Família

19 Bóngo mare mhoromaté nim moke re neke nesté, re mésié kyaté né ta dolo mésié anim diri nóté."*

Jou Lahatala npo fié pa bo tfatélaké

1 Yesusé nméiténé rewóré, tabóngo nfatoléné keé bótén Galilea se nfan I po bótén Yudea, po wóé Yordané ni féspalé. 2 Pocé ma reni kyat félé ta rfadéréré re Yesusé nóté, se Yesusé nfafié keé kyaté-kyat ta rpisé né.

3 Se kyat Yahudi ta rdéréré dodoto Farisi séfis néli rfano Yesusé bo réyówé nó sélsólé, se rutné I faje, "Iga bo tdéréré ité rir aturan agama, iga mon faisó re néfsówé, ga ntélaké ni pégelé njé ta ni sabab sói le, bisa pari tisé?"

4 Mayta Yesusé nécegé si faje, "Nihalé fsae pafule ta rlefo po Jou Lahatala ni Buké wlólo, ta ni glio né faje, ‘Po faiwóbno né, Jou Lahatala ntulada kyaté né món re mépiné’.* 5 Jou Lahatala ma néceg faje, ‘Ta mulo iga móné né ga réfsówé, nase rfatoléné keé riri neke re moke né, bo si re riri pégelé né rdadi be esó.’* 6 Se ni ngale si re rdadi kyat séluw pana, mayta esó le. Se ta mulo ga kyat séluw ta Jou Lahatala re nfajólo si rdadi esó né, ndél pa bo kyat ité ta tfatélako si."

7 Pocé rlongé ta Yesusé néceg fajé né, tabóngo kyaté-kyat Farisi né rutné I nóté, "Pana fajé, pe sói se nabi Musa npo fié pai ta bo ntélaké ni pégelé, mare npo ni surat télaké njé po ni pégelé njé ni?"*

8 Tabóngo Yesusé nécego si nóté, "Sababta lénglongomi lé, ta mulo Musa ndéréré be mew wlomi né, sogado ga npo mew fié bo ftélaké nimi pégelé né. Mayta po faywóbno ta Jou Lahatala ntulada món re mépiné né, wlo pa bo fpe fajé. 9 Se flongé fafié ta Ya kécegé nte: kyat pai ta ni pégelé njé nyó sól pa, ga ntélak i bo néfsóo nó mépin nésé, necé i re nyó sólé."

10 Pocé Yesusé ni motemote nesté rlongé ta néceg fajé né, tabóngo récegé I faje, "Alli, iga re tafsówé ga bisa tfatélak pa, ta fié né ma téfsówé le na."

11 Mayta Yesusé nécegé si faje, "Kyat iglé né wlori pa bo rdéréré ta néi, maduga kyat iglé ta Jou n’gali si né ta nase wlori. 12 Sababta reni món iglé né rtub nétó sogado rpélóyé né, bisa réfsów pa. Reni iglé ta kyat nésé rpe sogado bisa réfsów pa né. Reni món iglé nóté ta wlori pa bo réfsówé, sababta bo rpe riri kolano Jou Lahatala njé ni yabé né le. Se pai ta wlo néfsów pa, fajé bo ma néfsówé le na."

Yesusé nfabarakat yomya-yomya né

13 Pocé reni kyaté-kyat ta rut yomya myaku né po Yesus ni, réroré bo Yesusé nétewlé fao né po si ni bo néroré riri barakaté. Pocé ga ni motemote nesté rcawané keé si.

14 Se Yesusé nécegé ni motemote nesté faje, "Ma ffaket si na, fajé le bo rwóm lima Ya ni, sababta kyat ta wlori mya ta dolo yomya nesté, si ta néi ta rpo wlori se rdadi Jou Lahatala ni kyat si bo nkawasa dolo Kolano po riri hidupé wlólo." 15 Rewóré ta néi, Yesusé nétewlé fao né po yomya nesté ni, se nfabarakat si. Rewóré ta néi, ga nfatoléné keé géwgów ta néi se nfané nóté.

Móné mya isó ta nkayangé

16 Nuéncó, reni móné mya isó nfan po Yesus ni se nutné I faje, "Guru, fayfié sói ta mare ya kpe bo khidup re Jou Lahatala sogado fajé néli le?"

17 Bóngo Yesusé nécegé i faje, "Pe sói se mutné Ya sói ta fié né? Ta nfié njé maduga Jou Lahatala le. Se iga wlemé bo aw re I sogado fajé néli le, awé mare mdéréré sói le ta I nparenta né."

