31 ጊዶ ኣቲን ጎዳ

ሂዶታ ኦዛይቲ

ባንታ ዎልቃ ኦራጺሴቴስ፤

ኢስቲ ጎሌ ማላ ፒራና፤

ኢስቲ ዳቡሮንታ ዎጻና፤

ኢስቲ ባና፤ ኣርጋጬቴና።

18 ጊዶ ኣቲን ጎዳይ ኢንቴስ

ኪያ ኦናስ ናጌስ፤

ኢንቴና ባ ቃቴ

ቤሳናስ ዴንዴስ፤

ጎዳይ ቱሙ ፒርዲዛ

ጾሳ ጊዲዳ ጊሻስ

ኣማኔቲዲ ኢዛ ናጊዛይቲ

ኣንጄቲዳይታ።

14 ጎዳን ኣማኔታ፤

ሚና፥ ሂዶታ ቃንጾፋ፥

ጎዳን ኣማኔታ።

13 ታኒ ሼምፖራ ፓጻ ዳሼ

ጎዳ ኪያቴ ቤያናይሳ

ሂዶታ ኦይስ።

14 ጎዳን ኣማኔታ፤

ሚና፥ ሂዶታ ቃንጾፋ፥

ጎዳን ኣማኔታ።

1 ጎዳይ ታስ ፖኦኔ

ታና ኣሺዛይሳ፤

ሂስቲን ታኒ ኦናስ ያያኔ?

ጎዳይ ታ ሼምፖይስ

ኣቲዛ ሚጻ፤

ሂስቲን ታኒ ኦናስ ባባኔ?

2 ኢታ ኣሳቲ፥ ታ ሞርኬቲኔ

ታ ባልጋራቲ

ታና ዎናዉ

ታኮ ሆርዶፊ ዪዛ ዎዴ፥

ኢስቲ ባስ ጴቲዲ ኩንዳና።

3 ሞርኬ ቶራይ

ታና ዶዲዛኮካ

ታ ዎዚናይ ያዬና፤

ኦላይ ታ ቦላ ዎራጂዳኮካ፥

ታኒ ጎዳን ኣማኔታይስ።

4 ታኒ ጎዳ ኢሲ ሚሽ ኦይቻይስ፤

ሄሲካ ታኒ

ታ ዴኦ ላይ ኡባን

ጎዳ ኬን ዴኣናሳ፤

ታኒ ጎዳ ቦንቾ ሎኦቴ ቤኣናሳ፤

ኢዛ ኬንካ

ኢዛ ኮያሼ ዴኣናሳ።

5 ሄሳ ጊሻስ ሜቶ ጋላስ

ኢዚ ታና ባ ዲዛሶን ጌንና፤

ባ ዱንካኔን

ታና ቆቲ ኣሻና፤

ቃ ዛላ ቦላካ

ኢዚ ታና ኤሳና።

6 ሄ ዎዴ ታና ዶዲዳ

ታ ሞርኬታፔ ቦላራ

ቁ ቁ ጋና፤

ታኒ ኢዛ ዱንካኔዛ ሲንን

ኡፋይሳ ያርሾ ያርሻና፤

ታኒ ጎዳስ ዲጻናኔ

ዬጻና።

7 ኣቤት ጎዳዉ!

ታኒ ኔና ጼይጊዛ ዎዴ

ኔኒ ታስ ኮያ፤

ታስ ቃታ፤ ታና ሲያ።

8 ኔኒ፥ «ታ ሲን

ኮዪቴ» ጊዳ ዎዴ፥

ታ ዎዚናይ፥

«ኣቤት ጎዳዉ! ኤኖ፤

ታኒ ኔ ሲን ኮያና» ጊዴስ።

9 ኣቤት ታና ኣሺዛ ታ ጾሳዉ!

ኔኒ ታና ማዲዛዴ፤

ኔ ሲን ታፔ ጌንፋ፤

ታና ኔ ኣይሌ ሃንቄታዳ

ኔፔ ሃሶፋ።

ታና ኦሎፓኔ ኣጎፋ።

10 ታ ኣዋይኔ

ታ ኣያ ታና ኣጊኮካ

ጎዳይ ታና ሺሺ ኤካና።

11 ኣቤት ጎዳዉ!

