Arca de noé
A arca de Noé é história de salvação e fidelidade. Deus instruiu Noé a construir a arca para salvar sua família e os animais do dilúvio — exemplo supremo de obediência e fé.
आग परमेश्वर नूह से अंदुन, "सप्पा प्राणीगोळ्द अन्त माळोद सवाल नान मुंद होट बंदाद; यतिकी आंदुर कारण पृथ्वी उपद्रव देल तुम्मेग्याद, इदुरसाटी ना आंदरी पृथ्वी सांगुळ नष्ट माळ बुळाईन. इदुरसाटी नी गोपेर इन मार्र इन हुळ्ली इन ऊंद जहाज माळकोम, अदुर दा कमरागोळी माळेत, अदिक व्हार्या-बुळ्क अदुर मा राल हचेत. ई ढंग देल नी अदरी माळेत: जहाज इन लंबाई मुर सौ कय, चौळाई पचास कय, अदिक ऊचाई तीस कय इन ईरूल. जहाज दा ऊंद खिळकी माळेत, अदिक अदुर ऊंद कय म्याकुच टु अदुर छत माळेत, अदिक जहाज इन ऊंद दी ऊंद दरवाजा ईटेत; अदिक जहाज दा पयला, दुसरा, तीसरा खण्ड माळेत.
आग यहोवा नूह से अंदुन, "नी तान पुरा घराना अन सांगुळ जहाज मा होटोग; यतिकी ना ई समय इन लॉकुर दा टु नीनी का तान नजर इन मुंद धर्मी नोळीन.
नूह तान पारगोळ, हिंग्स, अदिक तान सास्सागोळ सांगुळ जल-प्रलय से ऊळोर साटी जहाज मा होदुर. शुद्ध अदिक अशुध्द, येढ्ढु प्रकार इन जनावर दा टु, पक्षीगोळ, अदिक जमीन मा रांगसावाळा कीळागोळ दा टु भी, येढ्ढ येढ्ढ, मतलब नर अदिक मादा, जहाज दा नूह इन हाती होदोव, याता प्रकार परमेश्वर नूह अक आग्या कोटीदुन. येळ दिन इन बाद्दा प्रलय इन नीर पृथ्वी मा बरली कुर्त.
अदिक जो होदोव, अव परमेश्वर उन आग्या अन अनुसार सप्पा जाती अन प्राणीगोळ दा टु नर अदिक मादा होदोव. आग यहोवा जहाज इन दरवाजा बंद माळ बुट्टुन.
पृथ्वी मा चालीस दिन ताका जल-प्रलय आगतेला ईत्त; अदिक हापाळ अच वाळुसतेला होत, यदुर देल जहाज म्याकुच येळली कुर्त; अदिक अद पृथ्वी मा टु म्याकुच येदोत. नीर वाळुस्त वाळुस्त पृथ्वी मा हापाळ अच वाळुसेत, अदिक जहाज नीर इन म्याकुच म्याकुच तैरूस्तेला ईत्त.
अदिक येन मंळसा, येन जनावर, येन रांगसावाळा जन्तु, येन आकाश इन पक्षी, जो जो भूमी मा ईरव सप्पा पृथ्वी मा टु नाश माळदेव; सिर्फ नूह, अदिक यास आऊन सांगुळ जहाज दा ईरोर, आंदुर अच ऊळदुर.
अदिक ऊंद सौ पचास दिन इन बाद्दा नीर पृथ्वी मा टु लगातार कम आगतेला ईत्त. सातवा तिंगुळ इन सतरावा दिन इक, जहाज अरारत हेसुर इन पहाळी मा टिकसेत.
बाक हींग आत कि चालीस दिन इन बाद्दा नूह तान माळ्द जहाज इन खिळकी तेरूकु, ऊंद काग्ग उक ऊळुस बुट्टुन: यागास ताका नीर पृथ्वी मा टु वंळ्गीदिल, आगासताका ताका काग्ग ईत्त आत्त वयाळतेला ईत्त. बाक आव तान हाती टु ऊंद कबूतर इक भी ऊळुस बुट्टुन कि नोळुल कि नीर पृथ्वी मा टु कम आत कि ईला. आ कबूतर इक तान काल टेक्सली येनु आधार सिकीदील, रा अद आऊन हाती जहाज मा वापस बत्त: यतिकी पुरा पृथ्वी इन म्याकुच नीर अच नीर तुमकु ईरोद. आग आव कय वाळुसकु अदरी तान हात्ती जहाज दा ताकोम कोंडुन. बाक अदिक येळ दिन थाम्सदुर बाद्दा, आव अदा कबूतर इक जहाज दा टु मात ऊळुस बुट्टुन; अदिक कबूतर द्यावगा अन वती आऊन हात्ती होट बत्त, रा येन नोळदुन कि अदुर चाचु दा जैतून इन ऊंद व्हाशोद याल्ला आद; ईदुर देल नूह जान्स कोंडुन कि नीर पृथ्वी मा टु कम आगेग्याद. बाक येळ दिन अदिक थाम्सकु अदा कबूतर उक ऊळुस बुट्टुन; अद बाक आऊन हात्ती यागलु वापस बंदिदील.
