Filho de Deus

3 'Ai Ngowa’a Nau’u gena-ge 'A sijumu Ma Jou’ongu Madutu 'ai kuasa re 'Ai kabasarana. Unanga gena-ge 'ai duhu re ngari mo-moini ma tero Ma Jou’ongu Madutu. Unanga 'a pake 'ai demo ma kuasa di’a 'O jaga re 'O parenta mo-moini. Unanga 'o sigofi ngowa’a manga ḏosa togumu i’a, kara 'O tegoro ra Ma Jou’ongu Madutu 'ai giama ma kuwiḏa i’a da’u toma soroga.

Ma Jou’ongu Madutu 'ai Ngowa’a Nau’u lebe kau’u reo mala’ekata

4 Dadi Ma Jou’ongu Madutu 'ai Ngowa’a Nau’u, Unanga sanga ḏe-ḏegoro lebe kau’u reo mala’ekata mo-moini re 'Ai lomanga ga’a Ma Jou’ongu Madutu 'U sitolumu lebe la-lamo’o reo loma-lomanga ga’a Ma Jou’ongu Madutu 'o pula’a toma mala’ekata mo-moini.

14 'Idini gena-ge ri dadi manusia, re Unanga 'o tegoro tananga sigolona re wa oḏi’i ḏua 'Ai kabasarana. Kabasarana gena-ge ma 'asala ra Ma Jou’ongu Madutu sababu Unanga 'Ai Ngowa’a Nau’u pa’i matengo. Sababu Unanga, ngene wa basono tala Ma Jou’ongu Madutu 'ai mura re dadalara masala ra ngene, re Unanga 'o sijumu ma ba-banari mangale Ma Jou’ongu Madutu ra ngene.

18 Matengo i’a mai nyangu ro oḏi’i Ma Jou’ongu Madutu, mada’a pa’i 'Ai Ngowa’a Nau’u matengo, ga’a 'O marimoi rai Ḇaḇa. Unanga gena-ge ra sibaiti re Ra sitarangi mangale Ma Jou’ongu Madutu ra ngene.

17 Yesus 'o kanau i’a ra ananga, " 'Ari Ḇaḇa 'o munara tau-taunu singadolo 'orasa nange-ne, re Ngoi to munara ḏi’i."

18 Yesus 'ai demo-demo gena-ge si’a’a ngowa’a Yahudi manga bi-biri’i ganapu disa ngo’omo di’a mau sisengene Unanga. Sababu pa’i Yesus 'a mete’e ua ḇato ananga manga 'agama ma 'atoranga mangale Sabata ma wangere, mada’a Unanga masiretene ḏi’i ro kanau, Ma Jou’ongu Madutu Unanga 'ai Ḇaḇa re dadi Unanga 'a site-tero 'ai diri ma tero sa’olo Ma Jou’ongu Madutu.

Petrus 'o ngaku Yesus gena-ge 'O Kristus

13 Yesus 'o tagi toma daeraha co-cori limau Kaisarea Filipi. Toma ngi’i gena-ge Unanga 'o sano Tai me-mete’e, "Ngowa’a 'aḏi kanau, Ngoi Manusia ma Ngowa’a Nau’u, ne 'a guna?"

14 'Ai me-mete’e 'aḏi sangoro, " 'Age mamuni’a 'aḏi kanau Jou 'a Yohanes tukanga baptis, 'age mamuni’a 'aḏi kanau Jou 'a Elia, 'age mamuni’a ḏi’i 'aḏi kanau Jou 'a Yeremia, bolo nabi matengo i’a."✝