ኔ ኦጌ ታና ታማርሳ፤

ታ ሞርኬታ ጊሻስ

ታና ሱሬ ኦጌራ ካሌ።

12 ዎርዶ ማርካቲ

ታ ቦላ ማካላቴን

ዴንዲዳ፤

ሄሳ ጊሻስ ኔ ታና

ኢስታ ኢታ ኣሞስ ኣ ኢሞፋ።

13 ታኒ ሼምፖራ ፓጻ ዳሼ

ጎዳ ኪያቴ ቤያናይሳ

ሂዶታ ኦይስ።

14 ጎዳን ኣማኔታ፤

ሚና፥ ሂዶታ ቃንጾፋ፥

ጎዳን ኣማኔታ።

1 ታኒ ጎዳ ዳንዳያን ናጋዲስ፤

ኢዚ ታኮ ሲሚዲ

ታ ዎሳ ሲዪዴስ።

2 ጪማ ኦላፌ፥ ሚቲዛ ኡርቃፌ

ታና ኬሲዴስ፤

ታ ቶሆታ ዛላ ቦላ ኤሲዴስ፤

ቃሴ ታ ሄሜ ሚንዴስ።

3 ኢዚ ታ ዶናን

ኦራ ማዛሙሬ ዎዴስ፤

ሄ ዬይ፥

«ኑ ጾሳይ ጋላቴቶ» ጊዛዛ።

ዳሮቲ ቤኢዲ ያያናኔ

ጎዳን ኣማኔታና።

4 ጎዳን ኣማኔቲዛይ፥

ኦቶራንቻታኮ ሲሞንታይ፥

ዎርዳንቻታኮ ጼሎንታይ

ኣንጄቲዳዴ።

5 ኣቤት ታ ጎዳዉ!

ኔኒ ዳሮ ማላሊሲዛ

ኦሶ ኦዳሳ፤

ኔናራ ሊኬቲዛይ

ኦኒኔ ባዋ!

ኔኒ ኑስ ቆፒዳ ሎኦ ቆፋ

ኦኒኔ ቆዳናዉ ዳንዳዬና፤

ሄሲ ታኒ ዮቲን

ዉሪዛዝ ጊዴና።

6 ኔኒ ያርሾኔ

ሙጹዋታ ኮያቤካ፤

ጹጊዛ ያርሾኔ

ናጋራ ያርሾካ

ኔኒ ሳሞታቤካ፤

ጊዶ ኣቲን ሲያና ማላ

ታስ ሃይታ ዶያዳሳ።✝

7 ሄሳፌ ጉዬ ታኒ፥

«ጻ ማጻፋን

ታ ጊሻስ ጻፌቲዳ ማላ

ሄኮ ሃኢ ታኒ ያዲስ።

8 ኣቤት ታ ጾሳዉ!

ታኒ ኔኒ ኮይዛይሳ

ኦናስ ዶሳይስ፤

ኔ ዎጋይ ታ ዎዚና

ጊዶን ዴስ» ጋዲስ።

9 ጊታ ሺቆን ታኒ ጺሎቴ

ሚሺራቾ ኣዋጃዲስ።

ኣቤት ጎዳዉ!

ኔኒ ኤሪዛ ማላካ

ታኒ ታ ዶናን

ዮቲዛይሳ ኣጊኬ።

10 ታኒ ኔ ጺሎቴ

ታ ዎዚናን ቆታቤኬ፤

ኔኒ ኣማኔቲዛይሳኔ

ኣሺዛይሳ ታ ዮታዲስ።

ቃሴ ኔ ሲቆኔ

ኔ ቱማቴ

ጊታ ሺቆዛፔ ጌንቤኬ።

11 ኣቤት ጎዳዉ!

ኔ ማሮቴ

ታፔ ሃሶፋ፤

ኔ ሲቆይኔ ኔ ቱማቴይ

ታና ኡባ ዎዴ ናጎ።

12 ኣይስ ጊኮ ቆዳይ ባይንዳ

ኢታ ሚሺ ታና ዶዲዴስ፤

ታ ኢታቴ ዳሪዳ ጊሻስ

ታ ጼላናዉ ዳንዳይኬ።

ታ ኢታ ኦሶይ

ታ ሁኤ ቢናናፔ ዳሪዴስ፤

ታ ዎዚናይ ታ ጊዶን ሴሪዴስ።

13 ኣቤት ጎዳዉ! ታና ኣሻ፤

ኣቤት ጎዳዉ!

