14 Ko na nongoro jongana api, isa na veveina na binangara tana Tamasa, sa mina tatarae pa kasia gusu doruna ko ira doru tinoni karovodi mai nongoria. Pa liguna tu isa sa mina lame sa na vinabebetona na totoso,>> sau si Jisu.

29 <<Mina jola sa na tapata pa rane ira,

sa kode mina rodomo sa na tapo,

na popu minake kabere,

na seru pa noka mai vukele,

beto doru sakasava pa noka mai tajou vakanoko beto.✝

30 Beto mina tabata votu lame pa vavagalo eqa sa na vinagigilana na Tuna na Tinoni. Beto sa mai lukana tadungana beto sira doru tinoni pa kasia gusu totonai mai batia na lamena na Tuna na Tinoni pa lei pa noka, mina lame tavitia na neqi lavatana beto na kabere lavatana. 31 Mina taivu vavaqoro viva sa na kuvili, beto mina garunu laoniria isa sira na ona mateana pa doru eqa pa kasia ababana, ko mai toni vaikamuniria na ona tinoni taviledi pa doru uququdi na kasia gusu.

42 Ko sa vei sa mu suvere gegele, ura quke gigilai agou sa na rane mina lame na miu Bangara. 43 Qu gigila vataleamiu agou sa vei bi tei gigila momoeona tu na tinoni poreona ruma sa ai totoso mina kamu na tinoni ikiko, sa kode mina suvere gegele ko minake boka pururu tomeia na tinoni ikikona sa nona ruma. 44 Ko sa vei sa agou mu kole suvere vanaqiti doru totoso, ura na Tuna na Tinoni sa mina lame na totoso quke rove veinia mina lame,>> sau si Jisu.

20 Beto ko muna vaivagigalainiria ko mai vataberia sira doru sakasava qa garununigou ara. Beto ko ara sa mana vavaburogou doru totoso, tinganai mina kamua na vinabetona na totoso,>> sau si Jisu.

32 <<Goto na veveina na rane babi na totoso isa sa kepore kai tinoni sa gigilai. Ira na mateana ba qaike gigilai, na Tuna ba sake gigilai tugu. Mekana gu na Tamana sa gigilai.

1 Mu vakoinonoa sapi: pa rane bebetodi sa kode mai lame sira na totoso tapatadi. 2 Ura ira na tinoni sa kode mai roroqu muleniria mekadi, mai gagale bulo poata, mai paranga valalavatai, mai valavata muleniria mekadi, mai vaipoja vivikere, maike vasotoria na tinadi na tamadi, mai daidia paranga jongana, beto maike toania na toa madina. 3 Kode na bulodi mina kokobania na vairoqu, mai puku tutia na dia kokora, mai poja vivikere tinoni, maike aru mulenia na dia toa ikikeredi, mina vapiruria na toa kokora, beto mai kanai na jongana. 4 Kode mai vaijuju lao pa tapata, mai nenekenia na roiti sake jonga, mai vapugeleniria na roqu muleniria mekadi, beto mai roqua na qeqera vailea jolania mai roqua na Tamasa. 5 Kode mai popokonia pa peguruna ira sa na pangagana na Tamasa, ba qai kilu palea tu ira sa na neqi tana. Mu balauniria sira na tinoni vevei aipira.

17 <Ego pira mina vei sa pa rane liligu,

sau sa na Tamasa:

Mana vakijara tariniria ira doru tinoni na qua Gagala.

Ko mai ule votunia ira na tumiu marene

beto na tumiu rereko sa na qua nongoro.

Ira na sae korega sa mai bati dodogoro,

beto ira na miu babaragoso sa mai putagitaria na putagita.

18 Ko na rane ira sa ira na qua nabulu marene na qua nabulu rereko

ba mana vakijara tariniria tugu na qua Gagala.

Ko ira ba mai ule votunia tugu na qua nongoro.

19 Kode mana roitiniria na sakasava vaivagabaradi pa noka vavagalo

beto na vinagigila neqidi pa peso api,

na orungu, na iku beto na rovu nune tula.

20 Na tapo sa mina rodomo

beto na popu sa mina jimiri orungu,

totonai mina oqoro lame sa na rane lavata tana Bangara.

21 Ba ira doru qai kiu alili lao tana Bangara sa mai taalo! sau sa na Tamasa,>✝ sau si Joili.

15 Ura na vaivagigalai tana Bangara sa qe korapa ule vanigou alepi: gita taqe korapa toaoda tonai mina mule lame na Bangara sa tanake lao momoeniria sira qai tei mate tu. 16 Tonai sa mina tanongoro sa na kuku lavata, na ovovelena na bangaradi ira na mateana, na vaqorona na kuvili tana Tamasa, beto sa na Bangara mekana mina lagere vei pa noka beto ira na tinoni qai vasosotoa na Karisito ba qai tei mate tu sa mai turu mule momoe. 17 Beto poni sa gita taqe korapa toaoda ko taqe korapa suvere sa tana tasaputu sae tavitiria ira pa vavagalo eqa ko tana gosoria gita sa na Bangara. Ko doru totoso tana mekarai suvere tavitia gita sa na Bangara. 18 Ko sa vei sa, mu mekarai vaiparanga vaneqiniria sa na paranga aipira.

