14 Duma o dunia ma dodogu yaado waasi, de o habari ḋaloloha o Gikimoino gena bilasu isihabari kasi sidago o dunia ma pupuku ihaka, la o bi doku yangodu lo aku yoiseka. Ḋabolo de o dunia ma dodogu asa imasidiado.>>

29 <<Ma orasi o susa de o sangisara magena ipasaka, de o wange de o ngoosa isiwa kawa so ḋapuputuka. So o dipa lo ihiti so o moi-moi ḋangodu o dipaka ma dodagi he yamote kawa, de o bi ngoma lo asa o dipaku itura. 30 O orasi magenaka de o dipaka o nonako moi asa yasikelelo gena ma ngale Ngohi, o Nyawa ma Duhutu, tahino kali. De o bi nyawa yangodu o duniaka asa yododora, sababu ona asa ikelelo Ngohi tahino o lobi-lobi ma rabaku touti de to Ngohi Ai mulia ma siwa tomasisaoka de Ai kuasa ma buturu. 31 O trompet ma ili ilamo asa yawuwu, de to Ngohi Ai malaikat tasulo la itagi yatolomu to Ngohi Ai nyawa yangodu o Gikimoi wahihirika, o dunia ma pupuku ihaka sidago o dunia de o dipa ma batika.>>

42 Komagena so Ngohi totemo bilasu ngini nimajaga de nia dailakoka, sababu ngini nisidodoguwa muruoka de nia Jou asa wahino.>>

43 <<Nimasosininga to Ngohi Ai ade-ade komanena: Nakoso o tahu ma duhutu yanakoka o putu itongirabaka de manga tahu ma rabaka itotosi iwosa, de igogou ona asa yojaga isidodiahi ma ngale itotosi gena upa iwosa. 44 Komagena lo ngini bilasu nimajaga nisidodiahi la Ngohi nidamaha, sababu ngini nianakowa ma orasi muruoka de Ngohi o Nyawa ma Duhutu asa tomasidiado.>>

20 Niadoto onaka o bi moi-moi ḋangodu o kia tinisusulo nginika. De niososininga, Ngohi asa togoge dede ngini o orasi manena de isikahika, ma bati o dunia ma dodoguka.>>

32 <<Ngaroko komagena, o nyawa moi lo asa yanakowa to Ngohi o Nyawa ma Duhutu Ai hino ma orasi eko ma wange. Salanta o malaikat o sorogaka lo yanakowa de Ngohi Awi Ngopa masirete lo tanakowa, ka cawali Ai Baba masirete wanakoka.

1 Bilasu ngona nanako done ma orasi o dunia ma dodoguka o nyawa o bi dorou moi-moi yaaaka gena foloisi yadala so magena yasisusa o bi nyawa ma somoa o manara itotiai yaaka. 2 Sababu o bi nyawa ma dorou magegena asa yodupa yaaka o dorou maro ka to ona manga rohe masirete isiboso de cawali ka o pipi yonyafusu, komagena lo o dorou yodupa yaaka gena imacaralamo, so manga demo masireteka lo ona imasihie, sidago lo yobicara maro o nyawa manga agama ihihiwa, de yoholu yasigise manga dodihimoka, de yoholu manga sininga ma loha yahike so manga sininga gena o Gikimoi wodupawa, 3 komagena lo o siboso de o dame gena ihiwa manga gianongoruka eko manga dodiaoka, de o nyawa ma somoa manga ronga yoaka ḋatorou, de to ona manga sininga masirete yaparetawa, de ona yatobadoosa de lo o loha yahoholu, 4 de ngaroko o kia naga moi manga sininga ma rabaka yafikiri ḋatorou, duma ka yaaka sidago yodupa o nyawa ma somoa yaaniaya de ḋangodu itemo ka yanako. So o bi nyawa maro komagena manga dupa o Gikimoika gena ihiwa, duma ka yodupa yamote to ona manga nyafusu masirete. 5 De ngaroko ona magena itemo aku yaaka o moi-moi maro o Gikimoi wodudupa, duma iholu o Gikimoi Awi kuasa yariwo la aku manga oho ḋaloha. Bilasu nomasirese ikuruka de o bi nyawa maro ona komagena.

17 O Gikimoi wotemo,

<O dunia ma dodogu ma orasi he yaadoka,

de Ngohi asa o bi nyawa yangoduku Ai Gurumi

tahike

la wowosa de wopareta.

Mutuwade to ngini nia ngopa-ngopa yanau de o ngopeḋeka

asa to Ngohi Ai demo yoise de isingangasu,

de nia gohiduuru asa yakelelo o gogelelo Ngohino,

de nia dodihimo asa yamake o doguruga Ngohino.

