Arca de noé
A arca de Noé é história de salvação e fidelidade. Deus instruiu Noé a construir a arca para salvar sua família e os animais do dilúvio — exemplo supremo de obediência e fé.
ತದೆ ದೇವ್ನೆ ನೋಹಾನ, "ಮೇ ಖ್ಹಾರಸ್ ಅದ್ಮೆವ್ನ ನೂಛಿನಾಖನ ತೀರ್ಮಾನ್ ಕರಿರಾಖ್ಯೊಸ್; ಶನಕತೊ ಅವ್ಣೇಥಿ ಧರ್ತಿ ಖರಾಬ್ಫನೈಥಿ ಭರೈರ್ಹೂಸ್ ಮೇ ಖ್ಹಾಚಮ ಇವ್ಣುನ ಧರ್ತಿನ ಜೋ಼ಡ್ಮ ನೂಛಿನಾಖುಸ್. ತೂ ತಾರಖ್ಹಾಜೆ ಘಣಮೋಲ್ನ ಝ಼ಾಡ್ಥಿ ಜ಼ಹಾಜ಼್ ಬಣೈಲೆ. ಇನಾಮ ಘಣಾ ಕೋಣರ್ಹೇಣು; ಮಹಿಬಿ ಭಾರ್ಬಿ ಡಾಂಬರ್ ಲಗಾಡ್. ತೂ ಇನ ಕಿಮ್ನಿ ಪರಕ್ಮ ಕರ್ನುಕತೊ ಯೊ ತೀನ್ಖ್ಹೊ ಹಾತ್ ಲಾಂಬುಬಿ, ಅಢೈಖ್ಹ್ ಹಾತ್ ಚೌ಼ಡುಬಿ, ಡೋಡಿಖ್ಹ್ ಹಾತ್ ಊಚು಼ಬಿ ಹುಯಿರೇವ್ಣು. ಇನ ಛ಼ತ್ನ ಹೇಟ್ ಅಶ್ಪಿಶ್ ಎಕ್ ಹಾತ್ ಊಚು಼ ಖೀಂಡ್ ಬಣಾವ್ಣು; ಭೀಡೆ ಬಾಕಲ್ಮ್ಹೇಲ್ನು. ಜ಼ಹಾಜ಼್ಮ ಏಕ್ನಪರ್ ಏಕ್ ತೀನ್ಖನ್ ಬಣಾವ್ಣು.
ಪಾಣಿನು ತೋಫಾನ್
ತದೆ ಯೆಹೋವನೆ ನೋಹಾನ, "ತೂಬಿ ತಾರ ಘರ್ವಾಳು ಅಖ್ಖೂಸ್ ಜ಼ಹಾಜ಼್ಮ ಪೇಶಿಜಾ಼ವೊ; ಹಮ್ಕೆ ಛಾ಼ತೆ ಅದ್ಮಿನಿ ಖಾನ್ದಾನ್ಮ ತೂ ಎಕ್ಕಸ್ ಜ಼ಣೊ ಮಾರ ಖ್ಹಾಮ್ಣೆ ನಿಯತ್ವಾಳೊಕರಿ ದೆಖೈರ್ಹೋಸ್.
ತದೆ ನೋಹಾನೆ ತೋಫಾನ್ಥಿ ಛು಼ಕಿಜಾ಼ವಾನಖ್ಹಾಜೆ ಬಾವಣ್ ಛಿಯ್ಯಾ ವ್ಹವೆ ಖ್ಹಮೇದ್ ಜ಼ಹಾಜ಼್ಮ ಪೇಶಿಗಯೊ. ದೇವ್ ನೋಹಾನ ಹುಕುಮ್ ದಿದೋತೆ ತಿಮ್ಮಸ್ ಶುದ್ಧಾ ಅಶುದ್ಧ ಜಾನ್ವರ್ ಅಜು಼ ಜಿನಾವರ್ಮಾಬಿ ಕೀಡುಕಮ್ಟಮಾಬಿ, ಪರ್ಖ್ಹೊ ತಯೇಡ ಜೋ಼ಡುಜೋ಼ಡು ಹುಯಿನ್ ದೇವ್ನಿ ಹುಕುಮ್ನಿತರ ನೋಹಾನಿ ಜ಼ಹಾಜ಼್ಮ ಅಯಿನ್ ಪೇಶಿಗಯು. ಯೊ ಖ್ಹಾತ್ದನ್ ಹುವಾನ ವಾರ್ ಪಾಣಿನು ತೋಫಾನ್ ಧರ್ತಿಪರ್ ಶುರುಹುಯು.
