Corpo

19,20 God ene Mudu Murubuglo togo, ene meglmara atne moglkwa pre ene ogono nagino i, Mudu Murubuglo yugumo mere yegl yogwa. Te, God yene ere mogl, ene topo si ikne edidre, bitno moglkwa pre ene erme meglkwa i, enene pre ta moglkrikwa. God ene bitno moglko, ene God taraglmo mere yegl meglkwa pre ene ogono nagino mina mabuno siragl mere ta eribi, God kagie kade inabuka i keme erio!

27 Te, yoba muku di, ira ede okna enabedi erikwa i, ye ogono nagino sugl wakai meglmere mere yegl, na ama ogona nagna sugl wakai moglsre, mabuno kide kane kane ta pogglau boglkwa i, mane di teiga. I siragl pre na God kamo yoba di tenaglka ba okuo God topo ta inaiglme dugwa i, ta ikribo, kide panabedi prika. God kogonmo ake giglede ere pai moglsre, okuo topo inagledi prika.

3 Te, yoba ta ere mogl, yoba goduglme meglkwa i ake ple di tenagledi mige moni ya bonaganamo mudu tenabo mo ye God kogonmo erukwa i pre yoba ye si gagl tege eramnedi eribi, ye kudugl goglkre, God kogonmo ere pai morabuka ba ye dem muduo yoba ta tekran, ye kogon podo erumara i, taragl wakai swara to ikrabuka.

13 I siragl pre God ye Murubuglomo nono mudu noruko, God Murubuglo swara i ere mogl, nono mudu ere i Jisas yugobunomo mina suna edugo, munga. Nono Juda yoba munga mo yugobuno pere pere ta meglkwa i ya te, yoba ta kane padre, yoba pere niglno kogono ere teigwa i mo yoba yoko munga i pra, nono mudu u swara pi yugobuno swara kaima munga.

4,5 Nono Jisas yugobunomo mina munga i, yoba swara mogl, kuno keme munga. Nono ogono nagino kunga i, ene kanio! Yoba ogo nagie swara paugwa ba ogo nagie swara i mina gumuglo paugo, guma dra paugo, ogo kagle pere pere paigwa i, ye ama kogono pere pere paugwa. Kuno yegl mere nono mudu Krais yugobunomo mina munga i, kogono pere pere paugwa ba nono ye ogo nagie swara mere yegl munga pre nono swara kaima munga.

8 I siragl pre nono ogono nagino sugl mogl, ere wakai eramga i, wakaimo kuri ta panabuka ba nono God mabunomo duo ersre, duglo bun, i swara wakai kaima panabuka. Yegl erumun, nono erme makandigle mogl enamga i wakai moramga. Te, okuo aimadi kamin moramga igne i, taragl wakai wakai ama inamga.

41 Yagl kide ene kinano si dinabedi kor mogl, kamage ere, ugl paikrio. Ene nomano mina wakai eramnedi prikwa ba ene ogono nagino mina yobuglno paikrumiwe dugwa.

29 Ene gumugln koglo, ogon wo kra paugwa i, ene tadaglme eratnedi eran, ene gumugln i, pogl ede, kide kodo! I siragl pre ene ogon nagn bage swara ta u kide enan, tadaglme ta erekitn, i wakai panabuka ba ene ogon nagn mudu ede doga kade enan, kide panabuka.

Makadigle taragl pre nomane sikramga paugwa

25 Ana na ene ka ebrie di teiga i, ene pre epigl ersre, erme makandigle siragl mere mogl pai eraiglkwa i, pre yubun dekrio. Ene nigl, kaya mokna siragl mere nenaiglmere mo kuguglno gaglno siragl mere edinaiglmere kaima nomane sikrio.

Neno Kade kor moramga norukwa pre kaya mokna ya kugugl gak edinamga i, taragl kebra pamedi praiglkwa.

28 Yoba ene ogono nagino keme si goraiglkwa i pre kuduglno goglkraiglkwa. Ye ogono nagino mina si goraiglkwa ba kiano ta ere kide erekraiglkwa. Yoba kuduglno goglkre, God swara kuduglmo goraiglkwa. Ye yoba ogono nagino si goglsre, kiano akie pia si doga kade mina edenabuka yagl moglkwa.