18 O orasi magena lo

Ai leleani-leleani,

yanau de o ngopeḋeka,

onaku asa to Ngohi Ai Gurumi tahike

la wowosa de manga siningaka wopareta

so ona lo Ai demo isingangasu.

19,20 Ngohi manena o Jou tomomulia

so ma wangeka o bi nyawa yangodu asa tafanggali,

duma o orasi magena yaado waasi,

de Ngohi asa o nonako ihahairani taaka.

Ena gena, Ngohi asa taaka o dunia ma ḋokuka

o au, de o uku, de lo o ḋopo de o marasa

la Ai kuasa o bi nyawaka tasikelelo.

Komagena lo asa taaka kadaku o dipaka

o wange he isiwa kawa so ḋapuputuka,

de o ngoosa ḋasawala koloko o au

sidago o bi nyawa yohairani icarawa.

21 La o orasi magena nagoona imasigaso de golo Ngohika

done asa isalamati.>

15 Komagena so ngomi minisingangasu maro o Jou to Una Awi dodoto gena itemo ma orasi o Jou wahino kali, upa ngomi ka miohosi ma ngale o Jou powimake kasi, duma iḋomaka o nyawa nagoona isosoneka gena asa yasioho kali, de ḋabolo asa ona dede ngone ka pooohosi tanu ngone inangodu de o Jou pomakamake. 16 Sababu o Jou Una masirete asa o sorogaka, de wouti so wosulo womaili-ili, de o malaikat ilalamo moi waaso, de lo o Gikimoi Awi trompet moi yawuwu. Ḋabolo de ma Kristus Awi nyawa nagoona isosone asa yasioho iḋoma kasi. 17 Imatodoka de o nyawa ona magena dede ngone ka pooohosi asa o Gikimoi wonangoso de wonatide o lobi-lobi ma rabaka, la kagena o dipaka asa o Jou pomakamake. So komagena de o Jouka asa ngone inangodu pogoge de pooho ka sidutu ikakali.

18 De o demo moi-moi magenena ngini nimatekesiduduga la ningodu asa nia sininga ḋaputuru.

6 Upa sidago ngone o orasi moi lo paaka maro o nyawa ma somoa, de ona maro o nyawa yakioloka de imajagawa so yosidailako waasi ma orasi o Yesus wahino kali. Duma ngone o bubutu ma rabaka pogogewa, so ngone bilasu maro o nyawa yakokiolowa la pomajaga de pomasidailako ḋaboloka, de lo maro o nyawa yadadaluwa so nanga sininga de nanga rohe ma nyafusu gena aku papareta ḋaloha. 7 O nyawa la nakoso yakiolo gena bilasu o puputu de asa aku yakiolo, de lo nakoso yatobadalu gena bilasu o puputu de asa aku yadalu. 8 Ma ngale komagena so nakoso ngone maro o nyawa la o wange ma nita ma rabaka pogoge, de ngone bilasu paaka maro o nyawa manga sininga de manga rohe ma nyafusu gena yapareta ḋaloha.

Komagena so ngone bilasu pomajaga la ma Kristus powipiricaya ḋaputuru de lo o nyawaka nanga dodara ilamo, ma ngale upa sidago o dorouku asa potura. Maro o nyawa yanau moi asa de awi salawaku wacohono la womasijaga, ma ngale una witudu eko wingami de upa awi mamatako yabolo. De bilasu ngone pongongano igogou o Gikimoi asa wonasisalamati so o oho ka sidutu ikakali pamake. Komagena maro o nyawa moi asa o helm womasitibaku la womasijaga, ma ngale upa he awi sahe ḋanabo. 9 Upa sidago o Gikimoi Awi edekati gena nanga dorou wodoosa so wonasisangisara, duma Una Awi edekati ma ngale dede nanga Jou Yesus Kristus wosone so o Gikimoi aku wonasisalamati.

