19 Hinte asatethay, Xoossay hintew immida hintenan de7iya Geeshsha Ayyaana keethi gideysa ereketii? Hinte hintebaa gideketa.✝ 20 Xoossay hintena gaten shammis. Hessa gisho, hinte asatethan Xoosse bonchite.

27 Shin taani haratas wongela odidaape guye, taani ta huuphen yegetida asi gidonna mela ta asatethaa wolqan haarada taw kiitetana mela oothayis.

3 Taw de7iyaba ubbaa manqotas immikoka, hari attoshin, tana tamas aatha immikoka, siiqoy dhayiko tana aykoka maaddenna.

13 Nuuni Ayhude gidin Girike gidin aylle gidin womaanno gidin, ubbay issi asatethi gidanaw Geeshsha Ayyaanan xammaqetida. Qassi nu ubbay issi Geeshsha Ayyaana ekida.

4 Nu issi asatethaa giddon dumma dumma kifileti de7oosona; he dumma dumma kifiletas dumma dumma oosoy de7ees.✝ 5 Hessada, nuuni daro asi gidikoka, Kiristoosan issi asatethi gidida. Nuuni issi asatethi gididi dumma dumma kifileti issoy issuwara oyketida.

8 Asi ba asatethaa minthanaw oothiya oosoy guuthas maaddees. Shin tuma ayyaana de7on bana loohisoy ha77iska merinawuka de7o immiya ufaysi de7iya gisho, ubbaas maaddees.

22 Ufaytiya wozani asas lo77o dhale;

shin meqida wozani asas wolqa dhaysees.

24 Lo77o qaali eessa ililoda mal7ees;

shempos mal7o; meqethas paxo gidees.

7 Nena ne huuphen cinca oothofa;

Godaa yayya; iitape haaka.

8 Hessi ne asatethaas payyatethi ehana;

ne meqethaaka xaalisana.

13 Neeni ta giddo asatethaa medhadasa;

ta aaye ulon tana neeni tiladasa.

14 Neeni tana malaalsiyabanne

yegelsi oothada medhida gisho,

taani nena galatayis.

Ne oosoti malaalsees!

taani hessa loythada erayis.

26 Ta wolqaynne ta wozanay daaburanaw danda7ees;

shin Xoossay ta wozanaa minotethaanne

merinaw tana gakida saamaa.

1 Abeeti Xoossaw, ne ta Xoossaa;

ta wozanay nena laamotees;

ta ashoyka nena amottees.

Haathi dhayidi phalqetida biittada,

ta asatethay nena saamotees.

41 Paacen hinte gelonna mela barkidi naagitenne Xoossaa woossite. Hintew lo77o amoy de7ees, shin hinte daaburancho asi" yaagis.

29 Ne ushacha ayfey new nagaras gaaso gidiko, kessa hola. Ne asatethay kumethi gaanname taman wodhanaape ne asatethafe issoy dhayiko new lo77o.✝

25 "Hiza, si7ite! Hinte de7on daanaw, ‘Ay maanee? Ay uyanee? Ay ma7anee?’ gidi un7etofite; de7oy kathafe woyko asatethi ma7ope aadhenee?

28 Ashope attishin, shempo wodhanaw danda7onaysatas yayyofite. Shin shempuwanne ashuwa gaannamen dhaysanaw danda7iya Xoossaas yayyite.

1 He wode daro mukulun taybetiya asay woli bolla yedhetana gakanaw asi asa bolla shiiqidi de7ishin, Yesuusi ba tamaaretako, "Farsaaweta irshofe naagetite. Hessika enta cubbotethaa.✝ 2 Qonconna qosetidi, eretonna geemmidi attiyabay aykoyka baawa.✝ 3 Hiza, hinte dhuman odetidabay ubbay poo7on si7etana, qol7a gaathan kalkashidabay dabaaban odetana.

4 "Ta baggato, ta odeysa si7ite; ashuwa wodhoosonape attishin, haraa aykoka oothanaw danda7onaysatas babofite. 5 Hanoshin, hinte babanaw besseysa ta hintew qoncisana. Hessika wodhidaape guye Gaannamen yegganaw wolqay de7eysas iyaw babite. Ee, tuma odayis; iyaw babite. 6 Ichashu buubeti issi santimes bayzetokonayee? Hanoshin, entafe issinnaka Xoossaa sinthan dogetuku. 7 Hari attoshin, hinte huuphe binaanayka paydetidi de7ees. Hiza, babofite; daro buubetape hinte aadheta.

