Arca de noé
A arca de Noé é história de salvação e fidelidade. Deus instruiu Noé a construir a arca para salvar sua família e os animais do dilúvio — exemplo supremo de obediência e fé.
pa phenđa e Nojese: "Odlučinđum te uništinav sa e manušen, adalese so i phuv pherdili nasilje zbog olende. Ače, ka uništinav len zajedno e phuvjaja. Adalese ćer tuće barka oto kaš čempres. Ano late ćer pregrade, a avrijal hem andral makh la smolaja. Ađahar ćer la: nek ovel šelu trijandu pandž metarija glego, bišu duj metarija buli hem dešu trin metarija uči. Ćer o krov ki barka ađahar da oto vrh na tele te ovel phravdo ekvaš metari zako svetlost. O udar čhiv ki jekh strana oti barka hem ćer te ovel la teluno, srednjo hem upruno sprati.
O GOSPOD phenđa e Nojese: "Đerdin ani barka, tu hem sa ti porodica, adalese so dikhljum da jedino tu angla mande injan pravedno maškaro manuša kola živinena ano akava vreme.
I o Noje đerdinđa ani barka pla romnjaja, ple čhavencar hem lengere romnjencar, te spasini pe oto potop. Oto čista hem nečista životinje, oto čiriklja hem oto sa o stvorenja so lazinena phuvjaja, đerdinde koro Noje ani barka duj po duj, murš hem đuvli, sar so o Devel naredinđa e Nojese. Efta dive palo adava, o baro pani alo upri phuv.
Đerdinde murš hem đuvli oto sa o dživde bićija, sar so o Devel naredinđa e Nojese.
Tegani o GOSPOD phandlja o udar palo leste.
O potop avela ine upri phuv saranda dive. Sar o pani barjola ine, ađahar legari ine i barka hem vazdinđa la oti phuv. O pani barilo hem vazdinđa pe uče oti phuv, a i barka plovini ine upro pani.
Ađahar o Devel uništinđa svako dživdo biće ki phuv: e manušen, e životinjen, okolen so lazinena phuvjaja hem e čirikljen. Ačhile samo o Noje hem okola kola inele oleja ani barka.
O pani hari po hari cidela pe ine tari phuv, a palo šelu pinda dive edobor pelo tele da ko dešu eftato dive oto eftato masek i barka ačhili ki planina Ararat.
Palo saranda dive, o Noje phravđa o prozori savo ćerđa ki barka hem muklja avri e gavrane. O gavran odletini ine hem irini pe sa đikote sa o pani na cidinđa pe tari phuv. Tegani o Noje muklja hem e golubica, te dikhel da li o pani cidinđa pe tari površina e phuvjakiri. Ali i golubica na arakhlja than ko savo te mukel pe, adalese so o pani pana učharđa sa i površina e phuvjakiri, pa irinđa pe koro Noje ani barka. Ov pružinđa plo vas, dolinđa e golubica hem anđa la ani barka. O Noje adžićerđa pana efta dive, i palem muklja e golubica tari barka. I golubica irinđa pe angli rat, i dikh, ano muj ine laće tek čhindo listo oti maslina. Palo adava o Noje džanđa da o pani cidinđa pe tari phuv. Tegani ov adžićerđa pana efta dive, i palem muklja e golubica, ali oj više na irinđa pe koro leste.
Kad e Noje ine šovšelu jekh berš, ko prvo dive oto prvo masek, o pani cidinđa pe tari phuv. O Noje phravđa jekh deo e krovesoro oti barka, dikhlja okolo, i eče, i površina e phuvjakiri šuki.
Tegani o Devel phenđa e Nojese: "Ikljov tari barka, tu, ti romni, te čhave hem lengere romnja. Tuja ikal hem sa e dživde bićen savei tuja: e čirikljen, e životinjen hem sa okolen so lazinena phuvjaja. Nek i phuv pherđol olencar, nek oven plodna hem nek množinen pe ki phuv."
Tegani o Devel phenđa e Nojese hem lesere čhavenđe: "Ače, phandava savez tumencar hem tumare potomstvoja pala tumende, hem svakone dživde bićeja savoi tumencar – e čirikljencar, e stokaja hem sa e divljone životinjencar, sa okoleja so iklilo tumencar tari barka – svakone dživde stvorenjeja ki phuv. Phandava savez tumencar: Nikad više sa o dživde bićija naka oven mudarde e potopesere panjeja. Nikad više o potop naka uništini i phuv."
Čhivđum mli duga ano oblaci te ovel znako oto savez maškara mande hem i phuv.
Veraja o Noje izgradinđa i barka te spasini pla porodica oto potop. Inele poslušno e Devlese kova upozorinđa le da ka ovel okova so nikad angleder na inele. Ađahar o sveto inele osudime, a o Noje opravdime prekali pli vera.
kola angleder, e Nojese ano vreme, inele neposlušna e Devlese. O Devel strpljivo adžićerđa sa đikote ćerđa pe i barka ani savi samo nekobor džene – ukupno ofto – inele spasime prekalo pani. Adavai pani slika oto krstiba savo akana spasini hem tumen adaleja so o Isus Hrist uštino taro mule. A adava nane thojba o melalipa e telosere, nego zavet e Devlese ani čisto savest. O Hrist dželo ko nebo hem bešlo ko počasno than, oti desno strana e Devlesiri, kaj pokorinena pe lese o anđelja, o vlastija hem o zoralipa.
Sar so inele ano vreme kad o Noje živinđa, ađahar ka ovel hem kad me, o Čhavo e manušesoro, ka avav. Sar so ano adava vreme, angleder o baro pani, o manuša hana ine hem pijena, lena pe hem dena pe sa đi o dive kad o Noje đerdinđa ki barka, a on ništa na džande đikote na alo o baro pani hem na legarđa sarijen – ađahar ka ovel hem kad o Čhavo e manušesoro ka mothoj pe. Tegani duj džene ka oven ki njiva. Jekhe ka lel pe, a e dujtone ka ačhaj pe. Duj đuvlja ka ćeren buti ano mlin. Jekha ka lel pe, a e dujtona ka ačhaj pe.