नूह उन उमर इन आर सौ ऊंद वर्ष इन पयला तिंगुळ पयला दिन नीर पृथ्वी मा टु वंळगेत. आग नूह जहाज इन छत खोल्सकु येन नोळदुन कि धरती वंळगेग्याद.
आग परमेश्वर नूह से अंदुन, "नी तान पारगोळ, हिंग्स, सास्सागोळ सांगुळ जहाज दा टु होट्टबुळ. येन पक्षी, येन जनावर, येन सप्पा प्रकार इनव रांगसावाळा किळा जो पृथ्वी मा रांगस्ताव यास शरीरधारी जीव जन्तु नीन सांगुळ आव, आ सप्पा अक तान सांगुळ तेगु कोम कि पृथ्वी मा अऊर देल हापाळ चिकोर आगुल; अदिक अव फलसुल फुलुसुल, अदिक पृथ्वी मा फैलुसेगुल."
बाक परमेश्वर नूह अदिक आऊन चिकोरगोळ से अंदुन, "केळी, ना नीम सांगुळ अदिक नीम बाद्दा जो नीम्द वंश ईत्तीत, आंदुर सांगुळ भी वादा माळतीन; अदिक जीत्ता प्राणीगोळ सांगुळ भी जो नीम सांगुळ आव, येन पक्षी येन मान्यागोळोव जनावर येन पृथ्वी माकळव सप्पा आळी दाकळव जनावर, पृथ्वी नव यास जीव जन्तु जहाज दा टु होटाव. अदिक ना नीम सांगुळ तान ईद वादा कटतीन कि सप्पा प्राणी मात जल-प्रलय सेल नाश आगतीदील: अदिक पृथ्वी इन नाश आगोर साटी मात जल-प्रलय आगतीदील."
ना बादल दा तान धनुष ईटीन, अद नान अदिक पृथ्वी इन बीच दा वादा अन चिन्ह आदीत.
विश्वास इन कारण देल अच नूह अक याग परमेश्वर उन द्वारा अव भविष्य अन मातगोळ्द बारा दा चेतावनी कोटकु आगित जो आव नोळीदुन भी ईला, रा आव पवित्र अंज्क पुर्वक तान परिवार इक ऊळसोर साटी ऊंद ड्वांगा अन निर्माण माळीदुन. परिणाम स्वरूप आऊन विश्वास इन द्वारा अच आव दुनिया अक दोषी ठहरूसदुन; अदिक विश्वास इन द्वारा परमेश्वर से बरावाळा न्यायीपन इक हासिल माळदुन.
ईव अव आत्मागोळ हुव जो आ समय परमेश्वर उन आग्यागोळ मा विश्वास ईला माळतोगोर याग नूह अन्द ड्वांगा माळकु आगोद अदिक परमेश्वर धीरज इन सांगुळ हादी कायोन आग आ ड्वांगा दा थ्वाळासा मतलब सिर्फ येठ्ठ मंळसागोळ अच नीर दा टु ऊळदीदुर. ईद नीर आ बपतिस्मा अन्द घाई आद यदुर देल नीम्द भलाई आगतद इदुर दा मय इन मईल तोळोद ईला बल्की ऊंद शुद्ध विवेक इन साटी परमेश्वर से विनती आद ईग रा बपतिस्मा नीमी यीशु मसीह अन्द पुनरूत्थान इन द्वारा ऊळस्तद. आव स्वर्ग मा होगकु परमेश्वर उन ऊमा कय दी कुरतोदुन; अदिक स्वर्गदूत अदिक स्वर्गीय अधिकारी अदिक सामर्थ्य आऊन हात्ती माळकु आदुर.
"ह्यांग नूह अन दिन ईरव, हांग अच मंळसा अन पार उन भी बरोद आदीत. ह्यांग नीर इन बाळ बरा से पयला अन्द दिनगोळ ताका लॉकुर तिंत-कुडुत ईत्तुर, अदिक मदा माळ्त ईत्तुर यागासताका नूह जहाज मा येरीदिल. अदिक यागासताका जल प्रलय बंदकु आ सप्पा मुंदरी वाहुसकु ओतीदिल, आगासताका आंदरी येनु उच पता नळदिदील; हांग अच मंळसा अन पार उन भी बरोद आदीत. आ समय दा येढ्ढ मुंदुर केई दा क्याल्सा माळ्त ईत्तार, ऊंद नेगुकु आदान अदिक दुसरा बिटकु आदान. येढ्ढ आर्तेर जाता दा पीसुसतेला ईत्तार, ऊंद नेगुकु आदार अदिक दुसरा बिटकु आदार"