16 Sun le bürüwañubei tidan Lererun Bungiu, Bungiu guánarügü íchugubalin haritagunrugun wügüriña lun habürüdüni, ani huutu lun tarufudahan, lun tadeinhan, adügatu lun hígiruni gürigia katei le mabuidunbei ani arufudahatu houn gürigia lidan richaguaü. 17 Lun aranseñu hamá lubúeingu Bungiu lun hadügün sun luwuyeri wadagimanu buiti.

15 Haritaguabatia luagu subudi banu Lererun Bungiu lúmagiñe biñüraü. Tidan Lererun Bungiu, ladarirúa sun lichú aau le busenwabei lun gayara lan hasalbarun gürigia, lau hafiñerun luagu Hesukrístu. 16 Sun le bürüwañubei tidan Lererun Bungiu, Bungiu guánarügü íchugubalin haritagunrugun wügüriña lun habürüdüni, ani huutu lun tarufudahan, lun tadeinhan, adügatu lun hígiruni gürigia katei le mabuidunbei ani arufudahatu houn gürigia lidan richaguaü. 17 Lun aranseñu hamá lubúeingu Bungiu lun hadügün sun luwuyeri wadagimanu buiti.

20 Lóugiñe sun katei, lunti hasubudiruni luagu ua lan ni aban gayaraati ladariruni lanichigu katei le bürǘ hamaalíbei profetagu lau lani lungua, 21 lugundun madimurehantiña meha wügüriña hagía lau hani houngua. Hagía, kei meha wügüriña habéi deregeguatiña houngua lun Bungiu, dimurei burí lúmagiñeti Bungiu hadimurehabei lugundun Sífiri Sandu lan adundehabaliña.

15 Houchabéi sun bubafu lun barufudagun bungua ligibugiñe Bungiu keisi aban nadagimeinti buiti, le úati kaba lan uagu labusigarida, le arufudahabalin uganu lánina inarüni kei lubudubu.

2 Apurichihabei Dimurei, adügabéi súnwandan, busén hagía yebe gürigia haganbuni, mabusenrun. Afiñegüdabáña, adeinhabá, erereha buguyame, arufudahabá houn lau gurasu.

13 Lubaragiñe nachülürün, rúguaba bungua lun baliihanu Lererun Bungiu lun adamurini, íchiga gurasu houn waduheñu lidan hafalaruni, alidihaña darime nachülürün.

12 Ladüga wínwantu Lererun Bungiu ani gabafu tuguya. Hamanatu sügǘ tau aban eféin to biánguati tamana, belú tuguya chülǘ tumoun wawani luma wani sífiri. Furangugüda tumuti sun waritagun luma sun le wabusenrubei, arufudatéi ka lan tídanbei wanigi.

35 Lásügürüba sielu luma ubóu, anhein nererun, meredebei magunfulirunga.

4 Aba lóunabun Hesusu: Tariñahare Lererun Bungiu: "Mámarügübei tau fein habagarida gürigia; habagariduba giñe lau sun dimurei le lariñagubei Bungiu".

10 «Ítara kei lararirun huya luma niewe siélugiñe,

magiribudúnhali ñeinhin,

lubaragiñe lira aba ladüdüragüdüni múa,

arandaragüdalei, ru ligía ilaü lun ábunaguti,

ru ligía fein lun teigín,

11 ítara liña giñe dimurei le áfuridubei niyumulugugiñe,

magiribudúnti nun madügüngalei le nabusenrubei,

lubaragiñe lira adüga lumuti le nabusenrubei,

gúnfuli lumuti le nariñagubei.

17 Deregeguagüda baña houngua bun, lau lubafu bererun le inarünibei.

39 Aturiaha humutu Lererun Bungiu lau saragu góunigi, ladüga aguraba humá hadariruni ibagari le magumuchaditi tidan; lau sun lira, líburu tuguya adimurehaboun nuagu,

25 anhein Lererun Bungiu, durati lun sun dan».

