14 Na kimambukizo king’hali hakinavika, Mbuli Inogile ya Undewa yopetigwa kwa wanhu wa kabila zose iwe usindila kwa isi zose.

29 "Gahamala magayo ga siku azo, zuwa dokuwa ziza, mbalamwezi honda imwemwese bule, nhondo zolagala kulawa kuulanga, na vinhu vili kuulanga votigisika. 30 Abaho kilaguso cha Mwana wa Munhu cholawilila kuulanga, wanhu wa mwiisi yose olila vonda wamone Mwana wa Munhu kokwiza mna gamawingu ga kuulanga kwa nguvu na ukulu. 31 Mhalati yotoigwa, na kowatuma wasenga zake wa kuulanga mna izibanzi nne za mwiisi, nao oweka hamoja wanhu zake yawasagule kulawa mwambu uno wa isi na uyagwe.

42 "Avo muiteganye, kwavija hamuijuwile siku ya kwiza Mndewa wenu. 43 Lakini mujuwe vino, maza mwene ng’anda yahaijuwile siku ya kwiza mbavi, yahakalile meso na sambi yamuleke mbavi yaitule ng’anda yake. 44 Avo, muitande siku zose, kwavija Mwana wa Munhu kokwiza mna isaa hamuigesile bule.

20 na muwafundize wagoge kila kinhu kiniwalagizeni, na niye nokuwa hamoja na mweye siku zose mbaka kukimambukizo cha isi."

32 "Kuduhu yaijuwile siku hebu saa ya kwiza, siyo wasenga wa kuulanga wala Mwana, lakini Tata yaiyeka ayo yaijuwile.

1 Kumbuka kuwa mna zisiku za kimambukizo kokuwa na magayo makulu. 2 Wanhu okuwa na gahigahi, okuwa na magoda, oitapa, ozinogela sente, omuliga Imulungu, honda wawategeleze tata zao na mama zao, wabule asente, hawamgesa Imulungu. 3 Wanhu hawanogela wayagwe, wanhu hawalonda kuilumba, wanhu owalonga wayagwe vihile, wanhu watatali, wanhu wakali, wanhu hawalonda ganogile. 4 Wanhu oihinduka, wanhu otenda mbuli bila kugesa, wanhu omema bezi, wanhu ounogela ugima uno kubanza kumnogela Imulungu. 5 Kwa kunze okoneka kamba omtambikila Imulungu, lakini oulema udahi wake. Muinege na wanhu kamba awo.

17 Imulungu kolonga, ‘Vino vivo vondanhende mna isiku ya uhelelo,

Nomgidila kila munhu Loho yangu.

Wanenu wa kimbigalo na wa kitwanzi olagula mbuli zangu,

wabwanga zenu olagusiligwa vinhu na Imulungu,

wavele wenu olota nzozi.

18 Ona, hata wasang’hanaji zangu wose wa kitwanzi na wa kimbigalo,

nowagidila Loho yangu mna izisiku azo,

na wao olagula.

19 Notenda unzonza kuulanga

na vilaguso mwiisi.

Hokuwa na damu, moto na yosi,

20 Zuwa dogeligwa ziza,

mbalamwezi yokuwa dung’hu kamba damu,

ing’hali hainavika siku ija ng’hulu ya kwiza kwa Mndewa.

21 Abaho, munhu yoyose yompula Mndewa kwa kutazigwa kokomboligwa.’ "

15 Dino dituwalongeleni ni fundizo da Mndewa, siye tuli wagima mbaka vonda yeze Mndewa, honda tuwalongolele waja wafile. 16 Avo sauti ng’hulu yolagiza na sauti ya msenga mkulu wa kuulanga na sauti ya mhalati ya Imulungu, nayo Mndewa mwenyego kohumuluka kulawa kuulanga. Baho waja wafile wang’hali omtogola Kilisito osonga kuzilibuligwa, 17 abaho siye tuli wagima kipindi acho tokwikigwa hamoja nao mna gamawingu kuiting’hana na Mndewa kuulanga. Avo siku zose tokala hamoja na Mndewa. 18 Avo muigangamize mmizoyo yenu kwa mbuli zino.

