Corpo

19 Ham’vimanyile kamba ng’huli zenu zizo Ng’anda ya Loho wa Mulungu yali mgati yenu, ayo yumum’bokele kulawa ha Mulungu? Na sio ng’huli zenu mweye wenyego. 20 Kawagula na beyu ng’hulu. Avo mmuyenzi Mulungu na ng’huli zenu.

27 Nolugaza lukuli lwangu na kulutenda nyakadala wangu, giladi nihawapetela wayagwe Usenga Unogile na nie mwenyego sambinilemigwe.

3 Kamba nihalava vinhu vangu vose na kuwagwaa wakumbulu, na kuilukuza lukuli lwangu hamoto, ila kamba nabule noge, nie sipata kinhu.

13 Vivija na tweye, hata kamba tuhawa Wayahudi ama Wamhazi, tuhawa nyakadala ama wailegehe, tose tubatizigwa na Loho wa Mulungu mulukuli lumwe, na tose tung’wezigwa Loho iija imwe.

4 Kamba vituli tweye tuna lukuli lumwe luli na vipindi bwando, na vipindi vino vose havitenda sang’hano imwe, 5 na vivija, tweye tuli bwando, twa lukuli lumwe kubitila Kilisto, na kila kipindi choilumba na miyage.

8 Kwavija lukuli luhasang’hanika losamhuka, ila sang’hano ya kumtanga Mulungu inoga ng’hani mzimbuli zose, mkukigoga kilagano sama ya ugima wa kipigiti kino na ugima wa kipigiti kikwiza.

41 Goneleleni, mtambike, giladi sambimwingile mkugezigwa. Kwavija loho yolonda, ila lukuli lutepweta."

29 Avo kamba siso jako da ukulume dokutenda utende vilozo, ding’ole ujase kutali nagwe! Vinoga kumwako kwagiza kipindi kimwe cha lukuli lwako kubanza lukuli lwako lose lwasigwe kuzimu.

25 "Avo nowalongela, sambimuigazile ugima wenu, kamba mje choni ama mung’we choni, ama ng’huli zenu, kamba m’vale choni. Ugima hauzamile kubanza mandia? Na lukuli haluzamile kubanza vivalo?

28 Sambimuwadumbe waja wose wokoma lukuli, ila hawadaha kukoma loho, mdumbeni Mulungu yodaha kubananga vose lukuli na loho na kuvasa kuzimu.

Yesu Kowazuma Videlenya

1 Wanhu bwando walibule mheta viwakiilundize hamoja, mbaka wakala wokiibojaga, tanhu Yesu kasonga kulonga na wanahina zake, "Iteganyeni na mela da Mafalisayo, nolonga udelenya wao. 2 Haduhu kinhu chochose kigubikwe chondakileke kugubulwa, ama kifisigwe chondakileke kutangigwa. 3 Avo mina, chochose chumulongile mziza, chohulikwa mmulangaza, na chochose chumnyong’onye mwiyeka mgati dihindigwe, chopetigwa mwa wanhu wose.

Yolondigwa Kudumbigwa

4 "Nowalongeleni, mweye wambwiga zangu, sambimuwadumbe awo wokoma ulukuli, abaho, hawadaha kutenda kinhu chochose kiyagwe. 5 Ila nowalagusila wa kumdumba, mdumbeni Mulungu kwavija Mulungu yehesha kulukoma ulukuli, kana udaho wa kuwasa mweye kuzimu. Avo, nowalongeleni, ino iyo wa kumdumba!

6 "Vitongwa vitano haviuzigwa na hela ndodo? Ila haduhu hata kitongwa kimwe kiisemwigwa na Mulungu. 7 Ila mweye, hata mheta ya mvili za mmapala genu zitangigwa na Mulungu. Avo sambimdumbe, mweye mzama ng’hani kubanza vitongwa bwando!

Kumtogola ama Kumulema Kilisto

8 "Nowalongela, munhu yoyose yondayanitogole nie hameso ga wanhu kamba ka ng’ambu yangu, nie, Mwana wa Munhu, nomtogola munhu ija hameso ga wasenga wa Mulungu wa kuulanga. 9 Ila munhu yoyose yahanilema nie hameso ga wanhu, nie, Mwana wa Munhu, nomulema munhu ija hameso ga wasenga wa Mulungu wa kuulanga.

10 "Munhu yoyose yolonga mbuli za kunibeza nie, Mwana wa Munhu, vodahika kugeligwa kumgongo, ila munhu yoyose yahalonga mbuli za ufukuzi ha Loho wa Mulungu, havidahika kugeligwa kumgongo.

11 "Wahawagala mzing’anda za nhambiko ama ha wandewa ama ha wakulu kuwatagusa, sambimgelegeze avija vondamuigombeleze ama avija vondamulonge. 12 Kwavija Loho wa Mulungu kowafundiza kimulondigwa kulonga mkipigiti hicho."

Hala da Mgoli M’bozi

13 Munhu imwe yakalile mdidale dija kamulongela Yesu, "Mkulufunzi, mulongele mkulu wangu yanigolele uhazi uyatulekele tata wetu."

