Comunhão com os irmãos

41 Ngowa-ngowa’a manga repe 'aḏi ngaku Petrus 'ai bobita, ḏua ananga gena-ge 'aḏi sanga baptis. Toma wangere gena-ge ngowa-ngowa’a ngaku Yesus manga nyo-nyoimi 'i dogo ḏa nga cala ro’ange. 42 Ananga ya mete’e mode-mode’e 'a Yesus 'ai so-soma’a manga do-doto’o re 'aḏi marimoi: Ananga 'aḏi malomu taunu di’a 'aḏi oromo, sibalangu roti, re 'aḏi manyiata.

Ngowa-ngowa’a ngaku Yesus manga 'ahu

43 Yesus 'ai so-soma’a 'aḏi 'a’a didina’o heranga re 'ori i’a hera-heranga ma repe. Sababu gena-ge, ngowa-ngowa’a mo-moini toma limau Yerusalem 'aḏi dadi mojongo re 'aḏi silamo’o masala Ma Jou’ongu Madutu 'ai lomanga. 44 Ngowa-ngowa’a ngaku Yesus mo-moini 'aḏi marimoi re na’o matengo rai 'ori i’a gena-ge 'i dadi di’a ta ananga mo-moini.✝ 45 'Age mamuni’a 'aḏi wu’unu manga 'ori rana bolo manga tana’a re enanga ma ijana 'aḏi masibalangu te-tero 'i mete’e ananga matengo re matengo manga kuranga re ngadolo ua. 46 Wange moi-wange moi, ananga 'aḏi malomu ra Ma Jou’ongu Madutu 'ai Wala ma soana. Ananga masibalangu manga roti re 'aḏi oromo mamete’e tamanga wala remanga 'akala re sinyingara ga’a maroanga re maholo, 47 re 'aḏi puji re silamo’o Ma Jou’ongu Madutu tau-taunu. Ngowa’a mo-moini toma limau Yerusalem 'aḏi sanangi toma ngowa-ngowa’a ngaku Yesus manga 'ahu re manga de’oso re ḏegoro. Wange moi-wange moi Ma Jou’ongu Madutu 'a dogo manga nyo-nyoimi ngowa’a ngaku Yesus.

24 Ino ngene ma’u sioḏi’i matengo re matengo, la ngene nga’unu wo ma’u babata di’a wo ma’u dadalara matengo re matengo re wo madaga’a 'ori i’a ma la-la. 25 Ino ngene wo malomu tau-taunu. Awa ngene ma tero sa’olo ngowa’a lelegu ga’a 'aḏi malomu riwara. Siḏibo ḏi’i, ngene balasu lebe cufala ma’u babata matengo re matengo di’a malomu, sababu ngene wo waro mangale ti’ara riwara Ma Jou ḏuanga i’a 'o sapolo moju.

22 Dadi nange-ne ngini ninga 'akala re sinyingara 'i dadi 'ofi-'ofi, sababu ngini ni mete’e Ma Jou’ongu Madutu 'ai do-doto’o banari singadolo mode-mode’e ngini ma’u dadalara ninga ioronongoḏu ngo-ngaku rimoi. Kalaha so’o gena, ngoi to pula’a duga re domolo moju, ngini balasu ni ma’u dadalara reo 'akala re sinyingara mode-mode’e,

9 Ngini matengo re matengo balasu ni dawongo ngowa’a ga’a masiḏingoto taninga wala, kama kuḏubungu ua.

10 Ngini balasu ni ma’u dadalara matengo re matengo, ma tero sa’olo ngini ngowa’a gia nongoḏu toma ngitu re ngale rimoi. Re ngini balasu ni cautu ma’u silamo’o matengo re matengo.

