Arca de noé

13 Ko pira saunia Tamasa si Noa, Mana vamanyao beto paleniria ara sa doru masa toadi, ura sa pugele taria na peso sa na dia toa vavaikana ira ko kopira mana piara pale ara sa na peso, sau. 14 Ko mu roitinia kai aka pa gou tiki, mu vakoleniria na lose pa leona beto mu pokonia na tita pa leona beto peguruna. 15 Pira muna roiti veinia sisa: Na aka sa mina kue gogoto kobu lima na kakasana, lima ngavulu kobu lima na revatana beto uengavulu kobu lima na ululuna.

16 Muna roitinia na isuna sa na aka ko na saena sa mina kobu lima koko pa paparana na tinina na vaka. Beto muna vakolenia kai atakamana pa leona na vaka beto muna roitiniria sa ka ue sape susuverena, pa kauruna, pa kokorapana beto pa narena.

I Noa beto Nona Tatamana Qai Tome pa Aka

1 Ego pira saunia i Iahova si Noa, <<Mu tome lao pa leo aka, ao beto na mua tatamana doruna, ura ao gu sa qa batia ara na tinoni tuvisimu pa sasae tinoni alepi.

7 Ko i Noa, ira na tuna marene, na maqotana beto ka ue roana sa qai lao tome pa aka ko qai ukunia sa na popogoso kolo. 8 Pana mamanugu mamade nenedi liosodi beto pa mamanugu mamade nenedi nake liosodi, beto pa mamanugu tatava beto pa doru mamanugu qai gavere pa are peso 9 sa qai okokoto kakaru, kai marene beto kai rereko, sa qai tome tutia i Noa pa aka tutia tugu isa vei na Tamasa sa garununia i Noa. 10 Ego ko sa jola gu ka vitu rane poni sa sa gorea na popogoso kolo sa na peso.

16 Ira na mamanugu mamade nenedi qai tome lao sa na marene na rereko pa doru mamanugu isa tugu vei sa garununia i Noa na Tamasa. Beto sa sa patei taria i Iahova si Noa.

17 Ego ko ka made ngavuluputa rane sa sa iolo vaituti pa are peso sa na popogoso kolo ko totonai sa mota na kolo poni sa ovulia ko sa vaiolia pa arena na peso sa na aka. 18 Ego ko sa vaituti neqi na ovuluna sa na kolo ko sa pugele vadururia sa na are peso ko na aka sa alea na vulitina na kolo.

23 Ko sa tavusu paleria i Iahova sa doru sakasa toadi qai kole pa are peso, na tinoni, na mamanugu mamade nenedi, na mamanugu gavere beto na mamanugu tatava pa vavagalo eqa, ko qai tatavusu pale pa peso sa aipira. I Noa gu mekana beto ira qai koi tavitia pa aka sa qai tavasare.

3 Na ovuluna na kolo pa are peso sa mate vaituti gore, ko pa liguna kai gogoto lima ngavuluputa rane poni sa sa vukele gore mate sa na kolo, 4 ko pa vina manoga vitu rane na popu vina vitu sa sa gore toqo makele pa batudi na kukubo pa Ararati sa na aka.

6 Ego pa liguna ka made ngavuluputa rane sa revangia i Noa sa na vuidana na aka sa roitinia isa 7 ko sa garunu variua sa kai belama, ba sa riu kole gu tatava lelekogona ko tinganai sa pidili betona sa na kolo pa peso. 8 Poni sa garunu variua mule isa sa kai kuru ko mi gigilai sa vei bi na vukele gorena na kolo sa tei kamu tu pa peso ba dai sau. 9 Ba na kuru sake isongo batia kai ia ketakoi bi boka toqonia na nenena ura na kolo sa korapa amua sa doru arena na peso, ko sa tatava muleona gu tai Noa pa aka. Ko i Noa sa kaqama votunia na limana ko sa teku vatomea pa aka sa na kuru. 10 Ko sa vera kai vitu rane mutu si Noa beto sa kai garunu vavotu riua mule koko pa aka sa na kuru. 11 Totonai sa tatava mule kamu na vevelu poni sa sa garatia pa mangana isa sa kai equru olive na koni tapudokona! Poni sa gigilai i Noa sa sa tei vukele gore tu pa arena na peso sa na kolo. 12 Ego ko sa verania pa liguna kai vitu rane mutugu beto sa garunu variua mutu isa sa na kuru, ba kopira sake gabala mule kamu ligu sa na kuru.

