10 Mo Hae God i talem se, "Bambae yufala i mas wokem wan Bokis long wud ya kasis.* Longfala blong hem bambae i kasem wan handred fiftin sentemeta, mo bigfala blong hem bambae i kasem klosap seventi sentemeta mo hae blong hem tu bambae i kasem klosap seventi sentemeta. 11 Long insaed blong hem mo long afsaed blong hem, bambae yufala i blokem ol wud blong hem long gol we i klin gud, i beswan, mo bambae yufala i wokem wan smol strap tu long gol, i goraon long hem bakegen long saed blong hem antap blong flasem. 12 Bambae yufala i wokem fo ring blong hem long gol, mo bambae yufala i hangem olgeta long ol fo leg blong Bokis ya, tu long wan saed, tu long wan saed. 13 Mo bambae yufala i wokem tu stik blong karem, long wud ya kasis, mo yufala i blokem tufala tu long gol, 14 nao yufala i pusum tufala i gotru long ol fo ring ya, wan long wan saed, wan long wan saed. 15 Mo taem yufala i pusum tufala stik ya i go, bambae yufala i no moa tekemaot tufala bakegen, bambae tufala i stap olwe long ol ring ya. 16 Mo tufala flat ston ya we mi raetem ol tok blong mi long tufala finis mo we bambae mi givim long yu, bambae yu putum tufala insaed long Bokis ya.

17 ✝"Lid blong Bokis ya, i Ples we bambae mi mi Tekemaot Sin blong yufala long hem. Bambae yufala i wokem long gol we i klin gud, i beswan. Longfala blong hem bambae i kasem wan handred fiftin sentemeta, mo bigfala blong hem bambae i kasem klosap seventi sentemeta. 18,19 Bambae yufala i hamarem gol long tufala en blong Lid ya, blong wokem tu pija blong jerubim* long hem we tufala i stanap, wan long wan en, mo wan long nara en, we tufala i haf blong Lid ya nomo. 20 Bambae yufala i mekem we tufala pija ya i stap lukluk i go long tufala, mo we tufala i pusum wing blong tufala i kam long tufala, nao wing blong tufala i kavremap Bokis ya antap. 21 Bambae yu tekem tufala flat ston ya we bambae mi givim long yu, yu putum i go insaed, nao yu tekem Lid ya blong hem, yu satem.

22 Bambae mi mi kam stap antap long Lid blong Bokis ya, long medel blong tufala jerubim ya, nao bambae mi stap mit wetem yu long ples ya, mo bambae mi givim ol tok ya blong mi long yu, we bambae yufala i mas folem."

1 Nao Bejalehel i tekem wud ya kasis,* i wokem Bokis ya we i Saen blong Promes* blong Hae God. Longfala blong Bokis ya i kasem wan handred fiftin sentemeta, mo bigfala blong hem i kasem klosap seventi sentemeta mo hae blong hem tu i kasem klosap seventi sentemeta.

1 Nao Hae God i talem long Moses se, 2 "Nekis yia, long fas manis* blong yia, long fas dei blong hem, bambae yufala i stanemap Haos Tapolen ya blong mi, we bambae yufala i stap kam long hem blong mit wetem mi. 3 Bambae yufala i tekem Bokis ya we i Saen blong Promes* blong mi, we i gat tufala flat ston ya i stap insaed, nao yufala i putum i go insaed long Haos Tapolen ya, mo yufala i tekem kaliko ya we i blong brekem rum ya long tu haf, yufala i hangem long fran blong Bokis ya blong blokem.

20 Nao Moses i tekem tufala ston ya, i putum tufala i go insaed long Bokis ya we i Saen blong Promes blong Hae God, mo i tekem tufala stik ya blong karem Bokis ya, i pusum tufala i gotru long ol ring blong Bokis ya, mo i putum Lid ya long hem we i Ples we Hae God i stap Tekemaot Sin blong olgeta. 21 Nao hem i tekem Bokis ya, i putum i go insaed long Haos Tapolen ya, mo i tekem kaliko ya we i blong brekem rum ya long tu haf, i hangem long fran blong Bokis ya blong blokem, stret olsem we Hae God i talem.