Maholo diri re mete’e Kristus 'ai de’oso re ḏegoro

1 Ngoi reto waro ngini ninga ngo-ngaku 'i te’e sababu ni marimoi ra Kristus! Ngini ni sanga hiburu sababu Kristus 'o dadalara ngini. Ma Ngagara 'Ofi-'Ofi 'i babata re 'i marimoi ra ngini singadolo ngini ma’u dadalara matengo re matengo. 2 Sababu mo-moini gena-ge, la ngini ni sitiai 'ari roanga, ngoi to golo’o ngini ni 'a’a so’o ne: Ngini ninga 'ahu ma’u 'aro’o la matengo re matengo, ni sirimoi ninga dadalara matengo re matengo, ni sirimoi ninga putusanga re ni sirimoi ninga maksudu.

16 Ngini balasu ni 'elingi tau-taunu Kristus 'ai do-doto’o, la 'i parenta taninga de’oso re ḏegoro, demo re ganau. Dadi ngini ni mete’e ma duhu so’o ne: Ni ma’u doto’o, ni ma’u si’elingi di’a mete’e 'Ai do-doto’o reninga 'akala soro’unu. Re ni mete’e ma duhu so’o ne ḏi’i: Ni manyanyi Mazmur, puji-pujiana re manyanyi nyanyi ma lelegu. Re wakutu ngini manyanyi, ni sibere ie murasa ma la ra Ma Jou’ongu Madutu.

32 Siḏibo ḏi’i, ngini balasu ninga 'akala re sinyingara lai rousu, ni ma’u dadalara re ma’u si’apongo matengo re matengo, ma tero sa’olo Ma Jou’ongu Madutu 'o singi-ngiranga ninga ḏosa sababu ni marimoi ra Kristus.✝

13 Ngini, 'ari ioronongoḏu ngo-ngaku rimoi, Ma Jou’ongu Madutu ro 'aro’o ngini, la ni dadi ngowa’a bebasa. Mada’a awa ngini ni madaga’a 'oru ḇato mete’e ngini ninga mau ma jira, sababu ni bebasa. Siḏibo ḏi’i, ngini balasu ni ma’u dadalara re ni ma’u riono matengo re matengo.

11 Sababu gena-ge, ngini ni ma’u si’elingi re ni ma’u babata matengo re matengo ma tero sa’olo ngini na si’a’a ḏua 'au wali singadolo 'orasa nange-ne.

6 Sababu gena-ge, na’o ngene wo aje nanga 'ahu marimoi ra Unanga, mada’a momongolo ua ngene wo 'ahu toma hafu-hafu ma dara moju, ngene ro sa-sakala re wo mete’e ua Ma Jou’ongu Madutu 'ai do-doto’o banari. 7 Mada’a siḏibo ḏi’i, na’o ngene wo 'ahu toma tarangi ma dara ma tero Ma Jou’ongu Madutu toma tarangi ma dara, ngene wo 'ahu marimoi reo ngowa-ngowa’a ngaku Yesus ma lelegu. Re Ma Jou’ongu Madutu 'ai Ngowa’a Nau’u, Yesus Kristus, 'a si’ofi ngene nanga ḏosa-ḏosa mo-moini Rai ngaunu masiretene.

Tabea ma ḏo-ḏogumu

11 Ioronongoḏu ngo-ngaku rimoi, ma ḏo-ḏogumu, ngini balasu ni maroanga re makutale ni dadi ngowa’a 'aḏi 'a’a 'oru ḇato mete’e tau-taunu Ma Jou’ongu Madutu 'ai 'akala ma mau, re na dawongo 'ari ajele mangale mo-moini. Ngini balasu ninga 'akala re sinyingara 'i dadi rimoi re ninga 'ahu balasu toma dame ma dara. Ma Jou’ongu Madutu ga’a 'o dadalara re dame ma cimi, Unanga ḏuanga i’a 'o sieanga i’a ngini ua.

34 Ngoi to pula’a ra ngini parenta ma su-sungi: Ni ma’u dadalara matengo re matengo. Ngini balasu ni ma’u dadalara matengo re matengo, ma tero sa’olo Ngoi tini dadalara ngini ḏua.✝