16 Weche duto manie Muma oa kuom much Nyasaye kendo konyo kuom puonjo ji, kendo kuom kwero gik maricho, kendo kuom rieyo ji, kendo kuom tiego ji mondo ji obed joma kare, 17 eka ngʼat Nyasaye obed molony chuth ne tich moro amora maber.

15 bende ngʼe ni nyaka ia e nyathi isebedo kingʼeyo weche manie Muma Maler manyalo miyi rieko makeloni warruok kuom yie Kristo Yesu. 16 Weche duto manie Muma oa kuom much Nyasaye kendo konyo kuom puonjo ji, kendo kuom kwero gik maricho, kendo kuom rieyo ji, kendo kuom tiego ji mondo ji obed joma kare, 17 eka ngʼat Nyasaye obed molony chuth ne tich moro amora maber.

20 To moloyo mago duto, nyaka ungʼe ni onge wach mokor mar Muma ma janabi nyalo loko tiendgi gi pache owuon. 21 Nikech weche mokor manie Muma ne ok owuok e pach dhano, to Nyasaye ema nomiyo ji owuoyo, ka gin e bwo teko mar Roho Maler.

15 Tem matek mondo ichiwri ne Nyasaye kaka jatich molony ma wiye ok kuodi kendo mapuonjo Wach mar adiera e yo makare.

2 Yal Wach kendo ikri mar timo mano kinde duto, kata ka piny rach kata ka piny ber, kirieyo ji, kikwero ji, kendo kijiwo ji gi kinda duto, kendo kipuonjo ji tiend wechegi adimba.

13 Ket chunyi kuom somo Ndiko ne ji e lela, kendo kuom jiwo ji kendo puonjo ji nyaka chopi abi.

12 Nimar wach Nyasaye ngima kendo tiyo. Obith moloyo ligangla ma dhoge ariyo, kendo opowo chuny dhano nyaka iye mogik, nyaka kuma pach dhano gi chunye jorome, kaachiel gi fuoni gi ondhudho. Kuno ema oketoe bura ne paro kod dwaro malingʼ-lingʼ manie chuny dhano.

35 Polo gi piny norum, to Wechena ok norum ngangʼ.

4 Yesu nodwoke niya, "Ondiki ni, ‘Dhano ok bed mangima nikech chiemo kende, to nikech wach ka wach moa e dho Nyasaye.’*"

10 Mana kaka koth gi pe lwar koa e polo,

kendo ok dog nono ka ok omiyo piny ngʼich,

ma cham twi kendo nyag kothe ne jachwoyo,

kendo cham ne jachiemo,

11 e kaka wachna mawuok e dhoga,

ok noduogna nono ka ok otiyo tije,

to nyaka ochop dwarona,

kendo otiek tijno mane omiyo aore.

17 Pwodhgi gi adierani, nikech Wachni en adiera.

39 Uketo chunyu kuom nono Muma nikech uparo ni unyalo yudo ngima mochwere kuomgi. Muma ema timo neno kuoma,

25 to wach Ruoth osiko manyaka chiengʼ."*

Ma e Injili mane oyalnu.

9 Ere kaka ngʼama pod tin nyalo rito ngimane mondo osik ka oler?

Onyalo rito mana ka odak moluwore gi wachni.

160 Wechegi duto gin adier;

kendo chikegi makare duto ochwere.

ש Sin gi Shin

11 To jo-Berea ne nigi kido maber moloyo jo-Thesalonika, nikech negirwako wach gi chuny mamor, kendo neginono Ndiko pile ka pile, mondo gine ane ka gik mane Paulo wacho gin adier.

2 Kaka Paulo ne jatimo pile, ne odonjo e od lemono, kendo kuom Sabato adek moluwore, nopimo kodgi wach kuom weche mondiki e Muma. 3 Noleronigi tiendgi kendo nomiyo gingʼeyo gadiera ni Kristo ne nyaka sandi eka bangʼe ochier oa kuom joma otho. Nowachonegi niya, "Yesu ma ayalonuni e Kristo."

30 Eka Filipo noringo odhi nyaka but garino mi owinjo ka ngʼatno somo kitap Janabi Isaya. Filipo nopenje niya, "Bende iwinjo tiend gima isomono?"