ನೋಹಾನ ದೇವ್ನೆ ಹುಕುಮ್ ದಿದೋತೆ ತಿಮ್ಮಸ್ ಖ್ಹಾರಸ್ ಜಾನ್ವರ್ಮ ಏಕ್ ಪರ್ಖ್ಹೋ ಏಕ್ ತಯೇಡ ಪೇಶಿಗಯು. ಯೆಹೋವನೆ ನೋಹಾನ ಮಹಿ ಘಾಲಿನ್ ದರ್ವಾಜು ಮೂಚಿನಾಖ್ಯೊ.
ಪಾಣಿನು ತೋಫಾನ್ ಚಾ಼ಳಿಖ್ಹ್ದನ್ ಧರ್ತಿಪರ್ ಪಾಣಿ ಛ಼ಡ್ತು ಐನ್ ಜ಼ಹಾಜ಼್ ಉಪ್ಪರ್ ಪಡಾವಖ್ಹತರ್ ಯೊ ಪಾಣಿಪರ್ ತೇಲಾವಲಗ್ಯು. ಪಾಣಿ ಘಣು ತಾಖಥ್ಥಿ ಧರ್ತಿಪರ್ ಜಾ಼ಖ್ಹತ್ ಹುವಾಖ್ಹತರ್ ಜ಼ಹಾಜ಼್ ಇನಪರ್ ಚಾ಼ಲಲಗ್ಯು.
ಅಮ್ ಪಹಿಲೆ ಅದ್ಮಿ, ಜೀನ್-ಜಿನಾವರ್ ಕೀಡುಕಮ್ಟುಬಿ ಧರ್ತಿಪರ್ ಥೂತೆ ಖ್ಹಾರುಸ್ ಮಟಿಗು. ನೋಹಾಬಿ ಇನಿ ಜೋ಼ಡ್ಮ ಜ಼ಹಾಜ಼್ಮ ಥೂತೆ ಜೀವಿಖ್ಹಾರು ಖಲಿ ಬಚಿಗು.
ಅಮ್ ಏಕ್ಖ್ಹೊ ಅಢೈವೀಖ್ಹ್ ದನ್ ಹುವಾನ ಪಾರ್ ಪಾಣಿ ಕಮ್ಹೋತು ನಿಕ್ಳ್ಯು. ಖ್ಹಾತ್ನ ಮಹಿನಾನೊ ಖ್ಹತ್ರಾನೊ ರೋಜ಼್ಮ ಜ಼ಹಾಜ಼್ ಅರಾರಾಟ್ ತಬರ್ಖಾನು ಪಹಾಡ್ಕನ ಭೀರಿಗು.
