14 Muthzimbu Ouwa o Kutumina kwa Nyambi kenge wa ku hongiwa mu kaye kokahe ci ikare ombangi kwanu o mishovo thzothzihe, mbeci kwa ku keye mahurerero o kaye.

29 "Popa a ku pwa ao mayuwa o makando, diyuwa kenge dya kwiraura, ngonda ka thza kwikara no mwethzi, matungwethzi kenge a ku wa ku wiru, karo yoshokoro yo mu wiruwiru kenge ya ku ngangama.

30 "Ngou honi athso thsimonithso thso kukeya kwa Mwana Munu thsa ku monahara mu wiru. Mishovo thzothzihe thzo kaye kenge thza ku dira, karo kenge a ku cimonena Mwana Munu o ku keya mu mavui o diwiru kokoro no kutethzima kokukuru. 31 Kenge a ku tuma tungeru twenthzi, karo kenge kwa ku dira muvumo oukuru o torombita. Kenge twa ku paka pofoci awa na a hangura mu mambango ane o kaye, ku tatekera ku matatekero o diwiru shime ku ka kuma ku mamaneneno adyo.

42 "Mu mamere, inene ka mu dimukire diyuwa edi a ku keya Fumu wenu. 43 Mu dimuke ci nga thsinda thsa nthzio aa dimukanga thsikati ethsi a keya mwithzi, nga aa kuñweranga ku nyunga nthzio thzenthzi karo tumba nga a tanekera nthzio thzenthzi o ku thzi tuviwa. 44 Namwe mwikare o ku mu na ciroithsera thsikati thsothsihe, inene Mwana Munu kenge a ku keya thsikati ethsi mu na kana ku taterera.

20 Mu ka wa rongithse ku hengeka yoihe eyi na ni mi raerera. Mu dimuke ci kenge nikaranga nenu mayuwa oahe shime ku ka kuma ku mamaneneno o kaye."

32 "Kwithsa oyu na dimuka edyo diyuwa nji ethso thsikati, shaanga tungeru to mu wiru, shaanga Mwana, shime Tata pohuma yofoci yo na i dimuka.

1 Uno honi o dimuke kenge ci: Kenge kwa kwikara ekati yoikaru nene mu mayuwa o mahurerero. 2 Anu kenge a ku cishima awo athsinda pohuma, kenge mba shima nene madi, kenge mba cishangara, kenge mba cinuneka, kenge mba yengwera Nyambi, kenge mba shwahura ashemi wo, kenge mba pira okanderero, karo mbera kekara owakenu. 3 Mbera ka shimi amweya, mbera ka tetera amweya, kenge mbepithsa amweya mathzina, kenge mbekara no ruthziho, kenge mbekara no ñore, kenge mba thzimba yoiwa. 4 Kenge mba omba ambusho, kenge mbekara mangurunde, kenge mbekara o mununa nene, karo kenge mba shima nene ecikora kupita ku shima Nyambi. 5 Kenge mba monahara eci a di no mwoyo o thsitawo, unone kenge mba kana okoro wao. O tunde kwanu o kengeyo.

17 ‘Nyambi aa amba ci, Mu mayuwa o mahurerero,

kenge mbo ni pa kongi Mupepo wange kwanu wahe.

Anenu wakwerumeana na mbuyamaana kenge mbokethza,

mishumba thzenu kenge mba mona emona,

akuru wakwerumenu kenge mba rota erota.

18 Mwao mayuwa ao kenge mbo ni pa kongi Mupepo wange,

kwapikange wakwerume nambuyama,

mweyo, kenge mbokethza.

19 Kenge mbo ni kwama ekomokithsa ku wiru mu diwiru,

nemonithso mu kaye pano pashi,

onyinga, mudiro no thsimemba thso mwithse kenge mbo ikarako.

20 Diyuwa kenge mbo di nyora,

ngonda kenge mbo thzi kiha eci onyinga,

o ku di shime ku keya edyo diyuwa dyoshokuru dyo kutethzima dya Fumu.

21 Munu yomuhe o kwithsa

pa dithzina dya Fumu, kenge mba a yoyithsiwa.’✝

15 Kokuthza ko maywi enthzi aye thsinda Fumu, twaa mi tongwera ci atwe twa ku yoya, atwe twa ku thsiarera shime ku ka kuma pa kukeya kwa Fumu, kadi cingwa yatwe twa ku tanga ku ka ciwana nenthzi ku thsia afu. 16 Inene Fumu aye thsinda kenge a ku keya ku tunderera ku wiru ko kakumbo ko ku raerera, ko diywi dyo mukuru o tungeru, no muvumo o torombita thza Nyambi. Awa fire o kwa na tawa kwa Krisitu wodiyo a kutanga ku pinduka kwafu. 17 Munyima thzeyo, atwe twa ku yoya mwethso thsikati, atwe twa ku thsiara pa kaye kenge twa ku humburiwa pofocino ku twariwa mu mavui ku ka ciwana na Fumu mu wiruwiru. Kenge twa ku kekara na Fumu diyere. 18 Mweyo, mu citanarithse micima kao maywi.

