13 Cë Obanga okobo both Noa nï, "An amoko thamana më tyeko gin na kwö kïbëc na tye ï wi lobo, pïën gïn ömïö lobo opong kï tïm më gero. An abino tyekogï ökö kanya acël ëka kï wi lobo. 14 Pï manön yüb dong yeya kï bao më yath caiprac; pok ïë na papath, ëka ipu ïë ëka kungee k’odok lam. 15 Man ënë kite na myero in ïyüb ködë: Bor ka yeya myero obed mita 135, lac mërë mita 22 ëka bor mërë yo malö myero obed mita 13. 16 Gër wi yeya ëka ityek ökö nakun ïwëkö malö mërë dong nucu mita. Keth dholokek ï kom yeya kucël ëka ipok ïë kör adek—pïny, dyere ëka malö.

1 Cë Rwoth okobo both Noa nï, "Cïdh ï öd yeya, in ëka jö më odi kïbëc, pïën an anwongo nï in ënë kiteni atïr kï ï kin rok më karë ni.

7 Ëka Noa, awope mërë, dhakö mërë ëka mon k’awope mërë ödönyö gïnï ï yeya më bwöth kï ï abwal pii. 8 Leeni n’ëcamö ëka leeni na ba ëcamö ka arïö arïö, wïny ëka gin n’ecweo kïbëc na wotho ï wi ngöm, 9 n’obedo ëcwö ëka n’obedo dhakö obino gïnï both Noa ëka ödönyö gïnï ï yeya, kite n’Obanga öcïkö Noa ködë. 10 Ëka kinge nïnö abïrö abwal pii opong ï wi lobo.

16 Leeni na papath n’obedo cwö ëka mon, kite n’Obanga öcïkö ën ködë obino ödönyö gïnï ï yeya both Noa. Cë Rwoth ocegogï ï öd yeya.

17 Köth obedo cwee ï wi lobo pï nïnö pyer angwën, ëka abwal pii opong ï wi lobo naka otingo yeya malö kï ï kom lobo. 18 Köth ocwee ëka ömïö pii ömëdërë rwök ï wi lobo naka yeya olyero ï wi pii.

23 Gin na kwö kïbëc n’onwongo tye ï wi lobo etyekogï ökö; dhanö, leeni, gin n’ecweo kïbëc na wotho ï wi ngöm ëka wïny kïbëc na ngwëcö kï malö etyekogï ökö kï ï wi lobo. Noa ëka jö n’onwongo tye ködë ï yeya këkën ënë odong.

3 Pii ömëdërë më dwon kï ï wi lobo. Kinge nïnö 150, pii onwongo odwon ökö. 4 Ï nïnö dwe apar abïrö më dwe më abïrö, yeya obino ocung ï wi kite më Ararat.

6 Kinge nïnö pyer angwën, Noa öyabö wang derica n’onwongo ën otuco ï kom yeya, 7 ëka ooro akürük yökö, cë öcakö ngwëc, nakun wïrë tungi kï tungi, naka pii öthwö ökö kï ï wi lobo. 8 Cë Noa ooro amam më nënö ka pii dong odwon ökö kï ï wi ngöm. 9 Ëntö amam ba onwongo kanya myero epye ïë, pïën pii onwongo pod tye ï wi lobo kïbëc. Cë amam öcakö dök cen both Noa ï yeya. Noa olyao cïngë ëka ögamö amam cë odwongo yo bothe ï yeya. 10 Ën ökürö pï nïnö abïrö nökënë, ëka dökï ooro amam yo yökö kï ï yeya. 11 Ï karë n’amam ödök bothe ï yeya kothyeno, amam onwongo otingo pot yath jeituni na thïc ï dhögë na ën öpüdö. Cë Noa önïang nï pii dong otyeko dwon ökö kï ï wi lobo.Amam onwongo... 12 Cë Noa ökürö pï nïnö abïrö nökënë, ëka dökï ooro amam, ëntö amam ba dök odwogo bothe.

13 Ï karë na Noa onwongo dong tye kï mwaka 601, ï nïnö më acël më dwe më acël më mwaka na nyen, pii onwongo dong odwon ökö kï ï wi lobo. Noa öcakö pudho wi yeya ökö, cë önënö nï wi ngöm onwongo öthwö ökö.

15 Cë Obanga okobo both Noa nï, 16 "Donyi yökö kï ï yeya, in ëka dhaköni, awopeni ëka mon-gï. 17 Kel gin na kwö kïbëc na tye gïnï kanya acël kodi yökö—wïny, leeni ëka gin na kïbëc na wotho gïnï kï korgï ï wi ngöm—ëk önya gïnï ï wi lobo, önywöl gïnï ëka ömëdërë na pol ï wi lobo."

8 Cë Obanga okobo both Noa ëka awope mërë nï, 9 "Nën! An amoko cïkërëna kodwu ëka k’ëkwaëwu na bino lübö körwu 10 kï gin na kwö kïbëc n’onwongo tye gïnï kodwu—wïny, leeni më pacö ëka kï leeni më thim kïbëc, gin na kïbëc n’odonyo yökö kï ï yeya kodwu—kï gin na kwö kïbëc na tye ï wi lobo. 11 An amoko cïkërëna kodwu nï abwal pii ba dökï bino neko gin na kwö; abwal pii ba dökï bino bedo na tye më tyeko wi lobo."

13 An aketho lüth köth na mëga ï edou, ëka bino bedo anyuth më cïkërëna ï kin an ëka kï wi lobo.

37 Bino ka Wod ka Dhanö bino bedo calö karë ka Noa. 38 Ï karë nonu n’onwongo abwal pii bara opong ï wi lobo, jïï onwongo cemo ëka medho gïnï, awope nyomo ëka anyira ënyömögï, naka othuno ï nïnö na Noa ödönyö ï yeya. 39 Gïn ba ongeo gin mörö na bino tïmërë naka abwal pii obino ömöl ködgï ökö kïbëc. Bino bedo nï kömanön ka Wod ka Dhanö bino dwogo. 40 Ï karë nön jö arïö bino bedo ï pwodho; ebino kwanyö ngat acël ökö cë ngat acël bino dong. 41 Mon arïö bino bedo ï rego kï pong rego; ebino kwanyö ngat acël ökö cë ngat acël bino dong.