89 Nao taem Moses i go insaed long Haos Tapolen ya blong toktok wetem Hae God, hem i harem we Hae God i stap toktok long hem we voes blong hem i stap kamaot long medel blong tufala jerubim* antap long lid blong Bokis ya we i Saen blong Promes* blong hem.

33 Nao taem olgeta oli aot long tabu hil ya Sinae, oli wokbaot tri dei, mo Bokis ya we i Saen blong Promes* blong Hae God, oltaem olgeta oli karem i go fastaem long olgeta, blong i soemaot ples we bambae oli stap long hem. 34 Mo oltaem, taem oli stap wokbaot long dei blong muv i go long narafala ples, klaod ya blong Hae God i stap antap long olgeta.

35 ✝Nao oltaem, taem we olgeta we oli stap karem Bokis ya oli stat wokbaot blong go, Moses i stap prea se,

"!Hae God!

!Plis yu girap,

yu ronemaot ol enemi blong yu

oli go wanwan!

!Olgeta we oli no laekem yu,

oli stap agens long yu,

plis yu mekem olgeta oli ronwe!"

36 Mo taem we Bokis ya i gotru long narafala ples, hem i stap prea bakegen se,

"!Hae God!

Mifala i laen* blong Isrel,*

mo mifala i plante we plante.

!Plis yu kambak,

yu kam stap wetem mifala!"

1 Nao Hae God i talem long Moses se, 2 "Yu talemaot long olgeta man ya, se ol twelef lida blong ol laen* blong yufala oli mas karem ol wokingstik blong olgeta i kam, oli givim long yu. Yu mas raetem nem blong olgeta wanwan long ol twelef stik ya, 3 mo stik ya we ol laen blong Livae* i givim, bambae yu raetem nem blong Hae Pris Eron long hem. Bambae i mas gat wokingstik i stap blong karem nem blong ol lida blong ol twelef laen blong yufala. 4 Nao yu mas tekem ol wokingstik ya i kam long Haos Tapolen blong mi, yu mas putum olgeta long fran blong Bokis ya we i Saen blong Promes* blong mi, long ples ya we mi stap mit wetem yu long hem. 5 Mo man we mi mi jusumaot hem blong i mekem wok blong mi, wokingstik blong hem bambae i gru. Nao long fasin ya, bambae mi mi blokem toktok blong ol man ya we oli stap tok agens long yu oltaem."

6 Nao Moses i talemaot tok ya long olgeta, mo ol lida blong ol twelef laen ya oli kam givim wokingstik long hem. Long fasin ya, i gat twelef wokingstik i stap, mo wokingstik blong Hae Pris Eron i go wetem olgeta, 7 mo hem i go putum olgeta wokingstik ya insaed long Haos Tapolen blong Hae God, long fran blong Bokis ya we i Saen blong Promes blong hem.

8 ✝Nao long nekis dei, taem Moses i kam long Haos Tapolen ya, hem i luk we wokingstik ya blong ol laen blong Livae, we nem blong Hae Pris Eron i stap long hem, hem i gru. Wokingstik ya i mekem ol lif blong hem, mo ol flaoa blong hem, mo i karem ol frut ya amon* tu we i raep. 9 Nao hem i tekem ol stik ya, i go soemaot long olgeta man. Mo taem olgeta oli luk samting ya we i kamaot, ol lida oli kam tekembak ol wokingstik blong olgeta. 10 Nao Hae God i talem long hem se, "Yu tekem wokingstik ya blong hae pris, yu putum i gobak bakegen long fran blong Bokis ya we i Saen blong Promes blong mi. Bambae yu holem i stap long ples ya blong mekem saen long fes blong olgeta ya evriwan we oli girap, oli stap tok agens long mi. Mo oltaem bambae stik ya i stap soemaot se sipos oli no finis long fasin ya, bambae oli ded." 11 Nao hem i mekem olsem we Hae God i talem.