8 "Ta odeysa si7ite; asa sinthan taw markatiya ubbaas Asa Na7i Xoossa kiitanchota sinthan markatana. 9 Asa sinthan tana kaddeysas Xoossa kiitanchota sinthan ta iya kaddana. 10 Asa Na7a bolla kadhe qaala haasaya ubbay maarota demmana, shin Geeshsha Ayyaana bolla kadhe qaala odeteysi maaretenna.✝

11 "Asi hintena oykidi ayhude woosa keethan, daynnata sinthaninne kawota sinthan gooshechiya wode ay odanekonne woygi zaaraneko hirgofite.✝ 12 He wode hinte odanaba Geeshsha Ayyaani hintena tamaarsana" yaagis.

13 Asaa giddofe issi asi Yesuusako yidi, "Ta ishay taw nu aawa laatape shaakana mela iyaw oda" yaagis.

14 Yesuusi zaaridi, "La addiyaw, hinte bolla tana daynnanne laata shaakiya cima oothiday oonee?" yaagis. 15 Gujidika, Yesuusi, "Asa de7oy shalo darotethan gidonna gisho yaare aggidi minthidi hintena naagite" yaagis.

16 Kaallidika leemison, "Gadey daro kathi immiya issi dure uray de7ees. 17 He uray, ‘Ta katha taani shiishanaw bessi guuxida gisho ay ootho?’ yaagidi ba wozanan qopis. 18 Hizape yaatana; kase de7iya shaaleta laallada haraa dalga shaaleta keexana. Kathinne taw de7iyaba ubbaa iyan yeggana. 19 Ba shempeko, ‘Ta shempete, daro laythas new gidiya shalo shiishas. Hiza, shempada ma, uya, ufayta’ yaagana.

20 "Shin Xoossay, ‘La, eeya uraw, hachi qamma ne shempiya neepe eketawusu. Hiza, ne shiishidabay ooddes gidanee?’ yaagis.

21 "Hessa gisho, baw duretethi sa7an shiishiya asas, Xoossaa matan dure gidonna asaas wursethay ha ura mela" yaagis.

22 Hessafe guye, Yesuusi ba tamaaretako, "Hiza, ta odiyaba si7ite, hinte shempuwas ay miino? Hinte asatethaas ay ma7ino? yaagidi un7etofite. 23 Shempoy kathafe, asatethi afilape aadhees. 24 Kafota be7ite zerokona, kiishokona, eleynne shaaley entaw baawa. Shin Xoossay entana muzees. Hinte kafotape daro aadheta. 25 Hanoshin, hintefe un7etidi ba laytha bolla issi qamma gujanaw danda7ey oonee? 26 Hiza, ha guuthaba oothanaw danda7onna hinte, harabas ayis un7etetii? 27 Ane ciishshati waanidi dicciyako be7ite. Waayokonanne suqokona. Hari attoshin, Solomoney ba de7iya boncho ubban entafe issuwa melaka ma7ibeenna.✝ 28 Hinteno, ammanoy pacidaysato, hiza, Xoossay hachi bentidi wonto taman yegetana ciishshata haysada mayziko, hintena waati aathidi mayzennee? 29 Hessa gisho, ay mino woyko ay uyino gidi un7etofite. 30 He ubbaas Xoossaa ammanonna asati un7etoosona. Shin hinte aaway Xoossay hessi ubbay hintew koshsheysa erees. 31 Ubbaafe aathidi Xoossa kawotetha koyite; hessi ubbay hintew guji imetana.

32 "Hinteno, guutha dereto, yayyofite; hinte aawa Xoossay kawotetha hintew immanaw ufaytees. 33 Hintew de7iyaba bayzidi manqotas immite. Kaysoy ekonnason, bili moonnason, cimonna karxiitan, wuronna shalo salon shiishite. 34 Hinte wozanay hinte shaloy de7iya bessan gidana.

35 "Qanthan dancidi giigetite; hinte xompey poo7o.✝ 36 Banta goday yaaganope simmana gakanaw barkidi naageysatada, goday yidi xeegiya wode ellesidi dooyanaw giigida asata daanite.✝ 37 Banta goday simmiya wode dhiskonna de7ishe naageysati anjetidaysata. Tuma gayis; goday qanthan dancidi gayta yuushon utisidi mokees. 38 Goday laade gidin, giddi bilahe gidin, woyko wonti maathe gidin yidi, hessa mela dhiskona naagishin demmiya he aylleti anjetidaysata. 39 Shin haysa erite; kaysoy awude yaaneko keetha aaway eriyako keethay boketiya wode si77i gidi be7enna.✝ 40 Hinteka giigidi naagite; Asa Na7i hinte qoponna wode yaana" yaagis.