Jisas ene Farisi mabuno ere dinamnedi kan kun erio dugwa

1 Ana yoba tausen mere kide u makai sidre, nagino bolamugl kaima meglko, Jisas komono kana ye duglo beglkwa yoba yegl di togwa, Farisi yoba yisno pre ene kan kun erio. Na Farisi yoba yisno we diga i, ye yoba gumuglno mina yoba wakai munedi ersre, teke atne mabuno kide erikwa i pre diga. 2 Ba ene prio, taragl kane kane ta atne teke yogwa i, mudu u nogugl enan, yoba pre pogl sinaiglkwa. 3 Ene ka siragl mere teke atne digwa i, yoba mudu praiglkwa. Te, ene yugugl mogl, yoba ka nunu ta di tenga i, nogugl kaima poran, yoba praiglmiwe di, Jisas yegl dugwa.

God swara kuduglmo goramga paugwa

4 Ana Jisas ka yegl didre, ama yegl dugwa, Na kabaglena meglkwa i, ka ta dibo, praiglmiwa. Yoba ene ogono nagino keme si goraiglkwa i pre kuduglno goglkrio. Ye ogono nagino mina si goraiglkwa ba kiano ta ere kide erekraiglkwa. 5 Yoba kuduglno goglkrisre, God swara kuduglmo golo. Ye swara yoba si goglsre, kiano ama akie pia si doga kade mina edenabuka yagl moglkwa pre yoba kuduglno goglkrisre, ye swara kuduglmo goraiglkwa.

6 Kua idada kebra kide kaima meglmedi kanumga ba God swara swarade sugl wakai moglmiwa. 7 Ye kua kebra sugl wakai moglkwa pre ene yoba meglkwa i, taragl kade munedi prisre, God no bitno yugo swara swarade wakai ere, kere kan kodidre, no suglno wakai moglmedi prisre, yoba swara ta kuduglmo goglkrio! dugwa.

Jisas agaimo goglkramga paugwa

8 Ana Jisas ka ta ama yegl dugwa, Yoba ta ere mogl, yoba gumuglno mina Na Jisas duglo boliwe dinabuka i, na Yoba Wam moglka i, ama God angeloma moraiglmara di nogugl edidre, Yoba i na duglo boglkwa yoba ta moglmiwe dinaglka. 9 Ba yoba ta yoba gumuglno mina Na Jisas duglo boglkrie dinabuka i, na God angeloma moraiglmara ama di nogugl edidre, Yoba i na duglo boglkwa ta moglkrume dinaluwe dugwa.

10 Ana yoba ta na Yoba Wam moglka i ka kide di naran, God ye tadaglmemo i, gugl edenabuka. Ba yoba ta Mudu Murubuglo di kide yei tenan, God ye tadaglmemo i ta gugl ede tekrabiwe dugwa.

11 Jisas yegl didre, ama yegl dugwa, Yoba ene kot ere tenamnedi auro i pi Hibru ka mabuno yuguno yugugl edenaiglkwa mo gavman yoba ya yoba kade gumuglno mina ta edibi, ene ka siragl mere kot mina di ikne ede tenaiglkwa i pre, pre yubun dekrio. 12 I siragl pre ene ka siragl mere dibi, wakai panabuka i, Mudu Murubuglo yene ege i ene beke tenabiwe di, Jisas yegl dugwa.

Jisas taragl kane kane bubuno goglkrio! dugwa

13 Ana yoba mere kide Jisas kamo pre meglmara suna i, yagl swara ta ere mogl, Jisas yegl di togwa, Tisa yo, na nina goglko, na agra ye taraglmo mudu yumiwa. Ene ye di ten, no neno taraglmo ikne yubu si narebedi priwe dugwa. 14 Yegl dugo, Jisas di ikne ede, yegl dugwa, Ene siragl pre yegl dine? Yoba ta ene jasno moglsre, ene bonaganano sugl moratnedi na dedumedi pitno? dugwa. 15 Jisas yegl di tedre, yoba mudu magigl meglkwa i, ama yegl dugwa, Ene kan kun erio! Taragl kane kane bubuno gogl dinaiglmiwa! Yoba ta kor mogl, gun yenabuka i, ye taragl mere kide bona sinabuka i pre ta gun yekrabiwe dugwa.

