Arca de noé
A arca de Noé é história de salvação e fidelidade. Deus instruiu Noé a construir a arca para salvar sua família e os animais do dilúvio — exemplo supremo de obediência e fé.
परमेस्वर नूह से कही मैं सब प्राड़िन कै नास कर दुंगो और पृथ्वी इंसान से भ्रस्ट हुई चुकी है। निस्चय मैं पृथ्वी और बे लोगन सुंदा नास कर दुँगो। तैं गोपेर पेंड़ की अच्छी कठिया से अपने ताहीं एक बड़ी नईंय्याँ बना; जामैं कमरा बना और जाके अंदर-बाहर कोलतार को लेप लगइये। ऐसे करकै तुम जाकै बनाबौ, जहाज एक सौ तैंतीस मीटर लम्बो, बाईस मीटर चौंड़ो और तेरह मीटर ऊँचो बनइये। जहाज मैं एक खिड़की बनइये और आधे मीटर ऊपर छत बनईयो, और जहाज मैं एक और फाटक बनईयो, और जहाज मैं तीन मंजिल बनईये, ऊपर, बीच और नीचे को मंजिल।
प्रभु नूह से कही, अपने पूरे परिवार समेत जहाज मैं जा; काहैकि मैं जौ पीढ़ी मैं सिरफ तहीं कै अपनी नजर मैं धर्मी पाओ हौं।
नूह और बाकी बईय्यर, और बाके लौड़ा और बहु बाढ़ से बचन के ताहीं नईंय्याँ मैं चले गै। सुद्ध और असुद्ध जानवरन के, पक्छियन के, जमीन मैं नेंगन बारे सब जन्तुअन के, दुई-दुई, मतलब नर और नारी, नूह के संग जहाज मैं गै, जैसे परमेस्वर नूह कै आग्या दई रहै। सात दिन बाद पृथ्वी मैं बाढ़ आए गई।
सब प्राड़ियन मैं से नर और नारी जहाज मैं गै, जैसी परमेस्वर आग्या दई रहै। फिर प्रभु नूह कै जहाज के भीतर बंद कर दई। रहै।
पृथ्वी मैं चालीस दिन ले बारिस होन की बजह से बाढ़ रही, और पानी इत्तो गहरो ही गौ कि जहाज तैर सकै। पानी गजब बड़न लग्गौ। बौ बढ़ते-बढ़ते पूरी पृथ्वी मैं फैल गौ, और जहाज पानी के ऊपर तैरन लग्गौ।
प्रभु पृथ्वी मैं सब जिंदे रहन बारे प्राड़िन कै, इंसान और जानवरन कै, नेंगन बारे जन्तुन कै, आसमान के पक्छिन कै मिटाए डारी। बे पृथ्वी से मिटाए डारे गै। सिरफ नूह और जित्ते लोग बाके संग जहाज मैं रहैं बेईं बचे।
और एक सौ पचास दिन ले पृथ्वी मैं धीरे-धीरे पानी कम होत गौ। सातमों महेना के सत्तरमें दिन जहाज अरारत नाओं के पहाड़ मैं टिक गौ।
चालीस दिन बाद नूह अपनी बनाई भई खिड़की खोली और एक कउवा को भेजी। और जब ले पृथ्वी मैं को पानी सूख ना गौ, तौले कउवा इतै-उतै उड़त रहो। तौ फिर से, नूह जौ देखन के ताहीं एक कबूतर कै भेजी कि पानी जमीन से घटो है कि नाय। लेकिन पानी हबै भी पूरी जमीन मैं भरो रहै, और कबूतर कै उतरन के ताहीं कोईये जघा नाय मिली। बौ बापिस जहाज मैं लौट आई, और नूह अपनो हात बढ़ाए कै बाकै भीतर लै लई। बौ सात दिन इंतजार करकै और फिर से कबूतर कै छोड़ी। और कबूतर संजाखिन कै अपनी टोठन मैं जैतून के पेंड़ को ताजो पत्ता लैकै बाके झोने लौट आओ। तौ नूह कै पता चल गौ कि पृथ्वी से पानी घट रहो है। तौ फिर से बौ और सात दिन ठहर कै बहे कबूतर कै छोड़ी; और जौ बार बौ बापस नाय आई।