ಚಾ಼ಳಿಖ್ಹ್ದನ್ ಹುವಾನ ಪಾರ್ ನೋಹಾನೆ ಇನೆ ಕರ್ಯೊತೆ ಜ಼ಹಾಜ಼್ನಿ ಕಿಟ್ಕೆನ ಕಾಡಿನ್ ಎಕ್ ಕಾಂಗಣ್ಣಾ ಭಾರ್ ಮ್ಹೇಲ್ಯೊ. ಧರ್ತಿಪರ್ಥೂತೆ ಪಾಣಿ ಖ್ಹುಕಾವಲಗು ಯೊ ಕಾಂಗಣ್ ಆವಣ್ ಜಾ಼ವಣ್ ಕರುಕರ್ತುಥು. ಅಮ್ರ್ಹಾವಪರ್ ಪಾಣಿ ಕಮ್ಹುಯುಕಿ ಕೊಯ್ನಿಕರಿ ಮಾಲುಮ್ ಕರಿಲ್ಯಾವನಖ್ಹಾಜೆ ನೋಹಾನೆ ಎಕ್ ಪರ್ಯಾವನ ಭಾರ್ ಮ್ಹೇಲ್ಯೊ. ಕತೋಬಿ ಜ಼ಮೀನ್ಪರ್ ಪಾಣಿ ಥೂತೆ ಇನಖ್ಹಾಜೆ ಪರ್ಯಾವೊ, ಗೋಡೊಮ್ಹೇಲಾನ ಝ಼ಗೊ ದೆಖಾಯುಕೊಂತೆ ಫರೀನ್ ಪಾಛು಼ ಜ಼ಹಾಜ಼್ಕನ ಆಯು. ನೋಹಾನೆ ಹಾತ್ ಪೂರೈನ್ ಇನ ಧರೀನ್ ಜ಼ಹಾಜ಼್ಮ ಘಾಲಿಲಿದೊ. ಇನೆ ಬಿಜು಼ ಖ್ಹಾತ್ ರೋಜ಼್ನ ಪಾರ್ ಪರ್ಯಾವನ ಪಾಛೊ಼ ಭಾರ್ ಮ್ಹೇಲ್ಯೊ. ಖ್ಹಾಂಜೆ ಯೊ ಪರ್ಯಾವೊ ಪಾಛು಼ಫರಿನ್ ನೋಹಕನ ಆವಖ್ಹತರ್, ಇನ ಚೋ಼ಚ಼್ಮ ಒಲಿವ್ ತೇಲ್ನ ಝಾ಼ಡ್ನು ನವು ಚಿಗುರ್ಥು. ತದೆ ಇನೆ ಇನ ದೇಖಿನ್ ಪಾಣಿ ಧರ್ತಿಪರ್ಥು ಖ್ಹರಿಗಯುಕರಿ ಮಾಲುಮ್ ಕರಿಲಿದೊ. ಪಾಛೊ಼ ಖ್ಹಾತ್ ರೋಜ಼್ನ ಪಾರ್ ಪರ್ಯಾವನ ಮ್ಹೇಲಾಖ್ಹತರ್ ಯೊ ಪಾಛು಼ಫರಿ ಇನಾಕನ ಆಯುಸ್ ಕೊಯ್ನಿ.
ನೋಹಾನ ಛೊ಼ಖ್ಹೊ ಎಕ್ ವರಖ್ಹ್ ಹುಯಿನ್ ಪಹಿಲ ಮಹಿನಾನೊ ಪಹಿಲೊ ರೋಜ಼್ ಧರ್ತಿಪರ್ ಥೂತೆ ಪಾಣಿ ಖ್ಹರಿಗಯುಥು. ನೋಹಾನೆ ಜ಼ಹಾಜ಼್ನು ಕಿಟ್ಕೆನ ಕಾಡಿನ್ ದೇಖಾಖ್ಹತರ್, ಧರ್ತಿ ಪೂರ ಖ್ಹುಕೈರ್ಹೂಥು.
ತದೆ ದೇವ್ನೆ ನೋಹಾನ, "ತೂ ತಾರಿ ಬಾವಣ್, ಲಡ್ಕಾವ್ ವ್ಹವೆಖ್ಹಮೇದ್ ಜ಼ಹಾಜ಼್ನ ಮ್ಹೇಲಿನ್ ಭಾರ್ ಆವ್; ತಾರಕನ ಛಾ಼ತೆ ಜೀನ್-ಜಿನಾವರ್, ಕೀಡುಕಮ್ಟು, ಖ್ಹಾರುಸ್ ಜೀವಿಬಿ ಭಾರ್ಆವಾದೆ; ಯೊ ಅಖ್ಖಾನ ಧರ್ತಿಪರ್ ಘಣುಹುಯಿನ್ ಫುಟಾದೆ; ಯೊ ಭಡೀನ್ ಜಾ಼ಖ್ಹತ್ ಹುವಾದೆ" ಕರಿ ಬೊಲ್ಯೊ.
