Comunhão com os irmãos

41 Iwanu wengi watsitoghola mbuli tsake, wabatitsighwa. Mne litsuwa lila, iwanu ka 3,000 wongetseka. 42 Awo wose waghendelela kulangulitsighwa ne iwatumighwa wa Yesu, wakala hamwe ka iwandughu, wamegha ichighate na walomba hamwe.

Pfawakalile awala iwamtoghole Yesu

43 Iwatumighwa tsawatenda pfihulo na pfinu pfa kukangawatsa pfingi, chila imunu ang’ali yopfuka. 44 Iwatoghole wose waghendelela kukala hamwe na kwigholela ipfinu pfawo. 45 Tsawang’ali wohutsa mali tsawo ne ipfinu pfawo na kwigholela sendi ka chila imunu pfayabamile. 46 Waghendelela kwitingana mne ing’anda ye Imulungu chila litsuwa. Lekeni hawang’ali womegha chighate, tsawetingana mne tsing’anda tsawo na ukuja ichijo acho kwa ndeng’elo na ghumoyo mtselu. 47 Tsawamtunitsa Imulungu ne iwanu wose wanoghelesighwa nawo. Na chila litsuwa Imtwatsa yang’ali yowongetsela iwanu iwang’ali wokombolighwa.

24 Twilolese twetwe kwa twetwe, twighume ghumoyo, twinoghele na kutenda ghanoghile. 25 Kuya tuleke kuleka kwitingana hamwe, ka wamwenga pfawatendagha, ila twighume ghumoyo na tughendelele kutenda apfo, ghendoghendo ka pfamkona litsuwa lye Mtwatsa lya habehi.

Pfakunoghile ukukala hamwe

1 Lola, pfinogha na pfonoghela ghendo,

iwandughu kukala hamwe na kuwa chinu chimwe.

2 Ka ghamapfuta ighanoghile

ighohulumka kulawa mna litwi lya Aruni,

mbaka mna ichidepfu chake,

na mbaka mna lipindo lya ligwanda lyake.

3 Ka tungwe lya chidunda cha Herimoni,

ililaghala kulawa mchanya mwa ipfidunda pfa Sayuni,

kuko IMNDEWA keka laghano lya ukuwabaliki iwanu wake,

ka katsoweng’a ugima wa matsuwa ghose ing’aghohupa.

14 Yatung’ali tukala hamwe na kulonga ghoya,

na tung’ali twilongotsa na ghumtingano kughenda kuna ing’anda ya Imulungu.

9 Ng’apfu kuwa weli kubita kuwa munu yumwe kwaapfila watsolihighwa pfinoghile kwa isang’ano yawo. 10 Haitsolawila yumwe kaghwa, miyaghe katsomwinula. Lekeni katsochona ayula iyaliyeka hayatsakughwa na kuduhu munu wa kumwinula. 11 Pfipfila iwanu weli wang’awasa hamwe wotsumbuka, lekeni imunu yang’awa yaliyeka yodahatse ukutsumbuka? 12 Munu yumwe kodaha kutsidiwa ngupfu, lekeni wang’awa weli ng’awodaha kutsidiwa ngupfu baye. Mitsabi midatu ing’apfoghosighwa hamwe ng’aisumka ukudumka baye.

22 Lelo mdeghetesighwa muhe kwa kuhulikitsa ukweli ili muwanoghele ndughu tsenu bila ung’enye, mwinoghele mwemwe kwa mwemwe kwa ghumoyo ghose.

9 Mwibokele kwa uluso mwemwe kwa mwemwe mmakaye mwenu bila kunung’unika.

10 Mwinoghele ka mwa wandughu, mwihulikitse wenyegho kwa wenyegho.

Muwe ka pfayali Kiristu

1 Apfi ughima wenu mghati mwe Kiristu ng’aumwing’ani ingupfu bae? Pfii unoghelo wake ng’auwaghumani ghumoyo bae? Pfii ng’amwilungile na Ghumuhe Mwenzeluka bae, na ng’amwiyonela libatsi na ng’amwiyonela usungu? 2 Lelo muimemelese indeng’elo yangu kwa kuwa na watso limwe, unoghelo umwe, ghumoyo ghumwe na mwalangule chinu chimwe.

16 Imbuli ya Kiristu imeme ghendo mghati mwenu. Mwilangulitse na mwikanye kwa inzewele yose, aku mwakwimba tsabuli na nyila tsa kumtunya Imulungu, akuno mwomwimbila Imulungu kwa kulonga mighede mne imimoyo yenu.

32 Lekeni muwe na moyo ghunoghile na mwiyonele libatsi, chila munu yamleghusile matotso miyaghe ka Imulungu pfamleghusileni tsinzambi kwa nzila ya Kiristu.

13 Mwemwe ndughu tsangu tsamkemighwa ili mleke kuwa watumwa, lekeni chinu acho chileke kuweng’a uleghelo wa kutenda chochose chambama, ila mwitumikile kwa unoghelo.

11 Lelo mwighume ghumoyo na mwiyapfe, ka pfamtenda sambi.

6 Tung’alonga twilunga naye aku tung’ali twakwanga mchisi, twoghutsuka na ng’atutenda gha kweli. 7 Lekeni ka twakwanga mne ghumwanga ka yeye pfayali mne ghumwanga, twakuwa chinu chimwe, na idamu ya Yesu, iyali Imwanaghe, wotutenda twele tsinzambi tsetu tsose.

11 Ndughu tsangu lelo nowaagha, muwe wanoghile kwa chila chinu, mwalangule chinu chimwe, ghakindeni ghose ghaniwalongele, kaleni bila kwisonga, na Imulungu wa unoghelo na tindiwalo katsokala namwe.

34 Lelo noweng’a laghitso lya sambi, Mwikunde. Ka pfaniwakundile nene, namwe mwikunde pfipfo.