18 Pocé bóngo móné njé nutné Yesusé nóté, "Jou Lahatala ni parenta ta fanfawa ta mare kdéréré né?"

Bóngo Yesusé ncónglo i, "Ma mfapun na, ma myó sól na, ma mfalewés na, re ma mmalól na. 19 Bóngo mare mhoromaté nim moke re neke nesté, re mésié kyaté né ta dolo mésié anim diri nóté."*

20 Bóngo móné mya njé nécegé Yesus faje, "Ta féléo i ta mécegé né, ya re kpe ndimé. Se góli sói nóté ta kpe pafule né?"

21 Yesusé nécego i nóté, "Iga wlemé ncuka bo mdéréré Jou Lahatala ta fatuw-fatuwé, mare mfané bo mwagé keé nam haréta né ndimé, tagare ni mulo né mfanténo keé kyaté-kyat ta reriri reróri pa né. Iga sogado mpe fajé, ga tagare nase mduk haréta ta po soroga lo né. Rewóré ta néi, ga aw lima bo mdéréré Ya."

22 Móné njé nlongé ta néi, wlo njé ta délé nkangelangé, sababta i nó haréta né tadélé félé.

23 Rewóré ta néi, Yesusé nécegé ni motemote nesté faje, "Ffatélolmo mew fafié ta Ya kécego mewé nte, kyat ta reriri reróri félé né ta délé rkangelangé bo rpo wlori né néli Jou Lahatala ni bo nkawasa dolo Kolano po riri hidupé wlólo né. 24 Se fatélolmo fafié nóté ta Ya kécegé nte, Ya kfatailo si né dolo unta ta pélóy isó bo ncungé po smo ni mdóké lo né, tadélé kangelangé! Mayta ta lébé kangelangé né, kyat ta reriri reróri félé né, bo rpo wlori néli po Jou Lahatala ni bo nkawasa keé si né."

25 Ta Yesusé nécegé né, ni motemote nesté ta délé rtélélé se récegé I faje, "Pana fajé, pai ta nase bo nduk salamaté?"

26 Pocé Yesusé néngóto si, bóngo nécegé si faje, "Iga kyaté, bisa rfasalamaté riri diri né pa. Maduga Jou Lahatala le ta bisa nfasalamaté kyaté, sababta sói le I bisa npe ndimé."

27 Pocé bóngo Petrusé nécegé Yesus faje, "Amé nte re kfatoléné keé mam sói néli né se re kdéréré Awé! Se sói ta nase amé bo kduké?"

28 Yesusé nécego si nóté, "Flongé fafié ta Ya kécego mewé nte. Pote se néli, iga dunia re ndadi nóbéné ndimé, Ya Kyat ta Ya I yama Jou Lahatala ni nase kdadi Kolano se ktolné nik kawasa po nik manano wlólo né, pocé mew dórén yófésó re séluw ta fdéréré Ya né bo ftoléné fdé Ya, bo fkawasa Israelé né riri suku yófésó re séluwé né. 29 Se kyat pai le ta rdéréré Ya, sogado rfatoléné keé riri um pari fténori re ramóri pari, riri moke re neke nesté pari, nturi pari róri bété, kyat ta néi Jou Lahatala nase nfamulo si riri ta féyfié né ni féléo nuén witéncó. Ta rduké né, necé le pa, mayta nase si re Jou Lahatala sogado fajé néli le. 30 Sababta kyat pai ta rpélóy ta réngóto si dolo rtubé né, si ta néi ta nase reriri ngale gélesó pa, mayta kyat ta réngóto si dolo reriri ngale gélesó pa né, si ta néi ta nase bo rtubé né."

6 Sababta po faiwóbno fafié, ‘Jou Lahatala ntulada kyaté né, món re mépiné’. 7 I nfarén fajé bo món pai le ta néfsówé, i nase nfatoléné keé ni déluté né, bo i re ni pégelé njé rfatolné si, 8 bo si dórén luwé né rdadi esó le. Se re séluw pana, mayta esó le. 9 Se sói le ta Jou Lahatala re npe se tdadi esó né, ndél pa bo tfatélaké."

13 Masike wlomi né lé, mayta funé fdo ta fié po ntumi né ni. Néga bo nimi moke Jou Lahatala ta I po soroga wlólo njé? I nase tadélé npo ni Rohé njé po kyat pai lé, ta néror po I ni né."