19 तम्हां का आसा थोघ कि थारी देही आसा भबन ज़ेथ पबित्र आत्मां बस्सा ज़ुंण तम्हां लै परमेशरै आसा दैनी दी, थारअ मालक आसा परमेशर। 20 किल्हैकि परमेशरै आसा तम्हां लै खास्सी किम्मत दैनी दी, ज़धू तेऊ मसीहा ईशू बल़ीदान हणां लै छ़ाडअ, तै बोला हुंह तम्हां लै कि ऐहा आपणीं देही करै रहैऊआ परमेशरो प्रतप्प।

27 पर हुंह करा आपणीं देही आपणैं बशै ताकि किधी इहअ निं हआ कि हुंह होरी लै ज्ञैन खोज़ूं अर आप्पू होए हुंह बृथा।

3 ज़ै हुंह आपणीं ज़ैदात बी गरीबा अर रैनै-गरीबा लै दैंऊं, अर आपणीं देही बी दुजै बच़ाऊंणा लै आगी जैंदरी पाऊं, पर झ़ूरी निं मेरै दिला दी कोही लै होए, तेतो बी निं मेरअ किछ़ फाईदअ आथी।

13 किल्हैकि हाम्हैं सोभ, कै यहूदी कै होरी ज़ातीए, कै गलाम कै आज़ाद, हाम्हैं आसा एकी ई आत्मां अर देही संघै डुबकी लई दी अर हाम्हां सोभी लै आसा एक्‍कै ई पबित्र आत्मां दैनी दी ज़िहअ हाम्हैं एकी प्रिहअ का झुटा।

4 किल्हैकि ज़ेही म्हारी ऐहा एकी देही दी कई आंग आसा, ईंयां निं सोभै एकी रंगो काम करदै। 5 तिहअ ई हाम्हैं बी ज़ुंण मसीहा दी विश्वासी आसा, हाम्हैं बी हआ तेऊए देही ज़िहै, अर हाम्हैं आसा तेते आंग अर हाम्हैं आसा एकी-दुजै संघै साझ़ू।

8 देही दी राम्बल़अ भैस्स पाणअ हआ देही लै भलअ पर च़ाकरी करै हआ सोभी गल्‍ला दी फाईदअ, किल्हैकि ऐहा ज़िन्दगी अर आजू भेटणीं तम्हां सह ज़िन्दगी ज़ेते परमेशरै आसा करार किई दी।

22 ज़ै मन्‍न खुश हुअ, तेता करै रहा मणछ नरोगअ,

ज़ै दिल चुटअ, सह दैआ हाडकै बी चजेऊई।

24 झणैल़ू बैण हआ मखीरा ज़िहै,

सुआद बी मिठअ अर शाह बी फिरा हरअ।

7 आप्पू लै निं तम्हैं इहअ समझ़ी कि तम्हैं आसा खास्सै अक्ली आल़ै,

तम्हैं रहै सिधै बिधाते डरा हेठै अर बूरअ करनै का रहै दूर।

8 ज़ै तम्हैं इहअ करे, सह हणअ तम्हां लै मल्हमा ज़िहअ

तेता करै रहणीं थारी देही अर हाड-मास्स नरोगै।

13 तंऐं आसा मेरी देही भितरे सोभै गल्‍ला बणाईं दी,

मेरी आसा आपणैं हाथै मेरी माए ओदरै हुंह बूणअ द।

14 हुंह करा तेरअ शूकर किल्हैकि ताखा लागा डरनअ ई,

ज़ेऊ साबै तंऐं हुंह बणाअं सह आसा बडअ ज़बर अर नोखअ!

