14 አሳ ኡባስ ማርካ ግዳና መላ ፆሳ ካዎተ ዎንገላይ ቢታ ኡባን ኦደታና። ሄሳፈ ጉየ፥ ዉርሰይ ያና።

29 "ሄ ዎደ ሄ ዋየ ጋላሳታፐ ጉየ፥

ኤለስድ አዋይ ማና፥

አጌናይ ባ ፖኡዋ ድጋና።✝

ፆልንቶት ሳሎፐ ዎና፥

ቃስ ሳሎን ደእያ ዎልቃት ቡቀታና።

30 ሄ ዎደ አሳ ናኣ ዩሳ ማላይ ሳሉዋ ቦላ በንታና። ሳአን ደእያ አስ ኡባይ ዬካና። ቃስ አሳ ናአይ፥ ዎልቃራነ ግታ ቦንቹዋራ ሳሉዋ ሻራ ግዶራ ይሽን ኤንቲ በአና።✝ 31 እ ባ ኪታንቾታ ግታ ሞይዘ ፑኖራ ኪታና። ኤንቲ ሳኣ ኦይዱ ባጋ ብድ፥ ሀ ጋፃፐ ያ ጋፃ ጋካናዉ ደእያ እያዉ ዶረትዳይሳታ ሺሻና።

42 "ህዛ፥ ህንተ ጎዳይ አይ ጋላስ ያነኮ ህንተ ኤሮና ግሾ፥ ምንድ ናግተ። 43 ሽን ካይሶይ ቃማፈ አይ ሳተን ያነኮ ጎዳይ ኤርያኮ፥ ባ ኬይ ቦከቶና መላ ባርክድ ናጋናሽን።✝ 44 ሄሳዳካ፥ አሳ ናአይ ህንተ ቆፖና ሳተን ያና ግሾ፥ ህንተካ ጊግድ ደእተ።

20 ታኒ ህንተና ኪትዳባ ኡባ ኤንቲ ናጋና መላ ኤንታ ታማርስተ። ታኒ ዎድያ ዉርሰ ጋካናዉ ኡባ ዎደ ህንተራ ደአይስ" ያግስ።

32 "ሽን ሄ ጋላሳነ ሄ ሳትያ አዋ ፃላላፐ አትሽን፥ ሀር አቶሽን ሳሎን ደእያ ኪታንቾታ ግድን ዎይኮ ናኣ ግድን ኦንካ ኤረይ ባዋ።✝

1 ዉርሰ ጋላሳን ኡንኤያ ዎደይ ያናይሳ ኤራ። 2 አሳይ ባንታና ዶሰይሳታ፥ ሚሸ ሲቀይሳታ፥ ጬቀተይሳታ፥ ኦቶረይሳታ፥ ጫየይሳታ፥ ባንታና የልዳይሳታስ ኪተቶናይስታ፥ ጋላቶናይስታ፥ ጌሻተ ባይናይሳታ፥ 3 ሲቆይ ባይናይሳታ፥ ማሮተ ኤሮናይሳታ፥ ዝግረይሳታ፥ ባንታና ሃሮናይሳታ፥ ዎዛና ምኖታ፥ ሎኦ ዶሶናይሳታ፥ 4 ሞርኬስ አድ እመይሳታ፥ ቆፍ ባይናይሳታ፥ ኦቶሮን ሱገተይሳታ፥ ፆሳፈ አድ አሾ ኡፋይሳናዉ ዶሰይሳታ ግዳና። 5 ኤንቲ አማንያ ዳኖሶናፐ አትሽን፥ አማኖ ዎልቃ ካዶሶና፤ ኔኒ ሄሳ መላ አሳታፐ ባቃታ።

