yaagidosona. 4 Hessa gisho, asay Seelo kiittin, kiruubeta giddon araatan uttiya Ubbaafe Wolqaama Godaa Taabotiya ehidosona. Eeli nayti nam7ay Afnaninne Finihaasi caaqo Taabotiyara yan de7oosona.

5 Godaa Caaqo Taabotey asay dunkaanida gutaa gakida wode Isra7eele ubbay biitti qaaxana gakanaw banta qaala dhoqu oothidi, "Godaa Caaqo Taabotey gakis" yaagidi waassidosona.

6 Isra7eeleta waasuwa Filisxeemeti si7idi, "Ibraaweta gutan si7etiya wolqaama waasoy aybee?" yaagidosona.

Godaa Taabotey enta gutaa yidaysa Filisxeemeti erida wode, 7 Yayyidi haysada yaagidosona; "Xoossay enta gutaa yis; nuna ayye! Haysa melabay haysafe kase hani erenna. 8 Nuna ayye! ha wolqaama Xoossaa kushepe nuna ashshanay oonee? Ha Xoossay Gibxeta mela biittan dumma dumma gadon shocis. 9 Hinteno Filisxeemeto, minnite! Adde gidite! Hessi hanonna ixiko, hinte enta kase aylletethan haaridaysada enti hintena haarana. Adde gidite; oletite" yaagidosona.

10 Filisxeemeti oletidi, Isra7eeleta xoonin Isra7eeleti banta soo soo baqatidosona. He olan daro asay hayqidosona; Isra7eele toho olanchotape hastamu mukulu asay hayqidosona. 11 Xoossaa Taabotey di7etis; Eeli nayti nam7ay, Afnaninne Finihaasi hayqidosona.

6 Ashdooda katamaa bollanne iya heeran de7iya asaa bolla Godaa kushey deexis; Goday kixa harge yeddidi enta seeris.

7 Ashdooda katamaa asay hanidaba be7ida wode, "Isra7eele Xoossaa kushey nu bollanne nu xoossaa Daagone bolla deexida gisho, Isra7eele Xoossaa Taabotey nu matan gam7ofo" yaagidosona. 8 Hessa gisho, ichashu Filisxeeme halaqata ubbaa xeegidi, "Isra7eele Xoossaa Taabotiya waatino?" yaagidi oychidosona.

Halaqati, "Isra7eele Xoossaa Taabotey Gaate katamaa boo" yaagidi zaaridosona. Isra7eele Xoossaa Taabotiya Gaate efidosona.

9 Shin Taabotey Gaate gakidaape guye, Godaa kushey he katamaa bolla deexidi, daro daganthis. Kataman de7iya asaa na7ape cima gakanaw kixa hargen shocis. 10 Hessa gisho, Xoossaa Taabotiya Eqroona katama yeddidosona.

Xoossaa Taabotey Eqroona geliya wode, Eqroona asay, "Nunanne nu asaa dhaysanaw Isra7eele Xoossaa Taabotiya nuuko ehidosona" yaagidi waassidosona. 11 Hessa gisho, enti Filisxeeme halaqata xeegidi, "Nunanne nu asaa dhaysanaape sinthe Isra7eele Xoossaa Taabotiya haysafe diggite; iya iya bessaa guye zaarite" yaagidosona. Godaa kushey katamaa bolla deexida gisho Katama ubbay hayqo dagaman oyketis.

1 Godaa Taabotey Filisxeeme biittan laapun ageena uttis. 2 He wode Filisxeeme asay banta kahinetanne marota xeegidi, "Godaa Taabotiya nuuni waatino? Nuuni guye iya bessaa iya waati yeddaneeko nuus odite" yaagidosona.

3 Enti zaaridi, "Isra7eele Xoossaa Taabotiya guye yeddishe mela kushe yeddofite. Ay hanidika nagara yarshora yeddite. Hessa oothiko hinte paxana; iya kushey hinte bollafe ayis kichiboonako hinte erana" yaagidosona.

10 Enti geetetidaysada oothidosona; nam7u dhanthiya miizata ekidi, gaaren waaxidosona; marata soo zaaridi gordidosona. 11 Enti Godaa Taabotiya, worqa kixanne ecere misileti de7iya saaxiniya gaaren wothidosona. 12 Hessafe guye, miizati Beet-Sameesa efiya ogiya oykidi gede haa goonna "Himbaa" gidi waassishe bidosona. Filisxeeme halaqati miizata geedo kaallidi, Beet-Sameesa zawa gakanaw bidosona.

13 Beet-Sameesa asay he wode zangaaran giste cakoosona; enti dhoqu gidi xeellidi, Taabotiya be7idi ufaytidosona. 14 Gaarey Beet-Sameesan de7iya Iyyasu geetetiya uraa gade gakidi, issi gita shuchaa matan eqis. Enti gaariya mithaa qeridi, xuussa yarsho oothidi he miizata Godaas yarshidosona. 15 Leeweti Godaa Taabotiyanne worqa miisheti de7iya saaxiniya gaariyape wodhisidi, gita shucha bolla wothidosona. He gallas Beet-Sameesa asay Godaas xuussa yarshonne hara yarshota yarshidosona.