6 Avo sikutuwase utulo kamba wanhu wayagwe, tukale meso na tuiteganye. 7 Wanhu owasa ikilo, na walevi okoligwa ikilo. 8 Lakini siye twa wanhu wa imisi, na tuiteganye. Tuvale kutamanila na unogelwa kamba kiwalo cha zuma cha kukimila mhambaga na tamanilo jetu da kuwa tokomboligwa kamba kofiya da zuma. 9 Kwavija Imulungu hatusagule yatubanange kwa ng’hasiliki yake, ila tuupate ukombola kubitila Mndewa wetu Yesu Kilisito,

34 "Iteganyeni! Mizoyo yenu sikuigogigwe na unovu wa mwiisi ino, kukoligwa, na kugaya mbuli ya ugima uno, kwavija siku ayo yowasinhusa 35 kamba mtego. Kwavija yowezila wanhu wose okala kila hanhu mwiisi. 36 Muiteganye na mupule siku zose, ili mudahe kuhonyeka mna zimbuli zose zino zondazilawilile na kwima haulongozi wa Mwana wa Munhu."

8 Ndugu zangu, sikumuisemwe kinhu kino, mgameso ga Mndewa siku dimoja sawa na miyaka magana longo, na miyaka magana longo sawa na siku dimoja. 9 Mndewa hakawa bule kutenda gaja gayawalongele kamba wanhu wayagwe viwogesa kokawa. Heyo kofunga umoyo mbuli yenu, kwavija halonda munhu yoyose yabanangigwe, lakini kolonda kila munhu yaleke nzambi zake.

10 Siku ya Mndewa yokwiza kamba mbavi. Siku dijo ulanga osegesigwa kwa mtigisiko mkulu, vinhu vose vili mumo haviwa baho kabili, nayo isi yosegesigwa hamoja na kila kinhu kili mgati yake. 11 Kwavija kila kinhu chonangigwa, avo mweye molondigwa muwe wanhu gani? Molondigwa mukale kwa kung’ala na kumtegeleza Imulungu, 12 kipindi vimuibeta siku ya Imulungu na kuitenda ize himahima. Siku dijo ulanga olukuzigwa kwa moto, na vinhu vose vili mumo volumbuka kwa vuke. 13 Lakini siye tobetela kija kiyalongile Imulungu, kupata ulanga na isi ya sambi, kae ya wanhu otenda goyolonda Imulungu.

51 Tegelezeni, nowalongeleni mbuli ifisigwe. Wose hatufa bule, lakini wose togaluka. 52 Yolawilila kwa kusinhukiza, himahima kubanza siso vidibwenza. Mhalati ya ikimambukizo yahalila, wanhu wafile ozilibuka, wose togaluka, avo hatufa kabili.

1 Abaho nyona ulanga wa sambi na isi ya sambi. Ulanga wa ichanduso na isi ya ichanduso vikala visegele, nayo bahali haikalile kuko kabili. 2 Nyona buga ding’alile, Yelusalemu ya sambi, dihumuluka kulawa kuulanga. Dikala ditandigwe vinogile kamba mtwanzi yosoligwa viyohambigwa yakaiting’hane na mkasano wake. 3 Abaho mhulika sauti ng’hulu kulawa kukigoda cha undewa, "Sambi kae ya Imulungu ya hamoja na wanhu! Kokala nao, na hewo okuwa wanhu zake. Imulungu mwenyego kokuwa nao. Nayo kokuwa Imulungu wao. 4 Nayo kowahangusa mahozi gao gose. Ifa honda iwe kuko kabili hebu kunyunyuwala hebu kulila hebu usungu. Kwavija mbuli za umwaka zibita."