14,15 Long taem ya, i taem blong tekemaot kakae long garen,* we oltaem, Jodan Reva i stap ron bigwan.*

Nao taem ol man ya oli aot long ples blong olgeta blong gokros long reva ya, ol pris oli karem Bokis ya, oli go fastaem, ol man oli kam biaen. Mo long semtaem ya we ol pris ya oli purumbut long wota, 16 wota ya i no moa ron. Haf wota ya we i stap ron i kamdaon, hem i stap fulap longwe, klosap long taon ya Adam we i klosap long Jaretan. Mo nara haf we i stap ron i godaon kasem Ded* Si, hem i ron i go, nao ples ya i kam drae olgeta. Nao olgeta man oli gokros, oli kasem narasaed klosap long Jeriko. 17 Mo taem olgeta oli stap gokros, ol pris ya oli stap stanap long medel blong ples ya we i drae finis, gogo kasem we olgeta man ya evriwan oli gokros.

11-18 * long fored blong Baebol ya.Olgeta we oli laen blong Ruben,* wetem olgeta we oli laen blong Gad* mo haf ya blong olgeta we oli laen blong Manase* oli karem ol samting blong faet blong olgeta, oli go fastaem, mo ol narafala man ya oli biaen long olgeta. Oli mekem ol samting ya, stret olsem we Moses i talem bifo. Namba blong olgeta ya, i gat samwe long foti taosen man we oli karem ol samting blong faet oli pas long fes blong Hae God*, nao oli go stap long bigfala levelples ya klosap long Jeriko. Ol bigfala samting ya we Hae God i mekem long medel blong olgeta long taem ya i stap soemaot we Josua i wan haeman. Nao oltaem long laef blong hem, ol man ya oli stap ona gud long hem, stret olsem we oli stap ona long Moses bifo.

Nao Hae God i talem long Josua, blong hem i talem long ol pris ya we oli stap karem Bokis ya, blong oli kamaot long krik ya. Nao hem i mekem olsem, mo taem olgeta oli kamaot, oli kam stanap long saed blong krik ya, nao wota ya i stat ron bigwan bakegen olsem fastaem, we i kavremap olgeta ples klosap long hem. Mo taem olgeta man ya oli stap evriwan long narasaed, ol pris we oli stap karem Bokis ya oli wokbaot i go fastaem long olgeta, ol man oli biaen long olgeta.

1 Long taem ya ol man Jeriko oli satemgud ol doa* blong bigfala stonwol blong taon ya, mo ol gad oli stap lukaot blong blokem Josua olgeta oli no save go insaed. Nao i no gat man i save go insaed, mo i no gat man i save go afsaed tu. 2 Nao Hae God i talem long Josua se, "Naoia mi mi putum taon ya Jeriko long han blong yu. King* blong hem, wetem ol soldia blong hem we oli strong man blong faet, mi mi putum olgeta evriwan long han blong yu finis. 3 Evri dei, yu wetem ol soldia blong yu, bambae yufala i mas maj i goraon long taon ya wan taem, gogo kasem sikis dei. 4 Bambae seven pris* we oli holem pupu we oli wokem long hon blong sipsip oli mas maj wetem yufala, mo ol pris ya we oli stap karem Bokis ya we i Saen blong Promes* blong mi bambae oli mas go biaen long olgeta. Nao long namba seven dei, bambae yufala i mas maj i goraon long taon ya seven taem. Mo long taem ya, ol pris ya bambae oli mas stap blu long pupu blong olgeta. 5 Nao taem yufala i harem we oli blu bigwan mo oli pulum i longfala, long semtaem, bambae yufala evriwan i mas singaot bigwan. Nao bigfala stonwol blong taon ya bambae i brobrok i foldaon. Nao olgeta soldia blong yu bambae oli save go insaed wantaem nomo long taon ya."