ಆನಾಹುಯಿನ್ ದೇವ್ನೆ ನೋಹನಾಬಿ ಇನ ಛಿಯ್ಯಾವ್ನಾಬಿ, "ಖ್ಹಮ್ಜೊ಼ ಮೇ ತುಮಾರಿ ಜೋಡ್ಮಾಬಿ ತುಮಾರ ವಾರ್ ತುಮಾರ ಪಿಳ್ಗಿವಾಳನಿ ಜೋ಼ಡ್ಮಾಬಿ ಒಪ್ಪಂದ ಕರಿಲೇವುಸ್, ಅಜು ತುಮಾರಿ ಜೋ಼ಡ್ಮ ಜ಼ಹಾಜ್ಮಾಥು ಆಯೂತೆ ಜೀನ್-ಜಿನಾವರ್, ಜ಼ಂಗ್ಳಿಜಾನ್ವಾರ್ ಹರೇಕ್ ಧರ್ತಿನು ಜ಼ಂತ್ನಿ ಜೋ಼ಡ್ಮಾಬಿ ಮಾರಿ ಒಪ್ಪಂದ ಕರಿಲೆವುಸ್, ಯೊ ಒಪ್ಪಂದ ಖಿವುಕತೊ; ಅನಪಾರ್ ಖಿವು ಜಾನ್ವರ್ಬಿ ವರ್ಖ್ಹಾತ್ನ ತೋಫಾನ್ಥಿ ನಾಶ್ ಕೋಉಷೇನಿ ಕರಿ ಆಣ್ಕರಿನ್,
ಆ ಮೇ ಜಗತ್ನಿ ಜೋಡ್ಮ ಕರಿರಾಖ್ಯೊತೆ ಒಪ್ಪಂದಾನ ಆಸ್ ಖ್ಹಣೇದ್ ಹುಯಿರ್ಹಿಶೆ.
ವಿಶ್ವಾಸ್ಥೀಸ್ ನೋಹಾನೆ ಬಿಜೂ಼ಬಿ ದೆಖಾವ ಕೊಯ್ನಿತೆ ಇನಿ ಬಾರೇಮ ದೇವ್ನಿ ವಾತೆನ ಲೀನ್ ಡರ್ಥೀಬಿ, ಭಕ್ತಿಥಿ ಭರಾವವಾಳೊ ಹುಯಿನ್ ಇನ ಘರ್ವಾಳಾನ ಬಚೈ಼ಲಾವನಖ್ಹಾಜೆ ಜ಼ಹಾಜ಼್ನ ಭಾಂಧಿನ್ ತಯಾರ್ ಕರ್ಯೊ. ವಿಶ್ವಾಸ್ಥೀಸ್ ಇನೆ ಜಗತ್ವಾಳು ನಿಶತ್ನ ಲ್ಯವಾಳುಕರಿ ತೀರ್ಮಾನ್ ಕರಿಲಿದೊ. ಇನಖ್ಹಾಜೆ ವಿಶ್ವಾಸ್ನು ಫಲ್ ಹುಯಿರ್ಹೂತೆ ನೀತಿನ ಹಕ್ದಾರ್ ಹುಯೊ.
