16 Geeshsha Maxaafaa ubbay Xoossaafe imetida qaala. He maxaafay tumaa tamaarsanaw, balidaysata seeranaw, suurisanawunne xillotetha duussas koshshiya zore immanaw maaddees. 17 Xoossaa asi polonne lo77o ooso ubbaa oothanaw giigidaysa gidana mela maaddees.

24 "Hiza, ha ta qaala si7idi oothiya oonika ba keethaa shucha bolla keexida wozanaama asa mela.

16 Kiristoosa qaalay hinte wozanan kumidi de7o. Cincatetha ubban issoy issuwa tamaarsitenne zorite. Mazmuren, sabaninne ayyaana yethan Xoossaa wozanape galatishe yexite.✝

4 Geeshsha Maxaafay immiya gencaninne minthethuwan nu ufaysaa ekana mela Geeshsha Maxaafan xaafetida ubbay nuna tamaarsanaw xaafetis.

1 Haysati Isra7eele kawa Dawita na7aa Solomone leemisota. 2 Leemisoti asay cincatethi, seeranne era haasaya akeekanaw maaddoosona. 3 Enti cincatethi, xillotethi, suure pirdinne suure wozani daana mela tamaarsoosona. 4 Eeyatas akeeka immees; na7atethatas eratethinne kahaamatethi immees. 5 Cincati ha leemisota si7idi, era gujoosona; akeekanchoti lo77o zore ekoosona. 6 Hessan leemisotanne enta birshethaa, cincatetha odaanne enta qan7isheta akeekanaw danda7etees.

7 Godaas yashshi cincatethas doomethi; shin eeyati cincatethinne seera kadhoosona.

5 Ne Godaa, ne Xoossaa ne kumetha wozanaape, ne kumetha shempuwafenne ne kumetha wolqaafe dosa. 6 Hachi ta nena kiittiya ha kiitaa ne wozanan wotha. 7 Enta neeni ne nayta tamaarsa; neeni ne son uttiya wode, oge hemetiya wode, zin7iya wodenne dendiya wode entaba haasaya.

8 Ta na7aw, ne aawa zoriya si7a;

ne aaye timirtiya kadhopa.

9 Hessi ne huuphiyas boncho kallacha;

ne qoodhiyas gozda gidana.

20 Ta na7aw, ne aawa kiita pola;

ne aaye timirtiya aggofa.

21 Enta ubba wode ne wozanan oyka;

ne qoodhiyan qacha.

22 Ne hemetiya wode enti nena kaalethana;

ne zin7iya wode, enti nena naagana;

ne barkiya wode enti nena zorana.

23 Godaa kiitay xompe; iya timirtey poo7o;

iya seeray de7oko efiya oge.

5 Cincatethinne akeeka demmanaw minna;

ta new odiyaba dogopa; iyape kare keyopa.

6 Cincatethas zoko zaaropa; iya nena ashshana;

iyo dosa; iya nena naagana.

7 Cincatethi aadhiya gisho iyo demma;

new de7iyaba wursidi ekikoka akeeka demma.

8 Ne iyo boncha;

iya nena dhoqu dhoqu oothana;

ne iyo oykiko, iya nena bonchana.

13 Ta timirtiya loytha naaga; yeddofa;

timirtey new de7o immiya gisho loytha naaga.

14 Nagaranchota ogiyara boopa;

iita asata ogiyan hemetofa.

23 De7oy iyape pultiya gisho,

ubbaafe aathada ne wozanaa minthada naaga.

24 Ne doonape iita haasaya digga;

wordo haasaya ne matape haassa.

25 Sitti gada sinthe xeella;

ne ayfey ne sinthan de7iyaba

tishshi oothidi xeello.

26 Ne tohuwa ogiya giigisa;

suure oge xalaalan hemeta.

27 Suure ogepe ushachi haddirsi goopa;

ne tohoy iita oge boonnada naaga.

14 Cincatethi immiya timirtey de7o pulto; higgey ase hayqo xihepe kessi ekanaw maaddees.

10 Godaas yashshi cincatethas doomethi, Geeshsha Godaa eroy akeeka.

1 Ta asaw, ta timirtiya si7ite;

ta doonape keyiya qaala hayzidi si7ite.

2 Taani ta doona leemison dooyana;

benipe geemmida xuura qoncisana.

3 Nuuni si7idaysanne eridaysa,

nu aawati nuus odidaysata odana.

4 Hessata nuuni enta naytape qosoko;

Godaas bessiya galataa,

iya wolqaanne malaalsiya iya oosuwa,

yaana yeletas odana.

10 He yeletetha ubbay hayqidi banta mayzatan gahetidosona. Hessafe guye Godaa woyko Goday Isra7eele asaas oothidaba eronna hara yeletethi dendis.

17 Woosa keethi loythi heemmiya cimati, ubbaafe aathidi, qaala sabbakoninne tamaarson daabureysati dako boncho ekanaw bessees. 18 Geeshsha Maxaafay, "Wudumman kathaa yedhiya boora doona qachofa" hessadaka, "Oosanchoy ba damooziya ekanaw bessees"✝ yaagees.

16 Shin ha alamiyas injetiya go77onna odape baqata. Hessa mela oday ase Xoossaafe haassees. 17 Hessa mela oday asatethi midigiya paxonna woyzazire maduntha mela. Hessa mela odaa odeteyisata giddofe Hemeneyoosinne Filixoosi de7oosona.

9 Kiristoosa timirtiyan doonnaysasinne iyape haakiya uraas Xoossay baawa. Kiristoosa timirtiyan de7iya uraas Aawaynne Na7ay de7oosona.

14 Baaliya bonchidi giddo gathiya wode Yesuusi Xoossa Keethi bidi tamaarso oykis. 15 Ayhudeti, "Ha addey timirte tamaaronna haysa ubbaa waati eridee?" yaagidi malaaletidosona.

16 Yesuusi zaaridi, "Ta tamaarsiya timirtey tana kiitida Xoossaa matape yaa timirtefe attishin, tabaa gidenna. 17 Xoossaa sheniya oothanaw koyiya oonika ha timirtey Xoossaa matape yaakonne woyko taani taape odiyako erana. 18 Babaa odiya oonika ba huuphe boncho koyees. Shin bana kiittidaysa bonchuwa koyiya oonika I tumancho; iyan wordoy baawa.