6 Nao Josua i singaot ol pris,* i talem long olgeta se, "Olgeta. Naoia bambae yumi go. Bambae yufala i karem Bokis ya we i Saen blong Promes* blong Hae God, mo seven long yufala bambae oli holem pupu we oli wokem long hon blong sipsip, oli wokbaot fastaem long Bokis ya." 7 Mo hem i talem long ol soldia blong hem se, "Naoia bambae yumi maj i goraon long taon ya. Haf blong yufala bambae i wokbaot fastaem long ol pris we oli karem Bokis ya."

20 ✝Nao ol pris oli blu long pupu blong olgeta, mo taem Josua olgeta oli harem, wantaem nomo, olgeta evriwan oli singaot bigwan, nao bigfala stonwol blong taon ya i brobrok, i foldaon. Nao i no moa gat wan samting i blokem ol soldia ya, olgeta oli go insaed wantaem nomo long taon ya, oli faet long ol man blong hem, oli winim olgeta, nao ples ya i stap long han blong olgeta.

2 Nao ol man Filistia oli kamaot, oli kam mekem faet long ol laen blong Isrel, mo oli faet strong tumas, gogo ol man Filistia oli winim olgeta, mo oli kilim samwe long fo taosen man oli ded long ples ya. 3 Taem ol laen blong Isrel ya we oli no ded oli kambak long ol haos tapolen blong olgeta, ol lida blong olgeta oli talem se, "?Olsem wanem ya? ?Hae God i letem ol man ya oli winim yumi tede from wanem? Yumi mas go long Silo, yumi karem Bokis ya we i Saen blong Promes* blong hem i kam, blong hem i stap wetem yumi, i tekemaot yumi long han blong ol enemi ya blong yumi, i sevem yumi." 4 ✝Nao oli sanem sam man oli go long Silo, blong karem Bokis ya i kam. Tufala pris* ya Hofni mo Finehas we tufala i pikinini blong pris ya Ilae, tufala i kam wetem Bokis ya. Bokis ya i saen blong jea blong Hae God we hem i stap sidaon long hem i stap rul. Hae God ya, hem i hae we i hae mo hem i gat olgeta paoa.

5 Taem ol man oli luk Bokis ya i kam kasem ples ya we oli stap long hem, oli glad tumas, nao oli stap singsingaot bigwan, we i mekem ples i muv. 6 Mo taem ol man Filistia oli harem ol noes ya we oli mekem, oli talem se, "!Ei, olgeta! ?Yufala i harem noes ya? !Hemia ol Hibru* ya!* ?Oli stap singsingaot from wanem?" Mo taem oli harem we Bokis ya i kamtru finis long ples ya we ol laen blong Isrel oli stap long hem, 7 oli fraet we i fraet. Oli talem se, "!Wan god i kamtru finis long ples blong olgeta! !Yumi lus nao! !Neva wan samting olsem i kasem yumi bifo! 8 !Ol god ya blong olgeta oli gat paoa ya! ?Hu bambae i save tekemaot yumi long han blong olgeta, i sevem yumi? Hemia ol god ya, we bifo, oli sanem ol bigbigfala trabol i kam kilim ol man Ijip, oli ded long draeples. 9 !Be yumi no mas fraet! !Yumi no woman ya! !Yumi mas stanap strong! Sipos no, bambae oli spolem yumi! Bambae oli mekem yumi kam slef* blong olgeta, olsem we bifo, yumi mekem olgeta oli kam slef blong yumi. !Yumi man ya! !Naoia yumi mas faet!"

10 Ale, oli go mekem faet bakegen, nao oli strong tumas, oli winim ol laen blong Isrel, oli ronem olgeta, oli kilim toti taosen soldia blong olgeta oli ded, mo ol narafala oli ronwe wanwan blong gohom. 11 Long faet ya, Hofni mo Finehas, tufala pikinini blong Ilae, tufala i ded, mo Bokis ya we i Saen blong Promes blong Hae God, ol man Filistia oli karem i go long ples blong olgeta.

