5 momentos em que Jesus mostrou como amar ao próximo

44 Waaye mi na woyee ɗu ne, waaɗaat ɓooɓi sang ɗu, ɗu kiimɗee ɓooɓi na torhiɗee ɗu in baahiɗ.

30 Yeesu loffa ɗe ne : « Raakeen ƴaar, a pulohee Yerusalem a kaɗeeɗa Yeriko, a cohha na nguɗndukohoh ci, ɓa wolla ɗe, ɓa laɓpa ɗe po a taskohha kaan, ɓa faɗta ɗe ŋ ɗiska. 31 Wa hennda ƴaar ɓaah ŋ seeƴkiɗoh ci lahha ŋ waaseem, a hotta ɗe, a lahha ŋ ɓaka winooraŋ waasi. 32 Ƴaar ɓaah ŋ Lewiici*, nammba taamb nga, a hotta ƴaari, a nammba tum ɗaa. 33 Waaye ƴaar gen Samari* ɓaaɓeeɗa, a raakka ƴaari nga, wi a hot ɗe, yeem misikka ɗe lool. 34 A reɓpa nga ɗe, a ɓayya diwliin na biiñ, a tumiɗta ɗe ŋ gaañ ciŋ ɗe, a tokka ca na daah. Ƴutta a rapiɗta ɗe ŋ ɗoopti a ɓaye, a ɓayya ɗe ŋ kahna ɓaaɓoh ca na dalohe, a taambkohha ɗe. 35 Na ɓaaɓa, a eɗta ƴaari adgoh kahni kopor* kanak"., a woosa ɗe ne : " Taambkohiɗ to ƴaarii, te in nu fu ɓaat nga ɗah, ñam na hee ɗa wa dokne ne ŋ wiirkee ɗah. " »

36 Teemb ndeem Yeesu meekissa ƴaara ne : « Ŋ ini fu liiɓ, ya ɓa ngaŋ ƴaaɓi kaahay ceem, a yi morom ƴaari cohee na nguɗndukohoh ci ? » 37 Ƴaara loffa ɗe ne : « A ƴaari a misik. » Yeesu woosa ɗe ne : « Fu kaɗ ɗah, tuma findiice. »

3 Weɗi jangɗohoh caŋ waasiŋ Musaa na Farisen ca komoh ɗe ɓitiɓ, a telu telu njaalo’eeɗa. Ɓa tufkiɗta ɓitɓa ŋ fiki mboolnda. 4 Ɓa woosa Yeesu ne : « Jangɗohohi, ɓitɓii telu telu njaalo’eeɗa. 5 Te ŋ waasiŋ ɓoo, Musaa woo ne ɓitiɓ ci mand an tapsaat atoh po ɓa kaan*. Kon nak, fu, fu woo ye nga ? » 6 Ɓa woyee ineem ne ɓa woyɗukoh ɗe woo uupiɗ, ɓa min raak yambaah ɗe. Waaye a hiirra, a fiiseeɗa na ndukniŋ ɗe ŋ kehƴi.

7 Ɓa taalndiɗta, ɓa meekseeɗa, ɓa meeksisseeɗa ɗe, a jaɗtukka, a woosa ɓa ne : « Ɓoyi moosɗi bakaaɗoh nga ɗu kocaat ɗe njaf atoh. » 8 A hiirissa a fiisisseeɗa ŋ kehƴi.

9 Wa ɓooɓa ɓayee ɓitɓa kerah woo keem, ɓa cooteeɗa yino yino, cambohha ŋ yakak ca. Yeesu tassa nga kiik ce na ɓitɓa, ŋ fiki mboolnda. 10 Ŋ ndeem, Yeesu jaɗtukka, woosa ɗe ne : « Ɓitɓi, ɓa nde ? Ali ɓo' eɗɗi ɗa tooñ e ? » 11 Ɓitɓa loffa ne : « Ali ɓo', kilifaani. » Yeesu woosa ɗe ne : « Ŋ namanɗi ɗa eɗ tooñ ; fu miniɗ kaɗ waaye ini amboh woti, kina bakaaɗis. »]

Yeesu wirɗiɗ surgaanaŋ ƴaara adgohee soldaar ca

5 Yeesu a yi kaɗoh po a aassa kur kaŋ Kapernawum, weɗi ƴaar ɓaah ŋ ɓa adgohee soldaar caŋ Rom* reɓoh nga ɗe, kiimmba ɗe keeh-keeh 6 an : « Kilifaani, ñaamaŋ ngo yaa faanukka ŋ kahna, cir ciŋ faaniŋ ɗe ceɗ lafañ a yaa sayeeɗa say. » 7 Yeesu loffa ɗe ne : « Ŋ hey ɗe hee wirɗe. »

8 Ƴaara adgohee soldaar ca loffa ne : « Kilifaani, ŋ yeyyooɗi fu aas ŋ kahan ndo ; woya woo rek ñaamaŋ ngo hey wire ! 9 Laam mi ŋ haf fo, raakiɗ ɓooɓi adgoh ho te ŋ namiɗ raak soldaar ci ŋ adgoh ; yaa nu ŋ woo ne : " Kaɗa " ɗah, a kaɗ, yaa nu ŋ woo ne : " Haya " ɗah, a hay. Te in nu ŋ woo ñaamiŋ ngo ne a haɓɗaata ɗah, a haɓiɗa. »

10 Wa Yeesu kerah woo keem, a feyuusa, a woosa ɓa ñaakɗee ɗe ne : « Ñam na woyee ɗu wa te wa keeh : Ŋ hotɗi ali ɓo' kosiɗ kosii ngaŋ Israayel jen ! 11 Ñam na woyee ɗu wa, ɓo' laayiɗ hey pulohe ŋ ɓak ci jen, ɓa ɓoof na Ibrahiima, Isaahha na Yaŋhooɓa, ɓa ñamee kañam ka yakka ŋ Nguuraŋ ɗafka. 12 Waaye ɓi joyee aas ŋ Nguuri, hey njafse ŋ ñuusaŋ hara, ɗiska fuɗ na ɗoɓɗoh sis raak. »

13 Ƴutta Yeesu woosa ƴaara adgohee soldaar ca ne : « Kaɗa, wa raakohaat ɗaa findi fu kosoha. » Te ŋ jamanoonaam jok, surgaanaŋ ɗe wirra.

13 Ɓoyi eɗoh kiñin kiŋ ɗe sagu nawleeciŋ ɗe, raakɗi waaɗ-waaɗi uup yak waaɗ-waaɗeem.