6 Ko sa vei sa, gita take puta vei qai vei ira goto qaike vasosoto, goto ta suvere gegele beto ta suvere tavagigala tu. 7 Ura ira na tinoni qai puta sa na bongi tu qai puta beto ira na tinoni qai bubuku sa na bongi tu qai bubuku. 8 Goto gita sa na tinoni tana rane ko ta suvere tavagigala, ta popokonigita vei na poko suqutu sa na rarange beto na vairoqu, beto ta soba veinigita na tarapae vaipera sa na oda vera gegelena na inaalo tana tekua vuka risa. 9 Ura na Tamasa sake udukunigita sa gita ko tana gosoria gita sa na ona kokora goto vei ko tana isongia tu gita sa na inaalo tana oda Bangara i Jisu Karisito,

34 <<Mu kopu mulenigou, ko na roqumiu muke vamamatania na toa goborona, na juno bubuku, beto na takulanganiria na sakasava tana toa pa peso, ura kita mi vasiborogou na lame tana rane isa. 35 Ura na rane isa sa kode mina lame vasiboro veiniria na sipata sira doru tinoni qai suvere pa doruna na gugusu pa peso. 36 Ba agou mu suvere kopu beto mu vavara doru totoso, ko muna boka varene sagou totonai muna tome laoria agou sira na ginugua pira beto ko muna boka turu varene pa moena na Tuna na Tinoni,>> sau si Jisu.

8 Ba muke roqu mumania agou sa kai sava api, ka visa baere jonga. Pana tana Bangara sa na kakasana na totoso sa sa kepore veveina. Pana tana Bangara kai rane sa sa vei kai tina aoro beto kai tina aoro sa sa vei kai rane gu. 9 Na Bangara sake korapa vavabonginia sa na vagore votuna na ona taringunguti vei qai rorove veinia sa vei qarigu ira kaki tinoni. Goto isa sa korapa mavo veranigou gu sagou ura sake nyoroguania isa sa kai tinoni bi mate. Ba ira doru tinoni sa sa nyoroguaniria isa ko mai gabala loa pale na dia sela. 10 Ba mina lame vasiboro vei kai tinoni ikikona sa na rane mule lame tana Bangara. Pana rane isa na oka mina mumuri tonai mina tanongoro sa na ovangana na qalalana na iku. Beto ko na sakasava pana oka mai tavurungu ko mai tapiara pale pana iku, beto na kasia abana beto doru sakasava qai taroiti pa korapana sa mai mumuri manyao betodia.

11 Ego qu tei nongoria tu agou sa kode doru sakasava sa mai tapiara vei inara, ko sa vei sa qu gigilaimiu ai muna toa goto vei sa agou. Mu toania na uana liosona beto na pangagana na Tamasa 12 totonai qu korapa verania sa na rane tana Tamasa ko mu vasisiqaraia na lamena na rane isa. Pana rane isa sa mina taqalala ko mina vurungia na iku sa na oka ko doru kai sava sa mai nyoro maragutu betodia. 13 Ba gita sa taqe korapa verania isa sa taringunguti vakole vanigita na Tamasa. Sa taringunguti vakole vanigita isa sa na oka koregana beto na kasia abana koregana, ketakoi sa kole na tuvisi tana Tamasa.

51 Mu vainongoro lame ko! Ma pojanigou sa na sosoto sa kole golomona api: gita sa tanake mate beto, goto tana tabei beto, 52 pana leona iapeki peki totoso vei kai vakipu mata, tonai mina vaqoro sa na kuvili bebetona. Ura tonai mina vaqoro sa na kuvili bebetona, poni sa mai tavaturu mule sira na tinoni matedi ko maike boka mate ligu, beto sa gita tana tabei.

1 Beto qa batia sa na oka koregana beto na peso koregana. Ura sa tei maragutuona tu sa na oka momoena beto na peso momoena, beto na ivere ba sa maragutuona tu. 2 Beto qa batia sa na gugusu madina, isa na Jerusalema koregana, sa korapa votu lagere vei tana Tamasa pa noka. Ko sa tei tavasari vatanana tu, ko sa babata jonga jola vei na rereko sa tavatana ko mina alavia sa na marene mina tekua. 3 Qa nongoria mule sa kai ovovele lavata sa lame vei pana totoqona bangara, pira sau, <<Vainongoro, na susuverena tana Tamasa sa sa kole tavitiria ira na tinoni! Ko isa mina suvere tavitiria beto ira sa mai ona tinoni isa. Na Tamasa mekana mina suvere tavitiria ko mina dia Tamasa. 4 Mina nyunyu paleria sira na oni matadi. Na mate mina kepore sa totonai, beto vei tugu na takulanga, na lukana, beto na vitigi. Ura na sakasa leludi sa qai tei mumuri tu,>> sau.