31 Ja-Ethiopia nodwoko Filipo niya, "Ere kaka dawinj tiende kaonge ngʼama olerona tiende?" Omiyo norwako Filipo mondo oidh obed kode ei gari.

32 Kama noyudo ngʼatno somo ndiko kama wacho ni:

"Notere kar thone mana ka rombo mitero kar yengʼo,

kendo nolingʼ ka nyarombo manie lwet ngʼama ngʼado yiere,

omiyo en bende ne ok otingʼo dhoge.

35 Eka Filipo nochako gi Ndiko kama ne ja-Ethiopiano somo, mi odhi nyime gi yalone Injili mar Yesu.

10 Nimar Ezra nosechiwore owuon ne somo matut kendo rito Chik mar Jehova Nyasaye, kod puonjo chikene gi buchene e Israel.

25 Nowachonegi niya, "Ufuwo nadi to mano kaka chunyu kawo kinde mondo uyie duto mane jonabi osewacho! 26 Donge ne Kristo nyaka yud masichegi eka bangʼe nodonji e duongʼ ma Nyasaye ne oseikone?" 27 To chakre Musa gi Jonabi duto, noleronigi konyisogi gino mane owachi kuome e ndiko duto.

18 Eka Yesu nobiro irgi mowachonegi niya, "Teko duto manie polo kod manie piny osemiya. 19 Kuom mano, dhiuru ulos jopuonjre e ogendini duto, kubatisogi e nying Wuoro gi Wuowi kod Roho Maler, 20 kendo kupuonjogi mondo gitim gik moko duto ma asechikou. To awachonu adier ni an kodu ndalo duto, nyaka giko mar ndalo."

7 Ka udhi to yaluru wach kama: ‘Pinyruodh polo ni machiegni.’

8 Eka wach Jehova Nyasaye nobirone mowachone niya,

1 Wach Jehova Nyasaye mane obiro ne Joel wuod Pethuel.

19 Wach Jehova Nyasaye nobiro ne Jeremia:

1 Ma e ote mane Jehova Nyasaye omiyo Malaki mondo omi jo-Israel.

8 Eka wach Jehova Nyasaye nochako obiro ni Zekaria niya,

4 Eka wach Jehova Nyasaye nobiro ne Isaya kama:

1 Roho mar Jehova Nyasaye Manyalo Gik Moko Duto ni kuoma,

nikech Jehova Nyasaye osewira,

mondo aland wach maber ne joma odhier.

Oseora mondo akwe chuny jok modakie lit,

kendo mondo aland ne joma otwe ni gin thuolo,

bende mondo ahul ne joma otwe modakie mudho ni koro osegonygi.

2 Bende oseora mondo aland ni ma e higa mar ngʼwono mar Jehova Nyasaye,

kendo chiengʼ ma Nyasachwa biro chuloe kuor,

kohoyo ji duto manie kuyo,

3 abiro konyo jogo man-gi lit Sayun,

kendo gik mabiro miyogi e magi:

ketonegi maua mabeyo kar buru magi bukorego,

kendo mor kar lit ma gin-go,

kendo chiwo lewni mag pak kar chuny mool.

Enoluong-gi ni yiend ober mag tim makare,

mopidh gi Jehova Nyasaye,

konyiso godo duongʼne.

5 "Wach ka wach moa kuom Nyasaye en adier;

Nyasaye en okumba ne jogo mopondo kuome.

6 Kik imed gimoro e wachne,

to nono obiro kwedi mi onyis ni in ja-miriambo.

18 An Johana asiemo ngʼato ka ngʼato mawinjo wechegi mokor mag kitabuni kama: Ka ngʼato moro nomed wach moro amora kuom wechegi, Nyasaye nomedne ngʼatno masiche mondik e kitabuni. 19 To bende ka ngʼato moro nogol oko weche mokor manie kitabuni, Nyasaye nogol kuome kamaye pokne manie yath mar ngima kendo manie Dala Maduongʼ Maler, mondiki e kitabuni.