13 Ego pa rane momoe na popu momoe pa vina vonomo gogoto kame aorona i Noa sa sa pidili beto sa na kolo pa arena na peso. Poni sa teku pale i Noa sa na pateina na aka beto mi doro sau poni sa batia sa sa pidili beto sa na arena na peso.

15 Poni sa parangia na Tamasa si Noa, pira sau, 16 <<Mu votu pa aka ao beto na maqotamu beto ira na tumu marene beto na maqotadi. 17 Mu toni votuniria doru okokoto puku mamanugu masa toadi qai koi tavitigo- ira na mamanugu tatava, na mamanugu mamade nenedi, beto doru mamanugu gavere qai gaveria na are peso- ko mai miminete pa peso beto mai vua beto mai soku pa peso>>, sau sisa.

8 Beto sa paranga na Tamasa lao pa tai Noa tavitiria na tuna marene, pira sau, 9 <<Kopira qa vatoqoa ara sa na qua vinaego ko qa vatoqonigou agou beto ko ira na tutimiu pa liguna lao 10 beto ira na mamanugu toadi qai suvere tavitigou- na mamanugu tatava, na mamanugu papausu, beto doru mamanugu mamade nene pirudi, doruna tugu qai tuti votugou pa aka- doruna mamanugu toadi pa abana. 11 Qa vatoqoa ara sa na qua vinaego ko qa vatoqonigou agou: Minake isongo tateku pale ligu pa popogosona na kolo sa doru na toa, minake isongo lame ligu sa na popogoso kolo ko mina piaria sa na abana,>> sauniria.

13 Qa vakolea ara pa lei sa na bibigo ko isa sa na vinagigilana na vinaego pa vaikorapaiqu ara beto na kasia abana.

7 Qi isongia na rarange si Noa ko qi vatabea isa sa na paranga vabalau tana Tamasa na veveidi ira na sakasa qai oqoro tabata. Qi vatabea isa sa na Tamasa ko qi roitinia sa na aka ketakoi qi tavasare sisa beto ira nona tatamana. Ko sa vei sa qi tapitu sa na kasia gusu, ba na Tamasa sa doro veinia na tinoni tuvisina si Noa ura qi rangea isa sa na Tamasa.

20 Ira sira na tinoni sa kole vera vamomosoniria na gabaladi na Tamasa pana totoso pa moa tonai sa kole roitinia na aka i Noa. Ira ka vesu tinoni momoqasadi gu sa qai tome pana aka ko ira gu sa sa aloria na Tamasa pana kolo. 21 Ko isa sa gosoria i Noa beto na ona tatamana sa na vinagigila sa udukia sa na paputaiso isa kopira sa alogou agou ura i Jisu Karisito sa tei turu mule tu. Ba na ginuana na paputaiso sa nake vei ko na valioso paleria na paji pana tini ba na ginuana sa gita taqe vasosotoa pana monana jongana sa na Tamasa. 22 Ko i Jisu Karisito sa tei sae tu pa noka ko kopira sa korapa toqo pa kale matuana na Tamasa, beto ko sa bangaraniria sira dorudi na mateana beto ira na okokoto kuta bangara beto na gagala neqidi pa vavagalo eqa.

37 Na bola lame tana Tuna na Tinoni sa kode mina kai muqisi podeke vei tugu pa totoso tai Noa. 38 Ira na rane totonai sa oqoro dururu na abana, sa ira na tinoni sa qai kole gaganigadia, qai kole bukugadia, beto ira na marene na rereko sa qai vavaialavadia, tinganai ko sa kamu sa na ranena sa tome pa leo aka i Noa. 39 Ba qaike isongo vagigila podekia tugu ira sa na sa sa korapa taroiti, tinganai ko sa gore na nyoro ko sa pogoso variu beto paleria. Kode inara tugu mina lame vasiboro vei sa na lame tana Tuna na Tinoni. 40 Na totoso isa sa karu tinoni mai korapa roiti pa inuma, sa kame sa mina tateku variu goto kame sa mina taloa pale. 41 Karu rereko sa mai korapa kija vaavururia na dia kiko vuiti, sa kame sa mina tateku variu goto kame sa mina taloa pale.