16 Jisas yegl didre, ye yoba ka ebrie ta di te yegl dugwa, Yagl ta mige moni podo kan nogwa. Ye makanmo nuglo podo moglkwa pre wit ere yaglkwa i, mere kide boglkwa. 17,18 Mere kide boglmedi kandre, yagl i yegl prukwa, Na yugu ta keiga i, wit mogo si yugugl edibo, kuno erekrabiwa. Yegl pre yugu i terke, tau podo dagl kedre, wit mogo mudu si yugugl edibo, kau sinabiwe di prukwa. 19 Yegl di prisre, Na wit mogo si i pi yebo, kau sinan, na yoko wakan mogl, ege olto wit topo bogl i nedre, ama kaya mokna kane kane ya wain nuglo ki kogl nedre, gun yenaluwe di, kina gudo prume dugwa. 20 Kina gudo pruko, God u yagl i yegl di togwa, Ene du etno? Ene erme eduer gogln, ene taragl mere makai singa i, yoba si pedigl padigl eraiglmiwe di, God yegl dumiwe dugwa. 21 Ana Jisas ka yegl di kodidre, ama yegl dugwa, Yoba taragl kane kane i makai sigwa ba God gumuglo wagle yobamo i, goduglme kaima meglmiwe dugwa.

Makandigle taragl pre nomane sikramga paugwa

22 Ana Jisas ka yegl di kodidre, ye duglo beglkwa yoba yegl di togwa, Ana na ene ka ebrie di teiga i, ene pre epigl ersre, erme makandigle siragl mere mogl pai eraiglkwa i, pre yubun dekrio. Ene kaya mokna siragl mere nenaiglmere mo kuguglno gaglno siragl mere edinaiglmere kaima nomane sikrio. 23 I siragl pre kugugl gagl edinaiglmara mo kaya mokna nenaiglmara i mina u yoba kaima pikraiglkwa. 24 Kua kotkot meglkwa i, ene prio. Yene kaya mokna ere yagl, si nenaiglkwa i pre nomane sikrikwa. Ba God kua wakai moraiglmedi suglno moglkwa i, no yoba munga i, siragl podo pamedi prisre, no wakai kaima suglno morabedi praiglmiwe dugwa.

25 Ene siragl mere wakai mogl pai eraiglkwa pre ege ege nomane sibi, ene bugla yuguno ere i olto edinaiglmo? 26 Ana bugla yugu olto kuri moraiglkwa ta kuno erekran, siragl eruko ene taragl kane kane pre nomane sidre, pre yubun deme? di, yegl dugwa.

27 Jisas yegl didre, ama yegl dugwa, Kugl siragl mere pare pi kwie sumere yegl prio. Ye nomane sidre, kogon podo eriko, kwieno u wakai pikrukwa ba God yene ekino wakai kaima togwa. Te, King Solomon king kuguglmo gaglmo edugwa i win paugwa ba kugl kwie ekino wakai kaima padre, Solomon ekinmo togwa. 28 Kugl ege sugunagle paigo, yoba kugl kuba sidre, ere gaiglkwa ba yoba taragl kade paugwa. Yegl pre God kugl ekino togwa panan, ene siragl pre God kugugl gagl norokrabedi prime? Ene God pre mediglkwa i, gigle dikrume dugwa.

29 Jisas yegl didre, ama yegl dugwa, Te, ene kaya mokna siragl mere nenaiglkwa mo nigl siragl mere nenaiglkwa i pre yubun dedre, dokokraiglkwa. 30 Yoba uglo koglo koglo meglkwa i, ye makandigle taragl yegl mere inamnedi nomano mina kau sugwa ba ene Neno moglkwa i, ene siragl taragl inaiglkwa pamere i kwande pre kodugwa. 31 Ba ene God yoba kingno mogl, suglno morabuka i, ake gumano kagle edibi, God makandigle taragl ta inaiglkwa panabere mere tenabiwe dugwa.

Taragl wakai wakai okuo inamnedi eramga paugwa

32 Ana Jisas ka ta ama yegl dugwa, Ene na sipsipna yugobuno kebra meglkwa i, kudugl goglkrio. I siragl pre ene Neno moglkwa i, ye king mogl, yoba suglno morabara ene tebo, inatnedi wakai prukwa. 33 Ene taraglno i pi mige boglsre, mige i pi goduglme yoba teo. Ene yegl eribi, ene mige moni i pi heven ibo bona sigwa mere yegl panan, taragl wakai wakai okuo inaiglkwa i, ta dudukrabuka. Kunogl gogl yoba ta u i pikribi, gunage ama ere kide erekraiglkwa ba aimadi kamun yenabuka. 34 Ene dumo aglo mere ta bona sinaiglkwa i, dumo i keme ene nomano mina kau sinabuka pre heven ibo keme bona sinamnedi erio di, Jisas yegl dugwa.