15 Yesus dadunu 'o sano, "Mada’a na’o mete’e ngini masiretene nena-ne, Ngoi ne 'a guna?"

16 Simon Petrus 'a sangoro, "Jou 'O Kristus, Ma Jou’ongu Madutu 'o 'ahu-'ahu, Unanga gena-ge 'Ai Ngowa’a Nau’u."✝

16 Sanga baptis togumu i’a, Yesus 'o baolo toma ḇanyo, kage-kage diwanga 'i talanga re Yesus 'o oḏi’i Ma Ngagara 'Ofi-'Ofi 'i matuhu ma tero sa’olo namo dara 'i 'uci ra Unanga. 17 Gena ḏua, ananga 'aḏi 'isene Ma Jou’ongu Madutu 'ai iḏingi ma betongo so’o ne: "Unanga nena-ne, 'Ari Ngowa’a Nau’u Ta dadalara, Ngoi 'ari 'akala re sinyingara ma sanangi Ta sipa’ala ra Unanga."✝

15 Na’o 'a guna ḇato 'o mangaku mangale Yesus gena-ge Ma Jou’ongu Madutu 'ai Ngowa’a Nau’u, Ma Jou’ongu Madutu ḏi’i 'o 'ahu marimoi toma ngowa’a gena-ge. Re ngowa’a gena-ge 'ai 'ahu marimoi ra Ma Jou’ongu Madutu.

9 Ma Jou’ongu Madutu ro sijumu 'ai dadalara ra ngene so’o ne: Unanga gena-ge 'o 'utusu 'Ai Ngowa’a Nau’u pa’i matengo ḇato toma dungia nena-ne, la ngene nga’unu wo sanga 'ahu ra Unanga 10 Dadi nena-ne si’aro’o dadalara: Ngene wo siḏa ua wo dadalara Ma Jou’ongu Madutu, mada’a Unanga siḏa na dadalara ngene, singadolo 'O 'utusu 'ai Ngowa’a Nau’u di’a 'O sapolo toma dungia nena-ne re 'O sidoa’a 'Ai lese sa’olo jou-jou, la Unanga 'a singi-ngiranga nanga ḏosa-ḏosa.

8 Mada’a ngowa’a ga’a 'a’a ḏosa tau-taunu, ananga gena-ge 'Iblisi ma ngowa-ngowa’a. Sababu ma mulaingi i’a, 'Iblisi 'i baraḏosa ḏua. Ma sababu gena-ge, Ma Jou’ongu Madutu 'ai Ngowa’a Nau’u 'o sapolo toma dungia nena-ne di’a 'a siwejere 'Iblisi ma munara.

12 Ngowa’a ga’a 'aḏi marimoi Rai Ngowa’a Nau’u, ananga gena-ge sanga 'ahu kasingado-ngadolo i’a re ngowa’a ga’a 'aḏi marimoi ua ra Unanga gena-ge, ananga gena-ge sanga 'ahu kasingado-ngadolo i’a ua.

Yesus 'o sapolo di’a sisalamata manusia

16 Ma Jou’ongu Madutu 'o dadalara manusia toma dungia ma tero so’o ne: Unanga ro 'utusu 'Ai Ngowa’a Nau’u pa’i matengo, la 'a guna ḇato 'o ngaku 'Ai Ngowa’a Nau’u gena-ge, 'o iranga ua kasingado-ngadolo i’a, mada’a 'o sanga 'ahu kasingado-ngadolo i’a.

21 'Ari Ḇaḇa dadunu 'o si’ahu moju ngowa’a senge-sengene, re 'O pula’a 'ahu kasingado-ngadolo i’a ra ananga. So’o gena ḏi’i Ngoi, 'Ai Ngowa’a Nau’u, To pula’a 'ahu kasingado-ngadolo i’a ra guna ḇato mete’e 'Ari mau. 22 Sidogo ḏi’i, 'Ari Ḇaḇa masiretene 'O sijuruhakimi 'a guna ua sababu 'Ai kuasa mo-moini Unanga ra sipula’a ra Ngoi, 'Ai Ngowa’a Nau’u, di’a sijuruhakimi manusia. 23 'Ari Ḇaḇa 'a si’a’a so’o gena, la ngowa’a mo-moini 'aḏi silamo’o Ngoi ma tero sa’olo ananga 'aḏi silamo’o Unanga. 'A guna ḇato ga’a silamo’o ua 'Ai Ngowa’a Nau’u, silamo’o ua ḏi’i 'Ai Ḇaḇa ga’a 'utusu ḏua Unanga gena-ge.