41 Phexroosika, "Godaw ha leemisuwa nu xalaalas odaye woyko asa ubbaasee?" yaagis.

42 Goday zaaridi, "Hiza, kathaa muzanaw bessiya wodiyan immana mela goday ba aylleta bolla shuumida ammantheysinne wozanaama halaqay oonee? 43 Goday simmiya wode hessa mela oothishe bentiya aylley, I anjetidaysa 44 Ta hintew tuma odayis; ba godaas de7iya shalo ubbaa bolla I, shuumetana. 45 Shin he aylley, ‘Ta goday elle yeenna’ yaagidi ba wozanan qopidi, macca aylletanne adde aylleta wadhiko, qassi baw koyda mela mishenne uyishe mathotiko, 46 he aylliya goday, I qoponna gallasaninne hirgonna wode yaana. Yidi iya qanxerethidi, iya qaada ammanonna asaara oothana.

47 "Godaa sheniyada giigonnaysinne iya goday ay dosiyako erishe oothonna aylley daro garaafetana. 48 Shin ba godaa sheniya eronna attidi garaafetanaw besseysa oothiday guuthara garaafetana. Gaasoyka daro imetidaysafe daro koyetees, daro hadara ekidaysafeka daro immana gidi naagetees.

49 "Taani yiday biitta bolla tama oythanaasa. Ha77i tamay oykiyako tana waanidi ufaysandesha! 50 Hanoshin, ta ha77i xammaqetey xinqatey de7ees. I poletana gakanaw ta daro un7etayis.✝ 51 Sa7a bolla sarotethi ehanaw yida hintew daanii? Gidenna, ta yiday shaakanaasa. 52 Ha77ife doomidi woli giddon shaaketida ichashu keethaa asati issife de7oosona. Nam7ati heedzata bolla, heedzatika nam7ata bolla, dendidi shaaketoosona. 53 Aaway na7aa bolla, na7ayka aawa bolla, aayiya na7e bolla, na7iya aaye bolla, azinaa aayiya na7a mache bolla, na7a machiya azina aaye bolla, dendidi shaaketana."✝

54 Qassika asaako, "Wuloha baggara saloy shaaratiya wode be7idi, ellesidi, ‘Iri yaana’ yaageeta, hessadaka hanees. 55 Dugeha carkoy carkiya wode ‘Sa7i awana’ yaageeta, hessadaka hanees" yaagis. 56 Hinteno, cubboto, Salobanne sa7aba shaakidi ereetashin ha wodiya shaakidi eroy hintena waanidi xoonidee?

57 "Yaatin, hinte huuphes ayis tuma pirdeketii? 58 Ne morkiyara wolla daynna sinthan eqanaw bashe oge bolla giiganaw koya. Ne giigonna ixiko gooshechidi daynna sinthe nena efana. Daynnay nena qachiya asas aathidi immana. I nena woynen yeggana. 59 Si7ite, issi bakani attonna cigga ongana gakanaw ne yaape keyonnaysa era" yaagis.

10 Na7atethinne goobatethi hada gidiya gisho ne wozanaape azzano, ne asatethafe iitatethi digga.

4 Xoossay hintena xeegida wode issi ufaysas xeegidaysada issi asatethinne issi Ayyaani de7ees.

22 Macheto, Godaas haareteysada hinte azinatas haaretite.✝ 23 Kiristoosi woosa keethaas huuphe gideysada azinika ba machees huuphe. Qassi Kiristoos ba asatethi gidida woosa keethaa ashsheysa.

15 Xoossay hintena issi asi oothidi xeegiday, sarotethaas gidiya gisho Kiristoosa sarotethay hinte wozanaa haaro.

22 Godaa Xoossay Addaamepe ekida meqetha macca oothidi medhis; yaatidi iyo iyako ehis. 23 Addaamey, "Ha meqethiya ta meqethafe, ha ashshiya ta ashope eketidaro. Iya addefe eketida gisho macca* geeteto" yaagis. 24 Hessa gisho, asi ba aawanne ba aayiw aggidi, ba machera issife de7ees; nam7ay issi asi gidoosona.

16 Hessa gisho, nuuni ufaysi qanxoko. Nu bentiya asatethay daaburishe biyaba gidikoka, nu ayyaana asatethay gallas gallas ooraxees.

24 Nuuni nagaras hayqidi xillotethas daana mela Kiristoosi ba ashuwan nu nagaraa masqaliya bolla tookis; hinte iya madunthan paxideta.✝

2 Nu ubbay daroban baletoos. Ba odan baletonna oonika banatetha naaganaw danda7iya polo asi.