Arca de noé

13 Nnungu nkunnyaulila Nuhu kuchidoni, "Nìmbeviondonganga viumbe vyammalele kwa kuva, chilambo chammalele chìumbele ukatili ing’anya ya vanang’o. Muhiu, nìmbevaondonganga mwalehu pamo na chilambo! 14 Bahi likatapajije safina ya mbao dya mvinje. Yavanya vyumba nkati mwake na uipakalange lami, nkati na pawelu uchinga medi lanainjile nkati. 15 Ikatapaje safina ivêle na ulehu wa futi myanne na amsini, na upana wa futi sabini na tano na changa cha futi alubaini na tano. 16 Aneyo safina ììve ya galofa tatu na ììve na nnango nnuvau. Tununa muha, na uleke mwanya wa ding’olokoto uvêle na ulehu malinga wa futi moja na nusu kati ya nakatene na likangala, mmipata yammalele ya safina.

Livambwe

1 Yahwe nkunnyaulila Nuhu kuchidoni, "Injila nsafina, wako pamo na vanu vammalele va nng’ande mwako, kwa kuva muvanu va chívelèkwà achino, nangu nìkuwene chihi wako weka kuva umunu utênda àlalá lángulembèlà.

7 Nuhu na n’jawe na vana vake na ajavao nkuinjila nsafina uchinga valinyemye na livambwe. 8 Bahi anyama halali na anyama halamu na vyuni na viumbe vyammalele viônga pachilambo, 9 vyachilume na vyachimahe, nkuida kwanga Nuhu, nkuinjila nsafina malinga Nnungu chamwamulisije Nuhu. 10 Bada ya maduva saba, medi la livambwe nkutandilika kuchihunika chilambo.

16 Kila aina ya viumbe anevyo víinjidile nannume na mmahe malinga Nnungu chanamwamulisije Nuhu. Bahi Nuhu pamalilikidile kuinjila nsafina, Yahwe Nnungu nkuchima nnango.

17 Imbula ítonyile maduva alubaini, na livambwe nkuhalija kuyenjejeka pachilambo. Medi nkuyenjejeka namene mpaka safina kunyanyulwa muha namene mwa chilambo. 18 Medi nkuhalija kuyenjejeka namene ulehu, na safina nkuva uielea muha mwake.

22,23 Nnungu ániviondonganga viumbe vyammalele vivêle na umi vya nchilambo, yani vanu na vanyama na vakoko vaônga pachilambo na vyuni vyammalele. Na nanga chiumbe chinalekwije chivèlè chomi ikànave chihi Nuhu na vanji vanavele nsafina.

3 Medi nkuhweneha kunywa kadiki-kadiki nchilambo. Bada ya maduva myamoja na amsini, medi nkunywa namene. 4 Nniduva lya kumi na saba lya mwedi wa saba, safina nkunatula kumachinga la Alalati.

6 Bada ya maduva alubaini, Nuhu nkuchimula lidilisha lyanakatapajije nsafina aneyo, 7 nkunhumya nankonda pawelu, henga nankonda nanga panauyite, nang’e ápite chihi wanachiuluka-uluka mpaka uhiku aula medi palanywele nchilambo. 8 Bahi Nuhu nkunhumya umunda pawelu uchinga apate kumala ikàva medi làninywa. 9 Henga kwa kuva medi lávele bado lakànambikunywa, ayula umunda nanga panawene pachinu pakutulila, bahi nkuuya kwanga Nuhu nsafina. Nuhu nkunyoloja nkono wake nkuntwala ayula umunda nkunnyinjija nsafina. 10 Nuhu nkulindilila kwa maduva lanji saba, nkunhumya kavila ayula umunda. 11 Chinalyulo ayula umunda nkuuya kwanga Nuhu akuno apambìlè pakanya pake lihamba livihi lya nnandi wa nzeituni. Bahi Nuhu nkumala kuva medi lànipungula nchilambo. 12 Nuhu nkulindilila kwa maduva lanji saba, nkunhumya kavila ayula umunda, mwanda anewo ayula umunda nanga panauite kavila kwanga Nuhu.

