13 Дэчи о Дэл пхэнляс э Ноески:

— Мэ кан тхав бытима алаески, со бэшэл опэр пху, вай андар лэндэ э пху пхэрдили джюнгалимаса. Мэ кан кхосав лэн екхетханэ алаи э пхуяса. 14 Кер туки кавчеги катар тэрэки гофер, тай кер андэ лэстэ тхана, тай мак смоласа лэс андар тай аврял. 15 Аки сар ту камэл лэс тэ керэс: о кавчеги камэл тэ овэл 150 куня андэ дулгипэ, 25 куня андэ буглипэ тай 15 куня андэ учипэ*. 16 Кер лэс опрал пханло тай э крыша опрал кер учи катар кавчеги екхпаш куни. Тхэ катар риг удар тай кер тэлуно, машкаруно тай опруно этажа.

1 О Сагбус о Яхвэ пхэнляс э Ноески:

— Дэ андэ кавчеги алаи э хорандаса. Мэ дикхав, кай машкарэ алаендэ, кай бэшэн андэ адава вахыти, екх ту чячё ангал Мандэ.

7 О Ной, лэски чявэ, лэски ромни тай о ромня лэски чявэнги динэ андэ кавчеги, тэ кутардиенпэс катар бугулдима. 8 О шужэ тай нашужэ гайваня, чирикля тай алаи, кай бэшэн по бут, 9 алэ ко Ной тай динэ андэ кавчеги парэнца: мурш тай джювли, сар пхэнляс э Ноески о Дэл. 10 Эфта десендар опэр пху алэ о паня э бугулдимаски.

16 мурш тай джювли андар алаи ко породэс, сар пхэнляс э Ноески о Дэл. Тай дэчи о Сагбус о Яхвэ пханляс пал лэстэ о удар.

17 О бугулдима сас опэр пху саранда дес, тай о паня бутёнас, ваздинэ о кавчеги, тай ов диняс джялдави опрал пху. 18 О паня бутёнас тай ваздиндёнас, ай о кавчеги дэлас джялдави опэр пани.

23 Алаи о дживиндо сас кхосло опрал пху: о мануша тай о гайваня, тай савэ балакадиен, тай о чирикля э булутенги. Ачило екх о Ной тай одола, кон сас лэса андэ кавчеги.

3 О пани тэмэли джялас опрал пху, тай ко шэлупэинда дес ов лачес гело. 4 Ко дэшэфтато дес эфтато чёнэско о кавчеги тэрдило опэр горадэс Арарат.

6 Саранда десендар о Ной пхутэрдяс э пэнчера, сави ов кердяс андэ кавчеги, 7 тай мукляс э карга, тай одоя урялас тай авэлас палэ джи одолэ вахытески, бискай о пани опэр пху на шукило. 8 Дэчи о Ной мукляс голубес, тэ дикхел, гело о пани опрал пху. 9 Ай о голуби на аракхляс шуко тхан тэ мукелпэс, тай ало ко Ной андэ кавчеги, вай о пани учярэлас алаи э пху. О Ной сидиняс по васт тай лиляс э голубес палэ пэстэ андэ кавчеги. 10 Накхло эфта дес, ов генэ мукляс э голубес андар кавчеги. 11 Кана бэлвэле о голуби ало, андэ муй лэстэ сас чинди зэлэно маслинаки патри. Дэчи о Ной галило, кай о пани гело опрал пху. 12 Ов ишанды генэ эфта дес тай генэ мукляс э голубес, тай акана о голуби на ало палэ.

13 Кана сас э Ноески шовшэл екх брэш, андэ екхто дес ки екхе чёнэско лэски бэшымаско э пху шукили катар пани. О Ной пхутэрдяс опрал о кавчеги, ваздиняспэс тай дикхляс, кай э пху шуки.

15 Дэчи о Дэл пхэнляс э Ноески:

16 — Никлё андар кавчеги ту, ти ромни, тэ чявэ тай лэнги ромня. 17 Никал аври алаи э дживиндэн, савэ туса: чириклен, гайванен тай алаен, кай балакадиен, он тэ пхэрэн э пху, тэ аракхлён лэндэ генэ тай тэ бутён.

8 О Дэл пхэнляс э Ноески тай лэски чявэнги:

9 — Анкха Мэ керав завети тумэнца тай тумарэ пуенца, 10 тай вэрсавэ дживиндимаса, саво си тумэнца: чирикли я, кхерутно гайвани я вэшэско гайвани — алаенца, кон никлисто тумэнца андар кавчеги, тай кажни гайванеса опэр пху. 11 Мэ керав тумэнца завети: на кан овэл генэ алаи о дживиндо мудардо бугулдимаски паненца, на кан овэл генэ о бугулдима тэ хурдярэл э пху.

13 Мэ тхав опрэ булутя Ми радуга, тай ой кан овэл сикаипэ э заветеско машкарэ Мандэ тай ки пху.