10 Ang usa ka adlaw diha sa imong Templo

mas maayo pa kaysa 1,000 ka adlaw didto sa ubang dapit.

Palabihon ko pa nga magtindog sa pultahan sa balay sa akong Dios,

kaysa mopuyo sa balay sa mga daotan.

4 Usa ra ka butang ang akong gipangayo sa Ginoo

ug mao gayod kini ang akong gihandom pag-ayo:

nga makapuyo ako sa iyang balay sa tibuok kong kinabuhi,

ug didto makapamalandong ako sa iyang kaayo

ug makapangayo sa iyang paggiya.

4 Bulahan ang tawo nga imong gipili

ug giagda nga mopuyo sa imong Templo.

Matagbaw kami sa mga kaayohan diha sa imong balay

nga mao ang imong balaan nga Templo.

1 Nalipay ako sa dihang miingon sila kanako,

"Mangadto kita sa Templo sa Ginoo."

6 Nakasiguro gayod ako nga ang imong kaayo ug gugma kanako magpadayon

sa tibuok kong kinabuhi.

Ug mopuyo* ako sa imong balay*, Ginoo,

hangtod sa kahangtoran.*

8 Apan ako nahisama sa kahoyng olibo nga nagtubo sa balay sa Dios.

Nagsalig ako sa iyang gugma sa walay kataposan.

9 Tungod sa paghigugma ko sa imong balay,

ginalaglag* ako,

ug gisakitan ako sa mga pagpanamastamas

sa mga tawo kanimo.

12 Misulod si Jesus sa templo ug giabog niya ang tanan nga namalit ug namaligya didto. Gipangtikwang niya ang mga lamisa sa mga nag-ilis ug kuwarta ug ang mga lingkoranan sa mga namaligya ug mga salampati nga ighahalad. 13 Miingon siya kanila, "Nag-ingon ang Dios sa Kasulatan, ‘Ang akong balay tawgon nga balay nga alampoanan.’* Apan gihimo hinuon ninyo kini nga ‘tago-anan sa mga tulisan!’ "*

13 Hapit na ang kasaulogan sa mga Judio nga gitawag nga Pista sa Paglabay sa Anghel. Busa miadto si Jesus sa Jerusalem. 14 Didto sa templo nakita niya nga adunay namaligya ug ighahalad nga mga baka, mga karnero ug mga salampati. Adunay mga tawo didto nga gapang-ilis ug kuwarta diha sa ilang mga lamisa. 15 Busa naghimo siya ug latigo nga pisi. Ug unya gipang-abog niya ang mga karnero ug mga baka ngadto sa gawas sa templo. Gilabay niya ang mga kuwarta sa mga nang-ilis ug kuwarta ug gipangtikwang pud ang ilang mga lamisa. 16 Miingon siya sa mga nagbaligya ug salampati, "Kuhaa kini dinhi! Ayaw ninyo himoa nga baligyaanan ang balay sa akong Amahan!" 17 Niining iyang gihimo, nahinumdoman sa iyang mga tinun-an ang nasulat nga nag-ingon, "Ang akong pagmahal sa imong balay maoy maghatod kanako sa kamatayon."*

19 Dili ba ang Espiritu Santo nga gihatag sa Dios nagpuyo sa atong lawas isip iyang templo? Busa kining atong lawas dili ato kondili iya sa Dios.

15 aron nga kon malangan ako, masayod ka na kon unsaon paggawi sa mga tumutuo isip pamilya sa Dios. Kita nga mga tumutuo mao ang iglesia sa buhi nga Dios, ang iyang gisaligan nga magbarog ug maglaban sa kamatuoran.

6 Apan si Cristo kasaligan isip Anak nga tinugyanan sa pamilya sa Dios. Ug kita ang pamilya sa Dios, kon magpadayon kita nga mahugtanon sa atong paglaom nga atong ginapasigarbo.

44 Miingon pa gayod si Esteban, "Samtang didto pa ang atong mga katigulangan sa kamingawan, anaa kanila ang tolda nga diin anaa ang presensya sa Dios. Kadtong maong tolda gihimo sumala sa sugo sa Dios, sumala sa plano nga iyang gipakita ngadto kang Moises. 45 Sa dihang nangamatay na ang atong mga katigulangan, ang ilang mga anak mao na usab ang nagdala sa tolda. Ang ilang pangulo mao si Josue. Naangkon nila ang mga yuta nga gisaad sa Dios human gipapahawa sa Dios ang mga tawo nga nagpuyo niadtong mga dapita. Ug didto nagpabilin ang tolda nga gidala-dala sa mga Israelinhon hangtod sa panahon nga si David ang nahimong hari. 46 Nahimuot ang Dios kang David, ug gipangayo ni David kaniya nga tugotan siya nga magpatukod ug balay alang sa Dios aron makasimba didto ang kaliwatan ni Jacob. 47 Si Solomon mao ang naghimo sa templo sa Dios.

48 "Apan ang Labing Halangdong Dios dili mopuyo sa mga balay nga hinimog tawo. Sumala sa gisulti sa propeta, miingon ang Dios:

49 " ‘Ang langit mao ang akong trono,

ug ang yuta tumbanan ko sa akong mga tiil.

Busa unsa pang matanga sa balay

ang inyong himuon alang kanako? Ingon sa Ginoo.

Asang dapita ako makapahulay?

50 Dili ba ako man ang naghimo sa tanang mga butang?’ "*

1 Mao kini ang giingon sa Ginoo,

"Ang langit mao ang akong trono,

ug ang yuta mao ang tungtonganan sa akong mga tiil.

Busa unsang matanga sa balay ang inyong tukoron alang kanako?

Unsang matanga sa dapit ang inyong papahulayan kanako?

2 Dili ba ako man ang naghimo sa tanang mga butang?

Gihatagan kog pagtagad ang mga tawo nga mapainubsanon,

mahinulsulon, ug adunay dakong pagtahod sa akong pulong.

16 Unya nakamata si Jacob ug miingon sa iyang kaugalingon, "Wala ako makahibalo nga ania diay ang Ginoo niining dapita." 17 Gikulbaan siya ug miingon, "Katingalahan kining dapita! Puloy-anan kini sa Dios ug kini ang pultahan paingon sa langit."