ታና ማዳናስ ኤሶታ።

14 ታና ዎናዉ ኮይዛይቲ

ሙሌካ ዬላቴቶኔ ካዉዬቶ፤

ታኒ ቆሄታናይሳ ኣሞቲዛይቲ

ካዉዪዲ ጉዬ ሲሜቶ።

20 ኑ ሼምፖያ ጎዳ

ሂዶታ ኦዉስ፤

ኢዚ ኑስ ማዶኔ ጎንዳሌ።

21 ኑኒ ጌሽ ጊዲዳ

ኢዛ ሱንን ኣማኔቶስ፤

ኑ ዎዚናይካ ኢዛን ኡፋዬቴስ።

22 ኣቤት ጎዳዉ!

ኑኒ ኔናን

ሂዶታ ኦዛይሳ ማላ

ሜርና ኔ ሲቆይ ኑናራ ጊዶ።

5 ታኒ ጎዳ ላሞታን ናጋይስ፤

ታ ሼምፖያ

ዳንዳያን ናጋዉስ፤

ኢዛ ቃላካ ሂዶታ ኦዉስ።

6 ዛቤቲ ሳኣይ ኣዉዴ ዎንታኔሻ

ጊዲ ናጊዛይሳፌካ ቦላ

ታኒ ጎዳ ላሞታን ናጋይስ።

5 ታ ሼምፖዬ!

ዎፑ ጋዳ ጾሳ ጻላ ናጋ፤

ታስ ሂዶታይ ኢዛፔ ያና።

34 ጎዳ ሂዶታ ኦ፤

ኢዛ ኣዛዞካ ናጋ፤

ኢዚ ኔና ቢታ ላቲሳና፤

ዛሪዲካ ቦንቻና፤

ኢታ ኣሳቲ ሚ ይሺን

ኔ ቤያና።

5 ኔኒ ፖሎ ዎዚናን

ጎዳን ኣማኔታ፤

ኔኒ ኔ ኣኬካን ዜምፖፋ።

6 ኔኒ ቢዛ ኦጌ ኡባን

ኢዛ ሲንሳ፤

ኢዚካ ኔ ቢዛ ኦጌ ሱሪሳና።

3 ሃይሳን ጻላላ ጊዶንታ ኑና ጋኪዛ ዋዬንካ ኡፋዬቶስ። ጋሶይካ ዋዬይ ዳንዳያን ጋዛይሳ ኑ ኤሮስ። 4 ዳንዳያይ ፓጬን ሚኖቴ ኢሜስ፤ ፓጬን ሚኖቴ ሂዶታ ኢሜስ።

11 ጎዳይ ባ ጊታ ዎልቃን ባ ሚኖቴ ኡባ ኢንቴስ ኢሞ፤ ዉርሲካ ኢንቴ ዳንዳያና ማላኔ ኡፋይሳን ጊጌቲዳይታ ጊዳና ማላ ኢንቴና ኢዚ ማዶ።

7 ሄሳ ጊሻስ ታ ኢሻቶ! ጎዳይ ሃ ያና ጋካናስ ዳንዳይቴ፤ ጎሼ ጎዪዛዴይ ቢታይ ሎኦ ካ ካጻና ጋካናስ ዋኒ ዳንዳይዛኮ ኮይሮ ኢራኔ ዉርሴ ኢራ ኢዚ ዎስቲ ናጊዛኮ ኣኔ ኣኬኪቴ። 8 ኢንቴካ ሄሳ ዳንዳይቴ፤ ኢንቴ ዎዚና ሚንቴ፤ ጋሶይካ ጎዳ ዩሳ ጋላሲ ማቲዴስ።

11 ዳንዳያን ጌንጪዳ ኣሳታ ኑ ኢስታ፥ «ኢስቲ ኣንጄቲዳይታ» ጊ ቆዲዛይሳ ኢንቴ ኤሬታ። ኢዮቢ ዋኒ ዳንዳይዳኮ ኢንቴ ኢዛ ጊሻስ ሲዪዴታ። ጎዳይ ኢዛ ዉርሴን ኣይ ኦዳኮ ኢንቴ ቤዪዴታ፤ ጎዳይ ኣሳስ ኬሂ ሚሼቲዛዴኔ ማሪዛዴ።✝

