19 Ere mu kolgad ngan’med mi gimed pi’ keru’med ko denen mi gimed cheal ngak Got, nge yag ni chuweg e denen romed. Fa’anra mu rin’ed ni aray rogon,

38 Me ga’ar Peter ngorad, "Nge bigimed me pi’ keru’ ko denen ni be rin’, min tawfenag nga fithingan Jesus Kristus, ma aram me n’ag Got fan e denen romed; me yag e tow’ath rok Got ngomed, ni aram fare Kan Nthothup.

30 I Got e ke n’ag fan u wan’ e yu ngiyal’ ni ba’aram nde nang e girdi’ murung’agen riy, machane chiney e be yog ngak e girdi’ u gubin yang ni ngar pi’ed keru’rad ko kireb ni yad be rin’.

17 Aram e re ngiyal’ ni tabab Jesus ko machib ni be ga’ar, "Mpi’ed keru’med ko denen ni gimed be rin’! Ya gagiyeg nu tharmiy e ke chugur!"

8 Mu rin’ed e ngongol ni ir e nge dag ni kam piliyeged pangimed.

15 ni be ga’ar, "Ke taw nga nap’an nnog, ma gagiyeg rok Got e ke chugur! Mpi’ed keru’med ko denen ni gimed be rin’ nge mich u wun’med e Thin Ni Bfel’ ni yib rok Got!"

7 Ere nggog ngomed ni ku ireray rogon ni ba ga’ e felfelan’ ni yira tay u tharmiy ni bochan ta’reb e tadenen nike pi’ keru’ ko kireb ni be ngongliy, ko felfelan’ ni yira tay ni bochan mereb i ragag nge mereb e girdi’ ni yad ba yal’uw ni dariy rogon ni ngar pi’ed keru’rad ko denen."

10 Ere nggog ngomed ni ku ireray rogon e pi engel rok Got ni yad ra felfelan’, ni bochan ta’reb e tadenen ni pi’ keru’ ko kireb ni be ngongliy."

32 Gathi ku gub ni nggu pining e pi’in yad ba yal’uw ni ngar kalgad ngan’rad ngar pi’ed keru’rad ko kireb ni yad be rin’, ya ku gub ni nggu pining e pi’in ndabun e girdi’ nu lan binaw dakenrad."

32 Be ga’ar SOMOL ni Th’abi Tolang, "I gag e dabug ni nge yim’ be’. Mu chealgad ngam pi’ed keru’med ko denen mi gimed fos."✝

21 "Be’ nib kireb e fa’anra tal ndabki denen ngi i fol ko fapi motochiyel rog, me rin’ e tin nib mat’aw ma bfel’, ma dabki yim’; ya kari muduwgil nike yag e yafos ngak.

1 I SOMOL e non ngog. 2 I ga’ar, "Be mang e re bugithin ni ba’aray nike par e girdi’ ni yugu yad be yog u lan e nam nu Israel ni be lungurad,

‘Gallibthir e kar unumew e grape ni mugunin,

ma pifakrow e ke mur’mur’ nguwelenrad.’"✝

3 Be ga’ar SOMOL ni Th’abi Tolang, "Rogon feni riyul’ ni Gag fare Got ni gu be par ni gub fos, e aram feni riyul’ ni bayi dab ku mogned e re bugithin ney u lan e nam nu Israel. 4 Pogofan rok gubin e girdi’ e bay u pa’ag, ni gallibthir nge bitir. En nra denen e aram e cha’ nra yim’.