6 Nao long taem ya, Hae God i panisim ol man Asdod wetem ol man blong ol ples raonabaot, we i meksavegud olgeta, nao oli fraet we oli fraet. Hem i mekem ol samting olsem boela* i stap solap long bodi blong olgeta. 7 Taem ol narafala man Filistia oli luk ol samting ya, oli talem se, "God blong ol laen* blong Isrel* ya i stap panisim yumi wetem god ya blong yumi. Yumi no moa save holem Bokis ya i stap long ples ya." 8 Nao oli sanem sam man oli go singaot ol faef king blong olgeta oli kam wanples. Nao oli askem long ol king ya se, "?Bambae yumi mekem olsem wanem long Bokis ya we i blong God blong ol laen blong Isrel?"

Ol king ya oli talem se, "Yufala i tekemaot long ples ya, yufala i karem i go long Gat." Nao oli karem i go long ples ya, we i wan narafala taon long Filistia. 9 Be taem oli tekem i go stap long ples ya, Hae God i panisim ol man blong taon ya tu, we i meksave olgeta, nao oli fraet we oli lusum hed. Hem i panisim olgeta man long taon ya. Hem i mekem ol samting olsem boela i stap solap long bodi blong olgeta, we ol yangyangfala wetem ol ololfala oli kasem sem mak nomo. 10 Nao oli sanem Bokis ya i go long Ekron, we i wan narafala taon blong Filistia. Be taem oli karem Bokis ya i go kasem taon ya, ol man blong ples ya oli stap singsingaot se, "!Ei, olgeta! Oli tekem Bokis ya we i blong God blong ol laen blong Isrel i kam long ples blong yumi. !Ating oli wantem kilim yumi ya!" 11 Nao oli sanem sam man i go long ol king blong Filistia blong talem long olgeta se, "!Yufala i tekemaot Bokis ya! Yufala i sanem i gobak long ples blong hem, blong hem i no moa kilim yumi wetem ol famle blong yumi." Olgeta man blong taon ya evriwan oli fraet we oli lusum hed olgeta, from we God i stap panisim olgeta we i meksavegud olgeta.

1 Bokis ya we i Saen blong Promes* blong Hae God i stap seven manis long Filistia, 2 nao ol man Filistia oli singaot ol pris* mo ol kleva blong olgeta oli kam, mo oli askem long olgeta se, "!Olgeta! ?Bambae yumi mekem olsem wanem long Bokis ya? ?Sipos yumi sanem i gobak long ples blong hem, bambae yumi mas sanem wanem samting i go wetem?"

3 Nao olgeta ya oli talem se, "Sipos yumi sanem Bokis ya i gobak, bambae yumi mas sanem wan presen i go wetem, blong pemaot ol sin blong yumi. Yumi no save sanem i gobak nating olsem, i mas gat wan samting i go wetem, nao bambae yumi save kam oraet bakegen. Mo bambae yumi save faenemaot tu, from wanem hem i stap panisim yumi olsem."

10 Nao ol man oli go wokem ol samting ya. Oli tekem tu kao olsem, oli hangem kat ya long tufala, mo oli satem tufala pikinini blong tufala i stap long haos blong buluk. 11 Nao oli putum Bokis ya long kat ya, wetem narafala bokis ya we ol pija ya oli stap long hem. 12 Nao tufala kao ya i stat wokbaot, be tufala i no go olbaot, tufala i folem rod ya i go stret long Betsemes, mo taem tufala i stap go, tufala i stap singaot. Mo ol faef king ya blong Filistia oli stap folem tufala, gogo kasem mak blong graon blong ol man Betsemes.