17 " ‘ፆሳይ፥ ዎድያ ዉርሰን ሀይሳዳ ሀናና ያጌስ፦

ታኒ አሳ ኡባ ቦላ ታ አያና ጉሳና።

ህንተ አደ ናይትነ ማጫ ናይት፥

ትንብተ ኦዳና።

ህንተ ያላጋት ቆንጨ በአና፤

ህንተ ጭማት አሙሆ አሙሀና።✝

18 ሄ ጋላሳታን ታና አማንያ አደ አይለታ ቦላነ ማጫ አይለታ ቦላ

ታኒ ታ አያና ጉሳና፤

ኤንቲ ትንብተ ኦዳና።

19 ቃስ ታኒ ቦላ ሳሎን ኦራባ፥

ጋርሳ ሳአንካ ማላ በሳና።

ሱይ፥ ታማይነ ዎልቃማ ጫጋናይ በንታና።

20 ግታነ ቦንቾ ግድዳ ጎዳ ጋላሳይ

ጋካናፐ ስን አው ማና፤

አጌን ሱ ዳናና።

21 ሄ ዎደ ሄሳዳ ሀናና፤

ጎዳ ሱን ፄግያ ኦንካ አታና’ ያግስ።

28 ህዛፐ ጉየ ሀይሳዳ ሀናና፤

ታኒ አሳ ኡባ ቦላ ታ አያና ጉሳና።

ህንተ አደ ናይትነ ማጫ ናይት ትንብተ ኦዳና፤

ህንተ ጭማት አሙሆ አሙሀና፤

ህንተ ናአተት ቆንጨ በአና።

29 ሄ ጋላሳታን ታ አደ አይለልታ ቦላነ

ታ ማጫ አይለታ ቦላ ታ አያና ጉሳና።

1 "ሄ ዎደ ነ አሳ ናግያ ግታ ሀላቃይ፥ ምካኤል ደንዳና። ካዎተ መትዳ ዎድያፐ ዶምድ፥ ሀን ኤሮና መቶ ዎደይ ያና። ግዶሽን፥ ኤንታ ሱንይ ፆሳ ማፃፋን ፃፈትዳ ነ አሳ ኡባይ ሄ ዎደ አታና።✝ 2 ሀይቅዳ አሳፐ ዳሮት ደንዳና። ኤንታፈ ባጋት መርና ደኦስ፥ ባጋት ቃስ ዬላስነ መርና ካዉሻስ ደንዳና።✝ 3 ጭንጫት ሳሎ ፖኦዳ ቃስ ዳሮታ ፅሎተ ኦገ ካለይሳት መርናዉ ፆልንቶዳ ፖአና።

15 ጎዳይ ኑስ ኦድዳይሳዳ ጎዳይ ያ ጋላስ እያራ ጋሄታናዉ ኑኒ ፓፃ ደኤይሳት፥ ሀይቅዳይሳታፐ ስንቶኮ። 16 ጎዳይ ዎልቃማ ኪታራ፥ ኪታንቾታ ሀላቃ ግርሳራ፥ ፆሳ ሞይዘ ፑኖራ፥ ሳሎፐ ዎና። ክርስቶሳ አማንድ ሀይቅዳይሳት ኮይሮትድ ሀይቆፐ ደንዳና። 17 ሄሳፈ ጉየ፥ ሄ ዎደ ኑኒ ፓፃ ደኤይሳት፥ ጎዳራ ሻራን ጋሄታናዉ ኤንታራ እስፈ ሳሎ ኤከታና። ሄሳፈ ጉየ፥ ኑኒ ጎዳራ እስፈ መርናዉ ዳና። 18 ሄሳ ግሾ፥ ሀ ቃላን እሶይ እሱዋ ምንተ።

6 ሄሳ ግሾ፥ ኑኒ ሀራት ስከይሳዳ ስካናዉ በሰና፤ ኑኒ ባርካናዉነ ጊግድ ዳናዉ በሴስ። 7 ስከይሳት ቃማ ስኮሶና፤ ማተይሳት ቃማ ማቶሶና። 8 ሽን ኑኒ ጋላሳ አስ ግድያ ግሾ ጊግድ ዳናዉ በሴስ። አማኖነ ሲቆ ፁሩረዳ ትራን ማእድ፥ አቶተ ኡፋይሳ ሁጰን ዎያ ኦላ ብራታ ባርኔፃዳ ዎድ ዳናዉ በሴስ።✝ 9 ፆሳይ ኑና ኑ ጎዳ የሱስ ክርስቶሳ ባጋራ ኩመ አቶተ ኤካና መላ ዶርስፐ አትሽን፥ ሀንቆስ ዶርቤና።

34 "ህዛ፥ ስ ባይና ደኦን፥ ኡሻ ዳሮንነ ዱሳባስ ኡንኤተን ህንተ ዎዛናይ ኦይከቶና መላነ ሄ ቃማይ አኬኮና ፅሄዳ ህንተ ቦላ ጋኮና መላ ናገትተ። 35 ሄ ቃማይ ቢታ ኩመን ደእያ ኡባ ቦላ ጋካና። 36 ሄሳ ግሾ፥ ያ ኢታፐ አታናዉነ አሳ ናአ ስንን ኤቃናዉ ዳንዳአና መላ ኡባ ዎደ ምንድ ዎስተ" ያግስ።