ऐहा गल्‍ला समझ़ा हुंह ज़ाथी राम्बल़ै करै।

26 मेरअ दिल अर मन्‍न आसा हारी गअ द,

पर तूह बिधाता आसा मेरअ बल

मुंह आसा सदा तेरी ई ज़रुरत।

1 हे बिधाता, तूह आसा मेरअ परमेशर,

मेरअ मन्‍न रहा ताह ई बाखा लागी,

मेरी झ़ूरा सारी देही ताल्है ई,

ज़ेही पाणीं बाझ़ी शुक्‍की ज़िम्मीं,

तेही आसा मेरी आत्मां ताल्है नचिशी।

41 बिहुदै रहा अर प्राथणां करदै रहा लागी ताकि तम्हैं खरी दी पल़ी पाप नां करे। थारअ शाह ता बोला पर देही आसा कमज़ोर।"

29 "ज़ै तूह आपणीं आछी कई गल्‍ला भाल़ी पाप करा, तिन्‍नां पापा दी पाप कराऊंणै आल़ी च़िज़ा भाल़णैं का रह दूर, च़ाऐ ताह सह आछ पोर्ही किल्है निं पल़े काढणीं। किल्हैकि ताल्है आसा अह ई भलअ कि तेरी देही का हणअ एक्‍कै आंग ज़ांऐं, तेता पिछ़ू तेरी सारी देही ता निं जम्परी डेऊणी।

25 "तैही बोला हुंह तम्हां लै इहअ कि आपणीं ज़िन्दगी लै इहअ फिकर निं करी कि किज़ै खाणअ किज़ै पिणअ? नां आपणीं देही लै फिकर करी कि हाम्हां किज़ै बान्हणअ? ज़िन्दगी आसा रोटी का अर देही आसा झिकल़ै का खास्सी किम्मती।

28 "तम्हैं निं तिन्‍नां का डरी आथी ज़ुंण थारी देही च़ाहा मारनअ, तिंयां निं थारी आत्मां मारी सकदै। पर डरनअ सिधअ तेऊ परमेशरा का ज़ुंण देही अर आत्मां दुही सका जम्परी खतम करी।

1 तेतरी हुऐ तिधी हज़ारो लोग कठा एतरै कि लोग लागै एकी दुजे खूरा प्रैंदै गंईं लाई भाल़ै। ईशू बोलअ आपणैं च़ेल्‍लै लै इहअ, "फरीसी मणछे कपट रुपी सज़ेल़ै का रहै चतैन। 2 इहअ बगत बी एछणअ ज़ेभै ढोपी डाही दी हर च़ीज़ शुझणीं सोभी का अर गुप्त च़िज़ो लागणअ सोभी का थोघ। 3 ज़ुंण तम्हैं न्हैरै दी आसा बोलअ द, सह शुझणअ प्रैश्शै दी, अर ज़ुंण तम्हैं पांडा भितरी काना पिछ़ू आसा बोलअ द तेतो हणअ छ़ाप्परा का प्रच़ार।

4 "पर हुंह बोला तम्हां का ज़ुंण मेरै साथी आसा कि तम्हैं निं तिन्‍नां का डरी आथी ज़ुंण थारी देही च़ाहा मारनअ। तिंयां निं होर किछ़ करी सकदै। 5 हुंह खोज़ूं तम्हां का कहा का लागा डरनअ? तेऊ परमेशरा का डरै ज़हा तम्हां मारी करै जम्परी पाणैओ हक आसा। हाँ, सह ई आसा ज़सरी डरा हेठै लागा रहणअ। 6 दूई चाम्बे ढब्बै करै कै पांज़ च़ेल्‍ली निं बिक्‍कदी? तैबी निं परमेशर तिन्‍नां मांझ़ै एकी बी बिस्सरदअ। 7 इधी तैणीं कि तेऊ आसा थारै मुंडे शराल़ बी सोभ गणै दै। तैही बोला हुंह डरी निं आथी, तम्हैं आसा तिन्‍नां च़ेल्‍ली का खास्सै किम्मती।

8 "हुंह बोला तम्हां का कि ज़ुंण मुंह मणछे पूता होरी मणछा सम्हनै मने, सह मनणअ मुंह आपणैं बाब परमेशरे स्वर्ग दूते सम्हनै। 9 पर ज़ुंण मेरै बारै होरी मणछा सम्हनै हुधिए, तेऊ लै हुधणअ मुंह बी स्वर्गै आपणैं बाब परमेशर अर स्वर्ग दूता सम्हनै।