जब नूह छ: सौ एक साल को भौ, तौ पहले महेना के पहले दिन पृथ्वी मै पानी खतम ही गौ। और तभई नूह जहाज के ऊपर की छत हटाय दई, और चारौ तरफ देखथै कि जमीन सूख रही है।
परमेस्वर नूह से कहथै, "अपनी बईय्यर, अपने लौड़ा और उनकी बईंय्यरन कै संग लैकै जहाज मैं से बाहर निकर आ। सब पक्छी और जानवरन और रेंगन बारे जानवरन कै अपने संग लै आ, कि उनसे भौत बच्चा पैदा हुई कै पूरी पृथ्वी मैं फैल जामैं।"
फिर परमेस्वर नूह और बाके लौड़न से कहथै, मैं तुमरे और तुमरे बाद होन बारे औलादन के संग वाचा, और तुमरे झोने के हर एक जिंदे प्राड़ी मतलब पक्छि, पालतू जानवर, पृथ्वी के सब बन- जानवर और जहाज से बाहर निकरन बारे सब जीव- जन्तुअन के संग अपनी वाचा बाँधथौं। जे सब्दन के संग मैं तुमरे संग वाचा बाँधथौं: मैं वादा करथौं कि फिर कहूवे जिंदे प्राड़ी बाढ़ से नास ना होंगे; और फिर कहू पृथ्वी कै बाढ़ नास नाय करैगी।
मैं बादर मैं अपनी धनुस रखथौं। जौ मेरे और पृथ्वी के बीच करे गै वाचा को चिन्ह होगो।
बिस्वास से नूह बे बातन के बारे मैं जो बौ समय दिखाई नाय पड़त रहैं, चितौनी पाएकै भक्ति के संग अपने परिवार के बचाव के ताहीं जहाज बनाई, और बाके जरिया परमेस्वर पूरे दुनिया कै दोसी ठहराई; और बौ धार्मिकता को बारिस भौ, जो बिस्वास से होथै।
जे बे लोगन की आत्मा रहैं जो परमेस्वर की आग्यन कै मन से यकीन नाय करीं रहैं। जब बौ बे दिनन धीरज से असियात रहैं जब नूह अपने जहाज कै बनात रहै। जहाज मैं कुछ लोग, सबै मैं आठ जनी, पानी से बच गै रहैं, जो बपतिस्मा के घाँईं इसारा करत भै एक प्रतीक रहै, जो अब तुमकै बचाथै। जौ सरीर की गंदगी से धोनो नाय है, बल्कि एक अच्छे मन से परमेस्वर से करो गौ वादा है। जौ तुमकै ईसु मसीह के पुनरुत्थान के जरिया से बचाथै, जो स्वर्ग मैं चले गौ है और सब स्वर्गदूतन और स्वर्गिय अधिकारी और अचम्मे काम के संग सासन करत भै, परमेस्वर के दहने बैठगौ।
जैसी नूह के दिन रहैं, बैसिये इंसान के लौड़ा को भी आनो होगो। बहाड़ से पहले के दिनन मैं आदमी खाईं-पीं, लोग और बईय्यर बिहा करीं, बहे दिन नूह बड़ी नईंय्याँ मैं गौ; तहुँओं पतै नाय चलो कि बहाड़ आन ले का हुई रौ है और सबै पुही गै। ऐसोई होगो जब इंसान को लौड़ा आगो। बौ समय दुई जनी खेत मैं होंगे, एक कै लै लौ जागो और दुसरे कै छोड़ दौ जागो। दुई बईंय्यरैं चक्की पीसत रहांगी, एक लै लई जागी, और दुसरी छोड़ दई जागी।