1 Ang Dios mao ang atong kusog ug tigpanalipod.

Andam gayod siya kanunay sa pagtabang sa panahon sa kalisod.

2 Busa dili kita mahadlok bisan pag matay-og ang yuta

ug mangatumpag ang mga bukid ngadto sa kinahiladman sa dagat,

3 o bisan pa kon magdahunog ug grabe kakusog ang mga balod sa dagat,

ug mauyog ang mga bukid tungod niini.

2 Makaingon siya* sa Ginoo,

"Ikaw ang akong tigpanalipod ug lig-ong tago-anan.

Ikaw ang akong Dios nga ginasaligan."

8 Kamong mga katawhan sa Dios,

salig kamo kaniya sa tanang panahon!

Isulti kaniya ang tanan ninyong kabalaka

kay siya ang nagpanalipod kanato.

9 Ginoo, ikaw ang tigpanalipod sa mga dinaog-daog

ug dalangpanan panahon sa kalisod.

10 Nagsalig kanimo ang mga tawo nga nakaila kanimo,

kay wala mo man isalikway ang midangop kanimo.

9 Gigamhan mo ang mapintas nga dagat;

gipalinaw mo ang iyang dagkong mga balod.

4 Apan mas gamhanan ka, Ginoo nga anaa sa langit,

kaysa dinahunog sa dagat;

mas gamhanan ka kaysa mga balod niini.

29 Gipahunong niya ang kusog nga hangin

ug milinaw ang dagat.

35 Walay makapahimulag kanato gikan sa gugma sa Dios. Bisag makasinati pa kita ug mga pag-antos, kalisod, paglutos, kagutom, kakabos, katalagman, ug bisan pag kamatayon, masiguro nato nga gihigugma gihapon kita ni Cristo. 36 Ang Kasulatan nag-ingon:

"Tungod sa among pagtuo kanimo,

anaa kami kanunay sa kakuyaw sa kamatayon.

Sama kami sa mga karnero nga ihawonon."*

37 Apan bisag mao kini ang atong kahimtang, magmadaogon kita pinaagi sa tabang ni Cristo nga naghigugma kanato. 38,39 Kay nasiguro ko gayod nga walay makapahimulag kanato gikan sa gugma sa Dios nga gipakita niya pinaagi kang Cristo Jesus nga atong Ginoo. Bisan pa ang kinabuhi dinhi o ang kamatayon, ang mga anghel o mga demonyo, ang mga panghitabo karon o ang mahitabo sa umaabot, ang mga adunay gahom, ang mga anaa sa ibabaw o sa ilalom sa kalibotan, o bisag unsa pa nga mga binuhat sa Dios dili makapahimulag kanato gikan sa iyang gugma.

16 Wala mahutdi ug harina ug lana ang iyang mga sudlanan, sumala sa giingon sa Ginoo pinaagi kang Elias.

39 Sa panahon sa paglakaw sa mga Israelinhon,

nagbutang ang Dios ug panganod sa paghatag ug landong kanila,

ug kalayo sa paghatag kanila ug kahayag sa panahon sa kagabhion.

40 Nangayo sila* ug pagkaon, ug gipadad-an sila sa Dios ug mga buntog,

ug gibusog niya sila sa pagkaon nga gikan sa langit.

41 Gibuak niya ang bato ug mibugwak ang tubig.

Midagayday kini sa disyerto sama sa suba.

25 Sukad sa akong pagkabata hangtod karon nga tigulang na ako,

wala pa ako makakita nga ang mga matarong gipasagdan sa Ginoo

o ang ilang mga anak nagpakilimos ug pagkaon.

18 Ginaatiman sa Ginoo ang mga tawo kansang kinabuhi walay ikasaway.

Ug ang ilang panulondon magpabilin nga ila hangtod sa kahangtoran.

19 Sa panahon sa kalamidad dili sila maunsa,

bisan sa panahon sa tinggutom daghan sila ug pagkaon.

3 Kay hatagan ka nako ug tubig nga mohupay

sa imong kauhaw ug mobasa sa imong malang yuta.

Gamhan ko sa akong Espiritu ang imong mga kaliwat

ug panalanginan ko sila.

4 Ikaw ang dalangpanan sa mga kabos panahon

sa ilang kalisod ug pagpanginahanglan.

Silonganan ka panahon sa bagyo ug ting-init.

Kay ang pagsulong sa mapintas nga mga tawo

sama sa bagyo nga mohapak sa paril,

6 Ug sama kini sa payag-payag nga maghatag ug landong gikan sa kainit sa adlaw, ug mahimong silonganan kon adunay bagyo ug ulan.

2 Kon moagi ka sa tubig, mouban ako kanimo.

Kon motabok ka sa mga suba dili ka malumos.

Kon moagi ka sa kalayo, dili ka mapaso;

ang dilaab niini dili makalamoy kanimo.

8 Sa among pagsangyaw kanunay kaming gipaantos, apan wala gayod kami mapildi sa mga nagbatok kanamo. Usahay maglibog na kami, apan wala gayod kami kawad-ig paglaom. 9 Daghan ang nagtinguha sa paglutos kanamo, apan wala kami pasagdi sa Dios. Tinuod nga gidagmalan nila kami, apan sa kaluoy sa Dios buhi pa gihapon kami.

7 Maayo ang Ginoo;

lig-on siya nga dalangpanan sa panahon sa kasamok,

moatiman siya sa mga mosalig kaniya.

8 Ginaputos niya ang ulan sa bagang dag-om,

apan ang dag-om wala mabusbos bisan bug-at kini.

9 Ginatabonan niya sa dag-om

ang takdol nga bulan.*

10 Naghimo siyag utlanan sa langit ug sa yuta,

ingon man ang utlanan sa kahayag ug sa kangitngit.

21 Panalipdan niya ikaw sa pagpangdaot kanimo sa uban,

ug wala kay kahadlokan kon moabot ang katalagman.

26 Miingon si Jesus kanila, "Nganong nahadlok man kamo? Kulang ang inyong pagtuo." Unya mibangon siya ug gimandoan niya ang hangin ug ang mga balod nga mohunong. Ug diha-diha milinaw.

27 Natingala gayod ang iyang mga tinun-an ug miingon sila, "Unsa ba kining tawhana nga bisan ang hangin ug ang mga balod motuman man kaniya?"

30 Kon gipatahom sa Dios ang mga sagbot nga buhi karon, apan sa kaulahian malaya ug sunogon lang, dili ba labi pa gayod niya kamong pabistihan? Kagamay sa inyong pagtuo! 31 Busa ayaw kamo kabalaka kon unsa ang inyong kaonon ug imnon, ug kon unsa ang inyong isul-ob.

6 Ang babaye nga nanganak miikyas didto sa kamingawan diin adunay lugar nga giandam nang daan sa Dios alang kaniya, aron didto siya atimanon sulod sa 1,260 ka adlaw.

19 Gihatagan ko kamo ug katungod aron madaog ninyo ang mga daotang espiritu ug ang tanan nga gahom sa atong kaaway nga si Satanas,* ug dili gayod kamo maunsa.