31 Kasi bayina ke tulaka kivuvu ya bawu na Yave,

bawu ke kuzwaka dyaka ngolo.

Bawu ke kwendaka na zulu mutindu mbemba,

bawu ke kimaka mbangu kasi bawu ke lembaka ve,

bawu ke tambulaka kasi ngolo ya bawu ke manisaka ve.

18 Na yina, Yave ke na kuvingila beno samu na kutala beno kyadi,

ni yawu yina yandi ke telama samu na kutala beno kyadi.

Ya tsyelika, Yave kele Nzambi ya kudedama,

kyese na bayina nyonso ke tulaka kivuvu na yandi!

14 Tula kivuvu ya nge na Yave,

vwanda na ngolo mpe vwanda na kibakala.

Tula kivuvu ya nge na Yave!

13 Mu ke na kiminu ya kutala bumbote ya Yave,

na yinsi ya bantu ya moyo.

14 Tula kivuvu ya nge na Yave,

vwanda na ngolo mpe vwanda na kibakala.

Tula kivuvu ya nge na Yave!

1 Mukunga ya Davidi.

Yave kele Nsemo mpe Muvuukisi ya munu,

mu ke vwanda na boma ya nani?

Yave kele Kiswamunu ya munu,

mu ke vwanda na boma ya nani?

2 Ntangu bantu ya yimbi ke kwiza na kudya musuni ya munu,

ni bawu, bayina ke nyokolaka munu,

bambeni ya munu ke bula mabaku mpe ke kubwa.

3 Kana nkonga ya binwani kwiza nwanisa munu,

mu ke vwanda ve na boma.

Kana mvita kusalama na munu,

mu ke kangama na kivuvu.

4 Mu ke lomba na Yave kima mosi,

yina mu ke na yawu nsatu mingi.

Mu zola kuzinga na Yinzo ya Yave bilumbu nyonso ya luzingu ya munu,

samu na kutalaka kitoko ya Yave,

mpe samu na kusikikaka meso ya munu na Yinzo ya yandi.

5 Samu ti yandi ke kengidila munu na Yinzo ya yandi ya mileba na kilumbu ya kyadi,

yandi ke bumba munu na kiswamunu ya Yinzo ya yandi ya lele,

yandi ke tula munu na zulu ya ditadi ya nene.

6 Ntangu yayi yintu ya munu me kuma na zulu ya bambeni yina me zungidila munu.

Mu ke pesa Yave minkayulu na Yinzo ya yandi, na kati ya milolo ya nsayi.

Mu ke kembila mpe kusika bisikulu samu na Yave.

7 Yave, kuwa ndinga ya munu, mu ke na kubokila nge,

vwanda na kyadi ya munu mpe pesa munu mvutu!

8 Ntima ya munu ke na kutuba na yina me tadila nge:

«Beno sosa munu!» Mu ke na kusosa nge, Yave!

9 Kubumbila munu ve kizizi ya nge,

kubingisa ve kisadi ya nge na nkele!

Nge kele lusalusu ya munu, kubika munu ve,

kumanga munu ve, Nzambi mpulusu ya munu!

10 Ata ti tata na mama me manga munu,

kasi Yave ke yamba munu.

11 Yave, longisa munu nzila ya nge,

twadisa munu na nzila ya kusungama,

samu na bambeni ya munu.

12 Kuyekula munu ve na maboko ya bambeni ya munu,

samu ti bambangi ya luvunu me tedimina munu,

bawu ke sadilaka ngolo samu na kutalisa munu boma.

13 Mu ke na kiminu ya kutala bumbote ya Yave,

na yinsi ya bantu ya moyo.

14 Tula kivuvu ya nge na Yave,

vwanda na ngolo mpe vwanda na kibakala.

Tula kivuvu ya nge na Yave!

1 Mukunga ya Davidi, mukunga yina ba twadisaka na mfumu ya miyimbidi.

2 Mu me tula kivuvu ya munu na Yave!

Yandi me teka makutu ya yandi na munu,

yandi me kuwa kulooka ya munu.

3 Yandi me basisa munu na dibulu ya lufwa, na yisi ya poto-poto,

yandi me telemisa munu na zulu ya ditadi,

yandi me pesa munu ngolo ya kutambula.

4 Yandi me tula mukunga ya malu-malu na yinwa ya munu,

mukunga ya nzitusu na Nzambi ya beto.