34 <<Nimajaga ḋaloha, upa sidago ngini nirame-rame ifoloi de nidalu, eko o orasi isigeto-geto niosininga ka nia oho o duniaka, sidago done Ai wange Ngohi tahino kali gena inisitodokano de ngini nimasidailako waasi. 35 Sababu Ai wangeka magena asa o bi nyawa yangoduka yatodoka, maro o haiwani moi ḋatodoka de o sabatolo. 36 So bilasu ngini salalu nimajaga de nia dailakoka, de lo niwigolo o Gikimoika la ngini asa niamoku niputuru o sangisara ḋangodu kiaka asa idadadi gena, sidago aku Ngohi o Nyawa ma Duhutuka nirisima.>>

8 Ai dodiao tinidododara, tanu ngini gena upa lo niawosa nakoso o Jou Gikimoika gena, kanaga o wange moi eko o taungu cala moi gena ka imaketero. 9 So upa nitemo sababu o Jou Yesus Kristus wahino waasi ma sinotoka, nagala o Jou Gikimoi wisimaha waasi de wosidatusi Awi jaji gena wosiganapu. Ngaroko kanaga o nyawa itemo komagena, duma ngini bilasu nianako cawali to Una Awi sabari nginika so Awi jaji gena wosiganapu waasi. Upa lo o nyawa moi bilasu isisa, duma wodupa o nyawa yangodu manga dorouno imatoba de imatoduba kasi.

10 Ngaroko Awi sabari komagena, duma igogou wahino gena maro o nyawa moi wototosi o putu itotongirabaka so ka inasitodokano, komagena lo ma wange wositotatapuka o Jou Yesus Kristus wahino kali gena ma orasi yaado, ma ngale o nyawa manga dorou wafanggali de o dorou. De o wange magenaka o dipaka done asa o kuguru ilalamo poise, de o bi moi-moi o dipaka asa isisa, de o bi moi-moi o kia bato gena ḋangodu-ngodu asa yatupu de yabodito, de lo o dunia manena de ma raba moi-moi yaaakaka lo ḋangodu asa de o uku isitupu la isisa.

11 Ma sababu o bi moi-moi ḋangodu magena igogou done isisa, so ngohi tongongano ngini bilasu nileleani nikaeli o Gikimoika de niodupa niaaka o bi moi-moi Una wodudupa bai! 12 Bilasu niaaka komagena, nakoso de nia ngongano ilalamo la niodamaha ma wange Una wositatapuka o Jou Yesus Kristus wahino kali, gena ma orasi yaado. Sababu o wange magegenaka o dipa asa yatupu so o bi moi-moi kagena yosibodito, de komagena lo o bi moi-moi o kia bato gena ḋangodu-ngodu asa yatupu sidago lo iuhi. 13 Ngaroko komagena, duma ngone aku pongongano gena igogou done kanaga o dipa ḋamomuane de lo o dunia ḋamomuane maro o Gikimoi wojajika, kagena ma rabaka o nyawa la manga sininga itotiai gena aku yogoge.

51 Nimasidodiahi! Ngohi asa ngini tinisingangasu o kia naga moi o nyawa yananako waasi de o orasi manena o Gikimoi kanaga wonasimane ngoneka. Done ma orasi o Jou Yesus wahino kali gena, ngone posone inangodu waasi, de ngaroko poohosi eko posoneka, duma inangoduka asa o rohe ḋamomuane pamake. 52 Magena asa inasitodokano idadi, ma deka gena maro nanga lako itawi ka ma moi, de ma orasi o dunia ma dodoguka o Gikimoi Awi trompet yawuwu. Sababu o trompet magena yawuwuka, de isosone asa yasioho kali de o rohe kiaka ibaka kawa, so aku ioho ka sidutu ikakali. De ngone la kanaga poohosi nanga rohe asa inatagali.

1 Kagena de asa ngohi takelelo he kanaga o soroga ḋamomuane moi de lo o dunia ḋamomuane moi. Sababu o soroga de o dunia iḋoḋoma gena ihiwaka, komagena lo o ngoloto. 2 De kanaga lo o kota moi de o bi dorou ḋatotorou moi lo ihiwaka so ḋatetebi, de takelelo gena o kota ḋamomuane moi, ena gena o Yerusalem asa iuti o sorogaku. Magena isidailako maro o ngopeḋeka moi mokakawi ma ngale ami roka gena o baju ḋaloloha-loha imihike la momasitiba. O kota magena o Gikimoi kagena o sorogaka de asa wosigutiku. 3 De lo asa toise o pareta ma kursino o ili ilalamo moi itemo, <<He! O Gikimoi Awi goge o orasi manena asa kanaga o nyawa manga sidongirabaka. Komagena so o nyawa ona magena asa yodadi to Una Awi nyawa de Una masirete lo asa wogoge dede ona, imatero maro to ona manga Gikimoi masirete. 4 So Una asa to ona manga sininga ma susa eko to ona manga o kongo gena, ḋangodu wapiki so wasisaka. De ona nagoona lo asa yosone kawa, yododora kawa, yoari kawa eko lo yasangisara kawa. Sababu o bi moi-moi iḋoḋoma ḋangodu asa isisaka.>>