13 Leza waamwanine Noa nangue, "Mpeleezio ya bantu bonse yakumana pantu bubi bwabo bwaizula mu kyalo kyonse. Kabili nakaba kubaloviizia pamo ni kyalo. 14 We Noa, nakwana ukite safina ikata ya mbao ilumine, ni kuputulamo miputule, ukabe kusubako kabulimbu mukati ni panze. 15 Ukabe kukita safina ileepele metre 133, ni mu bukata metre 22, ni mu kutuuluka metre lyanondo ni itatu. 16 Ukabe kukitako mutenge ni kusiako mando ali ni santimetre 44. Ukabe kukitamo mpungu itatu yateekaleene yali ni mulyango mumbali,

1 Yawe waamwanine Noa nangue, "Ale ingila mu safina pamo ni lupua lobe pantu nakikumona wali mulunghami pa bantu bonse.

7 ✝Noa ni mukazi wakue ni baana bakue balalume pamo ni bakazi babo, baingiile mu safina evi tekuti bafue na azo menda a kibunda. 8 Misango yonse ya nama ni ya tooni kilume ni kikota, bisambikile ni bisisambikile pamo ni bilibyayibula pansi, 9 byaingiile bibili bibili mu safina pamo ni Noa nga mwaalandiile Leza. 10 Pa kyamba kya nsiku kilooba, kibunda kyaizile pa kyalo.

16 Kubalua kilengua kikose, kilume ni kikota byaingiile mu safina nga mwa-aniinue Noa na Leza. Kupwako, Yawe wamwizalila Noa.

17,18 Nvula yaatwaliliile kunoka mpaka nsiku 40 busiku ni koba. Menda aizwile pa kyalo mpaka ni safina yabamba kweleela.

23 Yawe waloviizie bilengua byonse bya pano pa kyalo. Waaloviizie bantu ni nama pamo ni byoni. Paasyele sie Noa ni balia baali wali nabo mu safina.

3 menda aatwaliliile kuya akama buke buke mpaka nsiku 150. 4 Pa busiku bwa lyanondo ni kilooba mwezi wa kilooba, safina yaikeele peulu mpili ya Ararati.

6 Lupaapitile nsiku 40, Noa waizwile nzota 7 ni kutuma kazooko. Kazooko tekaabwelele, inzi kaali kaya kazyunguluka sie mu lweleele mpaka musita waakamine menda pa kyalo. 8 Kabili Noa waatumine kakunda kaye kamone kine menda akeepa pa kyalo, 9 inzi pantu menda aali teanakame pa kyalo kyonse, kakunda tekaamwene nkendo ya kuya kwikalapo. Ni pakako, kaabweleele kuli Noa. Noa wakakwata ni kukengizia mu safina. 10 Pa kyamba kya mulungu umo, kabili Noa waafumiizie kakunda mu safina ni kukatuma. 11 Bobo bwenka busiku kyungulo, kakunda kaabwelele katweme lyani lya muzeituni ku mulomo. Noa i lu-ainikile nangue menda akeepa. 12 Kabili Noa waapembeele ni unge mulungu. Waatumine kakunda paakale. Lolo lwendo lwene kakunda tekaabwelele.

13 Noa lu-aakumaniizie myaka 601, mu mwezi wa mambo pa busiku bwa mambo, menda aakamine pa kyalo. Noa waatupukwile ntupiko ya safina, ni kiine wamwene menda akamine.

15 Leza waamwanine Noa nangue, 16 "Fuma mu safina, wewe ni mukazi obe, ni baana bobe balalume pamo ni bakazi babo. 17 Fumia kubalua kilengua kikosele ki-uli nakio mu safina, byoni, ni nama pamo ni kubalua kilengua kya pa kyalo, evi bivyalane ni kusanduluka pa kyalo."

8 Kabili Leza waamwanine Noa ni baana bakue balalume nangue, 9 "Unvue, napinghana nenu pamo ni nvyalo yenu. 10 Napinghana na bilengua byonse bikose: Toni tonse, ni nama yonse ya kuteekua pamo ni nama yonse ya mu kisonso imwakifuma nayo mu safina. 11 Napinghana nenu nangue, nene nsikikeenoona kabili bilengua bikose na kibunda. Kabili tekukaba kinge kibunda kyaakeenoona kyalo."

13 Nabiika mukolanvula mu malezi kuti ube kalangi ka kipingo kinapinghana na kyalo.