Bantu mingi ke kuwa yawu, bawu ke zitisa Yave,

bawu ke tula kivuvu ya bawu na Yandi.

5 Kyese na muntu yina me tula kivuvu ya yandi na Yave,

mpe ke vwandaka ve kintwadi na

bantu ya lunangu mpe ya luvunu!

6 Yave, Nzambi ya munu, nge me lungisa samu na beto

mambu mingi ya nge ya ngitukulu mpe yina nge kanisaka.

Muntu ve me fwanana na nge.

Mu ke samuna mpe mu ke zabisa yawu,

kasi yawu kele ya mingi-mingi, ba lenda kutanga yawu ve.

7 Nge me zola ve minkayulu mpe makabu,

nge me fungula munu makutu,

nge me lomba ve Munkayulu ya Kuyoka to Munkayulu ya mulemvo.

8 Na yina, mu tubaka: «Mu ke na kukwiza,

na dibuku ya kuzingama yina ba sonikaka mambu yina me tadila munu.»

9 Nzambi ya munu, mu ke salaka luzolo ya nge

mpe Musiku ya nge ke na kati ya ntima ya munu.

10 Mu ke samunaka nsangu ya mbote ya ludedomo,

na kati ya mukangu ya nene ya bantu.

Tala, mu ke kangaka ve yinwa ya munu,

Yave nge zaba yawu!

11 Mu ke bumbaka ve na ntima ya munu, mambu ya kudedama yina nge me sala na munu.

Mu ke samunaka butsyelika mpe mpulusu ya nge.

Na kati ya mukangu ya nene ya bantu, mu ke bikaka ve na kuzonzila bumbote mpe kukwikama ya nge.

12 Nge Yave, nge ke bikaka ve na kutala munu kyadi.

Bumbote mpe kukwikama ya nge ke bumbaka munu bantangu nyonso.

13 Ya tsyelika, bampasi ke na kubwidila munu balweka nyonso,

mu lenda tanga yawu ve.

Yimbi ya munu ke na kulanda munu,

yawu ke na kusala ti mu tala mbote ve.

Yawu kele mingi kulutila bansuki ya yintu ya munu.

Ngolo ke na kumanisa munu.

14 Kuula munu, Yave!

Yave, kwiza mbangu samu na kusadisa munu!

20 Beto ke tulaka ntima na Yave,

yandi kele lusalusu ya beto,

yandi kele kinwanunu ya beto yina ke kebaka nzutu.

21 Ya tsyelika, ntima ya beto ke yangalalaka na yandi,

samu ti beto me tula kivuvu ya beto na Nkumbu ya yandi ya longo.

22 Yave, bika ti bumbote ya nge kuvwanda na beto,

samu ti beto me tula kivuvu na nge!

5 Mu me tula kivuvu ya munu na Yave.

Ya tsyelika mu me tula kivuvu,

mu me tula ntima ya munu na mambu ya yandi.

6 Mu me tula kivuvu ya munu na Yave,

kulutila nkebi ke vingilaka suka kukuma,

ya tsyelika, kulutila nkebi ke vingilaka suka kukuma.

5 Bawu ke na kubanza kaka na kukatula yandi na kisika ya yandi ya kuzangama.

Bawu ke na kuyangalala na mambu ya luvunu.

Na bayinwa ya bawu, bawu ke na kusakumuna.

Kasi na kati ya bantima ya bawu, bawu ke na kuvweza. Kupema

34 Tula kivuvu ya nge na Yave, landa nzila ya yandi.

Yandi ke zangula nge samu ti yinsi kuvwanda ya nge.

Nge ke tala ti bantu ya yimbi, bawu ke vwanda dyaka ve.

5 Tula kivuvu ya nge na Yave, na ntima ya nge nyonso, kusikidila ve na ndwenga ya nge. 6 Kangama na Yave na mambu ya nge nyonso, kana nge sala yawu, yandi ke sungika banzila ya nge.

3 Beto ke yangalalaka mpe na kati ya bampasi ya beto, kasi beto zaba ti bampasi ke pesaka mvibudulu, 4 mpe mvibudulu ke nataka muntu na kuvwanda ya kukwikama ata yandi ke na kutala mpasi. Kuvwanda ya kukwikama na kati ya bampasi ke pesaka kivuvu.