13 Ol man Betsemes oli stap mekem garen* long wan bigfala levelples long medel blong ol hil, mo long taem ya oli stap long ples ya, oli stap tekemaot kakae blong wit* long ol garen blong olgeta. Mo taem oli luk Bokis ya, oli sek long hem, mo oli glad tumas tu. 14,15 Nao kat ya i kam kasem garen blong wan man Betsemes, nem blong hem Josua, mo i stop klosap long wan bigfala ston long ples ya. Nao ol laen blong Livae* oli kam tekemaot Bokis ya we i blong Hae God*, wetem narafala bokis ya we ol pija ya oli stap long hem, oli putum tufala antap long bigfala ston ya. Nao ol man Betsemes oli brebrekem kat ya, oli katem ol wud blong hem, mo oli kilim tufala kao ya, oli bonem tufala blong mekem sakrefaes long Hae God. Mo oli kilim ol anamol blong olgeta tu long dei ya blong mekem sakrefaes long Hae God, sam we oli bonem olgeta evriwan, mo sam we oli bonem haf oli kakae haf.

1 ✝Nao ol man Kiriatsearim oli go tekem Bokis ya, oli kam putum long haos blong wan man, nem blong hem Abinadab, we haos blong hem i stap antap long hil. Nao oli putumap wan pikinini blong hem, we nem blong hem Eleasara, blong i lukaot long Bokis ya, 2 mo i stat long taem ya, Bokis ya i stap longtaem lelebet long taon ya, i kasem samwe long twanti yia.

Long taem ya ol laen* blong Isrel* oli stap singaot long Hae God blong hem i givhan long olgeta.

12 Nao King Deved i harem nius we Hae God i stap blesem Obededom wetem ol famle blong hem mo olgeta samting we hem i gat, from Bokis ya we i stap long haos blong hem. Nao hem i go tekemaot Bokis ya long hem bakegen, blong i tekem i kam long Jerusalem,* mo hem wetem ol man blong hem oli glad tumas, oli stap danis from. 13 Nao taem ol man we oli karem Bokis ya oli jes stat blong wokbaot, king i blokem olgeta blong oli wet fastaem. Nao hem i kilim wan bul wetem wan smol buluk we i fatfat gud, blong mekem sakrefaes long Hae God. 14 Long taem ya, hem i parpar nomo, nao i danis we i danis, i meksave, blong i leftemap nem blong Hae God. 15 Nao long fasin ya, king wetem ol man blong hem oli karem Bokis ya i kam antap long Jerusalem. Oli glad tumas, nao oli stap singsingaot, mo oli stap blu pupu from.

1 ✝Nao King Solomon i singaot ol hed blong ol twelef laen* blong Isrel,* wetem ol hed blong ol famle blong olgeta, mo ol narafala lida blong olgeta, blong oli kam wanples wetem hem long Jerusalem.* Olgeta ya oli kam blong luk we ol pris bambae oli go long Saeon,* oli tekemaot Bokis ya we i Saen blong Promes* blong Hae God, oli karem i go antap, long haos* blong Hae God. Long taem ya, Saeon i narafala nem blong haf ya blong Jerusalem we nem blong hem "Taon* blong King Deved". 2 ✝Mo olgeta ya evriwan oli kam wanples long fes blong king, long taem blong Lafet* ya blong Wokem ol Wansaed Haos, long manis ya Etanim* we i namba seven manis long yia blong olgeta. 3 Nao taem olgeta oli kam wanples finis, ol pris oli tekem Bokis ya, 4 mo ol narafala pris wetem ol Livaet,* oli tekem Haos Tapolen ya we olgeta oli stap go long hem blong mit wetem Hae God, wetem ol narafala samting blong hem, nao oli karem ol samting ya evriwan i go long haos blong Hae God. 5 Nao king wetem olgeta man ya oli kam wanples long fran blong Bokis ya, mo oli stap mekem sakrefaes we oli stap kilim ol sipsip mo ol buluk we oli plante we plante, man i no save kaontem. 6 Nao ol pris ya oli karem Bokis ya i go insaed long haos blong Hae God, mo oli putum insaed long Rum ya we i Tabu we i Tabu, aninit long wing blong tufala pija ya blong jerubim.* 7 Nao wing blong tufala jerubim ya i blokemgud bokis ya, wetem tu longfala stik blong hem we oli stap karem long hem. 8 Tufala stik ya i longfala, nao sipos man i stanap long bigfala Rum ya we i Tabu, stret long doa blong Rum ya we i Tabu we i Tabu, hem i save luk en blong tufala, be sipos i stanap afsaed, hem i no save luk. Tufala stik ya i stap yet long ples ya, kam kasem tede. 9 ✝Insaed long Bokis ya, i no gat narafala samting, tufala flat ston ya nomo i stap we Moses i bin putum bifo olgeta. Taem Moses olgeta oli aot long Ijip oli kam, Hae God i mekem wan promes wetem olgeta long hil ya Sinae, nao long taem ya, Moses i putum tufala ston ya long Bokis ya.