6 Mweyo, ka tu roerire ku cipitura eci amweya awa di pa turo, uno honi tu kothsoroke no ku cihenga. 7 Inene awa a rara aa raranga othsiku, nakwakupenda warwa aa pendanga othsiku. 8 Uno honi atwe po twakwa mutenya twaa roera ku cihenga. Karo twaa roera ku vata thsitawo no thsishimo eci thsicandekithso thso pa mbando thza dishwarare, nokurupero wetu o kuyoyithsiwa wikare eci thsikoko.

9 Nyambi ka a tu hangwerire humbithso thzoanthzi wenthzi, unone aa tu hangwera ci twa ku yoyithsiwe, ko ku cikwathsithsa Fumu wetu Yesu Krisitu.

34 "Mu mamere micima thzenu ci katere thzi anekere pohuma yedika no mawarwa necoyoka yo mwoyo, ci edi diyuwa katere dya ku mi wane ko thsiundumukera. 35 Inene edi diyuwa kenge dya ku wera anu o kano kaye eci thsimbande. 36 Mu taterere o ku mu rombera thsikati thsothsihe ci mwa ku wane okoro o ku para kweyi ya ku keya yoihe no ku kemana pa rupara rwa Mwana Munu."

8 Unone ashimiwa ange, mwa vurama ci kwa Fumu diyuwa dyofoci dyaa cipitura eci myaka thzo kakore kofoci (1,000), karo myaka thzo kakore kofoci (1,000) thzaa cipitura eci diyuwa dyofoci. 9 Fumu ka a katapithsire eyi a kumbwethzire, eci edi a anekera amweya ci aa katapa. Unone aa mi tenda ko ku kwata mucima, inene ka a fotire ci ku nonge shaanga munu yofoci. Aye aa fota ci anu wahe a cere. 10 Diyuwa dya Fumu kenge dya ku keya eci mwithzi. Mwedyo diyuwa diwiru kenge dya ku pwa ko muvumo oukuru o ku yapithsa, o ku pitura eci mushika o mvura. Yo ku wiru yoihe kenge ya ku ñotoka ku mudiro, kaye neyi i dimo yoihe kenge ya kwipa.

11 Pakuninga ci enu yoihe kenge ya kwipithsiwa kenge ne, mwaa roera kwikara anu o ngepi? Mwaa roera ku yoya mwoyo oukenu no mwoyo o thsitawo, 12 uno mu taterera diyuwa dya Nyambi no ku yokororithsa kukeya kwadyo. Inene mwedyo diyuwa diwiru kenge dya ku tumekiwa, enu yo mu wiru kenge ya ku nyongoroka ku kupya. 13 Unone kokuthza ko thsikumbwethzo thsenthzi, twaa taterera diwiru dyodipe no kaye kokape, omu kwa tunga owawa.

51 Uno honi ni mi tongwere diano. Ka twa ku fa twahe, unone twahe kenge twa ku piruriwa. 52 Kenge ya ku tendahara mu thsikati thsothsipu eci kucikopa ko dithziho, apa thza ku shikiwa torombita thzo mahurerero. Inene torombita ou thza ku dira, awa na fu kenge a ku pinduriwa a ku yoye diyere. Atwe tu yoya kenge twa ku piruriwa.

1 Ngou na monine diwiru dyodipe no kaye kokape, inene diwiru dyo kutanga no kaye ko kutanga ya pwire, karo ka kwekarire karo diwate. 2 Na monine Thsikuña Thsoshokenu, aye Yerusalema omupe, o ku shurumuka ku tunda mu wiru kwa Nyambi, o ku na roithsiwa nawa no ku yengiwera munuwenthzi eci mwenga.

3 Na yuvire diywi dyodikuru ku tunderera ku ngunja ci: "O mone, ndau omu a tunga Nyambi mu kaci kanuenthzi thzi di honi, karo kenge a ku yoyano. Kenge a kwikarano, karo kenge a kwikara anuenthzi, karo aye Nyambi kenge a kwikara Nyambi wo. 4 Kenge a ku porora mihothzi thzothzihe ku meho o. Ka kwa kwikara kufa nji thsidiro nji kudira nji kukora, inene enu yo kare i na pu."