Arca de noé
A arca de Noé é história de salvação e fidelidade. Deus instruiu Noé a construir a arca para salvar sua família e os animais do dilúvio — exemplo supremo de obediência e fé.
इजी बजअ ते परमेशरे नूओ खे बोलेया, "सबी लोका खे खत्म करने रा बखत आईगा रा, कऊँकि तिना री बजअ ते तरती ईंसा साथे परी गी री। एबे देखो, मां सेयो तरतिया पाँदा ते नाश करी देणे। इजी खे तूँ गोपेर डाल़ो री लकड़िया रा एक जाह्ज बणाई लो, तिदे कोठड़िया बणाई की तिजी रे बारे-पीतरे राल़ लगाणा। तैं जाह्ज एते टंगो रा बनाणा कि जाह्जो री लम्बाई तीन सौ आथ, चौड़ाई पंजा आथ ओर ऊच्चा तीई आथ ओ। जाह्जो रे एक द्धारी बनाणी, तिजी रे एक आथ पाँदा ते तिजी री छत बनाणा ओर जाह्जो रे एक तरफा खे एक दुराजा राखणा ओर जाह्जो रे पईला, दूजा ओर तीजा इस्सा बनाणा।
फेर यहोवे नूओ खे बोलेया, "तूँ आपणे सारे कराने समेत जाह्जो रे चली जा, कऊँकि मैं एते जुगो रे लोका बीचे बस तूँई आपणी नजरा रे तर्मी देखेया।
नूह आपणे पाऊ, लाड़ी ओर बऊआ समेत, जल-प्रलय ते बचणे रिया तँईं जाह्जो दे चलीगा। शुद्ध ओर अशुद्ध दुँईं किस्मा रे डांगरा रे जोड़ेया बीचा ते, पंछी ओर तरतिया पाँदे लूरने वाल़ेया हर जन्तुआ बीचा ते बी, दो-दो मतलब नर ओर मादा, जाह्जो रे नूओ गे गये, जिंयाँ परमेशरे नूओ खे आज्ञा दित्ती थी, ओर एड़ा ऊआ कि 7 दिना ते बाद प्रलया रा पाणी तरतिया पाँदे आऊणे लगेया।
ओर सबी जातिया रे प्राणिया बीचा ते नर ओर मादा परमेशरो री आज्ञा रे मुताबिक नूओ गे पीतरे गये। फेर यहोवे तेते जाह्जो रा दुराजा बंद करी ता।
40 दिना तक तरतिया पाँदे जलजला ऊँदा रया ओर पाणी बऊत ई जादा बढ़दा गया, जेते कि जाह्ज तरतिया पाँदा ते ऊबे उठणे लगेया। पाणी बढ़दे-बढ़दे तरतिया पाँदे बऊत ई जादा बढ़ी गा ओर जाह्ज पाणिए पाँदे-पाँदे तैरदा रया।
ईंयाँ परमेशरे तरतिया पाँदे रणे वाल़े हर एक जिऊँदे माणूं, पशु, लूरने वाल़े जन्तु ओर सर्गो रे पंछी मिटाईते ओर सेयो सब तरतिया पाँदा ते मिटीगे। बस नूह ओर जितणे तेस साथे जाह्जो रे थे, सेयो ई बचे थे।
ओर पाणी तरतिया पाँदा ते लगातार कटदा गया ओर 150 दिना ते बाद पाणी तरतिया पाँदे कटी गा। सातुए मीन्ने रे सतारूए दिने जाह्ज अरारातो रिया पाह्ड़िया पाँदे रूकी गा।
फेर एड़ा ऊआ कि चाल़िया दिना ते बाद नूहे आपणे बणाए रे जाह्जो री द्धारी खोली। ओर एक काओ उड़ाईता जदुओ तक पाणी तरतिया पाँदा ते नि सूकीगा, तदुओ तक काओ ओरे-पोरे उड़दा रया। फेर तिने आपू गे ते एक कबूतरी उड़ाईती कि देखूँए कि पाणी तरतिया पाँदा ते कटेया कि नई। पर तेसा कबूतरिया खे आपणे पैर राखणे खे कोई जगा नि मिली तो से नूओ गे जाह्जो रे वापस आईगी, कऊँकि सारी तरतिया पाँदे पाणी ई पाणी था। तेबे नूए आथ आगे करी की से पकड़ी ली ओर आपू गे जाह्जो रे लई ली। नूए सात दिन ओर रूकी की सेई कबूतरी जाह्जो ते फेर उड़ाईती, जेबे कबूतरी साँजके बखते तेसगे आईगी ओर तिने देखेया कि तेसा री चूंजा रे जैतूनो रा एक नवां पत्ता ए। इजी ते नूहे जाणी ला कि पाणी तरतिया पाँदा ते कटी गा रा। फेर तिने सात दिन ओर रूकी की सेई कबूतरी उडाई ओर से तेसगे फेर कदी वापस नि आई।
