Arca da aliança
A Arca da Aliança era o símbolo mais sagrado de Israel — representava a presença de Deus no meio do seu povo. Sobre ela brilhava a glória do Senhor entre os querubins.
वाचा को सन्दूक
बबूल की लकड़ी को एक सन्दूक बनायो जाये; ओकी लम्बायी ढायी हाथ, अऊर चौड़ायी अऊर ऊंचायी देड़ देड़ हाथ की होना। अऊर ओख शुद्ध सोनो सी अन्दर अऊर बाहेर मढ़वाजो, अऊर सन्दूक को ऊपर चारयी तरफ सोनो की किनार बनायजो। अऊर सोनो को चार कड़ा साचा सी ढाल क बनायजो ओको चारयी पाय पर, एक तरफ दोय कड़ा अऊर दूसरो तरफ दोय कड़ा लगाजो। फिर बबूल की लकड़ी को डन्डा बनवाजो, अऊर उन्ख भी सोनो सी मढ़ो। अऊर डन्डा ख सन्दूक को दोयी तरफ को कड़ा म डालजो, जेकोसी उन्को सहारा सी सन्दूक ख उठायो जाये सके। हि डन्डा सन्दूक को कड़ा म लग्यो रहेंन; अऊर ओको सी अलग नहीं करयो जाये। अऊर जो गवाही चिट्ठी मय तोख देऊं ओख उच सन्दूक म रखजो।
"फिर शुद्ध सोनो को एक पश्चाताप को ढक्कन बनवाजो; ओकी लम्बायी ढायी हाथ, अऊर चौड़ायी देड़ हाथ की होना। अऊर सोना ढाल क दोय करूब बनाय क पश्चाताप को ढक्कन को दोयी कोना पर लगवाजो। एक करूब एक कोना पर अऊर दूसरो करूब दूसरो कोना पर लगवाजो; करूबों ख दया आसन को ढक्कन ख एकच तुकड़ा सी बनाय क ओको दोयी कोना पर लगवायजो। उन करूबों को पंखा ऊपर सी असो फैल्यो हुयो बने कि पश्चाताप को ढक्कन उन सी ढक्यो रहे, अऊर उन्को मुख आमने-सामने अऊर दया आसन को ढक्कन को तरफ रहे। अऊर पश्चाताप को ढक्कन ख सन्दूक को ऊपर लगवाजो; अऊर जो गवाही चिट्ठी मय तोख देऊं ओख सन्दूक को अन्दर रखजो।
मय वहां रह्य क तोरो सी मिलतो रहूं; अऊर इस्राएलियों लायी जितनी आज्ञाये मोख ख तोख देनो होय, उन सभी को बारे म पश्चाताप को ढक्कन को ऊपर सी अऊर उन करूबों को बीच म सी, जो गवाही चिट्ठी को सन्दूक पर होना, तोरो सी बात-चित करतो रहूं।"
वाचा को सन्दूक बनायो जानो
तब बसलेल न बबूल की लकड़ी को सन्दूक बनायो; ओकी लम्बायी ढायी हाथ, चौड़ायी डेढ़ हाथ, अऊर ऊंचायी डेढ़ हाथ की होती,
मिलाप वालो तम्बू खड़ो करयो जावय हय
तब परमेश्वर न मूसा सी कह्यो, "पहिलो महीना को पहिलो दिन ख तय मिलाप वालो तम्बू को निवास ख खड़ो कर देजो। अऊर ओको म गवाही चिट्ठी को सन्दूक ख रख क बीच वालो परदा की आड़ म कर देजो।
अऊर ओन गवाही चिट्ठी ख ले क सन्दूक म रख्यो, अऊर सन्दूक म डन्डा ख लगाय क ओको ऊपर प्रायश्चित को ढक्कन ख सन्दूक को ऊपर रख दियो; अऊर मूसा न सन्दूक ख पवित्र जागा म रखवायो, अऊर बीच वालो परदा ख लटकाय दियो अऊर गवाही चिट्ठी ख सन्दूक ख अन्दर परदा की आड़ म करयो; जसो परमेश्वर न मूसा ख आज्ञा दी होतो।
फसल को समय होतो नदी म बहुत बाढ़ होतो येकोलायी जब प्रजा को लोगों न अपनो तम्बुवों सी यरदन नदी पार जान लायी निकल्यो, अऊर याजक वाचा को सन्दूक उठायो हुयो प्रजा को आगु आगु चल्यो, अऊर सन्दूक ख उठावन वालो यरदन नदी पर पहुंच्यो, अऊर सन्दूक को उठावन वालो याजकों को पाय यरदन नदी को पानी म डुब गयो यरदन नदी को पानी त कटनी को समय को सब दिन अपनो तट को ऊपर ऊपर बह्यो करय हय, तब जो पानी ऊपर को तरफ सी बहत आवय हय ऊ बहुत दूर, मतलब आदाम नगर को जवर जो सारतान नगर को जवर रूक क एक ढेर भय गयो, अऊर दीवार जसो उठ्यो रह्यो, अऊर जो पानी अराबा को सागर जो मृत सागर भी कह्यो जावय हय, ओको तरफ बहत जात होतो, ऊ पूरो रीति सी सूख गयो; अऊर प्रजा को लोग यरीहो को सामने पार उतर गयो। अऊर याजक यहोवा की वाचा को सन्दूक उठायो हुयो यरदन को बीचों बीच पहुंच क जागा पर स्थिर खड़ो रह्यो, अऊर सब इस्राएली जागाच जागा पार उतरतो रह्यो, आखरी म ऊ पूरी जाति को लोग यरदन नदी पार भय गयो।