Yagl Kade ede ikne unabedi sugl moramga paugwa

35 Ana Jisas ka ta ama yegl dugwa, Ene ake kun ersre, kogon mina enamnedi kwie ere molo. 36 Kogon yoba bitno yagl ta ede pi yagl abu suo ta bogl inabrara pidre, eduer ede ikne u dua sinan, tabre yauro tenamnedi sugl meglmere yegl, ene sugl moraiglkwa paugwa. 37 Yagl kade ede ikne udre, ye kogonmo yoba sugl kan meglmedi kandre, ye gun podo yenaiglmedi erabuka. Ye kogon yobamo i, ame dio didre, kaya mokna podo gagl yu tenan, nenaiglkwa. 38 Ye yaglno kade i eduer suna unabo mo tagna kide mogl unabo mo aunake unabedi sugl wakai meglmedi kanan, kogon yoba i gun podo yenaiglmiwe dugwa.

39 Ene kaima pre pogl sinaiglkwa i, yugu nem yagl ta kunogl gogl yoba aunake ta u yugugl kunogl nenaiglmedi pre kan eran, ye kwie ere, kan morabuka. Ye kanige erekrabuka. 40 Kuno yegl mere ene aimadi sugl kan molo. I siragl pre na Yoba Wam moglka i, aunake unaglka i, ene ta pre kan erekrimiwe dugwa.

Jisas nigl kogon yoba wakai ya kide pre dugwa

41 Ana Jisas ka yegl di kodugo, Pita ye yegl di prukwa, Yagl Kade, ene kogon yoba pre ka ebrie dinga i, no ene duglo bunga yoba munga i pre dino mo yoba mudu pre dine? dugwa. 42 Yegl dugo, Yagl Kade di ikne ede, ka ebrie ta dugwa, Yagl kade ta ere mogl, ye niglmo kogonmo yoba meglmara suna i ta kaya mokna sugl morabedi pran, ye yoba ta kamo duglo boglsre, nomanemo wakai panabuka i kere inabuka. Kere inan, yobamo i, kaya mokna sugl moglsre, pamere yubu si tedre, erabuka. 43 Ana nigl kogon yagl i, ye yaglmo kade kogon dedumere ere moran, ye wakai erumedi kandre, gun podo yenabedi ere wakai ere tenabuka. 44 Te, ye ka kaima taraglmo mudu sugl morabedi edenabuka. 45 Ba nigl kogon yoba i nomane kide idre, na yaglna kade tabre ukrukwa pre na gua gua eragledi pran, kide panabuka. Ye yoba tau suglno moglkwa i, ere sidre, yene kaya mokna podo nedre, spak eran, 46 ye yaglmo kade ye ta ukrabedi prabuka igne unabuka. Udre, ye duglnai ere sidre, nagie si baka didre, Ene ede pi yoba tau na kana pre mediglkrikwa meglmara i po! dinabiwe dugwa.

47 Nigl kogon yoba i, ege mere duglnai borabuka. I siragl pre ye kogonmo wakai siragl mere erabuka paugwa i, pre kan erukwa ba ye erekrisre, ama ake kun ere moglkrukwa. 48 Ba kogon yoba ye mabuno kide pre kan erekre, eran, ye yaglmo kade duglnai ege suom ta ere sinabuka.

Yoba ta taragl mere i pi yoba ta tebi, ye kwia mere i tebe ede noraiglmedi praiglkwa. Kuno yegl mere God ene taragl tau mere tenan, ene ye kogonmo mere ama eraiglkwa pamiwe di, Jisas yegl dugwa.

Jisas yoba si buno di, yugobuno pere pere edenagledi wiwe dugwa

49 Ana Jisas ka yegl di kodidre, ama yegl dugwa, Na doga ta makandigle ere garagledi pre wiga. Doga i tabre denan, na wakai praluwa. 50 Te, na ama nigl kide kaima ta buraglka pai moglkwa pre na dena mudna ibun podo kaima dogwa. Ba nigl kide i buglbo, yubun i dudunabuka.

51 Ana ene siragl we di prime? Na makandigle wiga i, yoba deno muduno swara yenaiglmedi umedi primo? Ta manugwa. Na yoba si buno di, ere i pere pere edenagledi wiga. 52 Na wimara i, yoba bormai swara meglkwa i, na pre ede u pere pere enaiglkwa. Yugu swara mina yoba 5-pela meglbi, suota pere meglbi, suo pere meglbr, erabuka. 53 Yagl ye wam kudamo ikne moran, ye wam i ama nem kudamo ikne morabuka. Te, abu ye abuglo kudamo ikne moran, abuglo i ama mam kudamo ikne morabuka. Te, abu ta ye ebiamo kudamo ikne moran, ye ebiamo i ama ye kudamo ikne morabuka mere yegl pamiwe di, Jisas yegl dugwa.