10 "ज़ुंण मुंह मणछे पूतो बरोधी हई किज़ै बोले, तेऊओ ज़ुल्म सका हई माफ, पर ज़ुंण पबित्र आत्में निंदा करे तेऊए ज़ुल्म निं कधि माफ हणैं।

11 "ज़ेभै लोग तम्हां सभागृहा, राज़पाल अर सैणैं सम्हनै निंए, तेभै निं फिकर करी कि हाम्हां किहअ करै अर किज़ै बोल़णअ, या किज़ै ज़बाब दैणअ। 12 किल्हैकि पबित्र आत्मां खोज़णअ तम्हां का तेभी कि तम्हां किज़ै बोल़णअ।"

13 तेखअ बोलअ एकी मणछै लोगे झाल़ै मांझ़ा का ईशू लै, "हे गूरू, मेरै भाई लै बोल इहअ कि बाबे ज़ैदात दै मुल्है बी बांड।" 14 ईशू बोलअ तेऊ लै, "हे मणछा, हुंह कुंणी आसा डाहअ द थारै पांच़ अर बांडी करदअ?"* 15 ईशू बोलअ तेखअ तिन्‍नां लै, "चतैन रहा, अर सोभी रंगे मांण करनै का रहा आप्पू बच़दै। किल्हैकि कोहिए ज़िन्दगी निं तेऊए खास्सी ज़ैदात करै बच़दी।"

16 तेखअ खोज़ी ईशू तिन्‍नां का एक होर कथ्या, "एकी सेठ मणछे हुई ज़िम्मीं दी खास्सी पज़ैआ। 17 तेखअ लागअ सह आपणैं मन्‍नैं आप्पू लै बोल्दअ, ‘हुंह किज़ै करूं? मुखा निं एतरी फसला डाहणां लै ज़ैगा आथी।’ 18 तेखअ बोलअ तेऊ ‘मुंह करनअ इहअ कि मुंह बणाणैं होछ़ै मणशू खोल्ही करै बधिया बडै अर तेथ डाहणअ मुंह आपणअ नाज़। 19 तेखअ दैणीं मुंह आपणैं शाह लै एही दसल्‍ली कि ताखा आसा आजू खास्सी साला लै धन-माया अर ज़ैदात डाही दी। मुंह करनअ ऐबै बैह संघा हणीं मुंह मौज़।’ 20 पर परमेशरै बोलअ तेऊ लै इहअ, ‘आरा ऐडै मणछा, तूह मरनअ ऐहा ई राची अर ज़ुंण बी तंऐं कठा आसा किअ द, सह कसरअ हणअ?’ 21 इहअ ई ऐडअ आसा सह मणछ बी ज़ुंण आप्पू लै धन-माया कठा करा, पर परमेशर निं तेऊ सेठ मंदअ।"

22 तेखअ बोलअ ईशू आपणैं च़ेल्‍लै लै, "तैही बोला हुंह तम्हां लै इहअ कि आपणीं ज़िन्दगी लै इहअ फिकर निं करी कि हाम्हां किज़ै खाणअ, किज़ै पिणअ नां आपणीं देही लै फिकर करी कि किज़ै बान्हणअ? 23 किल्हैकि ज़िन्दगी आसा रोटी का अर देही आसा झिकल़ै का खास्सी किम्मती। 24 * सरगै डैऊंदै काऊड़ै भाल़ा! ईंयां नां बऊंदै अर नां लऊंदै नां तिन्‍नें खेच खहल़ नां भढार हंदै। तैबी धाचा तिन्‍नां परमेशर आप्पै। तम्हैं आसा इना का खास्सै किम्मती।

25 "तम्हां मांझ़ै इहअ कुंण आसा ज़ुंण फिकर करी आपणीं अमर धख ज़ेही बी सका लाम्मी करी? 26 तैही बोला हुंह तम्हां लै, ज़ै तम्हैं फिकर करी एक होछ़अ ज़िहअ काम बी निं करी सकदै, होरी गल्‍ला लै किल्है करा फिकर?