Ani dimurei le, ligía uganu le lánina asalbaruni le uágubei lariñawagúa hun.

9 Ida lubagia gayara lan labagaridun nibureinti

aban ibagari harumati?

Lau lagunfulirun lau bererun!

160 Lídanñein bererun inarüni;

magumuchaditi sun lúaran bererun.

Shin

11 Huríu ha ñéinbaña, buítimati hagaburi hawéi ha Tesalónikabaña; resibi hamuti uganu luáguti Kristu lau ugundani; ságüti weyu haliihanu Lererun Bungiu lun harihini anhein inarüni lubéi le ariñawagúbei houn.

2 Kei lechun Pábulu, ñǘdünti tidan ligilisi tuguya; asigenehati hama ǘrüwa dimaasu, sagü luéyuri emeraaguni. 3 Arufudahati houn kei tariñaguni Lererun Bungiu luagu lunti lan meha lasufurirun Kristu, lárigiñeme lan lounwen, aba lanme lásaarun lídangiñe óunweni. Lariñaga houn:

—Hesusuméme le uágubei nadimureha hun, ligía Krístubei.

30 Aba layarafadun tuagun karü, aba laganbuni laliihaña lan wügüri ligía tidan liliburun Isaíasi; aba lariñagun lun:

—Gunfuranda bumuti san le baliihabei?

31 Aba lariñagun wügüri ligía lun:

—Ida lubagia gunfuranda nani, úaga kaba lan afuranguágüdei nun?

Aba lariñagun lun Felipe lun ládinun lumoun lun lañuurun lóubagiñe.

32 Anihán burí dimurei le laliihabei:

Barüwati kei mudún lun lafarún hilagubei;

ítara kei lerederun mudún maniñu hagibugiñe ha ásarubalin,

ítara liña giñe mariñagun lan ni kata.

35 Ábati lagumeserun Felipe arufudahei Lererun Bungiu lun, lúmagiñe le ñéingiñe lubéi lagumesera aliiha, aba líchuguni uganu luáguti Hesusu lun.

10 Deregeguati Ésüdürasi lungua le gumuti lun laturiahani luma lun ladügüni le lubeibei lilurudun Bungiu, luma lun larufudahani lúrudu luma gumadi houn Ísüraelina.

25 Ábati lariñagun Hesusu houn:

—Lóuguati giñe gunfuranda humá, lüti giñe lubá hafiñerun luagu le meha hariñagubei profetagu! 26 Ma funagia lunti meha lasufuriruni Kristu sun katei le lubaragiñe leresibiruni luéirigun?

27 Ábati lagumeserun afuranguagüdei sun le tariñagubei Lererun Bungiu luagu houn, lagumesera túmagiñe burí liliburun Moisesi tumoun sun haliburun profetagu.

18 Aba liabin Hesusu hawagun, aba lariñagun houn:

—Rúaali sun ubafu nun sielu luma ubouagu. 19 Heiba lubeiti habügürü gürigia ha lílana sun fulasu, adüga humaña nánime disipulugu; badisei humaña lidan liri Bungiu Úguchili, liri Bungiu Irahü, luma liri Sífiri Sandu. 20 Arufudaha huguyame houn lun gaganbadi hamá lun sun le uágubei nariñaga hun. Subudi huméi luagu anahein lan huma sagü weyu darime lagumuchun ubóu. Ítarala.