Taragl erme plau dugwa i, kan pogl sinamga paugwa

54 Jisas ka yegl di kodidre, yoba mere meglmara kan ake tedre ka yegl di togwa, Kamun kua tau ade beimara ir mage yugo, ene kandre, kamun sinabiwe digo, kaima, kamun sugwa. 55 Te, ir ta nigl beye mage yugo, Erme niga podo dinabiwe digo, kaima niga dugwa. 56 Ene ka didre, mabuno erikwa i, u swara pikrukwa yoba meglkwa. Taragl tau makan mina ya kamun mina plau dugwa i, ene kandre, mem yegl yegl pame digwa ba siragl eruko, God ene gumuglno mina taragl podo erukwa i, pre pogl sikrime? dugwa.

Ege erme God bogl ere kun eramga pre Jisas kot ebrie dugwa

57 Jisas yegl didre, ama yegl dugwa, Ene mabuno siragl mere wakai panabuka i, pre yubu sinaiglkwa paugwa. 58 Kuno yegl mere yoba ta ene kot ere tenagledi eran, tabre ere wakai eriro. Kowai ye ene gudu i pi jas moglmara edenan, jas ene kibr nem ogo mina yenan, ye ene i pi kane yugu ede dinabuka pre diga. 59 Taragl yegl plau dinan, na ene kaima di teiga, ene kane yugu kodokratnga. Mige mogo swara keme ta tenatnga pai moran, ene ede meda ukratniwe di, Jisas yegl dugwa.

4 Ana nono yugobuno swara kaima mungo, God Murubuglo nono munara suna moglkwa i, ama swara moglkwa. Te, God nono ye gagiglma moraiglmedi agle didre, nono okuo wakai kaima moraiglme dugwa i, nono mudu akie yegl moramnedi kie ere munga.

Yagl abu siragl mere mogl pai eraiglmere

22 Ana ene abu meglkwa i, ene Yaglno Kade moglmara mogl atne ede meglmere kuno yegl, ene winoma moraiglmara mogl atne ede molo. 23 I siragl pre nono God Kere Yugwa Yagl yugobunomo mina munga i, Jisas nono ere idre, nono bitno moglmere yegl, yagl meglkwa i, ye ene ebino meglkwa i, bitno meglkwa.

15 Ene nomano ya deno muduno bogl mudu Krais sugl morabedi teo. Tebi, Krais deno muduno wida di padigl tenabuka. Ene God ogo nagie swara meglkwa i, mem swara i pre ene agle dugwa. Te, ene ege ege God di wakai yei te pai molo.

22 Si kegl didre, ye dagigle yobuglo ikra wagle abu ta bekidre, yu, yagl moglmara edugwa. 23 Edugo, yagl yegl dugwa, Erme we, yoba i na moglmere moglkwa. God na yobra ya mienana idre, ye yobuglo ya miemo bekugwa. Na yagl yobra ya mienana idre, ye bekugwa pre na abu* we dinagle di, yegl dugwa. 24 Ana mabuno yegl paugwa pre yagl nem mam kide kodidre, ye ebie bogl si dakagl morabrika. Miur, ogono nagino swara kaima mere yegl paugwa.

16 No yubun yumnara i mina taragl wakai yegl mere plau dugwa pre no oglka erekre, kogon ere pai munga. Kaima, no ogono nagino mina ede ime ime ogwa ba no kiano ege ege u kor kor ogwa.

24 Nono tadaglmeno i, Krais ogo nagie mina idre, ede prak mina goglkwa. Ye nono tadaglmeno idre, goglkwa i, nono ama ye goglmere yegl goglsre, tadaglme kide kodo, mabuno du eraiglmedi pre erukwa. Te, yoba ye sigwa, boglmara i, ene u kor eigwa.

2 Nono mudu munga i, mabuno tau mere mina yage sumga, ba ege mere ka dumnara i mina yage sikramga. Yoba ta ye dra sugl wakai moglsre, ka dumara yage sikrukwa ta morabuka i, ye yake ede kade pi kodugwa mere yegl paugwa pre ye ogo nagie mudu ama sugl wakai morabuka i, kuno erabuka.