1 Qiriyat-Yi7aarima asay yidi, Godaa Taabotiya efidi dere huuphen de7iya Amnadaabe son wothidosona. Godaa Taabotiya naagana mela Amnadaabe na7aa Alaazara dummayidi sunthidosona.

2 Taabotey Qiriyat-Yi7aariman daro wode gam7is; yan laatamu laythi uttis. Isra7eele asa ubbay azzanidi Godaa koydosona.

12 Xoossa Taabotiya gisho Goday Abidaara soo asaanne iyaw de7iya ubbaa anjidaysa kawoy Dawiti si7is. Hessa gisho, Dawiti Abidaara soo bidi, Xoossa Taabotiya Dawita Katamaa ufaysan ehis. 13 Dawiti Godaa Taabotiya tookida asati usupuna tango tangida wode enta essidi, issi kormanne issi anqara mari yarshis. 14 Dawiti liinope oosetida efuude ma7idi, baw de7iya wolqa ubban Godaa sinthan duris. 15 Dawitinne Isra7eele asa ubbay ufaysan ililishenne moyze punnishe Godaa Taabotiya Dawita Katama ehidosona.

1 Hessafe guye, kawoy Solomoney Godaa taabotiya Dawita katamaape, Xiyoonepe kessidi, Xoossa keethi ehanaw Isra7eele cimata, kochata halaqatanne Isra7eele soo asata kaaletheyisata Yerusalaame kataman shiishis. 2 Etaanima geetetiya laapuntha ageenan, Shaqara Ba7aaley bonchetiya wode Isra7eele asa ubbay kawa Solomoneko shiiqidosona.

3 Isra7eele cimati ubbay shiiqin, kahineti Taabotiya denthidosona. 4 Leewetinne kahineti, Godaa taabotiya, Dunkaaniyanne iya giddon de7iya geeshsha miisheta ubbaa tookidi ehidosona. 5 Kawoy Solomoneynne iyara de7iya Isra7eele asay Taabotiya sinthan shiiqidi, taybanaw danda7etonna daro dorsenne mehe yarshidosona.

6 Hessafe guye, kahineti Godaa caaqo taabotiya Xoossa keethan Ubbaafe Geeshsha bessa ehidi, kiruubeta qefetape garsa baggara wothidosona. 7 Micetidi uttida kiruubeta qefeti taabotiyanne taabotiya tookiya kasota kammidosona. 8 Kasoti daro adusse gidiya gisho enta xeeray Ubbaafe Geeshsha Bessa sinthan qoncen bentoosona. Shin Geeshsha bessaafe karera bentanaw danda7enna. Enti hachi gakanaw he bessan de7oosona. 9 Isra7eele asay Gibxe biittafe keyida wode Goday entara caaqida Koreeba zuman Musey wothida nam7u loche shuchata xalaalape attishin, Taabotiya giddon harabay aybika baawa.

10 Kahineti Xoossa keethafe keyida wode Xoossa keethay shaaran kumis. 11 He shaara gaason kahineti banta oosuwa oothanaw danda7ibookona; Godaa bonchoy Xoossa keetha kumis.

14 "Hinteno, ammanetona asaw, ta hintew azina gidiya gisho simmite. Taani issi katamape issinno, issi yarape nam7a doora ekada Xiyoone ehana. 15 Ta wozanaada hintena heemmiya henthanchota hintew immana. Enti hintena eratethaninne akeekan heemmana" yaagees Goday.

16 "He gallasatan hinte he biittan dariya wode asay, ‘Godaa caaqo Taabotiya’ gidi odetokona. I entaw qofetenna; hassayetenna; baynaysi entaw eretenna; harika oosetenna.

1 Koyro caaquwas Xoossaa goyinniya wogaynne sa7a Xoossa Keethay de7ees. 2 Dunkaaney eqis. Iyan xompe wothiya kocay, xarpheezaynne Godaa sinthan wothiya uythay de7ees; he bessay Geeshsha Bessaa geetetees.✝ 3 Nam7antho magarajuwafe guye baggara de7iya bessay Ubbaafe Geeshsha Bessaa geetetees.✝ 4 Iya giddon ixaane cuyisiya worqa saaxineynne worqan meeshetida caaqo Taabotey de7ees. He caaqo Taabotiyan mannay de7iya worqa xaaroy, aacida Aarona xam7aynne Muse higgey xaafetida nam7u loche shuchati de7oosona.✝ 5 He Taabotiyape bolla baggara atotetha kamaa banta qefiyan genthiya boncho kiruubeti de7oosona. Shin ha77i he ubbaa qoncisidi odanaw danda7oko.✝

19 Salon de7iya Xoossa Keethay dooyetis; iya giddon Xoossaa caaqo Taabotey bentis. Qassi wol7anthi wol7amis, deshoy dechis; daday dhuuqis; biitti qaaxis; shachi bukis.✝