Arca de noé
A arca de Noé é história de salvação e fidelidade. Deus instruiu Noé a construir a arca para salvar sua família e os animais do dilúvio — exemplo supremo de obediência e fé.
Ineem tahha po Kooh woosa Noohin ne : « Ŋ ambiɗ ne ŋ hey ɗumbe ɓooɓi jen sagu riifɗi ɓa riifiɗ Adina na tumohaaɗ moɗaaɗi. Ŋ hey ɓa ɗumbe na kehƴi. Waaka kidig ndengiɗ, fu haɓɗiɗ haf fu in mand na wahnde yakak, wa min teembeer findi gaal. Wa raakaat ɓi tuuƴ, fu reefa godirong ŋ ɗooƴi na finhoori. Fu na hee wa haɓɗohe an : Hutiiniŋ wa nikaat saangal. teemet na saangal ndaŋkiyaah-yatuus (150), angiini nik saangal ndaŋkiyaah-kanak na saangal yatuus (25) te njooliini nik saangal ndaŋkiyaah na saangal yatuus (15). Fu heya waakɗe kunoha, harmban wa na gaali nikaat suung. yino. Fu heya haɓɗiɗe yahndeer ŋ hambuusiŋ wa, gaali raak nikoha kaahay, ŋ yoorɗi, ŋ leerni na ɗafki.
Wa ineem raak, Nikiɗi woosa Noohin ne : « Aasa ŋ ɗooƴ gaali, fu na ɓi kahan fu laam, ŋ hot ɗa dong yurhiɗ ngaŋ ɓooɓiŋ jamanooniŋ ɗa.
A aaseen ŋ ɗooƴ gaala, a yi na ɓitiice na kuɓuuciŋ ɗe kaahay ci na ɓitiɓ ciŋ ɓa, ne ɓa muc ŋ masma. Ɗoopaat ci hooliɗ ci na ci hoolaaɗiici, sel ci na in ci ƴin ƴin ci na iike ŋ kehƴi jen, ca raakeen Noohin ŋ gaala kanak kanak, naar na riɓ, findi Kooh woyohee wa.
Wa neeh ca yasna-kanak ca coot, masma cammba naaf kehƴi.
naar na riɓ, findi Kooh woyohee wa. Ƴutta, Nikiɗi rannga buntaanaŋ gaala.
Toɓa yuurkeeɗa noha na weka ini ree neeh ndaŋkiyaah-nikiis (40). Masma uupeeɗa nga rap po, wa meeɓpa gaala. Wa ɓaatkeeɗa po, gaala teembeerra ŋ jola.
In ca iikee ŋ kehƴi jen ceɗ Nikiɗi ambsoh, a ɗumbiɗta ca ; ɓo', ɗoopaat, in ca ƴin ƴin ca na sel ca. A faɗee Noohin dong na ɓa nikee na ɗe ŋ ɗooƴ gaala.
Masma cooteeɗa ƴin ƴin ; ŋ finho neeh teemet na neeh ndaŋkiyaah-yatuus ceem (150), wa haawsukka kotii. Mbaɗi, caɓna yasna-kanakɗoh raakee neeh ndaŋkiyaah na neeh yasna-kanak (17) ; gaala gaƴca ŋ tangooca ŋ Ararat.
Wa degga neeh ndaŋkiyaah-nikiis (40), Noohin rangissa palaŋteera a haɓɗiɗee gaala. A tuuƴca ngaak-suur ŋ hara, yeem kaɗeeɗa hayeeɗa, po findi masma ŋiisoh. Noohin nammba tuuƴ hoɗ ne a inah andi masma ŋiisiɗ. Waaye a raakɗi ɗiski a yongan laam kehƴi riifeen na masuɓ, a dokukka. Noohin puliɗta yaah a ammba ɗe, a ɓekka ɗe ŋ ɗooƴ gaala. A sekissa neeh yasna-kanak, a tuuƴissa hoɗa. Na niina, a hayya na saaf oliiw as ŋ nguɓiŋ ɗe. Noohin inahha kotii ne masma haawsukiɗ ŋ kehƴi. A ɓaatta sek neeh yasna-kanak a tuuƴissa hoɗa, yeem taalndiɗta, a dokkisɗi nga ɗe.