ಕತೊ ಅಗ್ಲ್ಯ ಹಗಾಮ್ಮ ನೋಹ ಜ಼ಹಾಜ಼್ ಭಾಂದಾನಿ ವಖ್ಹತ್ಮ ದೇವ್ ದೀರ್ಘಶಾಂತಿಥಿ ಟಿವೈರ್ಹವಾನಿ ವಖ್ಹತ್ಮ ಇವ್ಣೆ ಇನ ಅವಿಧೇಯ ಹುಯಿರ್ಹುಥು. ಯೋ ಜ಼ಹಾಜ಼್ಮ ಥೂತೆ ಆಟ್ ಅದ್ಮಿ ಖಲಿ ಪಾಣಿಮಾಥು ಬಚ್ಯು. ಯೋ ಹಮ್ಕೆ ತುಮುನ ಬಚಾ಼ಡನು ಬ್ಯಾಪ್ತಿಸ್ಮನು ಏಕ್ ರೂಪ್ ಹುಯಿರ್ಹುಸ್. ಆ ಖಲಿ ಶರೀರ್ನು ಮೇಲೊ ಧೊವಾಕೊಯ್ನಿ. ಕತೋಬಿ ಆ ಅಛ಼್ಛು ದಿಲ್ನಿಸಾಕ್ಷಿಥಿ ದೇವ್ನಿ ಜೋ಼ಡ್ಮಕರಾನಿ ವಾಗ್ದಾನ್ ಹುಯಿರ್ಹೀಸ್. ಅಜು಼ ಯೇಸುಕ್ರಿಸ್ತ ಪಾಛು಼ಜಿವ್ತು ಉಠಾಥಿಸ್ ಹಮ್ಕೆ ಆ ಅಪ್ಣುನ ರಕ್ಷಣೆದಿಶೆ. ಹಮ್ಕೆ ಯೇಸು ಪರ್ಲೋಕ್ನ ಜೈ಼ನ್ ದೇವ್ನ ಖಾವಿಬಾಜು಼ಮ ಬೇಠೋಸ್. ಖ್ಹಾರುಸ್ ದೇವ್ದೂತರ್ಬಿ ಪರಲೋಕ್ನು ಅದಿಕಾರಿಖ್ಹಾರು ಅಜು಼ ಶಕತ್ಖ್ಹಾರನ ಉಪ್ಪರ್ ಯೊ ರಾಜ಼್ಭಾರ್ ಚ಼ಲವ್ಕರಸ್.
ನೋಹಾನ ದನ್ಮ ಚಾ಼ಲ್ಯುತೆ ಇಮ್ಮಸ್ ಅದ್ಮಿನೊ ಛಿಯ್ಯೊ ಆವ್ಶೇತೆ ದನ್ಮ ಚಾ಼ಲ್ಷೆ. ಕಿಮ್ಕತೊ, ತೋಫಾನ್ ಆವಾನ ಅಗಾಡಿ ಅದ್ಮಿಖ್ಹಾರು ಖಾತು-ಪೀತು ಹುಯಿನ್, ವ್ಯಹಾ ಕರ್ತುಹುಯಿನ್, ವ್ಯಹಾ ಕರಿದೇತುಹುಯಿನ್ ಥೂ. ನೋಹಾನೆ ಜ಼ಹಾಜ಼್ನ ಮಹಿ ಚ಼ಢ್ಯೋತೆ ದನ್ಮಾಬಿ ಇವ್ಣೆ ಇಮ್ಮಸ್ ಕರುಕರ್ತುಥು. ತೋಫಾನ್ನು ಪಾಣಿ ಐನ್, ತಮಾಮ್ನ ವವ್ಹಾಡಿಲೀನ್, ಜಾ಼ವಾತೋಡಿ ಇವ್ಣೆ ಶಾತ್ಬಿ ಮಾಲುಮ್ಕೊಂತೆ ಇಮ್ ಥೂ. ಇಮ್ಮಸ್ ಅದ್ಮಿನೊ ಛಿಯ್ಯೊ ಆವ್ಶೇತೆ ತದೇಬಿ ರ್ಹಿಶೆ. ಯೋ ವಖ್ಹತ್ಮ ಖೇತರ್ಮ ಬೇ ಜ಼ಣು ಕಾಮ್ ಕರ್ತು ರ್ಹಿಶೆ, ಏಕ್ಜ಼ಣಾನ ಪಾಡಿಲಿಶೆ, ಅಜು಼ ಏಕ್ ಜ಼ಣಾನ ಮ್ಹೆಂದಿಶೆ. ಬೇ ತಯೇಡ ಬೇಶಿನ್, ಘಟ್ಟಿ ದಳುಕರ್ಶೆ, ಏಕ್ನ ಪಳ್ಳಿಶೆ ಏಕ್ನ ಮ್ಹೆಂದಿಶೆ.