14 Yesu kamulongela, "Mbwigaangu, yalihi yangwelele nie sang’hano ya kulamula ama kuwagolela vinhu mweye wabili?" 15 Abaho, kawalongela, "Teganyeni, inegeni na sulukila ya namna zose, kwavija ugima wa munhu hauli m’vinhu bwando vayalinavo."

16 Abaho, Yesu kawalongela hala dino, "Kukala na munhu imwe mgoli, yakalile na mgunda ugwisile vakuja bwando. 17 Kasonga kugelegeza munda kwa munda, yolonga, ‘Nabule hanhu ha kwika vakuja vangu. Nhendeze?’ 18 Abaho, kalonga, ‘Nhende vino, nogabomola makano gangu, nizenge makano makulu, avo nokwika vakuja vangu na vinhu vangu vose visigale. 19 Abaho, nokiilongela, "Gweye munhu mwene mhome! Kuna vinhu bwando vinogile vuwikile ngama ya milao bwando, avo uhumule, uje, ung’we, na udeng’he!" ’ 20 Ila Mulungu kamulongela, ‘M’bozi gweye! Ikilo ya lelo ugima wako wolondigwa, avo vinhu vino vose vuuilundikizile vowa va yalihi!’ "

21 Yesu kamambukiza yolonga, "Vino vivo vondaiwe mwa munhu yoyose yokiilundikizila mwenyego vinhu, ila hameso ga Mulungu kabule kinhu."

Mtamanile Mulungu

22 Abaho, Yesu kawalongela wanahina zake, "Avo, nowalongela, sambimuigazile ugima wenu, muje choni, ama ng’huli zenu, m’vale choni. 23 Kwavija ugima uzama kubanza mandia, na lukuli luzama kubanza vivalo. 24 Waloleni mabondwa, hawahanda mbeyu ama kuhuna vakuja, wabule makano gogose, ila Mulungu kowagwelela mandia! Mweye mzama ng’hani kubanza ndege. 25 Yalihi kumwenu mkuigaza ng’hani mmoyo, yodaha kongeza hata zua dimwe muugima wake? 26 Kamba hamdaha kutenda kinhu kidodo kamba kino, habali muigazila vinhu viyagwe? 27 Loleni malua ga mmuhulo vigokula, hagasang’hanika ama kuitendela vivalo. Ila nowalongela, hata Selemani na mali gake gose hawile na vivalo vinogile kamba malua gano. 28 Kamba Mulungu koivaza mijani ya mmuhulo ikoneka lelo na mayo yokwasigwa na kusomigwa, habanza ng’hani kuwavaza mweye? Mweye wanhu muli na nhamanila ndodo!

29 "Avo sambimgaye mmioyo yenu, kamba moja choni, ama mong’wa choni, na sambimdungwedungwe sama ya mbuli zino. 30 Kwavija Wamhazi wa ulumwengu uno wawo wozigelegeza ng’hani mbuli kamba zino, ila mweye, Tata wenu kovitanga kamba movilonda vinhu vino. 31 Ila uzahileni Undewa wa Mulungu, na gano gose mogweleligwa.

Mali Kuulanga

32 "Sambimdumbe, mweye dale dodo, kwavija Tata wenu kanogelwa kuwagwelela mweye Undewa wake. 33 Guzeni vimulinavo zihela muwagwelele wakumbulu. Itendeleni wenyego mkwiji wa hela haulalaga, mwike mali genu kuulanga, aho mali genu hagahunguka, kwavija haduhu wabavi wondawakwenhukile ama vimhungu vondavibanange. 34 Kwavija mali gako hagali na moyo wako baho hondaukale.

Watumigwa Wali Meso

35 "Kaleni meso na jojose dondadize, toeni lupati, na kubwinha viwenge venu, 36 kamba watumigwa wom’beta mndewa wao yobwela kulawa kulusona lwa zengele. Avija yobwela na kubwenga ulwivi, hima wom’vugulila. 37 Wodeng’ha ng’hani watumigwa waja mndewa wao vondayabwele yahawavika wameso, waisasale! Nowalongela ikweli, koisasala, na kuwalongela wakale hasi na kuwasang’hanikila. 38 Wodeng’ha ng’hani watumigwa waja kamba yahawavika waisasale, hata kamba yeheza ikilo kikulu ama nzogolo zikwika. 39 Muitange goya mbuli ino, kamba mwene ng’anda yahakimanyile kipigiti m’bavi chondayeze, sambiyaileke ng’anda yake ituligwe. 40 Vivija na mweye muisasale, kwavija nie, Mwana wa Munhu, nokwiza mkipigiti hamkitamanile."