10,11 ✝Nao ol pris oli aot long bigfala Rum ya we i Tabu, mo taem oli kam afsaed, wantaem nomo, klaod we i saen we i saen we i soemaot we Hae God i stap, hem i fulumap haos ya, nao oli no moa save mekem wok blong olgeta from samting ya.

14 " ‘I stat bifo, kam kasem tede, tingting blong yufala i no stap strong long mi nating, be naoia, yufala i mas kambak long mi, from we yufala i man blong mi. Long evri taon blong yufala, mi bambae mi tekemaot wan man long wan taon, wan man long wan taon, mo long evri famle blong yufala, bambae mi tekemaot tu man long wan famle, tu man long wan famle, nao mi tekem olgeta oli kambak long hil ya Saeon.*

15 " ‘Bambae mi givim ol gudfala lida long yufala, we oli save obei long mi. Bambae mi mekem olgeta oli waes gud, mo oli gat save blong lidim yufala. 16 Nao taem yufala i kam plante we plante, bambae i no moa gat wan long yufala we i save tokbaot Bokis ya we i Saen blong Promes* blong mi. Bambae yufala i fogetemgud, yufala i no moa save tingbaot. Bambae yufala i no moa wantem, from we i no moa gat wok blong hem, mo bambae yufala i no moa save mekem narawan bakegen.

1 Long promes* ya we God i mekem wetem ol man blong hem bifo, i gat ol fasin blong mekem wosip, mo i gat ples blong mekem wosip, we ples ya i blong wol ya nomo. 2 ✝Ol man bifo oli stanemap Haos Tapolen ya blong mekem wosip we i gat tu rum long hem. Fas rum blong hem, oli talem se "Rum we i Tabu". Long rum ya i gat Ples blong Putum ol Laet i stap, mo wan Tebol we i gat ol Tabu Bred i stap long hem. 3 ✝Olgeta oli blokem rum ya long wan kaliko, mo long narasaed kaliko ya i gat seken rum blong hem, we oli talem se "Rum we i Tabu we i Tabu". 4 ✝Long rum ya i gat wan Olta blong Bonem Insens*, we Olta ya, oli wokem long wud, mo oli blokem evri haf blong hem long gol. Mo i gat Bokis we i Saen blong Promes ya blong Hae God*. Bokis ya tu oli wokem long wud, mo oli blokem evri haf blong hem long gol. Mo insaed long bokis ya, i gat wan botel we oli wokem long gol, we i gat smol haf blong kakae ya mana* i stap long hem. Mo i gat stik ya we nem blong Eron i stap long hem, we bifo God i mekem i gru bakegen. Mo i gat tufala ston i stap, we ol tok blong Tenkomanmen i stap long hem. 5 ✝Lid blong Bokis ya, hem i Ples we God i stap Tekemaot Sin blong man long hem. Mo antap long hem bakegen, i gat tufala jerubim*, we wing blong tufala i blokem Ples ya, mo tufala i soemaot we God i stap. Be naoia i no gat taem blong tokbaot ol smosmol haf blong ol samting ya.

19 ✝Nao mi luk we doa blong haos blong God long heven i open, mo ol man oli save luk Bokis ya we i Saen blong Promes blong Hae God. Nao i gat laetning i laet, mo tanda i faerap. Mo i gat bigfala noes, mo graon i seksek, mo ol ston* blong aes oli folfoldaon olsem ren, we ol ston blong aes ya oli bigbigwan.