27 "बणैं लागै दै होछ़ै-होछ़ै फूला लै दैआ धैन कि तिंयां किहअ करै बझ़ा! तिंयां नां मैन्थ करदै अर नां तिंयां कातदै, तैबी बोला हुंह तम्हां लै कि सुलैमाने राज़ै बी निं आपणीं ज़िन्दगीए सारै राज़-पाठा दी तिन्‍नां मांझ़ै कहा एकी बराबर झिकल़ै बान्हैं। 28 ज़ै परमेशर घैहणींए घाहा लै, ज़ुंण आझ़ आसा अर काल्‍ला दहणअ सह आगी जैंदरी, तिन्‍नां का बी इहै झिकल़ै बन्हैऊंआं। ओ बैहमी विश्वासीओ, तम्हां लै कै सह झिकल़ै दैई निं सकदअ? 29 तम्हैं ऐहा गल्‍ला लोल़ै निं रहा लागी कि किज़ै खाणअ अर किज़ै पिणअ? नां बैहम करा। 30 किल्हैकि संसारे ज़ाती रहा इना गल्‍ला लोल़ी लागी। पर थारै बाब परमेशरा का आसा थोघ कि तम्हां किज़ू गल्‍ले ज़रुरत आसा। 31 पर तम्हैं करा आपणैं बाब परमेशरे धर्म अर राज़े लोल़-तोप अर ईंयां सोभ गल्‍ला जाणीं तम्हां भेटी।

32 "तम्हैं आसा भेडे होछ़ै छ़ुंडा ज़िहै ज़हा हुंह सभाल़ा, तम्हैं निं किछ़ी गल्‍ले फिकर करी। किल्हैकि थारै बाब परमेशरा लागअ इहअ भलअ कि तेऊ दैणअ तम्हां लै राज़। 33 आपणीं ज़ैदात करा बेच़ी दान अर आप्पू लै बणाआं इहै थैल्‍लू ज़ुंण कधि पराणैं निं हंदै। मतलब स्वर्गै करा आप्पू लै धन कठा ज़ुंण तिधी सदा रहणअ। नां तेता नेल़ च़ोर एछदअ अर नां किल़ै लागदै। 34 किल्हैकि ज़िधी थारअ धन आसा, तिधी रहणअ थारअ मन्‍न बी लागी।

35 "थारी कुछी लोल़ी गाची बान्हीं रही अर थारै दीऐ लोल़ी ज़ल़दै रहै। * 36 तम्हैं रहा तिन्‍नां मणछ ज़िहै ज़ुंण आपणैं मालका न्हैल़ै रहा लागी कि बैहा का केभै एछणअ फिरी कि ज़ेभै सह दुआर टोक्‍के, तेभै खोल्हणअ तेभी तेऊ लै दुआर। 37 तिन्‍नां लै आसा बर्गत, ज़हा तिन्‍नों मालक एछी बिहुदै भाल़े। हुंह खोज़ा तम्हां का सत्त कि ज़ेभै सह तिन्‍नां रोटी खांदअ बशैल़े, तेभै करनी तेऊ आप्पै दास बणी तिन्‍नें च़ाकरी। 38 ज़ै सह राचकै दुजै पहरै या चिऊथै पहरै तिन्‍नां बिऊंतै भाल़े, तिन्‍नां लै हणअ सह खुश।

39 "पर ऐहा गल्‍ला लऐ तम्हैं समझ़ी कि, ज़ै घअरे मालका का इहअ थोघ हंदअ कि च़ोर केभै एछणअ तै रहणअ त तेऊ बिऊंतै अर आपणैं घअरै निं तेऊ च़ोरी दैणीं ती हणैं। 40 तम्हैं बी रहा हर बगत तैर। किल्हैकि ज़हा घल़ी तम्हैं सोठी बी निं सकदै, तैहा घल़ी एछणअ हुंह मणछो पूत।"