Mtumigwa Yalibule Uzenzeleganye na Mtumigwa Mzenzeleganye

41 Petulo kalonga, "Mndewa, hala dino kotulongela tweye twiyeka, ama kowalongela na wanhu wose?"

42 Mndewa kamulongela, "Yalihi mtumigwa ija yalibule uzenzeleganye, yali m’bala, mkulu wake yondayamwike yawe mkulu wa watumigwa zake wayagwe, giladi yawagwelele mandia mkipigiti kilondigwa? 43 Kodeng’ha ng’hani mtumigwa ija mkulu wake yahabwela ukae, yaham’vika yotenda vino. 44 Nowalongela ikweli, mkulu ija komtenda mtumigwa ija yawe mkulu wa mali gake gose. 45 Ila kamba mtumigwa ija yahalonga mmoyo wake, ‘Mkulu wangu kokawa ng’hani kubwela,’ na kusonga kuwatoa watumigwa wayage wakitwanzi na wakimbigalo na kuja na kung’wa na kukoligwa, 46 mkulu ija kobwela mdizua mtumigwa ija haditamanile na kipigiti hakitangile. Mkulu ija komkanha mtumigwa ija vidangavidanga na kumwika hamoja na walibule nhamanila.

47 "Mtumigwa ija yovimanya vija voyolondigwa yatende na mkulu wake ila hakiisasala, ama hatenda gaja goyolonda mkulu wake, mtumigwa ija kolimbwa ng’hani. 48 Ila kamba mtumigwa ija hagatangile gaja mkulu wake goyolonda, na kutenda kinhu kimulumbile kulimbwa, kolimbwa hadodo. Munhu yagweleligwe vinhu bwando, kumwake volondigwa vinhu bwando. Na munhu yagweleligwe vinhu bwando ng’hani, kumwake volondigwa vinhu bwando ng’hani.

Yesu Keza Kugala Mbagu

49 "Niza kubwinha moto muisi, vinilondile wakile umalile! 50 Nna ubatizo nolondigwa niubokele, nogaya ng’hani mbaka vondaumale! 51 Mwagiza niza kugala tindiwalo muisi? Si vivo, sigalile tindiwalo ila uhasanyi. 52 Songela lelo na kugendelela, mulango wa wanhu watano wokiihasanya, wadatu kwa wabili na wabili kwa wadatu. 53 Watata wokiihasanya na wana zao, na wana wokiihasanya na watata zao, wakinamama wokiihasanya na wandele zao, na wandele wokiihasanya na wamama zao, wamama mkwe wokiihasanya na wakemwana zao, na wakemwana wokiihasanya na wamama mkwe zao."

Kuutanga Msimu

54 Kabili Yesu kawalongela wanhu, "Muhajona wingu dilawilila ng’ambu ya uswelo wa zua, molonga mvula konda kutoa, na kweli kotoa. 55 Na muhajona beho dilawilila kusi, molonga zua dobatuka lelo, na kweli dobatuka. 56 Videlenya mweye! Modaha kutapita gaja gokoneka kuulanga na muisi. Habali hamtanga kukitapita kipigiti kino?

Ilumbe na Mdumuka Wako

57 "Habali hamdaha kuilamula wenyego mtende mbuli zinogile? 58 Iyohe ng’hani kuilumba na munhu yokugala ha mulamula kipigiti mng’hali mnzila, kamba hutendile avo kokukwekwesa yakuvikize ha mulamula, na mulamula yakugele mmakono ga wemilizi, na wemilizi wakugele mkifungo. 59 Nokulongela hulawa himo mbaka ulihe shilingi ya ikimambukizo."

4 Hana lukuli lumwe na Loho imwe wa Mulungu, kamba vija vumkemigwe na Mulungu mditamanilo dimwe da lukemo lwenu Mulungu luyawakemele.

22 Kila mtwanzi yawe mwende ha mbigalo wake kamba viyali mwende ha Mndewa. 23 Kwavija mbigalo iyo pala da mtwanzi wake, kamba vija Kilisto viyali pala da wanhu wamtogole Kilisto. Na heyo iyo Mkombola wa wanhu wamtogole Kilisto, awo wali lukuli lwake.

15 Na tindiwalo dilawa ha Kilisto ditawale mmioyo yenu, avija mweye vumuli vipindi va lukuli lumwe mkemigwa mkale mditindiwalo. Na muwe wanhu wa kulava hewela.

22 Abaho MNDEWA Mulungu kamtenda mtwanzi kulawa mulubavu luja na kumgala ha ija imunhu. 23 Na ija imunhu kalonga,

"Ino iyo zege mmizege yangu

na lukuli mulukuli lwangu.

Avo kokemigwa mtwanzi kwavija kababazuligwa kulawa mwa mbigalo."

24 Sama ya kilamso kino mbigalo kowaleka tataake na mamaake na kuilumba na mtwanzi wake, na hewo wowa lukuli lumwe.

Kukala na Nhamanila

16 Avo hatudonha. Hata kamba unhu wetu wa kunze womala, ila unhu wetu wa mgati wotendigwa wa sambi kila lelo.

24 "Heyo mwenyego kavipapa vilozo vetu" mulukuli lwake mumsalaba, giladi mmbuli ya vilozo toneke kamba tudanganhika, na mmbuli zinogile toneke tuna ugima. "Na kubitila kutoigwa kuyatoigwe mweye muhona."

2 Tweye tose tokiikwangwala mzimbuli bwando. Ihawa munhu yoyose hahonyela mmbuli ya kija choyolonga, heyo iyo munhu yalekile kuhungula hanhu, na kodaha kuluzuila lukuli lwake lose sambilutende gehile.