13 Nuhu panavele na vyaka myasita na moja, liduva litandi lya mwedi ntandi, medi lávele lanywèlè nchilambo. Anepo Nuhu nkuchihunukula chihuniko cha safina, na palolite pawelu, nkwona medi lanywèlè mwalehu nchilambo.

15 Bahi Nnungu nkunnyaulila Nuhu kuchidoni, 16 "Huma nsafina, wako pamo na n’jalo na vana vako na ajavao. 17 Na vihumye pawelu viumbe vyammalele, yani vyuni na anyama na vakoko vammalele vaônga pachilambo uchinga vapate kuvelekana namene na kuyenjejeka na kuyanjala pachilambo chammalele."

Inyingamu

8 Bahi Nnungu nkunnyaulila Nuhu pamo na vana vake kuchidoni, 9 "Lola, nangu ngùtenda lilailano lyangu na mwenu pamo na vanu va nnukolo lwenu, 10 na viumbe vyammalele vivêle na umi, yani vyuni na vanyama va kulangwa pamo na vanyama vammalele va munnyitu, vammalele vahumîle nsafina pamo na mwenu. 11 Nangu ngùtenda lilailano lyangu na mwenu kuva, likambehumila kavila livambwe lya kwondonganga chilambo chammalele na viumbe vyammalele.

12,13 Na ayi inyingamu inguivikile kumahunde, ìmbekuva chimaiho cha lilailano lingulitenda na mwenu na viumbe vyammalele vya pachilambo. Inyingamu ayi ichiinkumbusange mwenu kuva, pàvele lilailano kati yangu na mwenu, mmivelekwa vyammalele.

7 Kwa kupitila ing’ulupa, Nuhu ádengile safina uchinga avapohe vanu va nng’ande mwake na livambwe. Nang’e ámpilikene Nnungu anan’dumile kuyamba mambo àlalá lakánambiwahi kuhumila. Bahi kupapatana na ing’ulupa yake, vanu va pachilambo vánihukumiwa, nanang’e nkupata kutendwa kuva wambone pameho pa Nnungu.

20 Disungu anedyo nni dya vanu avala vanantahwike Nnungu anepo kala, mmahiku la Nuhu, muuhiku aula Nuhu wachikatapaja safina, na Nnungu ánivapililila namene vanu anevo muuhiku anewo. Safina aneyo váingidile chihi vanu kadiki, vanu nane bahi vanapohwije kupitila medi anelo. 21 Na medi anelo nni nfano wa ubatiso umpôha mwenu vino. Ubatiso anewo ukee wa kuhahula uhakwa wa mummili, henga nni ahadi kwanga Nnungu imuitenda kwa makudungilo lambone la muntima. Na ubatiso anewo ùmpoha mwenu kwa indila ya kufufuka kwanga Yesu Kilisto. 22 Yesu àpite kulihunde na vino àikala m’bali wa kunkono wa Nnungu, mmamulaka lake Nnungu, wavatawala malaika na mamulaka lammalele pamo na dimongo dyammalele.

37 Malinga chilanavele mahiku langa Nuhu, nni uchocho chiimbekuva pambekwida Mwana wa Munu. 38 Kwa kuva, mmahiku àlalá livambwe kabla likànambikwida, vanu vánalya na kukumbila, vánalomba na kulombwa mpaka liduva alila lyainjidile Nuhu nsafina. 39 Vanang’o nanga pavanamaite chinu chohecho mpaka livambwe palihaleke nkuvayola vammalele. Uvila nni chiimbekuva pambekwida Mwana wa Munu. 40 Uhiku anewo vanu vavili vàmbekuva kumawelu, yumo àmbetwaliwa na yunji ambelekwa. 41 Vamahe vavili vàmbekuva pamo uvahaya ntama nniyanga, yumo àmbetwaliwa na yunji àmbelekwa.