16 Lahat ng Kasulatan ay isinulat sa pamamagitan ng kapangyarihan ng Diyos, at mapapakinabangan sa pagtuturo ng katotohanan, pagsasaway, pagtutuwid, at sa pagsasanay sa matuwid na pamumuhay, 17 upang maging karapat-dapat at handa sa lahat ng mabubuting gawa ang naglilingkod sa Diyos.

24 "Kaya ang sinumang nakikinig sa aking mga salita at sinusunod ito ay maihahalintulad sa isang matalinong lalaki na nagtayo ng kanyang bahay sa pundasyong bato.

16 Hayaan ninyong manahan nang lubusan sa inyong mga puso ang mga aral ni Kristo. Paalalahanan at turuan nʼyo ang isaʼt isa ayon sa karunungang kaloob ng Diyos. Umawit kayo ng mga salmo, himno, at iba pang mga awiting espirituwal na may pasasalamat sa Diyos sa mga puso ninyo.

4 Ang lahat ng nakasulat sa Kasulatan noong unang panahon ay isinulat upang turuan tayo. At sa pamamagitan ng Kasulatan, tayoʼy magiging matatag at malakas ang loob, at magkakaroon ng pag-asa.

1 Ito ang mga kawikaan ni Solomon na anak ni David, hari ng Israel.

2 Sa pamamagitan ng mga kawikaang ito,

magkakaroon ka ng karunungan,

maitutuwid ang iyong ugali

at iyong mauunawaan

ang mga aral na sa iyoʼy

magbibigay karunungan.

3 Sa pamamagitan din nitoʼy magiging disiplinado ka,

dahil itinuturo nito ang matuwid

na paraan ng pamumuhay,

mabuting pag-uugali, paggawa ng tama,

at pagiging makatarungan.

4 Makapagbibigay ito ng karunungan

sa mga walang kaalaman

at sa kabataaʼy magtuturo

ng tamang pagpapasya.

5 Sa pakikinig nito, ang marunong

ay lalong magiging marunong

at ang may pinag-aralan

ay magiging dalubhasa

6 sa pag-unawa sa kahulugan

ng mga kawikaan,

mga talinghaga, at mga bugtong

ng marurunong.

7 Ang pagkatakot sa Panginoon

ang simula ng karunungan.

Ngunit sa hangal, walang halaga

ang karunungan

at ayaw niyang maturuan.

5 Mahalin ninyo ang Panginoon na inyong Diyos nang buong puso, nang buong kaluluwa, at nang buo ninyong lakas. 6 Huwag ninyong kalilimutan ang mga utos na ito na ibinigay ko sa inyo ngayon. 7 Ituro ninyo ito sa inyong mga anak. Pag-usapan ninyo ito kapag kayoʼy nasa inyong mga bahay at kapag naglalakad, kapag nakahiga, at kapag babangon kayo.

8 Anak, dinggin mo ang turo at pagtutuwid

sa iyong pag-uugali ng iyong mga magulang,

9 dahil itoʼy makapagbibigay

sa iyo ng karangalan

katulad ng koronang gawa sa bulaklak

at makapagpapaganda katulad ng kuwintas.

20 Anak, sundin mo ang itinuturo

at iniuutos ng iyong mga magulang.

21 Itanim mo ito sa iyong isipan

upang hindi mo makalimutan.

22 Ito ang papatnubay, mag-iingat

at magpapaalala sa iyong pamumuhay,

kahit ano pa ang iyong ginagawa.

23 Sapagkat ang mga turo

at utos ng iyong mga magulang

ay katulad ng isang ilaw

na tatanglaw sa iyo.

At ang kanilang pagsaway sa iyo

upang ituwid ang ugali mo

ay ikabubuti at ikahahaba ng buhay mo.

5 Pagsikapan mong magkaroon

ng karunungan at pang-unawa.

Huwag mong kalilimutan

ang mga sinasabi ko

at huwag kang hihiwalay dito.

6 Huwag mong tanggihan ang karunungan,

sa halip pahalagahan mo ito,

dahil iingatan ka nito.