5 "Susun e ara’ rogon ma bay be’ nrib fel’, nib yal’uw ma tin riyul’ e ma yog mma rin’. 6 Dar ma meybil ko pi liyos ni be meybil piyu Israel ngay ara kay ufin e gamanman ni ka ni pi’ ni maligach u altar rok yugu boch e got. Dar ma bannag le’engin be’ nge dabki yul’yul’ ngak figirngin, ara ra pirew be’ ni bpin ko ngiyal’ nib pael. 7 Dar ma sasaliyebnag be’ ara iring ban’en rok be’ u fithik’ e yargel. Ma ra pi’ be’ ban’en ngak ni nge mang mich ko n’en nike yib i ning fa’anem ngak ni nge maruwel ngay nge mu’ me fulweg, ma fare n’em ni ka ni pi’ ngak ni nge mang mich e ma fulweg; mma pi’ e ggan ngak e en nike yim’ ko bilig mma pi’ e mad ngak e en ndariy e mad rok. 8 Ma dar ma pi’ e salpiy ngak e girdi’ ni nga ni maruwel ngay ni ba’ nap’an mi ni fulweg ngak ni bay e win ni ka nin’ ngay. Ma siyeg ni nge rin’ e tin kireb, ma ba riyul’ e tin ma yog ko malu’ag thin u thilin e girdi’. 9 Ma fol ko tin kugog ni ngan rin’ mma fol ko pi motochiyel rog. Ir be’ nib yal’uw mab mat’aw ma ra par nib fos." Ara’ rogon nike yog Somol ni Th’abi Tolang.

10 "Susun e aram rogon ma bay bpagel ni fak nma moro’ro’ u fithik’ e yargel mma thang e pogofan, ma be rin’ bogi n’en 11 nda i rin’ e chitamngin. Ma kay ufin e gamanman ni ka ni pi’ ni maligach u altar rok yugu boch e got, mma bannag le’engin be’ nge dabki yul’yul’ ngak figirngin. 12 Ma ban nag e pi’in gafgow, mma moro’ro’ u fithik’ e yargel, ma dar ma fulweg e n’en ni pi’ be’ ngak ni mich ko n’en ni ka nib nning ngak ni nga ni maruwel ngay nge mu’ min fulweg. Ma meybil ngak e liyos nma meybil yugu boch e girdi’ ngay, mma rin’ e tin ndab ni rin’, 13 mma pi’ e salpiy ngak e girdi’ ni nga ni maruwel ngay nge mu’ min fulweg ngak ni bay e win ni ka nin’ ngay. Gur ra par nib fos? Danga’, dabi par nib fos. Ke rin’ urngin e pi kireb ney ma aram fan ni bay yim’. Yam’ nra tay e ir e kireb rok.

14 "Susun e aram rogon ma bay bpagel ni fak e re mo’on ney. Be guy urngin e kireb ni be ngongliy e chitamngin ma de folwok rok. 15 Dar ma meybil ngak e pi liyos nma meybil piyu Israel ngay ara be un i kay ufin e gamanman ni ka ni pi’ ni maligach u altar rok yugu boch e got. Ma dabi ban nag le’engin be’ nge dabki yul’yul’ ngak figirngin, 16 ara gafgownag be’, ara iring ban’en rok be’ u fithik’ e yargel. Mma fulweg e n’en ke pi’ be’ ngak ni mich ko n’en nike yib i ning ngak ni nge maruwel ngay nge mu’ me fulweg. Mma pi’ e ggan ngak e en ke yim’ ko bilig, mma pi’ e mad ngak e en ndariy e mad rok. 17 Ma siyeg ni nge rin’ e tin kireb ma dar ma pi’ e salpiy ngak e girdi’ ni nga ni maruwel ngay nge mu’ mi ni fulweg ngak ni ka nin’ e win ngay. Mma fol ko pi motochiyel rog nge tini kugog ni ngan rin’. Ere dabi yim’ ni bochan e kireb ni i rin’ e chitamngin ya mmudugil nra par nib fos. 18 Chitamngin e i sasaliyeb nag e girdi’ ma i iring ban’en u fithik’ e yargel ma gubin ngiyal’ ni i ngongliy e kireb ngak e girdi’. Me yim’ ni bochan e denen ni i rin’.