अऊर जसोच परमेश्वर की वाचा को सन्दूक उठावन वालो याजक यरदन नदी को बीच म सी निकल आयो, अऊर उन्को पाय सूखी जमीन पर पड़्यो, वसोच यरदन नदी को पानी अपनो जागा पर लौट आयो, अऊर पहले को जसो किनारा को ऊपर फिर बहन लग्यो।
यरीहो नगर को विनाश
इस्राएली लोगों को वजह यरीहो नगर को फाटक बन्द कर दियो गयो होतो, कोयी भी नगर को अन्दर नहीं आय सकत होतो अऊर नहीं कोयी बाहेर जाय सकत होतो। फिर परमेश्वर न यहोशू सी कह्यो, "देख मय यरीहो नगर ख ओको राजा अऊर योद्धावों समेत तोरो वश म कर देऊ हय। येकोलायी तुम म जितनो योद्धा हय नगर ख घेर ले, अऊर ऊ नगर को चारयी तरफ दिन म एक बार चक्कर लगाये। अऊर छय दिन तक असोच करतो रहो। अऊर सात याजक मेंढा को सींगो सी बन्यो सात नरसिंगा ले क सन्दूक को आगु आगु चलेंन; फिर सातवों दिन तुम नगर को चारयी तरफ सात बार घूमो, अऊर याजक भी नरसिंगा फूकतो चलेंन। अऊर जब हि मेंढा को सींगो को नरसिंगा देर तक फूकतो रहेंन, तब सब लोग नरसिंगा को आवाज सुनतोच बड़ो आवाज सी जय जयकार करेंन; तब नगर की दीवाल नीव गिर जायेंन, अऊर सब लोग अपनी आंखी को सामने सीधो चलतो जाये।"
येकोलायी नून को टुरा यहोशू न याजकों ख बुलाय क कह्यो, "वाचा को सन्दूक ख उठाय लेवो, अऊर सात याजक परमेश्वर को सन्दूक को आगु आगु मेंढा को सींगो को सात नरसिंगा ले क चलेंन।" फिर ओन इस्राएली लोगों सी कह्यो, "आगु बढ़ क नगर को चारयी तरफ घुम क आवो; अऊर हथियार लियो हुयो आदमी परमेश्वर को सन्दूक को आगु आगु चले।"
तब लोगों न जय जयकार करयो, अऊर याजक नरसिंगा फूकतो रह्यो। अऊर जब लोगों न नरसिंगा को आवाज सुन्यो त फिर बड़ी आवाज सी उन्न जय जयकार करयो, तब नगर की दीवाल गिर गयी, अऊर लोग सीधो ऊ नगर म घुस गयो, अऊर नगर पर अधिकार कर लियो।
धरती की अऊर स्वर्गीय उपासना
वा पहिली वाचा म भी सेवा करन को नियम होतो, तथा आदमियों को हाथों सी बनायो गयो पवित्र जागा होतो। एक तम्बू बनायो गयो होतो, जेको पहिलो कमरा म दीवट होतो, अऊर मेज, अऊर जेको पर भेंट की रोटी होती; जेक पवित्र जागा कह्यो जात होतो। दूसरों परदा को पीछू अऊर एक कमरा होतो, जेक परम पवित्र जागा कह्यो जात होतो। ओको म सुगन्धित धूपदानी को लायी सोनो की वेदी अऊर सोनो सी मढ़्यो हुयो वाचा को सन्दूक होतो यो सन्दूक म सोनो को बन्यो मन्ना को एक बर्तन होतो, अऊर हारून की वा छड़ी जेको म अंकुर उग्यो होतो तथा दोय गोटा की पाटियों जेको पर आज्ञाये लिखी हुयी होती हि होतो। सन्दूक को ऊपर परमेश्वर को उपस्थिति को महिमामय याने करूब बन्यो होतो, जो अपनो पंखा ख फैलाय क पश्चाताप को जागा पर छाया करत होतो। पर यो समय हम या बातों को विस्तार को संग चर्चा नहीं कर सकय।
अऊर परमेश्वर को जो मन्दिर स्वर्ग म हय ऊ खोल्यो गयो, अऊर ओको मन्दिर म ओको वाचा को सन्दूक दिखायी दियो। अऊर बिजलियां, शब्द, गर्जन, भूईडोल भयो अऊर बड़ी गारगोटी गिरयो।