22 ኢንቴ ኣማኒዛይታ ሱሬ ዎዚናፔ* ሲቃና ማላ ቱማስ ኣዛዜቴን ኢንቴ ኢንቴ ኣሳቴ ጌሺዴታ፤ ሄሳ ጊሻስ ኢንቴ ኢንቴ ጊዶን ኢሶይ ኢሳራ ሎኤ ሲቄቲቴ። 23 ኢንቴ ናምኣን ዬሌቲዳይ ሜርናስ ሚኒ ዲዛ ዮንታ ዴኦ ጾሳ ቃላን ዮንታ ዜሬፌ ኣቲን ይዛ ዜሬፌ ጊዴና። 24 ጌሻ ማጻፋይ ጊዛ ማላ፥

«ኣሾ ማይኢዳይ ዉሪካ

ማታ ማላ፤

ኢዛ ቦንቾይካ ዉሪካ

ዎራ ጪሻ ማላ፤

ማታይካ ሜሌስ፤

ጪሻይካ ቆኬስ።

25 ጎዳ ቃላይ ጊዲኮ

ሜርናስ ኤቂ ዴስ።»

ኢንቴስ ሳባኬቲዳ ሚሺራቾ ቃላይካ ሄሳ።

9 ኢሲ ኢሲ ኣሳታስ ሚሳቲዛ ማላ ጎዳይ ባ ዮቲዳ ሂዶታ ቃላ ፖላናስ ጋምኤናኮሺን ኣሲ ዉሪካ ማሬታና ማላኔ ኣይ ኣሲካ ዮንታ ማላ ኮዪዲ ኢዚ ኢንቴ ጊሻስ ታኬስ።

1 «ሄ ዎዴ ሳሎ ካዎቴያ ሚሺራ ሞካናስ ጾምፔ ኦይኪዲ ኬዚዳ ታሙ ጌላኦታ ሚሳታዉስ።✝ 2 ሄ ታማታፔ ኢቻሹ ጌላኦቲ ኤያታ፤ ሃንኮ ኢቻሻቲ ጪንጫታ። 3 ኤያቲ ኩራዜ፥ ጾምፔ ኦይኪዳ ሺን ዉሪኮ ጉጃና ሃራ ናጌ ላምባ ኦይኪቤቴና። 4 ጪንጫቲ ጊዲኮ ባ ኩራዜዛራ ዉሪኮ ጉጃና ላምባ ሃራ ጻርሙሴን ኦይኪዳ። 5 ማቺዮ ኤካና ሚሺራይ ዮንታ ጋምኢን ስኮይ ዴጺን ኣሳይ ዉሪካ ስኪዴስ።

6 «ሌላ ጊዶ ጊዲሺን፥ ‹ሚሺራዚ ዬስ! ኬዚዲ ሞኪ ኤኪቴ!› ጊዛ ጼይሳ ቃላይ ሲዬቲዴስ። 7 ሄ ዎዴ ጌላኦቲ ዉሪካ ዴንዲዲ ባ ጾምፔ ጾምፔ ኦይሴኔ ጊጌቴ ኦይኪዳ። 8 ኤያቲ ጪንጫታ፥ ‹ኑ ጾምፔይ ቶኣና ጊዛ ጊሻስ ኢንቴ ላምባፌ ኑስ ኢሚቴ› ጊዳ።

9 «ጪንጫ ጌላኦቲ ኢስታስ ዛሪዲ፥ ‹ኑስ ዲዛ ላምባይ ኑሳራኔ ኢንቴሳራ ጊዶንታ ጊሻስ ቢዲ ላምባ ባይዚዛይታፔ ኢንቴስ ሻሚቴ› ጊዳ። 10 ኢስቲ ላምባ ሻማና ቢ ኪቺን ሚሺራዚ ጋኪ ዎዴስ። ካሴ ጊጌቲ ኡቲዳ ጌላኦቲ ቡላቻሶ ኢዛራ ጌሊዳ፤ ካሬይካ ጎርዴቲዴስ።

11 «ጉ ጋምኢሼ ሃንኮ ጌላኦቲ ዪዲ፥ ‹ጎዶ! ጎዶ! ካሬ ኑስ ዶያ!› ጊዳ። 12 ኢዚካ ዛሪዲ፥ ‹ታ ኢንቴስ ቱሙ ጋይስ፤ ታ ኢንቴና ኤሪኬ!› ጊዴስ። 13 ሄሳ ጊሻስ ያና ጋላሳ ዎይኮ ሳቴዛ ኢንቴ ኤሮንታ ጊሻስ ጊጌቲዲ ናጊቴ።