41 तेखअ बोलअ पतरासै, "हे प्रभू, ऐहा कथ्या कै तूह सिधअ हाम्हां ई लै बोला कि होरी लै बी बोला?" 42 ईशू बोलअ तेऊ लै, "इहअ भरोस्सै करनै जोगी अर समझ़कार मणछ कुंण आसा ज़सरै मालकै सह सोभी दास-दासी लै हुकम करदअ अर कामां कराऊंदअ भढारी डाहअ बणाईं कि तिन्‍नां लै रोटी-पाणीं करे दैई? 43 मालक हआ तेऊ दासा लै खुश ज़हा तेऊओ मालक इहअ ई करदै भाल़े। 44 हुंह खोज़ा तम्हां का सत्त कि तेऊ बणाणअं सह आपणीं सारी ज़ैदातो भढारी। 45 पर ज़ै सह दास इहअ सोठे कि मेरै मालक एछणा लै आसा अज़ी खास्सी बल़ैग, अर सह होरी दास-दासी च़िक्‍कदअ-मारदअ अर शूर-शराबा झुटदअ लागे, 46 तेऊ दासो मालक एछणअ तैहा धैल़ी, ज़ेभै सह न्हैल़अ बी निं होए लागअ द। ज़ेभै तेऊओ मालक एछणअ तेऊ का निं थोघ बी लागणअ। तेऊ भेटणीं तेते सज़ा तिन्‍नां ज़ेही ज़ुंण विश्वास घात करा।

47 "सह दास ज़हा आपणैं मालके बारै थोघ त पर तैर निं रहअ अर नां तेऊ तिहअ किअ ज़िहअ मालकै तेऊ लै बोलअ त! तेऊ भेटणीं बेघै बूरी मार। 48 पर ज़हा दासा का इहअ थोघ निं होए कि तेऊओ मालक किज़ै काम कराऊंणअ च़ाहा अर नज़ाणै दी कोई गलती करे, तेऊ भेटणीं थोल़ी मार। तैही ज़हा लै खास्सअ आसा दैनअ द, तेऊ का मांगणअ खास्सअ ई अर ज़हा का खास्सअ डाहअ द आसा, तेऊ का काढणअ बी खास्सअ।

49 "हुंह आसा पृथूई दी आगी चैल़दअ आअ द। हुंह होर एता सुआई किज़ै च़ाहा कि आग एभी ज़ल़े! 50 मुंह आसा आजू एक घोर दाह-दुखे डुबकी लणा लै। ज़ेभै तैणीं सह पूरअ निं हुअ तेभै तैणीं आसा मुल्है खास्सअ बोझ़। 51 तम्हैं किज़ै समझ़ा कि हुंह पृथूई दी मेल़-ज़ोल़ करदअ आसा आअ द? हुंह बोला नांईं, पर हुंह आसा मणछा एकी-दुजै का ज़ुदै करदअ आअ द। 52 किल्हैकि एभा पोर्ही हणैं एकी घअरे पांज़ ज़ण्हैं आप्पू मांझ़ै बरोधी चिई ज़ण्हैं दूई का अर दूई ज़ण्हैं चिई का।*

53 ‘बाबा करनी शोहरू संघै ज़ीद

अर शोहरू करनी बाबा संघै ज़ीद।

ईजा डाहणीं शोहरी संघै ज़ीद

अर शोहरी डाहणीं ईजा संघै ज़ीद।

शाशुई करनी नुशा संघै ज़ीद

अर नुशा डाहणीं शाशुई संघै ज़ीद।’"

54 ईशू बोलअ तिधी तिन्‍नां खास्सै झाल़्हुऐ दै लोगा बाखा फिरी, "ज़ेभै तम्हैं बादल़ पछ़मा बाखा भाल़ा, तेभै बोला तम्हैं इहअ कि पाणीं हणअ अर इहअ ई हआ बी। 55 ज़ेभै दखणा बाखा बागरी च़ला, तेभै बोला तम्हैं इहअ कि आझ़ पल़णअ चटाक धुप्पअ अर हआ बी तिहअ ई। 56 ओ कपटी मणछो, पृथूई अर सरगे बारै जाआ तम्हैं तेते लछ़ण भाल़ी समझ़ी, तै एऊ जुगो भेद किल्है निं समझ़दै?