19 "Machane bay mfith ni lungum, ‘Mangfan ndabi gafgow fare pagel ni bochan e denen rok e chitamngin?’ Fulweg riy e fare pagel ni fak e i rin’ e tin nib mat’aw ma bfel’. I tiyan’ ko pi motochiyel rog ngi i fol riy, ere mmudugil nra par nib fos. 20 Ya en ni be denen e ir e ra yim’. Be’ ni fak be’ e dabi gafgow ni bochan e denen rok e chitamngin, ara gafgow ba matam ni bochan e denen rok fak. Be’ ni bfel’ e ra yib puluwon ngak e tin ni bfel’ ni be rin’, ma be’ nib kireb e ra yib e gafgow ngak ni bochan e kireb ni be ngongliy.✝

21 "Be’ nib kireb e fa’anra tal ndabki denen ngi i fol ko fapi motochiyel rog, me rin’ e tin nib mat’aw ma bfel’, ma dabki yim’; ya kari muduwgil nike yag e yafos ngak. 22 Ra n’ag Got fan urngin e denen rok, ma ke yag e yafos ngak ya be rin’ e tin nib mat’aw." 23 Be ga’ar SOMOL ni Th’abi Tolang, "Mogned, gimed be finey ma gu ba’adag ni ngug guy be’ nib kireb ni nge yim’? Danga’, ku gu ba’adag ni ngug guy ni nge kolngan’ nge pi’ keru’ ko denen ni be rin’ nge yag e yafos ngak.

24 "Ma be’ nib mat’aw e fa’anra tal ndabki rin’ e tin ni bfel’ me tabab i rin’ urngin e kireb, ni pin’en nma rin’ e girdi’ ni kireb ni yira tamra’ ngay, gimed be finey nra par nib fos? Danga’! Dariy ban’en ko tin ni rin’ ni bfel’ ni gu ra leamnag. Bayi yim’ ni bochan e daki yul’yul’ nge bochan e denen rok.

25 "Machane bayi lungumed, ‘N’en ni be rin’ SOMOL e de mat’aw.’ Gimed piyu Israel, mu telmed ngog. Mogned, gimed be finey ni rogon ni gu be rin’ e tin ni gu be rin’ e de mat’aw? Rogon ni gimed be rin’ ban’en e de mat’aw. 26 Be’ nib mat’aw e ra tal ndabki rin’ e tin ni bfel’ me tabab i rin’ e kireb me yim’, ma ke yim’ ni bochan e kireb ni i rin’. 27 Ma be’ nib kireb e fa’anra tal ndabki denen me rin’ e tin nib mat’aw ma bfel’, ma ke ayuweg e birok e pogofan. 28 Ya kenang ni tin be rin’ e ba kireb me tal ndaki denen, ere mmudugil ndabi yim’, ya ra par nib fos. 29 Ma gimed piyu Israel e be lungumed, ‘N’en ni be rin’ SOMOL e de mat’aw.’ Mogned, gimed be finey ni n’en ni gu be rin’ e de mat’aw? N’en ni gimed be rin’ e ir e de mat’aw.

30 "I Gag SOMOL ni Th’abi Tolang e gu be yog ngomed yu Israel ni bayi bigimed mu gu turguy e n’en ni nggu rin’ ngak ko ngongol rok. Mpi’ed keru’med nga urngin e kireb ni gimed be rin’, ma dab mpaged e denen romed nge thang e pogofan romed. 31 Mpaged urngin e kireb ni gimed be rin’ mi gimed tay lanin’med nge gum’ircha’med nike be’ech. Mang ni gimed ba’adag piyu Israel ni ngu’um m’ad?" 32 Be ga’ar SOMOL ni Th’abi Tolang, "I gag e dabug ni nge yim’ be’. Mu chealgad ngam pi’ed keru’med ko denen mi gimed fos."✝

9 Ya dawori sowath Somol ni nge rin’ e tin keyog nra rin’, ni bod rogon ni be leamnag boch e girdi’. Ya be gum’an’nag ir u puluwmed, ni fan e dabun ni nge n’ag be’, ya ba’adag ni nge urngin e girdi’ miyad pi’ keru’rad ko urngin e denen ni yad be rin’.

