13 Mutindu tata ke fwilaka bana ya yandi kyadi,

Yave ke fwilaka kyadi bantu yina ke zitisaka yandi.

15 Kasi nge Yave, nge kele Nzambi yina ke fwilaka bantu kyadi,

nge kele Nzambi ya mbote,

nge zaba kuvingila, nge kele Nzambi ya nene,

na yina me tadila, kukwikama, mpe butsyelika,

3 Mu ke yangalalaka na kutalaka nge na kati ya Yinzo ya nge ya longo,

samu na kutala lulendo mpe nkembo ya nge.

22 Bumbote ya Yave, me manisa ve,

luzolo ya yandi me suka ve.

23 Yawu ke vutukilaka konso suka.

Kukwikama ya nge kele nene!

15 Kento lenda zimbana mwana ya yandi,

yina yandi ke na kupesa mabene?

Yandi kele ve na kyadi ya mwana yina me basika na kivumu ya yandi?

Ata ti mama zimbana mwana ya yandi,

kasi munu, mu ke zimbana nge ve!

16 Tala, mu sonikaka nkumbu ya nge na diboko ya munu,

bibaka ya nge kele ntangu nyonso na mantwala ya munu.

18 Na yina, Yave ke na kuvingila beno samu na kutala beno kyadi,

ni yawu yina yandi ke telama samu na kutala beno kyadi.

Ya tsyelika, Yave kele Nzambi ya kudedama,

kyese na bayina nyonso ke tulaka kivuvu na yandi!

18 Wapi Nzambi yina kele mutindu nge?

Yandi yina ke katulaka yimbi,

ke lemvokilaka masumu ya bantu ya yandi yina bikanaka ya moyo.

Nkele ya yandi ke zingilaka ve bantangu nyonso,

samu ti yandi ke zolaka na kulakisa beto luzolo ya yandi ya kukwikama.

6 Mu ke kindisa dikanda ya Yuda,

mpe mu ke vuukisa dikanda ya Yosefi.

Mu ke vutula bawu na yinsi ya bawu

samu ti mu lakisa dyaka bawu luzolo

ya munu mutindu mu salaka

yawu ntete mu manga bawu.

Samu ti ni munu Yave, Nzambi ya bawu.

Mu ke pesa bawu mvutu

na balusambu ya bawu.

9 Yave, Nzambi ya Binwani ke na kutuba:

«Beno sala lufundusu ya kudedama,

beno salasana bumbote

mpe beno fwila bampangi kyadi.

10 Beno nyokola ve mifwidi

ya bakento, bansaana,

bantu ya nzenza mpe bamputu.

Beno vwanda ve na mabanza

ya kusalasana yimbi.»

12 Beno kele bana ya Nzambi. Nzambi soolaka beno, mpe ke zolaka beno. Ni yawu yina, beno fwana kuvwanda na ntima ya kukuluka, ya kufuluka na mulemvo, bumbote, lembami mpe mvibudulu.

32 Beno vwanda mbote beno na beno, mpe beno zolasana ya kulutila. Beno lakisa bumbote na bampangi mutindu Nzambi lakisaka beno bumbote na Klisto.

8 Na yina, beno wisana mpe beno kabula na bampangi yina ke na mpasi. Beno zolasana mutindu bampangi. Beno tala bampangi kyadi, mpe beno vwanda bantu ya kukuluka na ntwala ya bampangi.

17 Kana muntu yina ke na bimvwama tala mpangi yina kele na nsatu ya kima, mpe kanga ntima na kusadisa yandi, wapi mutindu yandi lenda kutuba ti yandi ke zolaka Nzambi?

3 Beto siika Nzambi, Tata ya Mfumu ya beto Yesu-Klisto. Yandi kele Tata yina ke talaka bantu kyadi, mpe Nzambi yina ke katulaka kyadi ya bantu nyonso. 4 Yandi ke katulaka beto kyadi na bampasi nyonso yina ke kuminaka beto, samu ti beto mpe lenda na kukatula kyadi na bayina nyonso ke talaka bampasi. Beto ke katula bawu kyadi mutindu Nzambi katulaka beto yawu.

15 Beto kele na nganga-Nzambi ya ntete yina ke talaka beto kyadi na mambu yina ke lembisaka beto. Ba tontaka yandi na mambu nyonso mutindu beto, kasi yandi salaka ve disumu.

15 Beno yangalala na bayina ke na kilengi, mpe beno dila na bayina ke na kudila.

11 Bampangi, na mambu yina me bikana, beno zinga na kati ya kilengi, beno sosa na kuvwanda ya kulunga. Beno kindisa bampangi beno na beno. Beno wisana, mpe beno zinga na kizunu. Na yina, Nzambi ya luzolo mpe ya kizunu ke vwanda na beno.