फेर एड़ा ऊआ कि नूओ री उम्रा रे 601 वें सालो रे पईले मीन्ने रे पईले दिने पाणी तरतिया पाँदा ते सूकीगा। तेबे नूहे जाह्जो री छत खोली की देखेया कि तरती सूकी गी री।
तेबे परमेशरे नूओ खे बोलेया, "तूँ आपणी लाड़ी, पाऊआ ओर बऊआ समेत जाह्जो ते बारे निकल़ी की आओ। तिंयाँ ई क्या पंछी, क्या पशु, सबी किस्मा रे लूरने वाल़े जन्तु, जो तरतिया पाँदे लूरोए, ओर जितणे जीव-जन्तु शरीरो रे तां साथे ए, तिना सबी खे आपू साथे निकयाल़ी की ली आओ ताकि तरतिया पाँदे तिना रे जरीये बऊत सारे बच्चे पैदा ओ ओर सेयो फल़़ो-फूलो ओर तरतिया पाँदे फैली जाओ।"
तेबे परमेशरे नूह ओर तेसरे पाऊआ खे बोलेया, "सुणो, आँऊ तुसा साथे ओर तुसा ते बाद जो तुसा रे जो बच्चे ऊणे, तिना साथे बी वाचा बानूँआ; ओर सारे जिऊँदे प्राणिया साथे बी जो तुसा साथे ए मतलब पंछी, करेलू डांगर, तरतिया रे सारे बणो रे डांगर ओर जितणे जीव-जन्तु जाह्जो ते तां साथे बारे निकल़ी रे, तिना सबी साथे बी आऊँ येई वाचा बानूँआ। ओर मां तुसा साथे आपणी ये वाचा पूरी करनी कि सारे प्राणी फेर जलप्रलय रे जरीये नाश नि ऊणे ओर तरतिया खे नाश करने खे फेर जलप्रलय नि ऊणा।"
कि तेसा वाचा रा ये चिह्न ए कि मैं बादल़ो रे आपणा बरखा रा धनुष राखी राखेया ओर ये मां ओर तरतिया बीचे वाचा रा चिह्न् ऊणा।
विश्वासो तेई जेबे नूह नाओं रे माणूंए खे परमेशरे तेसा बाढ़ा रे बारे रे चेतावणी दित्ती थी, जो तिने कदी नि देखी थी, चेतावणी पाई की आज्ञा मानी की आपणे कराने खे बचाणे री खातर जाह्ज बणाया। नूह रे विश्वासो रे सामणे बचे रे लोके जिने विश्वास नि कित्तेया सेयो नाश ऊईगे। परमेशरे नूह खे तर्मी बणाया कऊँकि तिने तेस पाँदे परोसा कित्तेया।
ये सेई आत्मा ए जेसे तेस बीते रे बखतो रे परमेशरो री आज्ञा नि मानी। जेबे नूह आपणा जाह्ज बनाणे लगी रा था तेस बखते परमेशर सब्रो साथे ये देखणे खे इन्तजार करने लगी रा था कि यो लोक आपणा मन फिराओए कि नि। पर तेस जाह्जो रे सिर्फ आठ लोक ई खतरनाक जलप्रलय रे डूबणे ते बची सके। से पाणी बपतिस्मे रा चिह्न ए जो एबे तुसा खे बी बचाओआ। बपतिस्मे रा मतलब शरीरो रा मईल तोणा नि बल्कि साफ दिलो ते आपू खे परमेशरो गे सम्बाल़ना ए। पर ये बपतिस्मा यीशु मसीह रे मरे रेया बीचा ते जिऊँदे ऊणे रे जरिए आसा रा उद्धार करोआ। और यीशु मसीह स्वर्गो रे जाई की परमेशरो रे दाँणे कनारे बैठी गा और स्वर्गदूत, अधिकारी और सामर्थी तेसरे अधीन करी ते।
जेड़े नूहो रे दिन थे, तिंयाँ ई मां माणूं रे पुत्रो रा आऊणा बी ऊणा। कऊँकि जिंयाँ जल-प्रलय ते पईले, जदुओ तक नूह जाह्जो रे नि चढ़ेया, तदुओ तक लोक खाओ-पीओ थे और तिना रे ब्या-शादिया ओ थे और जदुओ तक जल-प्रलय तिना सबी खे हड़ाई की नि लईगा, तदुओ तक तिना खे कुछ बी पता नि चलेया; तिंयाँ ई मां माणूं रे पुत्रो रा बी आऊणा ऊणा। तेस बखते दो जणे डोरूआ रे ऊणे, एक लयी लणा और दूजा छाडी देणा। दो जवाणसा चाक्की पीशणे लगी री ऊणिया, एक लयी जाणी और दूजी छाडी देणी।