Filho de Deus: o que significa a divindade de Jesus?

17 Lo Yiisu ábvuhulu kundaa bo ti: «Tee sonali Taara a me li mu okasala, ya mehe si ndi mu okasala.» 18 Mu nkooro a ndagha oyo, bakwuru ba ba-Dzwife bákabvulu osagha nde odzwa, mu kuulu nde ka yini a bungili bu etsughu kii Sabate ákatsumunu o. Lo nde ákalyele si ti Nzaami li Taara a ndeme. Mbimbili oyo yíkasuo ti nde li nsihi ya Nzaami.(Dzã 5:17,18)

14 Ya Ndagha yiikighiri mbwuru,

nde aayakala ŋa kara li bihi,

ya bihi liimono nsia a nde,

nsia oyo yi ookagyagha Mwana wu a mbunu kundaa Taara.

Nde álwulu mu bwehe ya mu engaŋma.(Dzã 1:14)

18 Mbwuru nkini ámaamono Nzaami o. Lo munde wu áasuo baara nde, me Nzaami Mwana wu a mbunu, wu li ŋa likara li Taara.(Dzã 1:18)

3 Mwana wu, wu li osehene o nsia a Nzaami,

ya wu li omoŋono kuu bu ali nde,

aakasughu byehene mankaana mu ndagha a nde yi a lileene.

Bu amana otsehebe baara banga a masumu,

nde aabwi-nsini ku kwogho kii babaghala kii nsia mu mayulu.

4 Mwana bu abvulu bangye-yulu,

nde ágwolo pfa li nkwumu yibvulu bunene ya nkwumu yi a ndaa-bo.(Eebere 1:3,4)

16 Bu basaaboghoro nde, ŋaana oŋo Yiisu ápala mu madza. Ya mono, mayulu mádzubulu kundaa nde, ya nde ámono Mufulu a Nzaami mu okayakumunu ti beeme, ya gyi ŋa yulu a nde. 17 Ya ndagha yífi mu mayulu ya yílyele ti: «Wu me Mwana a me wu mukolo. Mu nde me aankamono esee.»(Matye 3:16,17)

13 Yiisu bu ato mu etsulu e nsie ki eli bele ya bvulu lili Sedzare lili Filipe, nde áfwulu kundaa binduono bi nde ti: «Mu mbiili a baara, Mwana a mbwuru nande ali?» 14 Bo bábvuhulu nde ti: «Mu bana ti me Dzã Muboghoro, babake ti me Eli, bakimi ti me Dzeremi bwunu we mumõ ŋa kara li mibighili». 15 Yiisu áfwulu bo ti: «Lo mu be, me nande ndi?» 16 Simõ Piere ábvuhulu ti: «We li Kriste, Mwana a Nzaami wu a mweẽ.»(Matye 16:13-16)

15 Nswe mbwuru wu aakihi ti Yiisu li Mwana a Nzaami,

Nzaami li mu nde ya nde li mu Nzaami.(1 Dzã 4:15)

16 Mu obo, Nzaami bu ábvulu dzyi nsie, ágwi Mwana a nde wu a mbunu, mpaala nswe mbwuru wu aasa kana mu nde anyaã okpa, lo abagha laama lili mibvu ya mibvu.(Dzã 3:16)

9 Bu, me bu oosuo Nzaami dzyi li nde ŋa kara li bihi-a-be:

Nde aagweghe Mwana a nde wu a mbunu mu nsie,

Mu kuulu bihi-a-be likala baba mweẽ mu nde.

10 Ya dzyi lilo lili bu:

Ka oli ti bihi-a-be líidzyi Nzaami o,

Lo me nde áadzyi bihi-a-be,

Ya áagweghe Mwana a nde ti anga mukaba wu osa masumu ma bihi-a-be kolokolo.(1 Dzã 4:9,10)

8 Mbwuru wu aakasa masumu li wu a ndaa dyabulu,

Mu kuulu dyabulu ábaana osa masumu obaana ku ebaana.

Mwana a Nzaami ágyi mu otsala bigyighili bi dyabulu.(1 Dzã 3:8)

10 Mu kuulu, kala ti ŋa líli bihi-a-be mitaara mi Nzaami, Nde ábvurulu ogwihini o nde ya bihi-a-be mu lipfu li Mwana a nde, lo bunu bihi-a-be ligwene obvwughu mu bumweẽ bu mwana a nde, bu liibvurulu ogwihini ya nde.(Rome 5:10)

21 Bwunu a bu ookasiili Taara baara ba bákpi ya aakagwa bo bumweẽ, bwunu obo si Mwana aakagwa bumweẽ kundaa munde wu adzyi nde. 22 Ya Taara ka aakalamana mbwuru o, lo nde aagwi litumu lwohono lili okalamana kundaa Mwana, 23 mpaala baara bwohono bagwa Mwana budziri ti bwunu a bu baakagwa Taara budziri. Mbwuru wu aagwene ogwa Mwana budziri, nde ka li mu ogwa si Taara wu aagweghe nde budziri o.»(Dzã 5:21-23)

25 Mu engaŋma, me ndyele be ti: Lo matala mali mu ogya, ya mu bu mo mamaato, maala ba bákpi sa bagyughu likyi li Mwana a Nzaami ya babo ba akala baagyughu lo sa bakala baba mweẽ. 26 Mu kuulu, bwunu a bu oli a Taara bumweẽ mu ndeme, oboho si bu aagwi nde Mwana mu okala a bumweẽ mu ndeme.(Dzã 5:25,26)

12 Wu li a Mwana li a laama,

wu gwene a Mwana a Nzaami ka li a laama o.(1 Dzã 5:12)

12 Lo kundaa babo ba báagyagha nde,

babo ba baakasa kana mu nkwumu a nde,

nde aagwi muswa mu okala baana ba Nzaami. 13 Baara babo ka báburu bo bu baakaburu baara o, bwunu we mu waa lili baghala ya mukaha, lo mu waa li Nzaami.(Dzã 1:12,13)

4 Lo matala bu makughu, Nzaami aagweghe Mwana a nde, wu óburu mukaha, ŋa lili nkini kunsa litumu li mikyene, 5 mu okwulu ba bali kunsa litumu li mikyene, mpaala bihi-a-be likala baana ba ákwuhu nde. 6 Mu kuulu be lili baana, Nzaami ágweghe Mufulu a Mwana a nde, munsa mikolo mi bihi-a-be. Nde wu li mu okakehe engubu ti: Aba, Taara!(Ngalate 4:4-6)

20 Me bu ndi mweẽ, ka oli me o, lo Kriste li mweẽ mu me. Mu bumweẽ bu me bubu mu musunu, me ndi a bo mu kana mu Mwana a Nzaami wu áadzyi me ya wu áagwi nyuru a nde ndeme mu nkooro a me.(Ngalate 2:20)