57 "तम्हैं आप्पै किल्है निं फैंसलअ लंदै कि भलअ किज़ै आसा? 58 ज़ेभै तूह आपणैं दुशमणा संघै पांच़ा सेटा लै आसा च़ाल्‍लअ द, तेभै कर बाता हांढदी तेऊ संघै मेल़-ज़ोल़। इहअ निं हआ कि सह निंए ताह पांच़ा सेटा अर पांच़ दैए ताह सपाही का अर सपाही पाए ताह कैद खानै दी। 59 हुंह खोज़ा तम्हां का सत्त ज़ेभै तैणीं तूह पाई-पाई नां भरी मुक्‍के, तेभै तैणीं निं तूह तिधा का छ़ुटणअ।"

10 मन्‍नैं निं फिकर डाहणअ, तै रहणीं थारी देही नरोगी किल्हैकि बाल़ी अमर अर ज़ुआनी निं सदा रहंदी आथी। तेखअ हआ सोभै गल्‍ला बृथा।

4 हाम्हैं सोभै विश्वासी आसा एकी ई देहीए आंगा ज़िहै अर हाम्हां सोभी आसा एकी रंगे पबित्र आत्मां भेटी दी, ज़ेही तम्हां लै आशा आसा भेटी दी ज़ेभै तम्हैं परमेशरे आपणैं हणां लै आसा छ़ांटै दै।

22 ओ बेटल़ीओ, आपणैं-आपणैं मर्धे डरा हेठै रहा एही कि तम्हैं समझ़ै इहअ कि प्रभूए डरा हेठै आसा।✝

23 किल्हैकि मर्ध आसा बेटल़ीओ मूंड, ज़िहअ मसीहा मसीही टोलीओ मूंड आसा अर टोली आसा तेऊए देही ज़ेही। सह आसा आप्पै ई तैहा देहीओ उद्धार करनै आल़अ।

15 सह आसा मसीहा ई थारअ परमेशरा संघै अर एकी-दुजै संघै मेल़-ज़ोल़ करा, थारअ सभाब लोल़ी तिहअ शांती दी रहअ। तम्हैं आसा तेऊ एते ई तैणीं एक देही हणां लै शादै दै। कबल्‍लै रहा परमेशरो शूकर करदै लागी।

22 तेऊ शल़्है करै बणाईं बिधाता एक बेटल़ी, संघा निंईं सह तेऊ आदमी सेटा लै।✝

23 तैहा भाल़ी बोलअ तेऊ आदमी,

"अह आसा बै मुंह ई ज़ेही,

अह आसा मेरी देहीओ भाग अर

मेरअ आपणअ हाड-मास्स।

मुंह डाहणअ ऐहा नाअं बेटल़ी।"

24 तैही रहणअ मर्ध आपणैं ईजा-बाबा छ़ाडी आपणीं लाल़ी संघै मिली अर तिंयां दुहै हणैं एक देही।✝

16 म्हारअ मन्‍न निं धिठअ हंदअ, ज़ेभै म्हारी देही बागा का हर धैल़ै पराणीं लागा हंदी, परमेशर बणाआं हाम्हां भितरा का म्हारी आत्मां दी हर धैल़ै नऊंऐं।

24 "ज़ेभै ईशू क्रूसा दी मूंअ, तेऊए देही दी दैनी म्हारै पापा पिछ़ू सज़ा। तेऊ किअ अह एते तैणीं कि पाप हाम्हां दी आजू राज़ नां करे, पर ऐबै हाम्हैं तिन्‍नां धर्मीं गल्‍ला करे ज़ुंण परमेशर च़ाहा। ज़ुंण कोल़े मार तेऊ ज़िरी, हाम्हैं हुऐ तेता करै नरोगै।"✝

2 हाम्हैं सोभ करा कई बारी च़ूक, ज़ुंण आपणीं ज़िभा बशै करा, सह ई आसा सिध्द मणछ अर सह सका आपणीं सारी देही बशै करी।