7 Pi’in kireb e ngongol rorad e ngar paged,

miyad thiliyeg rogon e leam ni yad be tay.

Miyad sul ngak SOMOL, ni Got rodad;

ya ri ma runguy e girdi’, ma ba gur ni ma n’ag fan ban’en u wan’.

22 Kug chuweg e denen rom ni bod bangi manileng.

Mu sul ngog; ya gag e kug biyuliyem."

12 Me ga’ar SOMOL, ’Mus ko chiney

nrayag ni ngan kalngan’uy ngan pi’ keru’uy ko kireb ni yibe ngongliy ngan sul ngog,

ni kan pag e abich ma yibe yor ma yibe dololoy’.

13 Mu paged lanin’med nike m’ing nge gagyal u dakenmed;

ma gathi kemus ni ngam guchthuyed e mad romed.’

Mu sulod ngak SOMOL ni ir e Got romed.

Ya ba gol ma ba sug ko runguy’;

ya ba gumaen’ mma tay u gil’ e tin ni micheg;

ma gubin ngiyal’ ma ke fal’eg rogon ni nge n’ag fan u wan’ e kireb ma gathi nge gechig.

14 ma fa’anra yad ra meybil ngog ni ka ra kal gad ngan’rad miyad pi’ keru’rad ko kireb ni yad be ngongliy, ma aram e gu ra rung’ag nga tharmiy, mu gu n’agfan u wun’ug e denen rorad, mu ku gu fulweg e nam rorad nge fel’ rogon bayay.

1-3 De yag ni madnomnag e girdi’ fare Madnom ni Paluk’af u ngilan’ ko bin m’on e pul, ni bochan e dawori gaman e prist ni ka ra be’ech gad nrogon ko motochiyel, ma dawori yo’or e girdi’ nike mokun nga Jerusalem. Ere me ta’reban’ Hezekiah ni Pilung, nge pi tolang ko salthaw rok, nge girdi’ nu Jerusalem ni ngar madnom niged e Paluk’af ko bin l’agruw e pul, ma aram me pi’ fare pilung e thin nge yan ngak e girdi’ ni gubin u Israel ngu Judah. Me yoloy e babyor nge pi’ nge yan ngak fa gali ganong rok Efraim nge Manasseh, ni be piningrad ni ngarbad ko fare Tempel nu Jerusalem ngan madnomnag e Paluk’af ngan liyor ngak SOMOL, ni Got nu Israel. 4 I m’ag u wan’ e en pilung nge girdi’ e tin ka ra turguyed ni ngar rin’ed, 5 ere ra pininged piyu Israel ni gubin, ni mus ko ganong rok Dan u lan e lel’och nge yan i mada’ nga Beersheba u lan e yimuch, ni ngarbad nga ta’bang u Jerusalem ngan madnomnag e Paluk’af ni bod rogon ko Motochiyel, ni nge yo’or e girdi’ e yaney ko gubin yay. 6 Me yan e pi tamol’og ya keyog fare pilung nge pi tolang ko salthaw rok ni ngranod u daken yu Judah ngu Israel ni ga’ngin ngar pininged e girdi’ ni be lungurad:

"Girdi’ nu Israel da m’ad ko ngiyal’ ni kol yu Assyria e re nam ney. Ere chiney e ngam sulod ngak SOMOL, ni fare Got rok Abraham, Isak, nge Jakob, ma aram e ra sul SOMOL ngomed. 7 Dab mu boded e pi chitamngimed nge pi walagmed ni piyu Israel nda ur yul’yul’gad ngak SOMOL ni Got rorad. Ya ka mu guyed nike gechig nagrad nrib gel. 8 Dab mu gel niged lanin’med ni bod nrin’ed, ya ngam folgad rok SOMOL. Mired ko fare Tempel nu Jerusalem, ya aram e re gin’en nike tay SOMOL ni Got romed nib thothup ni manemus, ngam liyorgad ngak ya nge dabki damumuw ngomed. 9 Fa’an gimed ra sul ngak SOMOL, ma aram e pi’in ni ka ra feked e girdi’ romed ngabang ni bogi kalbus e yad ra runguy ya’arad ngar pagedrad ngar sulod nga taferad. I SOMOL ni Got romed e ba gol ma ba murunguy, ma fa’an gimed ra sul ngak, ma gimed ra fel’ u wan’."