7 Pinakamahalaga sa lahat

ang karunungan at pang-unawa.

Sikapin mong magkaroon nito

kahit na maubos pa ang lahat

ng kayamanan mo.

8 Tanggapin moʼt pahalagahan

ang karunungan,

dahil magbibigay ito

sa iyo ng karangalan.

13 Huwag mong kalilimutan

ang pagtutuwid ko sa iyong pag-uugali;

ingatan mo ito sa puso mo

sapagkat mabubuhay ka

sa pamamagitan nito.

14 Huwag mong susundan

ang daan ng mga masasamâ.

Huwag mong gagayahin

ang ginagawa nila.

23 Higit sa lahat, ingatan mo

ang iyong isipan,

sapagkat kung ano ang iyong iniisip

iyon din ang magiging buhay mo.

24 Huwag kang magsalita

ng kasinungalingan at walang kabuluhan.

25 Ituon mo ang iyong paningin

sa mga bagay na mabuti.

26 Pag-isipan mong mabuti

ang iyong mga gagawin

upang magtagumpay ka.

27 Mamuhay ka sa katuwiran

at layuan mo ang kasamaan.

14 Ang mga turo ng taong matalino

ay bukal ng buhay,

ilalayo ang tao sa bitag ng kamatayan.

10 Ang pagkatakot sa Panginoon

ang simula ng karunungan.

At ang pagkilala sa Banal na Diyos

ay nagpapahiwatig ng pagkaunawa.

1 Mga kababayan,* ang mga turo koʼy

inyong pakinggan.

Sundin ninyo ang aking mga salita.

2 Tuturuan ko kayo sa pamamagitan ng paghahalintulad.*

Sasabihin ko sa inyo ang mga lihim

na katotohanan ng nakaraan.

3 Napakinggan na natin ito at nalaman.

Sinabi ito sa atin ng ating mga ninuno.

4 Hindi natin ito ililihim sa ating mga anak;

sasabihin natin sa mga susunod na henerasyon

ang kapangyarihan ng Panginoon

at ang mga kahanga-hanga niyang gawa.

10 Nang mamatay na ang mga tao sa henerasyong iyon, ang sumunod na salinlahi ay nakalimot sa Panginoon, maging sa mga ginawa niya para sa Israel.

17 Ang mga pinuno ng iglesya na naglilingkod nang mabuti ay dapat bigyan ng nararapat na sahod, lalo na ang mga naglilingkod sa pangangaral at pagtuturo ng salita ng Diyos. 18 Sapagkat sinasabi sa Kasulatan, "Huwag mong bubusalan ang baka habang gumigiik"* at sinasabi pa, "Nararapat bigyan ng sahod ang manggagawa."*

16 Iwasan mo ang makamundo at walang kuwentang usap-usapan, dahil lalo lang napapalayo sa Diyos ang mga gumagawa nito. 17 Ang mga aral nilaʼy parang kanser na kumakalat sa katawan. Kabilang na sina Himeneo at Fileto sa mga taong ito.

9 Ang taong hindi nagpapatuloy sa katuruan ni Kristo kundi nagtuturo pa ng labis dito, hindi sumasakanya ang Diyos. Ang taong nagpapatuloy sa katuruan ni Kristo, sumasakanya ang Ama at ang Anak.

14 Noong kalagitnaan na ng pista, pumunta si Hesus sa Templo at nangaral. 15 Namangha sa kanya ang mga pinuno ng mga Hudyo. Sinabi nila, "Paano nalaman ng taong ito ang mga bagay na ʼyan, gayong hindi naman siya nakapag-aral?"

16 Sumagot si Hesus, "Hindi galing sa akin ang mga itinuturo ko, kundi sa nagsugo sa akin. 17 Malalaman ng sinumang gustong sumunod sa kalooban ng Diyos kung ang itinuturo koʼy galing nga sa Diyos o sa akin lang. 18 Ang nagtuturo nang mula sa sarili niyang karunungan ay naghahangad lang ng pansariling karangalan. Ngunit ang naghahangad na parangalan ang nagsugo sa kanya ay tapat at hindi sinungaling.