8 ሽን ታ ሲቆ እሻቶ፥ ሀ እስባ ዶጎፕተ። ጎዳ ማታን እስ ጋላስ ሙኩሉ ላይ መላ ግደይሳነ ሙኩሉ ላይ እስ ጋላሳ መላ ግደይሳ ዶጎፕተ።✝ 9 እሶት እሶት ጋምእስ ግድ ቆፐይሳዳ፥ ጎዳይ ባ ኡፋይሳ ቃላ ግሾ ጋምኤና። ሽን ኦንካ ዮና መላ ኮይድ፥ ኡባይ ባንታ ናጋራፐ ስማና መላ ህንተ ግሾ ግድ ገንጬስ።

10 ሽን ጎዳ ጋላሳይ ካይሶዳ ያና። ሄ ጋላሳን ሳሎት ዎልቃማ ጉንን ያና፤ ሳሎ መተት ታማን ፁገታና፤ ሳእነ እያ ቦላ ደእያ ኡባይ ያና።✝ 11 ህዛ፥ ኡባባይ ሄሳዳ ሀንዳ ይያባ ግድኮ ህንተ አይ መላ አስ ግዳናዉ በሲ? ህንተ ጌሽነ ፆሳ ዳንያ ደኦ ዳናዉ በሴስ። 12 ህንተ ስንራ ያ ፆሳ ጋላሳ ናግሸ ህንተዉ ዳንዳኤትያባ ኡባ ኦድ ሄ ጋላሳ ኤሶይተ። ሄ ጋላስ ሳሎትነ እያን ደእያባይ ታማን ፁገታና፤ ዎልቃማ ሱላን ትልአና። 13 ሽን ኑኒ ፅሎተ ሃርያ ኦራ ሳሎነ ኦራ ሳአ ፆሳ ኡፋይሳ ቃላዳ ናጎስ።✝

51 ታ ህንተዉ እስ ፁራ ኦዳና። ኑ ኡባይ ሀይቆኮ፥ ሽን ዉርሰን ኡባይ ላመታና። 52 ሞይዘይ ፑነትያ ዎደ፥ አይፈይ ቅጵ ፄላናዉ ሀሳዮና ላመታና። ሀይቅዳ አሳይ ዎቆና አስ ግድድ ደንዳና፤ ኑካ ላመታና።✝

17 "ሄኮ፥ ታኒ ኦራ ሳሎታነ

ኦራ ሳአ መና፤

ካሰባ ኡባይ ሀሳየተና፤ ቆፈተና።

18 ሽን ታኒ መያባን

መርናዉ ኡፋይትተነ ሀሹ ጊተ።

ታኒ የሩሳላመ ኡፋይሳስነ

እ አሳካ ጋላታን ኩምዳይሳታ ኦዳ መና።

19 ታኒ የሩሳላመን ኡፋይታና፤

ታ አሳን ሀሹ ጋና።

ህዛፐ ጉየ ዬሆይነ

ኡንአ ዋሶይ ያን ስኤተና።

1 "ሄኮ፥ ጮጨ ታማዳ ኤፅያ ጋላስ ያና፤ ኦቶራንቾትነ ኢታ ኦይሳት ኡባይ ቡረ መላ ግዳና። ሄ ያ ጋላሳይ ኤንታ ፁጋና፤ ኤንታዉ ፃጶነ ፄራ አሸና" ያጌስ ኡባፈ ዎልቃማ ጎዳይ።

2 ሽን "ህንተዉ፥ ታ ሱንስ ያየይሳታስ፥ ፅሎተ አው ባ ቀፈ ጋርሳን ፓፆተ ኤክድ ከያና። ህንተ ቃሾፐ የደትዳ ኮኦ ጋሎዳ ጉፓና።

1 ታኒ ኦራ ሳሎነ ኦራ ሳአ በአስ። ኮይሮ ሳሎይነ ኮይሮ ሳእ ይስ፤ አባይካ ይስ።✝ 2 ጌሻ ካታምያ፥ ኦራ የሩሳላመይ፥ አዝና ገላናዉ አሌቀታዳ ጊጋዳ ደእያ ማጫሳዳ ሳሎፐ ፆሳ ማታፐ ዱገ ዎሽን በአስ።✝

3 አራታፐ ሀይሳዳ ያግድ፥ ኦድያ ግታ ቃላ ስአስ፤ "ፆሳ ኬይ አሳራ ደኤስ፤ ፆሳይ ባ ቦንቹዋራ አሳራ እስፈ ዳና። ኤንቲ እያ ደረ ግዳና፤ ፆሳይ ባ ሁጰን ኤንታራ ዳና፤ እ ኤንታ ፆሳ ግዳና።✝ 4 ፆሳይ ኤንታ አይፈፐ አፉ ኡባ ቁቻና። ህዛፐ ሀይቆይ ዎይኮ ካዮይ ዎይኮ ዋሶይ ዎይኮ ዋየይ ዴና። ጋልአይ ኡባይ አስ" ያግስ።✝