25 Ni ngaku mode-mode’e 'Ari demo-demo nena-ne: Ḏuanga i’a ma 'orasa 'i ngadolo - re nange-ne 'orasa gena-ge 'i ngadolo ḏua - wakutu ngowa’a ga’a ma tero sa’olo ngowa’a senge-sengene, ananga gena-ge 'aḏi 'isene Ma Jou’ongu Madutu 'ai Ngowa’a Nau’u 'ai iḏingi. Re ngowa’a ga’a ya totoho, ananga ḏuanga i’a 'aḏi 'ahu. 26 Ma tero sa’olo 'Ari Ḇaḇa masiretene 'o dadi 'ahu ma cimi, so’o gena ḏi’i, Ngoi, 'Ai Ngowa’a Nau’u masiretene, To dadi 'ahu ma cimi ḏi’i, sababu Unanga ro pula’a 'Ai kuasa ra Ngoi.

12 Mada’a 'a guna ḇato 'o dawongo re 'o ngaku Unanga, Unanga 'o pula’a haku ra ananga di’a 'aḏi dadi Ma Jou’ongu Madutu 'ai ngowa-ngowa’a. 13 Ananga gena-ge 'aḏi dadi ua Ma Jou’ongu Madutu 'ai ngowa-ngowa’a, sababu manga ete re dotumu, bolo manusia manga nyafusu, bolo nau’u 'ai nyafusu. Mada’a ananga gena-ge 'aḏi dadi Ma Jou’ongu Madutu 'ai ngowa-ngowa’a sababu 'ahu su-sungi ga’a ma 'asala ra Unanga.

20 'Ari 'ahu ne, ngoi 'ari 'ahu 'ua mada’a Kristus masiretene ro 'ahu ra ngoi. 'Ahu ga’a ngoi ta basono nange-ne sababu ngoi to ngaku Ma Jou’ongu Madutu 'ai Ngowa’a Nau’u ga’a 'o dadalara ngoi re Unanga 'o sengene di’a ngoi.

4 Mada’a wakutu ma 'orasa ri ngadolo, ga’a Ma Jou’ongu Madutu ro sitantukanga pasala ḏua, Unanga 'o siḏingoto 'ai Ngowa’a Nau’u sapolo toma dungia. Re we-were’a matengo mu sibuoro Unanga. Sababu gena-ge sa’olo ngowa’a Yahudi, Unanga balasu 'o ta’aloko ra Musa 'ai hukumu. 5 Unanga 'o sapolo di’a 'O tuusu ngowa-ngowa’a ga’a Musa 'ai hukumu 'i parenta manga 'ahu, la ngene nyengara wo dadi Ma Jou’ongu Madutu 'ai ngowa-ngowa’a nau’u.

6 Re sababu ngini mode-mode’e reni dadi Ma Jou’ongu Madutu 'ai ngowa-ngowa’a nau’u, Unanga gena-ge 'o siḏingoto 'Ai Ngowa’a Nau’u 'Ai Roh, di’a 'i osama ra ngini ninga 'akala re sinyingara ma dara. 'Ai Roh gena-ge 'i munara ra ngini ninga 'akala re sinyingara ma dara singadolo ngene nyengara wo maḏigaro’o ra Ma Jou’ongu Madutu, "Baba, 'ari Ḇaḇa!"

10 Sababu na’o wakutu ngene Ma Jou’ongu Madutu 'ai lawana, Unanga 'o sirimoi ngene ra Unanga sababu 'Ai Ngowa’a Nau’u 'ai se-sengene; tantu ḏua toma 'orasa nange-ne, wakutu ngene rewo marimoi ra Ma Jou’ongu Madutu, Kristus ḏuanga i’a 'o sisalamata ngene sababu Unanga dadunu 'o 'ahu moju!