11 Beto ke na kulomba na Nzambi na kukumisa beno ngolo na lulendo ya yandi ya nkembo. Na yina, beno ke lenda na kuvibidila mambu nyonso mpe kutelama na ngwi.

7 Bampangi, beno vwanda na mvibudulu tii na kilumbu yina Mfumu ke vutuka. Beno tala kisadi-bilanga! Yandi ke vingilaka na mvibudulu nyonso bambuma ya mbote ya ntoto katuka bamvula ya ntete tii na bamvula ya nsuka. 8 Beno mpe, beno vwanda na mvibudulu. Beno kindisa bantima ya beno, samu ti Mfumu ke vutuka na mwa ntangu.

11 Beto ke tubaka ti Mfumu sakumunaka bawu, samu ti ba vwandaka na mvibudulu tii na nsukunu. Beno kuwaka mvibudulu ya Yobi, mpe beno zaba yinki Mfumu salaka na nsuka samu na yandi, samu ti Mfumu kele ya kufuluka na mbote mpe na kyadi.

22 Na kutumama ya beno na butsyelika, beno me kuma ya kuvedila samu na kuzolasana na butsyelika mutindu bampangi. Na yina, beno zolasana ya kulutila na ntima mosi. 23 Beno me kuzwa luzingu ya malu-malu. Beno me kuzwa yawu ve na lulendo ya mbuma yina lenda kufwa, kasi na lulendo ya mbuma yina ke kufwaka ve. Mbuma yango kele ndinga ya moyo mpe ya bantangu nyonso ya Nzambi. 24 Ya tsyelika, Dibuku ya Nzambi ke tubaka:

«Bantu nyonso kele mutindu matiti,

mpe nkembo ya bawu mutindu bifulu ya matiti.

Matiti ke yuma mpe bifulu ke kubwa.

25 Kasi ndinga ya Mfumu kele ya bantangu nyonso✝.»

Ndinga yango, ni Nsangu ya Mbote yina ba zabisaka beno.

9 Mfumu ke na kulutisa ve ntangu samu na kulungisa nsilulu ya yandi mutindu bantu ya nkaka ke na kubanza. Yandi ke na mvibudulu samu na beno. Ya tsyelika, yandi zola ve ti yandi mwangisa bantima ya bantu ya nkaka. Kasi yandi zola ti bantu nyonso bika nkadulu ya yimbi.

1 «Kimfumu ya Mazulu ke vwanda mutindu bandumba kumi yina bakaka minda ya bawu, mpe basikaka samu na kwenda kubwabana mulumi. 2 Tanu na kati ya bawu vwandaka ve na mayela, mpe tanu ya nkaka vwandaka na mayela. 3 Bayina vwandaka ve na mayela bakaka minda ya bawu ata kunata mafuta mingi. 4 Kasi bayina vwandaka na mayela bakaka minda ya bawu mpe bambwata ya mafuta. 5 Mutindu mulumi vwandaka kwiza nswalu ve, bandumba nyonso kumaka na pongi, mpe lalaka.

6 «Na kati-kati ya mpimpa, bawu kuwaka ndinga yina lookaka: "Mulumi yandi yayi! Beno kwenda kubwabana yandi!" 7 Na yina, bandumba nyonso kumi vumbukaka mpe bandaka na kukubika minda ya bawu. 8 Bayina vwandaka ve na mayela tubaka na bayina vwandaka na mayela: "beno pesa beto mwa mafuta samu ti minda ya beto me banda na kufwa." 9 Kasi bayina vwandaka na mayela vutulaka: "Ve! Yawu kele mingi ve samu na beto mpe beno. Ya kele mbote ti beno kwenda kusumba mafuta na bayina ke tekisaka yawu." 10 Ntangu bawu kwendaka sumba mafuta, mulumi kwizaka. Bandumba tanu yina vwandaka ya kukubama kotaka na yandi na kati ya yinzo ya makwela, mpe ba kangaka mwelo na fungula. 11 Na manima, bandumba tanu ya nkaka kwizaka mpe tubaka: "Mfumu! Mfumu! Zibudila beto mwelo!" 12 Kasi mulumi vutulaka: "Ya tsyelika, mu ke na kuzabisa beno: Mu zaba beno ve."» 13 Na yina, Yesu tubaka dyaka: «Beno lala ve pongi samu ti beno zaba ve kilumbu mpe ngunga.»