6 Awuoro ahinya kaka uselokoru piyo piyo nono, mi uweyo Jal mane oluongou kuom ngʼwono mar Kristo, kendo koro uluwo Injili mopogore gi mane opuonju, 7 ma chutho ok en Injili. Kuom adiera nitie jomoko marundo pachu ka gitemo mondo gilok Injili mar Kristo obed gimoro nono. 8 To ka ngʼato dipuonju Injili machielo mopogore gi mano mane wapuonjou, bed ni en wan, kata malaika moro moa e polo, to mondo okwongʼe nyaka chiengʼ. 9 Mana kaka wasewacho e kaka achako awacho kendo: Ka ngʼato koro yalonu Injili ma opogore gi mane urwako, to Nyasaye mondo okwongʼe nyaka chiengʼ!

15 Beduru kungʼeyo ni deko mar Ruodhwa oweyo mana thuolo mar yudo warruok, mana kaka Paulo owadwa mwageno bende osendikonu gi rieko mane Nyasaye omiye. 16 Barupenego duto ondiko machalre, kowuoyo kuom wechegi. Barupene otingʼo weche moko ma tiendgi tek ma joma kia kaachiel gi jo-hubagabaga gwenyo, mana kaka gigwenyo Ndiko mamoko bende, to timgino biro kelonegi chandruok.

4 Nimar weche duto ma nondiki e ndalo machon, nondiki mondo opuonjwa, mondo kwachungʼ motegno kendo ka wajiwore gi Ndiko, to wanyalo bedo gi geno.

14 To ere kaka digiluong ngʼat mapok giyie kuome? Koso digiyie nadi kuom Ngʼat mapok giwinjo kuome? To giniwinj kuome nadi kaonge ngʼama oyalonigi? 15 To ere kaka digiyal wach kuome ka ok oorgi? Mana kaka ondiki niya, "Mano kaka en gima ber neno tiend joote makelo wach maber!"*

16 To jo-Israel duto ok oserwako Injilini. Nimar Isaya nowacho niya, "Ruoth, en ngʼa moseyie wach mwalando?"* 17 Kuom mano, yie aa kuom wach miwinjo, kendo wach miwinjono en wach Kristo.

16 Aonge wichkuot kuom Injilini, nikech en e teko mar Nyasaye makelo ni ngʼato angʼata moyie warruok, mokwongo ni jo-Yahudi, eka bangʼe ni joma ok jo-Yahudi bende. 17 Nikech kuom Injilino ema Nyasaye ketoe dhano kare kuom yie kende ma ok omedie gimoro machielo, mana kaka ondiki niya, "Ngʼat makare nobed mangima kuom yie."*

12 Roho mwaseyudo ok en roho mar piny, to en Roho moa kuom Nyasaye, mamiyo wangʼeyo mich ma Nyasaye osemiyowa. 13 Mago e weche mwawuoyo kuomgi, ka ok wakonyre gi weche mopuonjwa gi rieko dhano, to wakonyore gi weche ma Roho ema opuonjo, kwalero adiera mag chuny gi weche mag chuny. 14 To ngʼat ringruok ok nyal rwako gik moa kuom Roho mar Nyasaye, nikech onenogi kaka fuwo kendo ok onyal winjo tiendgi, nikech iwinjogi kuom Roho.

21 Nyasaye nochano gi riekone ni piny ok nyal ngʼeyo Kristo gi riekone owuon, to nochano mana ni kuom fuwo mar wach mwalandoni ema owarogo joma oyie.

22 Jo-Yahudi dwaro ni nyaka timnegi honni, to jo-Yunani to manyo rieko, 23 to wan wayalo Kristo mane ogur, ma en kidi machwanyo jo-Yahudi kendo en fuwo ni joma ok jo-Yahudi. 24 To kuom ji duto ma Nyasaye oseluongo, bed ni gin jo-Yahudi kata jo-Yunani, Kristo en teko Nyasaye kendo en rieko Nyasaye.

17 Nikech Kristo ne ok oora mondo abatis ji, to noora mondo ayal Injili, ok gi weche mamit mag rieko dhano, nono to dipo ka msalap Kristo obedo tekone.

9 Un to un jogo moyier. Un jodolo ma joka Ruoth kendo un oganda maler mar Nyasaye mane oyiero mondo ohul tijene miwuoro, kane oluongou mi ua e mudho kendo udonjo e lerne miwuoro.