10 Fapi tamol’og e ranod u gubin e binaw u lan e gin nib milsuwon ko ganong rok Efraim nge Manasseh, i yan ko lel’och ngar mada’gad ko ganong rok Zebulun, machane i moning nagrad e girdi’ ma yi be minmin ngorad. 11 Miki immoy boch e girdi’ ko ganong rok Asher, Manasseh, nge Zebulun nib magan’rad ngay i ngarbad nga Jerusalem. 12 Ma ku errogon Got ni be maruwel u lan yu Judah me ta’rebnag laniyan’ e girdi’ nge yag nra dugliyed u wan’rad ni ngar folgad ko tin nib m’agan’ ngay ni aram e ngar folgad ko tin keyog fare pilung nge pi tolang ko salthaw rok.

13 Bo’or e girdi’ nra mu’ulunggad nga Jerusalem ko pul ni l’agruw ni ngar madnom niged fare Madnom ko Flowa ni dariy e is riy. 14 Miyad fek gubin e altar ni un fanay u Jerusalem ngu’un pi e maligach u daken nge incense ni yibe urfiy ngron’ed ngalan fare loway ni fithingan e Kidron. 15 Me yan i rofen ni ragag nge aningeg ko pul miyad li’ pifak e saf ni fan ko maligach ko Paluk’af. Prist nge pi Levite ndawor ra be’echgad nrogon ko motochiyel e ra tamra’gad ngorad miyad og niged yad ngak SOMOL, ma aram me yag nra pi’ed e maligach ni mo’oruf u lan fare Tempel. 16 Ranod ra pired nga tagilrad u lan fare Tempel ni bod rogon ni bay u lan e Motochiyel rok Moses, ni fare mo’on ni bay Got rok. Yu Levi e ra pi’ed racha’en fapi gamanman ni maligach ngak e prist, ni yad e ra atngiyed nga daken fare altar. 17 Bo’or fapi girdi’ e de yag nra li’ed fapi pifak e saf ni maligach ko Paluk’af ni bochan e dar be’echgad nrogon ko motochiyel ere pi Levite e rali’ed ni pa’rad ngar pi’ed ku SOMOL. 18 Ma bo’or e pi’in rabad ko pi genong ni Efraim, Manasseh, Issakar, nge Zebulun ni dar bangbeng gad ningar be’ech gad ere susun dabra un’ed ngay. Me pi’ Hezekiah ni Pilung e re meybil ni ba’aray ni ferad: 19 "SOMOL ni Got rok e pi chitamngimad, rogon fenam gol e ngam n’ag fan rok e pi’in yad be liyor ngom u polo’ i gumircha’rad, ni yug aray rogon ndawor ra be’ech niged yad nrogon ko motochiyel." 20 Me fulweg SOMOL taban e meybil rok Hezekiah; me n’ag fan e denen rok fapi girdi’ ma de gechig nagrad. 21 Medlip e rran ni madnomnag fapi girdi’ ni kar mu’ulunggad nga Jerusalem fare Madnom ko Flowa ni dariy e is riy nri yad ba felfelan’, ma yu rran ni i pining e pi Levite nge pi prist e sorok ngak SOMOL u polo’ i gelngirad. 22 Me pining Hezekiah e sorok ngak epi Levite nga ferad salap i gagiyegnag rogon fare liyor ngak SOMOL.