7 Heiba, apurichiheina luagu yarafaali lan larúeihan Bungiu.

8 Ábati lariñagun Aburemei lun Elíasi:

1 Anihán uganu le líchugubei Wabureme lun Hoeli,

le liráü Petueli:

19 Aba ladimurehan Aburemei lun Heremíasi, Lariñaga lun:

1 Anihán uganu le líchugubei Bungiu lun Malakíasi, lun líchuguni houn lílana Ísüraeli.

8 Aba ladimurehan Wabureme lun profeta Sakaríasi, lariñaga lun:

4 Aba lariñagun Wabureme lun Isaíasi

1 Anihein lani Bungiu sífiri nuagu,

lugundun anúadira láadina Bungiu;

óunaha láadina apurichihei iseri uganu houn gudemetiña,

awalidaguagüdaña ha nidiheribaña,

adimureha houn adaürǘtiña ha furisunrugubaña luagu áfuriduni;

2 íchigei uganu houn gürigia,

luagu chülühali lan weyu,

luéyuri lesefuruniña Bungiu lumutuniña,

weyu le lunbei lageindagun Wabungiute hama wáganiñu waweigiñe,

óunaha láadina ámalihaña sun ha hírubaña,

3 íchiga aban ridi lánina ugundani

houn lílana Sión ha nidiheribaña leweñegua íruni,

ibiñein lánina ugundani leweñegua águiraü,

daüguaü lánina fedu teweñegua ludu.

Hadügübei le úaraguabei,

ítara haba kei tídibu wewe

le lábunagubei Bungiu lun larufuduni luéirigun.

5 Góunigi lumutiña Bungiu ha hemenigibaña luagu,

gayaraati lafiñerúniwa luagu le füramase lubéi.

6 Míchigaba ni kata lanwoun le lariñagun,

ébecha liñalibu, ábame berederun kei yeeti.

18 Sun ha aganbubalin luganute Bungiu le bürüwañubei tidan líburu to, wéridi numutiña luéi katei le: Le íchuguti lanwoun katei le, laganwoundagüdübaña Bungiu igei ha uágubaña labürühóua tidan líburu to, luagu. 19 Le giñe agidaruti somu katei lídangiñe luganute Bungiu le bürüwañubei tidan líburu to, lagidarubei giñe lufanran lídangiñe lin tídibu wewe lánina ibagari, luma lídangiñe Uburugu Sánduti le burí uágubei labürühóua tidan líburu to.

6 Wéiritu nanigi lau lufuresen hígiruni Bungiu le agúarubei hun luagu lareini Kristu, lun hásügürün lidoun amu uganu luáguti asalbaruni; 7 mama luagu anihein lan amu uganu luáguti asalbaruni, le suserebei, añahein lan fiu wügüriña ádahatiña bulíeiguaü haganaguóun, ani busén hagía hasansiruni uganu luáguti Kristu. 8 Gama lumoun íbini anhein ñüdün aban wádangiñe o aban lan ánheli siélugiñeti apurichiha aban uganu luáguti asalbaruni amu luéi le apurichiha wamaalibei, íñarawaguala! 9 Kei meha wariñaguni, ariñagaya numuti guentó: Le apurichihati amu uganu luáguti asalbaruni hun, luéi le resibi humaalibei, rédeila lábugiñe íñarawaguni!

15 Subudi humeitia luagu lagurabaharügüña lan Wabureme Hesukrístu hasalbarun gürigia lubá lagiribudun ubouagun. Ítara liña giñe labürühan waduhe Pábulu le hínsiñebei woun saragu, hun, lau subudi le líchugubei Bungiu lun. 16 Adimurehati tidan sun burí ligaradan luagu burí katei le; lau sun anihein burí lan tídangiñe, hénrenguti gunfurandawa lan. Hati ibidiouguabaña aau hama ha lóuguabaña afiñe, garabaguati lanichigu labürühan Pábulu según hagía, ítara kei hadüga tun burí tíbiri líburu to Lererun Bungiu. Heferidiruba lun sun dan ladüga katei le.

4 Sun le ariñawagúbei tidan Lererun Bungiu lúmagiñe binarü, lun larufudahóun woun labürühóua; bürüwati meha dimurei burí ligía lun wanügün gurasu luma dǘgüdaguaü lídangiñe, gayara láamuga wemenigidúntima luagu Bungiu.