Kiis ka Noohin raakoh kiis teemet-yasna-yino na kiis yino (601), ŋ caɓna koc nga, ŋ mbeha adug nga, raak masma reehiɗ ŋ kehƴi. Noohin kunissa gaala, a marakka, a hotta ne kehƴi suyiɗ.
weɗ Kooh woyoh Noohin ne : « Pula gaali, fu na ɓitiifu na kuɓuuciŋ ɗa na ɓitiɓ ciŋ ɓa ; fu puliɗ cuuɓ ciŋ ɗoopaat ci nik na ɗa, ciŋ kahan ci na ciŋ bilaf fi, sel ci na in ci ƴin ƴin ci jen ; ca pasarkohaat, ca nikaat ɓasloh, ca rimaatɗohaat laayiɗ ŋ kehƴi. »
Kooh woyissa Noohin na kuɓuuciŋ ɗe ne : « Mi yii ambtiɗoh na ɗu na ɓi na hee rimkohe nga ɗu, na in ci na pese na ɗu jen, findi sel ci na ɗoopaat ciŋ kahan ci na ciŋ bilaf fi, ceɗ ci pul na ɗu ŋ gaali na in ci na hee pese ŋ kehƴi jen. Ambtiɗohiŋ ngo na ɗu, wa na hee nikohe an : Ŋ heyɗi boomisse kipes na masuɓ laayiɗ te masuɓ laayiɗ ɗumbissanɗi kehƴi. »
Ŋ tumiɗ ñaangi-ñaangiiniŋ ngo ŋ eel ci weɗ ini na hee teeɓohe ambtiɗohiŋ ngo na ɓi kehƴi.
A kos tah po, wa Noohin inhiɗu in ci hee raake te ɓo' hotɗi ca paaɗ, a kerhiɗta Kooh, a haɓiɗta gaal yakak ne a muciɗ ɓi kahan ce. A kosa a kosee tah po a ɓurra ɓi Adina, a rahassa kiyurhi kos na eɗohe.
Maanaam, ɓi sangee kerhiɗ Kooh ɗeɓgaan, wa a muñɗee ɓa ŋ jamanoona Noohin haɓɗohee gaala. Ɓooɓa aasee ŋ gaala laayeeɗi, ɓa nikee yasna-kaahay dong, ɓeɗ mucɗassee ŋ masma.
Wa nikee ñaamaariŋ ɓoktuki woti, wi ɓoo na rahse, ɓoo muc, wa na nihse riiɓ faan haa, waaye wa teyɗuk ɓeeɗkohiŋ Kooh na hel daliɗ. Wa muciɗ ɗu taamboh ŋ hultiŋ Yeesu Kiristaa. A rapiɗ Asamaan, a yaa ŋ ñaahmaŋ Kooh, malaakaaci na nguurkoh ci na heɗ hatil ci jen degu ŋ yaah ce.
Kuɓkiŋ ɓoyi hay ɗah, wa mandan findi wa mandee ŋ jamanoonaŋ Noohin. Waam, bala masma laayɗa riifee kehƴi hayan ɗah, ɓooɓa nikee ñameeɗa, aneeɗa, ɓa kilookeeɗa, ɓa kilookseeɗa po mbeha Noohin aasoh ŋ gaala. Ɓa inheeɗi in nga po wa masma hay, wa ɗummba ɓa jen. Kuɓkiŋ ɓoyi hay ɗah, wa mandan ɗaa. Ƴaar kanak hey nike ŋ yohon, yinni ɓayu, yi tas faɗu. Ɓitiɓ kanak hey hune oɗe, yinni ɓayu, yi tas faɗu.