Nap’an ni m’ay fa medlip i rran ni ur pi’ed e maligach riy ni yibe pining e sorok ngak SOMOL ni Got rok e pi chitamngirad, 23 miyad duwgiliy ni ngki ul ul fare madnom ni medlip e rran. Ma aram mukra madnomgad u fithik’ e felfelan’. 24 Me pi’ Hezekiah ni Pilung 1,000 e garbaw ni pumo’on nge 7,000 e saf ni fan ngak e girdi’ ni ngar li’ed ngar ked, miki pi’ e pi tolang ko salthaw rok 1,000 e garbaw ni pumo’on nge 10,000 e saf. Bo’or e prist nranod u yalen rogon ni ngar be’echgad. 25 Ere gubin e girdi’ nra felfelan’gad — girdi’ nu Judah, prist, yu Levi, girdi’ ni karbad u lan e lel’och, nge girdi’ nu boch e nam ni yad ma par u Israel ngu Judah. 26 Fare binaw nu Jerusalem e ri sugnag e felfelan’, ya dariy ban’en ni aray rogon ni ka’an rin’ ni kanpan e pi rran rok Solomon ni Pilung, nib mo’on ni fak David. 27 Fapi prist nge pi Levite e ra ninged ngak SOMOL ni nge fal’eg wa’athan fapi girdi’. Me rung’ag Got e pi meybil rorad nga tafen nga tharmiy mab fel’ u wan’.

1 U lan e bin meruk e pul ko re duw ni l’agruw ngay nike mang Darius e pilung nu Persia, me pi’ SOMOL e pi thin ney ku Zekariah ni profet nib mo’on ni fak Berekiah nib mo’on ni fak Iddo e tutuw rok. 2 Ba’aray e thin ni yog SOMOL ni Gubin ma Rayag Rok ngak Zekariah ni nge yog ko girdi’ ni nge ga’ar, "I Gag SOMOL e ri gu damumuw ngak e pi chitamangimed kakrom, 3 machane chiney e be lungug ngomed, ‘Mu sulod ngog, ma aram mug sul ngomed. 4 Dab mboded e pi chitamangimed kakrom. Kab kakrom me pi’ e pi profet e thin rog ngorad, ni yibe yog ngorad ni dab kur pired u fithik’ e kireb, nge denen. Machane dar motoyilgad ngog ara rfolgad rog. 5 Pi chitamangimed kakrom nge fapi profet e dakuriy bagyad ni kabfos. 6 U daken e pi tapigpig rog nge fapi profet e gu pi’ e motochiyel nge tin ngan kol ayuw riy ngak e pi chitamangimed kakrom, machane miyad fek yathin miyad gafgow u wenegen. Ma aram miyad cheal ngar pi’ed keru’rad ko kireb rorad miyad yog ni Gag fare SOMOL ni Gubin ma Rayag Rok, e kug gechig nagrad ni bay tapgin ni nge aw ngorad ni bod rogon ni kug turguy ni nggu rin’.’"

7 U lan e bin l’agruw e duw ni Darius e ir e pilung, ko rofen ni rliw’ nge aningeg ko bin ragag nge ta’reb e pul (fare pul ni Shebat), me pi’ SOMOL e thin ngog u lan e changar rog ni pilyeg ni nep’. 8 Gguy be’ ni be yan u daken ba os nib row. Yib i tal nga fithik’ yuke gek’iy ni myrtle u lan e loway, mu tomur rok e bay boch e os riy nib row, nge boch nib wupwupnun’, nge wechwech. 9 Mug fith nug ga’ar ngak, "Fare mo’on, mang e be yip’ e pi os ney fan?"

Me fulweg ni ga’ar, "Bay gu dag fan ngom. 10 I SOMOL e ke l’oegrad ni ngar damit niged e fayleng."

11 Rabad ra weliyed salparad ko fare engel nra ga’argad: "Kug warod u gubin yang u fayleng ma kug pir’eged nike aw e mocha’ riy."