14 Ida lubati gayara lan hagúaruni lun lasalbaruniña anhein mafiñerungiña lubéi luagu? Ida luba giñeti gayara lan hafiñerun luagu, anhein maganbungiña lubéi luagu? Ida lubati gayara lan haganbun luagu, anhein uá habéi apurichihati uganu houn? 15 Ida lubati giñe gayara lan hapurichihan gürigia houn anhein úa kaba lan óunahaña apurichiha? Keisi lariñawagún tidan Lererun Bungiu: «Ma lubuidun hachülürün ha anügübalin uganu buiti!»

16 Gama lumoun másutiña gürigia ebereserutiña lau uganu lánina asalbaruni le aganba hamaalibei. Keisi lariñaguni Isaíasi tidan liliburun: «Wabureme, ka afiñerubaña lau haganbuni uganu le wapurichihabei?» 17 Ítara liña lubeiti, lídangiñe haganbuni gürigia uganu hafiñera, ani Lererun Kristu uganu ligía.

16 Úati nibusigari nan lau uganu luáguti Wasalbaragüle, lugundun anihein lan lubafu Bungiu lidan lun lasalbaruniña sun ha afiñebaña luagu; huríu furumiñe, lárigiñe, ha mámabaña huríu. 17 Arufuda lumuti uganu ligía woun ida liña lan laricharaguagüdüniña Bungiu gürigia ligibugiñe, lau hafiñerun lúmagiñe lagumeseha lumoun lébeha. Ítara liña tariñaguni Lererun Bungiu: «Le richaguabei lau lafiñerun, labagariduba».

12 Wagía afiñetiña, mama aban sífiri le lánina ubóu weresibirubei; Sífiri le ñǘbuinbei lúmagiñe Bungiu, ligía weresibirubei, lun gunfuranda wamani le ru laalibei Bungiu woun lau lareini. 13 Adimurehatiwa luagu lareini Bungiu lau burí dimurei le larufudahabei Sífiri woun, mama lau burí dimurei le wafurendeirun lau lichú wau. Ítara liña, lau lubafu Sífiri Sandu, wafuranguagüdei linarün Bungiu houn gürigia ha ibihubalin Sífiri.

14 Gürigia le mibihinbalin Sífiri, meresibirun lumuti katei le lánina lani Bungiu Sífiri, lugundun libidiounigan aau lanügüni; siñá lumuti giñe gunfuranda, lugundun katei lan burí le, láurügüñein lubafu Sífiri Sandu gayara lan gunfurandawa lan.

21 Lugundun lidan lichú lau Bungiu, mígirun lumutiña gürigia lun hasubudiruni lau guánarügü lichú hau, lubaragiñe lira aba laranseruni lun lesefuruniña lau hafiñerun luagu uganu buiti le wapurichihabei le lenegebei libidiounigan aau.

22 Ladüga amuriahatiña huríu milaguru; áluaha hagía ha mámabaña huríu lichú aau. 23 Anhein wagía, wapurichihan luagu Kristu le ádarawagubei luagu gurúa, le ábanbei dübü achugeraguágülei houn huríu, libidiounigan ligía aau houn ha mámabaña huríu. 24 Ánheinti houn ha lagúarubaña Bungiu lun lánigu hamá, dandu huríu kei güriegu, Kristu lubafubei luma lichú lau Bungiu.

17 Móunahan lumutina Kristu abadiseiha, lóunahañadina apurichihei uganu luáguti lasalbaruniña gürigia; mama lau apurichihani lau lichú hau wügüriña, luéi lagidarun lídangiñe lanichigu lounwen Kristu luagu gurúa.

9 Ánheinti huguya le afiñebei luagu Kristu, aban rasa anuadahóuatiña huguya, fádirigu ha eseriwidutiña lun urúei le Bungiu, néchani ha deregeguaaña houngua lun Bungiu, lumutuniña Bungiu. Anuadirúaadün lun hadimurehan luagu burí katei buiti le ladügübei Bungiu, le agúarubei hun lídangiñe luburiga lun lidoun lueirin larugounga le líchugubei.