12 Ma aram me ga’ar fare engel, "SOMOL ni Gubin ma Rayag Rok, kam par ni gab damumuw ngak yu Jerusalem nge pi binaw nu Judah nike gaman medlip i ragag e duw e chiney. Fin wi’in e ra taw ngay ma fin mu dag ngorad e runguy rom?"

13 Me fulweg SOMOL lungun fare engel ko thin nib manigil, 14 me yog fare engel ngog ni nggu weliy e n’en nike yog fare SOMOL ni Gubin ma Rayag Rok ni be ga’ar: "Rib t’uf rog ma ri gu ma runguy yu Jerusalem, ni fare binaw rog nib thothup, 15 ma kar gu damumuw ngak e pi nam ni kar felan’gad u fithik’ e mocha’ nge gapas. De n’uw nap’an nug kadan’ug ko girdi’ rog, ma fapi nam e ra gel niged e gafgow ngak e girdi’ rog nge pag rogon. 16 Ere nggu sul nga Jerusalem ni nggu dag e runguy rog ko fare binaw. Tempel rog e bay ntoy bayay, ma fare binaw nu Jerusalem e bay kun ubung."

17 Fare engel e ki yog ngog ni ngkug weliy e re thin ni ba’aray: "Fare SOMOL ni Gubin ma Rayag Rok e be yog ni fapi binaw rok e bay ki fal’eg rogon bayay ma bay ki ayweg bayay yu Jerusalem nge par fare binaw ni ir e suwon."

18 U lan reb e changar rog ni pilyeg e gguy riy aningeg i gagey ko garbaw. 19 Mug ga’ar ko fare engel ni be non ngog, "Mang e be yip’ e pi gagey ney fan?"

Me fulweg ni ga’ar, "Pi gagey ney e fapi nam ni yargal u fayleng nra wereged e girdi’ nu Judah, Israel, ngu Jerusalem."

20 Me dag SOMOL ngog aningeg i girdi’en e maruwel ni kar feked e ama. 21 Mug fith bayay fare engel ni lungug, "Mang e karbad ni ngar rin’ed?"

Me fulweg ni ga’ar, "Karbad ni ngar k’aringed e marus miyad m’aynag gelngin fapi nam ni fa’anra bilged yu Judah ngar wereged girdi’en."

19 Gu ma puwan’ ma gu ma gechignag urngin e pi’in yad ba t’uf rog. Ere mu tiyan’um ngam pi’ keruum ko denen ni ga be rin’.

5 Ere thingar mu li’ed ngem’ e ar’ar nu fayleng ni be maruwel u fithik’ i dowmed, ni aram e darngal, nge puwlag, nge ar’ar nib kireb nma waliy e girdi’ ko denen, nge chogow (ya chogow e bmit e tayfan nge meybil ni yibe tay ngak e liyos nma meybil boch e girdi’ ngay.)

13 Ma thingar dab kum paged fan bang u dowmed ngak e denen ni ngan maruwel ngay ni fan ko tin nib kireb. Machane ngam pi’ed gimed ngak Got, ni bod rogon e girdi’ ni kan chuwegrad ko yam’ kan fekdad ko yafos, mi gimed pi’med nge tafinay romed ni polo’ ngak ngan maruwel ngay ni fan ko tin nib mat’aw.

1 Pi walageg ni girdi’en Kristus, fa’anra rin’ be’ ban’en nib kireb, ma gimed e pi’in ni fare Kan ni Thothup e be gagiyeg nagmed e ngam guyed rogon fa’anem nge sul ngarogon nge par nike mat’aw bayay; machane thingar mu rin’ed u fithik’ e sumunguy. Ma ku er rogomed ni ngam guyed rogomed, nge dabiyag ni mu paged gimed ko n’en nma pingeg e girdi’ nge denen.

21 Ere mu n’iged urngin e ngongol romed nib golong ni kam mechamgad riy nge urngin i pangimed nib kireb. Mpired u tan pa’ Got ma gimed be fol ko thin rok nike yung nga lanin’med, ya ireray e ren’en nra i ta’med rok Got.